ئه‌ڤرۆ نیوز:
رێككه‌فتنا د ناڤبه‌را بزاڤا گۆڕان و ئێكه‌تیا نیشتمانیا كوردستان ئيرو هاته ئیمزاكرن، د په‌یڤه‌كێ دا كوسره‌ل ره‌سول جێگرێ سكرتێرێ گشتى یێ ئێكه‌تیێ ئاماژه ب وێ یه‌كێ كر كو ئه‌و هیڤیخوازن ئه‌ڤ رێككه‌فتنه ببیته ئه‌گه‌رێ ئێك ده‌نگیا كوردان و بناغێ دیموكراسیێ ل هه‌رێمێ.
كوسره‌ت ره‌سول سوپاسیا سه‌رۆك بارزانى كر كو وه‌ك پێشمه‌رگه‌یه‌ك رۆله‌كێ مه‌زن دیتى یه د شه‌رێ داعشدا و پاراستنا ئاخا كوردستانێ.
نه‌وشیروان مسته‌فا رێكخه‌رێ گشتى یێ بزاڤا گۆران د په‌یڤه‌كێ دا ئاماژه ب وێ یه‌كێ كر كو ئه‌ڤ رێككه‌فتنه بۆ چه‌سپاندنا ئاشتى و ئێكرێزیا ناڤ مالا كورد و باشتركرنا په‌یوه‌ندیێن د ناڤبه‌را به‌غدا و هه‌رێمێ یه، دیسا بۆ خوشكرنا ژیانا خه‌لكى و ئازادى و دادیا جڤاكى یه، هه‌روه‌سا بۆ زه‌لالكرنا داهاتێ ڤێ هه‌رێمێ یه ب تایبه‌ت داهاتێ نه‌فت و غازێ، دیسا بۆ ئه‌نجامدانا چاكسازیانه.
نه‌وشیروان مسته‌فا دیاركر كو د ڤێ رێككه‌فتنێ دا یا گرنگ نه‌وه یا هاتیه نڤیسین، به‌لكو یا گرنگ جێبه‌جێكرنا وێ یه.
ئه‌ڤرۆ نيوز:
وه‌زاره‌تا دارايى و ئابوورى ل حوكمه‌تا هه‌رێما كوردستانێ بڕيار دا رێ ب ڤه‌گوهاستنا راژا فه‌رمانبه‌ران د ناڤ وه‌زاره‌ت و فه‌رمانگه‌هـ و ده‌سته‌يێن سه‌ربه‌خۆدا بهێته دان كو پێشتر يا قه‌ده‌غه‌كرى بوو.
وه‌زاره‌تێ د رێنمايه‌كا نوو دا بڕيار دا ب راستڤه‌كرنا خالا دويێ ژ رێنمايا ژماره 16 يا سالا 2016ێ تايبه‌ت ب راگرتنا ڤه‌گوهاستنا راژا فه‌رمانبه‌ران د ناڤ وه‌زاره‌ت و فه‌رمانگه‌هان دا و ئه‌و رێنما هاته ژناڤبرن.
ئه‌ڤرۆ نيوز:
رێكخه‌رێ گشتيێ بزاڤا گۆڕان گه‌هشته ده‌باشان بۆ ئيمزاكرنا رێكه‌فتناما د ناڤبه‌را گۆڕان و ئێكه‌تيێ دا ل مالا مام جه‌لال.
ب مه‌ره‌ما ئيمزاكرنا رێكه‌فتنا ناڤبه‌را گۆڕان و ئێكه‌تيێ كو ژ 25 مادان پێكهاتيه، هه‌ر ئێك ژ نه‌وشيروان مسته‌فا، رێكخه‌رێ گشتيێ بزاڤا گۆڕان و كوسره‌ت ره‌سۆل جێگرێ ئێكێ يێ سكرتێرێ گشتيێ يێ ئێكه‌تيێ گه‌هشته مالا مام جه‌لال ل ده‌باشان.
بڕياره ئيڤاريا ئه‌ڤرۆ ل ئۆتێلا “شارى جوان” ل سلێمانيێ و درێ و ره‌سمه‌كێ تايبه‌ت دا ئه‌ڤ رێكه‌فتنا ناڤبه‌را ڤان هه‌ردو لايه‌نان بهێته ئيمزاكرن.
ئه‌ڤرۆ نيوز:
د چارچۆڤێ وان چاكسازيێن سه‌رۆكێ هه‌رێما كوردستانێ مه‌سعود بارزانى ئه‌ڤرۆ رۆژا سێشه‌مبى بڕيارا ده‌سته‌سه‌ركرنێ بۆ مه‌زنه بازرگانا وارێ به‌رهه‌مئينانا په‌ترۆلێ ل هه‌رێما كوردستانێ ده‌رچوو.
