ئەڤرۆ نیوز، مەحمود نھێلی:
قایمقامێ قەزا ئامێدیێ بۆ ئەڤرۆ دیارکر، کو ئەو ھەموو بزاڤێن خوە دێ دەنە کاری بۆ وێ یەکێ کو پرۆژەیێ ئاڤا ستراتیژی یێ ئاڤا ئامێدیێ دەست ب کاربیت و ئاڤ بگەھیتە سەرانسەرێ قەزایێ.
دسەرەدانەکی ئسماعیل موستەفا رەشید قایمقامێ قەزا ئامێدیێ بۆ سەر پرۆژەیێ ستراتیژیێ یێ ئاڤا ئامێدیێ ل دێرەلۆک ل رۆژا سێ شەمبی 19/4/2016 بۆ ئەڤرۆ دیارکر، کو ئەڤ پرۆژە ب داوی ھاتیە و بتنێ ژ بەر رەوشا ئابوری و ڤی قەیرانا نھا ھەرێم تێدا دەرباز دبیت تا نھا ئاڤا ڤی پرۆژەی نەگەھشتیە دەڤەرێ و گۆت: ( دێ ھەموو بزاڤێن خوە دەینە کاری بۆ وێ یەکێ د ھەیاما 15 رۆژێن بھێت دا ئەڤ پرۆژەیە کەڤیتە کاری و تا بامەرنێ و سەرنکی ئاڤێ بگەھینتە دەڤەرێ).
و دیاکر، کو بتنێ دێ ناحیا شێلادزێ و لایەکی دێرەلۆک مینیت ئەو ژی ژ بەر کو کار دھێتە کرن د پراکەڤانیا دێرەلۆک دا نەشیانە بوریێن ئاڤێ گرێدەن و دی ھەول دەین ڤێ ئاریشەیێ ژی چارەسەرکەین.

ئەڤرۆ نیوز:
لقێن رێکخستنێن پارتی دیموکراتی کوردستان ھژمارەکا ڕاپۆرتان ل دۆر گەندەلیێ بۆ سەرۆک مەسعود بارزانی دھنێرن، ئە ژی 21 بادەکان ژ وان د دەتە دەستەیا دەستپاکیێ یا ھەرێما کوردستانێ، ئەندامەکێ سەرکردایەتیا پارتی ژی دبێژیت: “بارزانی گۆتیە مە، ھەکەر دەستەیا دەستپاکیێ ناڤێ وان کەسان ئاشکرا نەکەت، وی دەمی ئەز بخوە دێ ناڤان ئاشکرا کەم”.
ھەیڤا شواتا بۆری، مەسعود بارزانی، سەرۆکێ ھەرێما کوردستانێ ڕاگەھاندبوو کو ئەو دێ چاکسازیان د ناڤ حوکمەتا ھەرێما کوردستانێ و حزب خوە دا کەت و ژ خوە و بنەمالا خوە دێ دەست پێ کەت، پاشی داخواز ژ ھەموو لقێن پارتی کر، د ڤی واری دا ڕاپۆرتان بۆ فرێکەن ل سەر ھەر کەسەکی ھەبیت کو گۆمان ل سەر ھەبیت دەست د کارێ گەندەلیێ دا ھەبیت.
سەربەست لەزگین، ئەندامێ سەرکردایەتیا پارتی و بەرپرسێ لقێ ھەشت یێ وێ حزبێ ل زاخۆ دیار کر کو ڕاپۆرتێن ھەموو لقان گەھشتینە پیرمام و بۆ رووداو گۆت: “سەرۆک بارزانی دووڤچوون بۆ وان ڕاپۆرتان کریە، ھەروەسا چەندین کۆمبوون دەربارەی وان ڕاپۆرتان ل گەل لایەنێن پەیوەندیدار کرینە، ب رێیا نڤێسینگەھا خوە بەردەوام دووڤچوونێ بۆ وان ناڤان دکەت یێن د ڕاپۆرتێن لقێن پارتی دا ناڤێن وان ھاتین”.
