ئەڤرۆ نيوز:
خەیری بۆزانی، رێڤەبەرێ گشتی یێ کاروبارێن ئێزدیان ل وەزارەتا ئەوقاف و کاروبارێن ئایینی یا حوکمەتا ھەرێما کوردستانێ د پەیجێ خوە یێ تایبەتێ تۆرا جڤاکی یا فەیسبووکی دا ئاشکرا کر کو ب ھەلکەفتا جەژنا سەرێ سالا کوردێن ئێزدی (چارشەمبا سوور) کو دکەڤیتە رۆژا 20/4/2016 دێ بیتە بھێنڤەدانا فەرمی ل ھەموو دامودەزگەھێن حوکمەتا ھەرێما کوردستانێ.
ھەژی گۆتنێ یە کو ل سالێن بۆری ب ھەلکەفتا ژناڤچوونا رژێما بەعسا عیراقێ ل نەھی ھەیڤا نیسانێ دبوو بھێنڤەدانا فەرمی ل ھەموو دامودەزگەھێن حوکمەتا ھەرێما کوردستانێ، بەلێ ئەڤ سالە رۆژا 9/4/2016 دکەڤیتە د رۆژا شەمبی دا و ھەتا نوکە حوکمەتا ھەرێمێ چو بڕیار ل دۆر ڤێ بھێنڤەدانێ نەداینە.
نووترين نووچه
- سەرۆكێ حوكمەتێ و قونسلێ فلستینێ دووماهی پێشهاتێن رەوشا غەزە گەنگەشەكرن
- د. خەلیل غازی: داهاتێ دەزگەهێن حوكمەتا ئیراقێ بۆ گەنجینەیا وەلاتی ناچن
- هەكە دۆزێن مللەتان د هندەك ویستگەهاندا تووشی راوەستییانێ ژی ببن، چو جاران ب دووماهی ناهێن
- مەسرور بارزانی و پاتریاركێ كەنیسەیا ئاشۆرییا رۆژهەلاتی دوپاتیێ ل پێشڤەبرنا كەلتوورێ پێکڤەژیانێ دكەن
- پارتی ل گەل ئێك لیستییێ یە ل دەڤەرێن كوردستانی یێن ل دەرڤەی ئیدارەیا هەرێمێ
- لەیلا قاسم نموونەیا قەهرەمانییا كچا كوردە و سیمبۆلا ئازادیخوازیێیە
- نێچیرڤان بارزانی: پێشوازیێ ل خوە هەلوەشاندنێ و چەكدانانا پەكەكێ دكەین
- نێچیرڤان بارزانی و مەسرور بارزانی پیرۆزباهیێ ل بنگەهێ لالشێ دكەن
- مەسرور بارزانی: پشتەڤانییا حوكمەتێ بۆ ب هێزكرنا ژێرخانەیا ئابۆری دێ بەردەوام بیت
- بنگەهێ لالش خزمەتەكا بەرچاڤ یا جڤاكێ ئێزدیاتیێ كریە
سه‌ره‌كى نووترين نووچه
نووترین پێزانین ل سەر ژڤانێ راگەھاندنا ناڤێن حەجیان
ئەڤرۆ نیوز:
بڕیارە ل چەند رۆژێن داھاتی پڕۆسا پشککێشانێ بۆ ناڤێن حەفت ھزار کەسان بھێتەکرن بۆ ئەنجامدانا فەریزا حەجا ئەڤ سالە، بەرپرسەکێ وەزارەتا ئەوقافێ ژی دبێژیت: بۆ ئەڤسالە سێ ھزار و 656 کەس دێ چنە حەجێ، ژ لایەکێ دیڤە، رێڤەبەرێ حەج و عومرێ ل پارێزگەھا دھۆکێ بۆ ئەڤرۆ گۆت: چەندین گوھۆرین کەتینە مەرجێن ئەڤ سالە یێن چوونا حەجێ.