ب گۆره‌ى وان پێزانينێن کوردستان 24 به‌لاڤكرين، سه‌رۆكێ هه‌رێما كوردستانێ فه‌رمانا ده‌سته‌سه‌ركرنێ بۆ چارخان ره‌فيق مه‌زنه بازرگانا وارێ په‌ترۆلێ ل هه‌رێما كوردستانێ ده‌ركر، ئه‌و ب خوه ژى ماوه‌كه ژ كوردستانێ ده‌ركه‌فتى چوويه ژ ده‌رڤه‌ى وه‌لاتى.
چراخان ره‌فيق هه‌ڤژينا وه‌زيرێ سامانێن سرۆشتى ل حوكمه‌تا هه‌رێما كوردستانێ، ئاشتى هه‌ورامى بوو، به‌لێ به‌رى چه‌نده‌كێ يه، چراخانێ راگه‌هاندبوو كو ئه‌و ژ هه‌ڤژينێ خوه جودا بوويه و نوكه ل ژ ده‌رڤه‌ى وه‌لاتى دژيت.
ئه‌ڤرۆ نيوز:
هێمن هه‌ورامى، به‌رپرسێ مه‌كته‌با په‌يوه‌نديێن ژ ده‌رڤه يا پارتى ديموكراتى كوردستان راگه‌هاند، شانده‌كێ بلندێ كوردستانێ ده‌رباره‌ى ئه‌نجامدانا ريفراندۆمێ و دانوستاندنێ ل سه‌ر چاره‌كرنا كێشێن ناڤبه‌را هه‌ردولا دێ سه‌ره‌دانا به‌غدا كه‌ت.
به‌رپرسێ مه‌كته‌با په‌يوه‌نديێن ژ ده‌رڤه يا پارتى ديموكراتى كوردستان ئه‌ڤ گۆتنه د چارچۆڤێ پێشوازيكرنا خاتين “زه‌ينه‌ب علياڤا” كاربرێڤه‌به‌را حوكمه‌تا كه‌نه‌دا ل هه‌رێمێ كرن.
هێمن هه‌ورامى د ديدارێ دا ئاماژه ب وێ چه‌ندێ ژى كر كو هه‌كه حوكمه‌تا به‌غدا پابه‌ندى برگێن دستوورى و رێكه‌فتنامان نه‌بيت و مه‌رجێ شه‌راكه‌تا راسته‌قينه و پيكڤه‌ژيان و ته‌بايێ د نناڤبه‌را پێكهاتان دا به‌رچاڤ وه‌رنه‌گريت، دبيت ريفراندۆم بهێته كرن.
هه‌ورامى گۆتژى: “د ده‌مه‌كى دا هه‌كه هه‌ردولا نه‌گه‌هشتنه رێكه‌فتنێ، ريفراندۆم دێ هێته ئه‌نجام دان و دێ گرێداى بڕيارا ملله‌تى بين”.
ئه‌ڤرۆ نيوز:
ئه‌ندامێ په‌رله‌مانێ كوردستانێ، د. عه‌بدولا جاسم رێكانى، ل په‌يجێ خوه يێ تۆڕا جڤاكيا فه‌يسبۆكى بابه‌ته‌ك ل دۆر رێكه‌فتناما گۆڕان و ئێكه‌تيێ به‌لاڤكريه و پرسياره‌ك ژ خوانده‌ڤانێن فه‌يسبۆكى كريه: چاوان ئێکەتیێ کچەکا 10 سالی یا وەکو گۆڕان مارەکر، ئەرێ بابەت مارەکرنە یان (زواج المتعە) یە؟
دكتور د نڤيسينا خوه دا چه‌ند پرسياران دكه‌ت و دبێژيت ئه‌ڤ پرسيارێن ساده بۆ ملله‌تێ فه‌يسبۆكى نه و ره‌خنه‌يێن سڤكن و ب سينگه‌كێ به‌فره‌هـ وه‌رگرن.
ده‌قێ نڤيسينا دكتۆرى:
دا پیچەک جەوێ خو ب گورین!
جەند پسیارەکێت سادە بو مللەتێ فیسبوکێ: ھیڤیدارین رەخنێت سڤک ب سینگەکێ فرە وەربگرن
١- بدیتنا وە، ئەڤ ھەڤژینیا چێ بوی دمابەینا ئێکەتیێ و گوران دا، دێ یا بەردەوام بیت، یان ژی دێ، بتنێ”ھەڤژینیا خوشیێ بیت” (زواج المتعە)؟.
٢- ھەرێ، ما، شەرعەن و قانونەن، چێدبیت ھەڤژینی بێتە کرن دگەل زاروکا. تەمەنێ گوران، نا بیتە دە سال، و دسەر ھندێ را ژی، د بیتە کچا ئێکەتیێ!! ما نە حەرامە؟!
