ئه‌ڤرۆ نيوز:

ژ به‌ر روودانێن ڤان چه‌ند رۆژێن بۆرى يێن خورماتۆ، مه‌سعود بارزانى سه‌رۆكێ هه‌رێما كوردستانێ په‌يامه‌ك به‌لاڤكر و ئه‌ڤه‌ ژى ده‌قێ وێ يه‌:

ب ناڤێ خودێ يێ مه‌زن و دلۆڤان

روودانێن چه‌ند رۆژێن بۆرى يێن باژێركێ خۆرماتۆ كو بوويه‌ ئه‌گه‌رێ ئالۆزى و نه‌سه‌قامگێريێ ل ڤى باژێركى جهێ دلگرانيا مه‌يه‌. گه‌له‌ك يا ئاشكه‌رايه‌ كو هنده‌ك كه‌س و لايه‌نان كو به‌رى نوكه‌ ژێده‌رێ كێشه‌ و فتنا بووينه‌، نوكه‌ ژى ل ژێر ناڤێ نوكه‌ ده‌ست ل ناڤ كێشێن فتنه‌گه‌رى دا هه‌يه‌ و دڤێت شه‌ر و دووبه‌ره‌كيێ ل ناڤبه‌را خه‌لكێ خوجهێ ده‌ڤه‌رێ و پێكهاتان دا دروست بكه‌ن.

ب مخابنيه‌كا زۆر ڤه‌، د ئه‌ڤان روودانان دا ژماره‌كا وه‌لاتى و پێشمه‌رگان شه‌هيد و بريندار بووينه‌، سه‌ره‌خۆشيا كه‌سوكارێن شه‌هيدان دكه‌م و هيڤيا ساخبوونێ بۆ برينداران دخوازم. داخوازێ ژ به‌رپرسێن هه‌رمێ و فه‌رماندێن پێشمه‌رگه‌ى دكه‌م ل گه‌ل مرۆڤێن ئاقلمه‌ندێن ناڤ حه‌شدێ، ئه‌وێن دژى فتنێ پاقژ بكه‌ن و ديالۆك و راوێژێ كار بكه‌ن دا كو رێ ل وان كه‌سان بگرن يێن دڤێت ئاگر به‌ست و شه‌ر و فتنێ دروست بكه‌ن و رحه‌تيا خه‌لك و پێكهاتێن ده‌ڤه‌رێ تێك بده‌ن.

پێدڤيه‌ هێزێن پێشمه‌رگێ كوردستانێ به‌ره‌ڤانيێ ل خه‌لكێ ده‌ڤه‌رێ بكه‌ن و رێ ل هه‌موو ده‌ستدرێژيا بۆ سه‌ر مال و مولكێ وه‌لاتيان و خه‌لكێ ده‌ڤه‌را خۆرماتۆ بگرن.