کاروان ستوونی، بەرپرسێ ڕاگەھاندنا رێڤەبەریا گشتی یا حەج و عومرێ ل ھەرێما کوردستانێ بۆ رۆژناما ئەڤرۆ ئاشکرا کر، ل ڕۆژێن بۆری ھژمارەکا زۆر یا وەلاتیان پەیوەندی ب رێڤەبەریێن حەج و عومرێ ل پارێزگەھێن ھەرێما کوردستانێ ھاتیەکرن، کو دبێژن پشککێشان بۆ ناڤێن حەجیان ھاتیەکرن، بەلێ ئەڤ چەندە یا دوورە ژ راستیێ و ھێشتا وەزارەتا ئەوقاف و کاروبارێن ئایینی یا حوکمەتا ھەرێمێ پڕۆسا پشککێشانێ بۆ ناڤێن حەجیێن ئەڤ سالە ئەنجام نەدایە و گۆت: “بڕیارە ل چەند رۆژێن داھاتی پشککێشان بۆ ناڤێن حەجیان بھێتەکرن و ھژمارا دیاریکری یا ناڤان بھێنە دەستنیشانکرن بۆ ب جھئینانا فەریزا حەجا ئەڤ سالە، د ھەمان دەم دا ھزار و 311 کەس یێن سالا بۆری ماینە و ئەڤ سالە دێ چنە حەجێ”.
کاروانی ئاماژە ب وێ چەندێ ژی کر، ژ بلی ناڤێن سالا بۆری پشککێشان دێ بۆ ناڤێن حەفت ھزار کەسان ھێتەکرن و تێدا دێ ناڤێن دو ھزار و 200 کەسان ھێنە دیارکرن بۆ ب جھئینانا فەریزا حەجێ، ب شێوەیەکێ گشتی ناڤێن سالا بۆری و د گەل یێن ئەڤ سالە و تیمێن حەملەدار و نۆشداری و فەتوایێ دێ بنە سێ ھزار و 656 کەس کو گەشتا حەجێ ئەنجامدەن و گۆت: “داخوازێ ل کۆمپانیێن حەج و عومرێ دکەین یێن دخوازن حەجیان ڤەگوھێزن، سەرەدانا رێڤەبەریێن مە بکەن، دا کو رێیێن پێدڤی و مەرجێن وەرگرتنا کۆمپانیا بۆ گەشتا ئەڤ سالە بزانن”.
ھەر ل دۆر ڤی بابەتی شێخ شەمسەدین تاھر، رێڤەبەرێ حەج و عومری ل پارێزگەھا دھۆکێ خویا کر، بەرھەڤی بۆ پشککێشانا تەمامکەر ھاتینەکرن و ژ سەرجەمێ 801 کەسان 323 وەلاتیێن دھۆکێ دێ ژێ ھێنە کێشان و گۆت: “ئەڤە سێ سالە حوکمەتا سعوودیێ بریار دای 20% ژ چوونا وەلاتیان بۆ حەجێ بھێتە کێمکرن، ئەڤ سالە ژی کارێ نوژەنکرنێ ھێشتا یێ مای، لەوما ئەڤ سالە ژی چوونا وەلاتیان بۆ حەجێ دێ 20% کێم بیت، ھەکەر ژ بەر ڤێ رێژێ نەبا ھزار و 50 کەسان ل پارێزگەھا دھۆکێ ماف ھەیە بچنە حەجێ، لێ چونکو رێژە کێمکریە، ئەڤ سالە ژی نێزیکی 890 وەلاتیان دێ چنە حەجێ”.
شێخ شەمسەدینی گۆتژی: “ئەو ناڤێن بڕیارە ڤان رۆژان پشککێشان بۆ بھێتە کرن، ھەموو ئەون یێن ل سالا 2010 ھاتینە نڤسین و گۆت: “بریار ھاتیەدان، ئەڤ سالە کەسێ ناڤێ وی دەرکەڤیت و ھەتا ژ ئەوان کەسان ژی بیت یێن پار بۆ ئەڤ سالە ھاتینە پاشخستن مافێ وی دێ ھێتە سۆتن و کەسەک ناھێتە جھێ وی، ئەڤ سالە لێک گوھارتن نینە، کو ئێک بچیتە جھێ ئیکی و دیسا داگێران ژی نینە، کو وەلاتیەک بۆ بابێ خوە یان کەسەکی بکەت و پێشڤە بچیتە حەجێ و پاشخستن ژی نینە، ھەر کەسەکێ ناڤێ وی دەرکەت د ماوەکێ کێم دا دڤێت بھێت پارێن خوە بدەت و یێ نەھات دێ مافێ وی ھێتە سۆتن”.