٣- کیش لایەنێ سیاسی دێ ب رولێ “المآذون الشرعی” رابیت. کومەل، ئیران. یان حکمەتا عيراقێ؟
٤- ھەکە ھەڤژینیێ سەرگرت، و خودێ ھاتە کەرەمێ، و چەند زاروک ژێ بون (حەلەبچە، گەرمیان، کرکوک، وخانقین)، ھەرێ ما ژمارا ڤان زاروکا و روبەرێ خانیێ وا، پتر نا بن ژ زاروک و خانیێ پارتی و لایەنگرێت وی “ھەکە ھەبن”؟
٥- ھەکە بوریەکا گازێ ژی ھاتە فرێکرن ب رێکا ئیرانێ، و داھاتێ وێ، ھاتە تەرخانکرن بو خێزانا نی، ما ئەو خێزان، بێ مننەت نا بیت و خو ب خو رێڤەببەت؟
٦- یەعنی، ھەرێما مە، دێ بیتە دوو ھەرێم، یەعنی، بای بای دەولەتبوون.
٧- یەعنی، خودێ نەکەت، سایکس-پیکو یەکا “خومالی” دێ دروسبیت و نە دیرە، ئەو ژی سەد سالێن دی ب کێشیت!!
٨- د سەر ھندێ را ژی، سترانبێژێ دەنگ خوش شڤان پەرورەر دێ ھە ر و ھەر بێژیت و کتە ھەوار ” کینە ئەم و کینە ئەم” ؟ ئەم داکوکەینە، ودوژمنێ سەرێ خویی نە، قربان.
ئه‌ڤرۆ نيوز:
وەزارەتا شەھید و ئەنفالکریان ئاماژێ ب وێ چەندێ دکەت، کو بڕیارە د دەمەکێ نێزیک دا یەکەیێن ئاکنجیبوونێ ل سەر ھزار و 400 شەھیدێن شەڕێ داعش دا بھێنە بەلاڤکرن و دیار کر، ژبەر نەبوونا خانی و شقان ئەرد ل سەر مالباتێن شەھیدێن شەڕێ داعش ل سنوورێ پارێزگەھا دھۆکێ دێ ھێنە بەلاڤکرن.
فوئاد عوسمان، پەیڤدارێ وەزارەتا شەھید و ئەنفالکریان بۆ رۆژناما ئەڤرۆ گۆت: “ھەر وەلاتیەکێ خوەبەخش د شەڕێ داعش دا شەھید ببیت ئەڤە ژ لایێ وەزارەتا پێشمەرگەی ڤە دھێتە تۆمارکرن و دو پلە بۆ دھێنە دانان و ب شەھیدێن سەنگەری دھێنە ھژمارتن، ھەتا نوکە ناڤێن ھزار و 400 شەھیدێن شەڕێ داعش ل سەرانسەری ھەرێما کوردستانێ گەھشتینە وەزارەتا شەھیدان و بڕیارە بۆ ھەر خێزانا شەھیدەکی یەکەیەکا ئاکنجیبوونێ بھێتە ئاڤاکرن، کو نوکە ژ لایێ وەزارەتا ئاڤاکرنێ د قووناغێن دووماھیێ دانە، وەزارەتا شەھید و ئەنفالکریان داخوازا ھزار و 500 یەکەیێن ئاکنجبوونێ کریە بۆ مالباتێن شەھیدان”.
فوئاد عوسمانی گۆتژی: “بۆ ھەر پارێزگەھەکێ ھژمارەکا یەکا ھاتینە بەرھەڤکرن، بەلێ ژ بەرکو وەزارەتا ئاڤاکرنێ چو پڕۆژە ل پارێزگەھا دھۆکێ نینن، وەزارەتا کاروبارێن شەھیدان لیستا شەھیدێن پارێزگەھا دھۆکێ ھنارتیە باژێڕڤانیا دھۆکێ و ب رێیا رێڤەبەریا گشتیا کاروبارێن شەھیدان ل پارێزگەھا دھۆکێ بۆ بەرھەڤکرنا پارچێن ئەردی، لەوڕا ل شوونا خانی و شقان دێ ئەرد ل سەر کەسوکارێن شەھیدێن دھۆکێ ھێتە بەلاڤکرن، بڕیارە د دەمەکێ نێزیک دا پارچێن ئەردی و خانی ل سەر مالباتێن شەھیدێن شەڕێ داعش بھێنە بەلاڤکرن”.
ئەڤرۆ نیوز:
رێڤەبەریا ڕاگەھاندنێ و رێڤەبەریا چاپ و بەلاڤکرنێ ل دھۆکێ بوونە ئێک رێڤەبەری و رێڤەبەرێن وان ژی ھاتنە گوھۆرین و رێڤەبەرەکێ نوو ل سەر پشکا یەکگرتوو بۆ ھاتە دانان.