مه‌سعود بارزانى

سه‌رۆكێ هه‌رێما كوردستانێ

26ـی 4ـی 2016

ئەڤرۆ نیوز:
فەرماندەکێ پێشمەرگەی ل کەرکووکێ نھێنیەکا مەزن ئاشکرا دکەت و رادگەھینیت نێزیکی 900 چەکدارێن حزب اللە یا لوبنانی ب شێوەیەکی نھێنی یێن ھاتینە دەوروبەرێن باژێڕێ کەرکووکێ و دناڤا سەربازگەھێن حەشد شەعبی دا جھگیر بووینە وکارێ خوە یێ لەشکری دکەن، ھەروەسا دیارکر، ئەڤ ھێزا حزب اللە یا چەکدار ب فەرمانا ئیرانێ یا ھاتیە دەڤەرێ و دخوازیت پشتی شەڕێ داعشێ، ئەجندایێن کۆمارا ئیسلامی یا ئیرانێ بجە بینیت.
حسێن یەزدان پەنا، جێگرێ سەرۆکێ پارتا ئازادیا کوردستانێ و ئێک ژ فەرماندێن پێشمەرگەی ل کەرکووکێ بۆ رۆژناما ئەڤرۆ گۆت” پێزانین یێن گەھشتینە من کو د پڕۆسەیەکا ڤەشارتی و نھێنی دا، ھژمارەکا مەزن یا چەکدارێن بیانی یێن ھاتینە سنورێ پارێزگەھا کەرکووکێ و ژبەرکو پڕۆسا ئینانا ڤان چەکداران ب شێوەیەکێ نھێنی بوویە، ئامارێن دروست ل بەردەستێ مە نینن، بەلێ پێشبینیێ دکەم کو ھژمارا وان چەکداران د ناڤبەرا 600 ھەتا 900 کەسان بیت و ھەموو ژی چەکدارێن حزب اللە یا لوبنانی نە کو ژلایێ حەسەن نەسرۆلای ڤە رێبەریا وێ حزبێ دھێتەکرن و ژلایێ کۆمارا ئیسلامی یا ئیرانێ ڤە ب شێوەکێ نھێنی ھاتینە ھنارتن بۆ کەرکووکێ و تێکھەلی چەکدارێن حەشد شەعبی کرینە”.
حسێن یەزدان پەنا زێدەتر گۆت” ھاتنا وێ ھێزا چەکدارێن حزب اللە یا لوبنانی پشکەکە ژ کۆمکرنا ھێزێن چەکدار ل دەوروبەرێن باژێڕێ کەرکووکێ، ھەتا ئەجندایێن ئیرانێ ل دەڤەرێ بجە بینیت و ب دەستڤەبینیت، ئەو چەکدارێن حزب اللە یا لوبنانی ل نێزیک ناحیا تازە ب سەر سەربازگەھێن میلیشیێن شیعی یێن ھاتینە بەلاڤکرن و ناھێلن تێکھەلی خەلکێ ئاسایی ببن و ل بەرچاڤێن رۆژنامەڤانان دیارببن، ئیران دخوازیت مینا سووریێ ھێزەکا ھەڤپشک ل کەرکووکێ پێک بینیت و دژی کوردان بکاربینیت و مەترسیەکا مەزن ل سەر دەڤەرێ پەیداکریە و ل رۆژا دویێ یا ئازادکرنا قەزا شنگالێ ئەڤێ ھێزا چەکدارێن حزب اللە ئالۆزی ل قەزا خورماتوو پەیداکربوون”.
حوسێنی خویاکر ” ئینانا ڤێ ھێزا چەکدار بۆ شەڕێ داعش تنێ بۆ ناڤە و چو رۆل نەبوویە د شەڕێ دژی چەکدارێن داعشێ دا و ھەتا چو چەکدارێن بیانی و ئیرانی ل شەڕێ دژی داعشێ دا نەھاتینە کوشتن، چونکی پتر کارێ وان ل گەل تنێ مەشق و راھێنانن ب چەکدارێن حەشد شەعبی، ھەتا نوکە ھەموو میلیشیێن شیعی یێن عیراقێ یێن شەڕی دکەن تنێ فەرماندەیێن لەشکرێ قودس یێ ئیرانێ ل پشت ھەنە، فەرماندەکێ ئیرانێ ب ناڤێ (ئێقبالی) ئێکە ژ سەرپەرشتیارێن ڤێ ھێزێ”.
ب دیتنا ڤی فەرماندێ پێشمەرگەی، ھەبوونا چەکدارێن ئیرانی و حزب اللە یا لوبنانی ل عیراقێ یا جۆدایە ل گەل سووریێ و گۆت” ئەڤ ھێزە دخوازیت پشتی ب دووماھی ھاتنا شەڕێ داعشێ، ئەجندایێن ئیرانێ بجە بینیت و دەستکەفتێن شەڕی بۆ ئیرانێ کۆم بکەت، ژلایێ لەشکری ڤە ئیران مژوولی دارێشتنا ھیلالا شیعی یە و ئەڤ چەکدارێن بیانی یێن ژلایێ ئیرانێ ڤە ھاتینە ھنارتن بۆ کەرکووکێ مەرەم پێ ئەوە دڤێت ل کەرکووکێ بچنە مەخموورێ و مووسلێ و دەربازی سووریێ و لوبنانێ ببن، ددەمێ خوەدا ژی، ئیرانێ داخواز ژ ھەرێما کوردستانێ کربوو کو ھێلەک بۆ بھێتە ڤەکرن و چەکدار و چەک و تەقەمەنیان دەربازی ئاخا سووریێ بکەن، بەلێ ھەرێما کوردستانێ ئەڤ چەندە رەتکر و باجا وێ رەتکرنێ ژی ھاتەدان”.
ژلایێ خوەڤە قایمقامیا خورماتوو ئاشکراکر کو پتریا چەکدارێن حەشد شەعبی ئەوێن ل شەرێ بەری دو رۆژان ل خورماتوو ل گەل پێشمەرگەی ھاتینە کوشتن و بریندارکرن، چەکدارێن ئیرانی بوون.
محەمەد فایق بەرپرسێ راگەھاندنا قایمقامیا خورماتوو دیارکر کو ژ ئەگەرێ شەڕێ د ناڤبەرا کوردان و حەشد شەعبی دا، 30 چەکدارێن حەشد شەعبی ھاتنە کوشتن و 90 ژی برینداربوون کو پتریا وان کوشتی برینداران ب رەگەز ئیرانی بوون و ھەموو خەلکێ خوراسانێ بوون و پێنج کوشتیێن حەشد شەعبی ژی شیعێن تورکمان بوون یێن خەلکێ خورماتوو.