بەرپرسێ لقێ ھەشت یێ پارتی ل زاخۆ، لقێ ھەشت ب نموونە دئینیت و دبێژیت: “گەلەک جاران نڤێسینگەھا سەرۆک بارزانی ل سەر وان ناڤێن د ڕاپۆرتێن مە دا ھاتین پەیوەندی ب مە کرینە و داخوازا پێزانینێن زێدەتر کریە”.
سەربەست لەزگین ناڤێ چو ژ وان کەسان ئاشکرا نەکرن یێن د ڕاپۆرتێن وان دا ھاتین، لێ د گەل ھندێ ژی دا ھندەک نموونە بەحسکرن و گۆت: “کەس ھەنە ب دەھان دۆنەمێن ئەردی بناڤێ دامەزراندنا کۆمپانیێ وەرگرتیە، لێ د بنیات دا کۆمپانی نەبوویە و پاشی ئەو ئەردە فرۆتیە”.
د چەند رۆژێن بۆری دا فەرمانا دەستەسەرکرنێ بۆ چەند کەسەکان دەرکەفت، ژ وان ژی سەرۆکێ بانکا ناڤەندی یا ھەرێما کوردستانێ و جێگرێ وی و ھژمارەکا فەرمانبەرێن وێ بانکێ ب تۆمەتا وێ چەندێ کو چەکێ پارەی مەزاختیە، ئەڤە د دەمەکی دایە کو ب بڕیارا جڤاتا وەزیرێن ھەرێما کوردستانێ مەزاختنا چەکان ھاتیە ڕاگرتن.
بەرپرسێ لقێ ھەشت یێ پارتی ل زاخۆ خویا کر، سەرۆک بارزانی 21 بادەکێن گەندەلیێ ئاراستەی دەستەیا دەستپاکیێ یا ھەرێما کوردستانێ کرینە بۆ ھندێ ڤەکۆلین تێدا بھێتەکرن و ئەو بخوە کو ئاگەھداری وان 21 بادەکێن گەندەلیێ یە گۆت: “سەرۆک بارزانی گەلەک یێ رژدە ل سەر ئەنجامدانا چاکسازیێ و وی گۆتیە، ھەکەر دەستەیا دەستپاکیێ وان 21 بادەکان ئاشکرا نەکەت، ئەز بخوە دێ ناڤان ئاشکرا کەم”.
دادوەر سدقی سەلیمخان، دادوەرێ دەستەیا دەستپاکیێ ل دھۆک چەند پێزانین ل سەر چەوانیا ئێکلاکرنا وان 21 بادەکان ئاشکرا کرن و بۆ رووداو گۆت: “دەستەیا دەستپاکیێ ل ھەولێرێ، ل دۆر وان 21 بادەکان پەیوەندی ب من کریە، نوکە ئەم یێ کار ل سەر ئێکلاکرنا وان بادەکان دکەین، ل ھەموو پارێزگەھێن ھەرێمێ ناڤ د ناڤ وێ لیستێ دا ھەنە، ئەو بادەک ل دووڤ جھێ وان ل سەر رێڤەبەریێن سەر ب دەستەیا دەستپاکیێ ڤە ھاتینە پارڤەکرن”.
دادوەر سدقی گۆتژی: “بەری نوکە ئێکلاکرنا بادەکێن گەندەلیێ گەلەک یا ب زەحمەت بوو، چونکو قانوونێن گەندەلیێ گەلەک دئاشکرا نەبوون، بەلێ نوکە قانوونێن گەلەک رۆن ھەنە و ھندەک بادەک ب دەمەکێ کێم دێ ھێنە ئێکلاکرن و ھندەک ژی دێ چەندەکێ گیرۆ بن و پێدڤی ب ڤەکۆلینەکا زێدەتر ھەنە”.