د چارچوڤێ وێ رێککەفتنا سیاسی یا دناڤبەرا پارتی دیموکراتی کوردستان و یەکگرتوویا ئیسلامی دا ھاتیەکرن بۆ دانا 25 پۆستێن حوکمەتا خوەجھی یا پارێزگەھێ بۆ یەکگرتوو، دوھی 16/5/2016 ب ئامادەبوونا ئوسمان یونس، جێگرێ پارێزگەرێ دھۆکێ بۆ کاروبارێن تەکنیکی و دکتۆر باسل جۆقی، جێگرێ پارێزگەری ب وەکالەت بۆ کاروبارێن کارگێری، درێورەسمەکی دا رێڤەبەریێن ڕاگەھاندنێ و چاپ و بەلاڤکرنێ ل پارێزگەھا دھۆکێ بوونە ئێک رێڤەبەری و رێڤەبەرێن وان ھاتنە گوھۆرین و ل شوونا وان رێڤەبەرەکێ نوو ھاتە دانان.
ئوسمان یونس، جێگرێ پارێزگەرێ دھۆکێ دەستخوشی ل ھەردو رێڤەبەرێن ھاتینە گوھۆرین وەێفی حەسەن، رێڤەبەرێ راگەھاندنێ و کەریم بیانی، رێڤەبەرێ چاپ و بەلاڤکرنێ کر بۆ وێ خزمەتا د سالێن بۆری دا کری و ھیڤیا سەرکەفتنێ بۆ ئیدریس غازی، رێڤەبەرێ نوو یێ راگەھاندن و چاپ و بەلاڤکرنێ کر د کارێ وی دا.
ئه‌ڤرۆ نيوز:
سەد سال ژ سەر پەیمانا سایکس بیکو دەرباز بین و گەلەک دەزگەھێن راگەھاندنێ بەحسێ وی پەیمانێ دکەن و رۆژناما نیویورک تایمز یا ئەمریکی نەخشەکێ نوو بەلاڤ کریە کو ئەمریکا دڤیا بەری پەیمانا سایکس بیکو نەخشێ رۆژھەلاتا ناڤین وەسا بیت لێ ژ بەر پەیمانا سایکس بیکو ئەو نەخشە نەھاتە بجە ئینان و د نەخشێ دا دەڤەرەک ب ناڤێ کوردستان ژی دیار دبیت.
رۆژناما نیویورک تایمز پشتی بۆرینا سەد سالان ل سەر پەیمانا سایکس بیکو کو د وێ پەیمانێ دا زۆرداریەکا مەزن ل کوردان ھاتە کرن و وەلاتێ وان ھاتە پارچەکرن نەخشەک ژ ئەرشیڤا دەولەتا ئەمریکا بەلاڤ کریە و د راپۆرتەکێ دا دیار کریە کو وی دەمی سەرۆکێ ئەمریکا ویلسۆن دڤیا ژ بۆ چارەکرنا ئاریشێن رۆژھەلاتا ناڤین ئاخا ل ژێر دەستھەلاتا ئۆسمانیان بۆ چەندین دەڤەران پارچە بیت و پارچەک ژێ کوردستان بیت، لێ پاشی ژ بەر پەیمانا سایکس بیکو ئەو نەخشە نەھاتە بجە ئینان.
د بەردەوامیا راپۆرتێ دا ھاتیە دیار کرن کو ئەمریکا وی دەمی بەرژەوەندیێن خوە و یێن بریتانیا و ھەڤالبەندێن دی دانە بەرچاڤ و پشتی گەنگەشێن درێژ پەیمانا سایکس بیکو ھاتە ئیمزاکرن و ھەکە ئەو پەیمانە نەھاتبا کرن دا ل رۆژھەلاتا ناڤین بەری سەد سالان ھەرێمەکا کوردی ژی ھەبیت.
د بەردەوامیا راپۆرتێ دا ھاتیە دیار کرن کو بریتانیا وی دەمی ژ جیھادا کو ئۆسمانیان دژی ئورۆپا راگەھاندبوو گەلەک دترسیان و نەدڤیان ھەموو خەلکێن رۆژھەلاتا ناڤین ھەتا ھندستانێ ل دژی ئورۆپیان ببنە ئێک و شەری بکەن و ژ بەر ھندێ ژی وان گەلەک بزاڤ کرن کو رۆژھەلاتا ناڤین بھێتە پارچەکرن دا کو خەلک لاواز بن و ژ ئەنجامێ وێ یەکێ سایکس بیکو ھاتە ئیمزا کرن و زۆرداری ل گەلەک گەلێن دەڤەرێ ھاتە کرن کو ئێک ژ وان ژی کوردن کو ھەتا نھا نەبووینە خودان دەولەتا خوە یا نەتەوی.
نيشاندان