ئه‌ڤرۆ نيوز:

رێڤەبەرێ پەیوەندی و ڕاگەھاندنێ ل رێڤەبەریا گشتی یا پەروەردێ ل پارێزگەھا دھۆکێ بۆ رۆژناما ئەڤرۆ ئاشکرا کر کو بڕیارە ئەزموونێن گشتی یێن قووناغا 12 ئامادەیی ل 2/6/2016 و یێن قووناغا نەھێ بنەرەت ل 8/6/2016 ل سەرانسەری ھەرێما کوردستانێ بھێنە کرن و ل پارێزگەھا دھۆکێ 82 ھزار و 934 قوتابی دێ پشکداریێ تێدا کەن.

ئەحمەد عەبدوللا زوبێر، رێڤەبەرێ پەیوەندی و ڕاگەھاندنێ ل رێڤەبەریا گشتی یا پەروەردێ ل پارێزگەھا دھۆکێ خویا کر، ئەزموون دێ ل دەمژمێر 8 و 30 ل سەرانسەری ھەرێما کوردستانێ دەست پێ کەن و گۆت: “مە وەکو رێڤەبەریا گشتی یا پەروەردا پارێزگەھا دھۆکێ ھەموو بەرھەڤی بۆ ئەنجامدانا ئەزموونا ب سەرکەفتیانە کرینە، بۆ ئەڤ سالە رێنمایێن تایبەت بۆ ئەزموونان ژ وەزارەتێ دەرکەفتینە سەبارەت چاوانیا ئەنجامدانا ئەزموونان ل بنگەھێن ئەزموونان”.

گۆتژی: “ل قووناغا ئامادەیی ب پشکێن (زانستی، وێژەیی، پیشەیی، خواندنا ئیسلامی ڤە) 41 ھزار و 955 قوتابی ل 664 بنگەھان ل سەرانسەری پارێزگەھا دھۆکێ دێ پشکداریێ د ئەزموونێن گشتیێن ئەڤ سالە دا کەن، ژ وانا 23 ھزار و 505 قوتابی یێن پشکا زانستی، 17 ھزار و 925 قوتابی ێن پشکا وێژەیی، 370 خواندنا ئیسلامی و 155 پشکێن پیشەیی نە”.

دەربارەی ئەزموونێن نشتیمانی یێن پۆلا نەھێ بنەرەت ژی ئەحمەدی گۆت: “ژڤانە ل 8/6/2016 ئەزموونێن نشتیمانی بۆ ئەڤ سالە ل سەرانسەری ھەرێما کوردستانێ دەست پێ بکەن، 40 ھزار و 979 قوتابی دێ پشکداریێ تێدا کەن و ل 568 بنگەھێن ئەزموونان ل سەرانسەری پارێزگەھا دھۆکێ ھاتینە بەلاڤەکرن”.

ئه‌ڤرۆ نيوز:

رێڤەبەریا گشتی یا رەوشەنبیری و ھونەری ل دھۆکێ ب ھەڤکاری د گەل سەرۆکاتیا باژێرڤانیا دھۆکێ کەرنەڤالێ چارێ یێ پارێزگەھبوونا دھۆکێ دێ ل رۆژێن 27 و 28/5/2016ێ ل پارێزگەھا دھۆکێ گێریت.
حەسەن ئەحمەد، بەرپرسێ پشکا راگەھاندنێ ل رێڤەبەریا گشتی یا رەوشەنبیری و ھونەری ل دھۆکێ بۆ رۆژناما ئەڤرۆ ئاشکرا کر کو کەرنەڤالێ چارێ یێ پارێزگەھبوونا دھۆکێ دێ ب چەندین چالاکیان ھێتە گێران و بۆ ڤێ مەرەمێ ژی ھەموو بەرھەڤی ھاتینەکرن و گۆت: ” ل رۆژا 27/5/2016 کو رۆژا ئێکێ یا کەرنەڤالێ پارێزگەھبوونا دھۆکێ یە ل دەمژمێر 5:30 ئێڤاری کوردوسێ ترۆمبێلان دێ ژ جادا قازی محەمەد (زرکا) بۆ پارکێن مازی مۆل ب رێ کەڤیت و رێورەسمێن پێشۆازیێ دێ ل پارکێن ناڤھاتی ھێنە ئەنجامدان و نامیلکەکا 12 لاپەری ل دۆر دیرۆک و جھێن گرنگێن پارێزگەھا دھۆکێ دێ ھێتە بەلاڤکرن و دووڤ دا ل دەمژمێر 7:30 ئێڤاری کۆنسێرتەک ب پشکداریا ھونەرمەندان (بلند ئیبراھیم، کاروان کامل، ماھر ئەمین، ئیسماعیل جومعە) و ھەلبەستڤان (برھان زێباری) دێ ل ھەمان جە ھێتە گێران”.
ناڤبری ئاماژە دا وێ چەندێ کو رۆژا 28/5/2016 کو دبیتە رۆژا دویێ یا کەرنەڤالێ پارێزگەھبوونا دھۆکێ ل دەمژمێر 10:30 ی سپێدێ پێشانگەھەکا ھەمەجۆر کو یا پێکھاتیە ژ داھێنانێن زانستی و فوتۆ یێن دھۆکا کەڤن و نوو دێ ل ھۆلا کۆنگران ل زانکۆیا دھۆکێ ھێتە ڤەکرن و سەرەرایی ڤێ چەندێ چەندین کەڤالێن ھەلبژارتی یێن قوتابیێن پەیمانگەھا ھونەرێن جوان ل دھۆکێ و قوتابیێن پشکا درامایێ ل کۆلیژا ئادابێ یا زانکۆیا دھۆک دێ ھێنە نیشادان و دووڤ دا فەرھاد ئەمین ئەترووشی، پارێزگەرێ دھۆکێ دێ بەحسێ پلانا ستراتیژی یا سێ سالێن داھاتی یا پارێزگەھا دھۆکێ ل ھەمان جە کەت و گۆت: ” موسەدەق تۆڤی ل ھەمان دەم و جە دێ بەحسێ ئنسکلۆپیدیا پارێزگەھا دھۆکێ کەت کو پرۆژەکە بۆ دەمێ سێ سالانە کار تێدا دھێتە کرن و نوکە د قووناغێن دووماھیێ دایە و دووڤ دا فلمەکێ دیکیۆمێنتاری ل دۆر پارێزگەھبوونا دھۆکێ دێ ھێتە نیشادان و چەندین پارچە مۆزیک دێ ژ لایێ تیپا دھۆک یامۆزیکێ ڤە ھێنە ژەنین”.
ل دووماھیێ حەسەن ئەحمەدی دیار کر کو ھەر ل رۆژا 28/5/2016ێ ل دەمژمێر 3:00 ی ئێڤاری بۆ جارا ئێکێ فیستەڤالەکا فراندنا فرۆکێن کاغەزی دێ ل سەرێ چیایێ زاوا ھێتە گێران و ب ڤێ چەندێ دێ دووماھی ب کەرنەڤالێ پارێزگەھبوونا دھۆکێ ھێت.

ئەڤرۆ نیوز ، نەوزاد زادە ھلۆری:
سەرۆکێ لیستا ئێکگرتوویا ئیسلامی یا کوردستانێ ل پەرلەمانێ کوردستانێ ئاماژە ب وێ یەکێ دکەت کو رێکەفتنا دناڤبەرا ئێکەتی و گۆرانێ یا تایبەتە ب دوولایەنێن سیاسی ڤە و داخوازی ل چوو لایەنێن سیاسی نەھایتەکرن کو بھێنە دناڤا رێکەفتنێ.
ئەبوبەرکر ھەلەدەنی سەرۆکێ فراکسوونا ئێکگرتوو ل پەرلەمانێ کوردستانێ بو ” باسنیوز ” دیارکر کو ل گورەی پەیرەو و پروگرامێ یەکگرتوو دەستھەلات دایە ئەنجومەنا سەرکردایەتیا ئێکگرتووی ئیسلامی کوردستان کو بریارا چوونا دناڤا رێکەفتنا دناڤبەرا ئێکەتی و گۆرانێ بدەت.
رون کر ژی کو ئێکگرتوو خودانا بریارا خوەیە کا چوو د بەرژەوەندی یا خەلک و یەکگرتوو دایە دێ وەسا بریارێ دەت ، و دوپاتکر کو بۆ چوونا دناڤ رێکەفتنێ ئێکگرتوو دێ بریارا خوە ژ سەرکردایەتیێ دەت و جەماوەرێ یەکگرتوو ژی چاڤەرێ سەرکردایەتیا خوە دکەت.
لگوەری ئەو زانیاریێن کو ژ ژێدەرەکێ دەست ” باسنیوز ” کەفتین ھندەک ژ کادرێن ئێکگرتوو ل سلێمانیێ دڤێت فشارێ لسەر ئێکگرتوو درۆست بکەن داکو بچیتە دناڤا رێکەفتنا ئێکەتی و گۆرانێ بەلێ ئەبو بەکر ھەلەدەنی دبێژیت: (ئێکگرتوو فەرمانا سەرکردایەتیا خوە بجھدکەت و ئەوا ل پەرلەمانی درۆست بوی ل وی دەمی سەرکردایەتیا ئێکگرتوو چوو بریار ڤێنەبوون).