بزاڤا دیموکراتیا ئاشوورێ ھێزەکا سەر ب حەشد شەعبی ڤە يا هه‌ى
ئەڤرۆ نیوز:
سکرتێرێ حزبا دیموکراتی بێت نەھرێن ڕاگەھاند، چەندین ھێزێن چەکدار یێن ئاشووری یێن ھاتینە پێکئینان بەلێ تنێ ھێزا دەشتا نەینەوا یا فەرمی یە و سەر ب وەزارەتا پێشمەرگەی ڤەیە و دبێژیت ئەو ھێزا بزاڤا دیموکراتیا ئاشووری پێکئینای سەر ب حەشد شەعبی ڤەیە، بەلێ ڕێکخەرێ وێ ھێزێ دبێژیت ھێزا مە نە سەر ب پێشمەرگەی ڤەیە، بەلکو سەر ب فەرماندەیا ئۆپەراسیۆنێن نەینەوا ڤەیە.
ڕۆمیۆ ھەکاری سکرتێرێ حزبا دیموکراتی بێت نەھرێن بۆ ڕۆژناما ئەڤرۆ گۆت”چەندین ھێزێن ئاشووری یێن ھاتینە پێکئینان، بەلێ گرنگترین ئەو ھێزە ( ھێزا دەشتا نەینەوا) یە کو ل مەھا ئیلۆنا 2014 ێ ژلایێ (حزبا دیموکراتی بێت نەھرێن) و حزبەکا دی ڤە ھاتیە پێکئینان، کو ژ چەند سەد پێشمەرگەیان پێکھاتیە کو پتریا وان ژی خەلکێ باژێڕ و باژێڕک و گوندێن دەشتا نەینەوانە و ئەڤە تاکە ھێزە کو ب ڕێیا وەزارەتا پێشمەرگە ل ھەرێما کوردستانێ ھاتیە پێکئینان و ھێزەکا فەرمی و قانوونی یە و ئەڤە بۆ سالا دویێ یە کو ئەڤ ھێزە ل باژێڕکێ (تللسقوف) ھاتیە بجھکرن کو بارەگایێ وێ یێ سەرەکی ل وێرێ یە، ل ڤان نێزیکان ژی دێ 200 کەسێن دی ھێنە سەر ب وێ ھێزێ ڤە و مە ل بەرە فەوجەکا تمام دروست بکەین کو ھژمارا وان 700 ھەتا 800 کەسان بیت”.
ڕۆمیۆی گۆت ژی” ل سالا 2014 ێ، وەزارەتا پێشمەرگەی مەشق و ڕاھێنان ل ھەولێرێ ب ڤێ ھێزێ کریە و پاشی ھاتە ھنارتن بۆ (تللسقوف) و ئەڤە بۆ سالا دویێ یە ئەڤ ھێزە ل گەل ھێزا پێشمەرگەی ل بەرەیێن شەڕی ل تللسقوفێ و تلکێفێ د بەرگریێ دایە دژی تیرۆرستێن داعشێ”. ل دۆر مەرەما پێکئینانا ڤێ ھێزێ، سکرتێرێ حزبا دیموکراتی بێت نەھرێن، دبێژیت” مەبەست ژ پێکئینانا ڤێ ھێزا ئاشووری بۆ دو خالان دزڤریت، یا ئێکێ پشکدارببیت ل گەل ھێزێن پێشمەرگەی د پرۆسا ئازادکرنا دەشتا نەینەوا، یا دویێ بۆ قۆناغا پشتی داعشێ ئەڤ ھێزە دێ بیتە پشکەک ژ وێ ھێزا دێ سەقامگێری و ئێمناھیا دەشتا نەینەوا پارێزیت د پاشەڕۆژێ دا”.
ڕۆمیۆ ھەکاری خویاکر ژی کو ھندەک ھێزێن دی یێن ئاشووری یێن ھەین، بەلێ تنێ ( ھێزا دەشتا نەینەوا) یا فەرمی یە و سەر ب وەزارەتا پێشمەرگەی ڤەیە و گۆت”بزاڤا دیموکراتیا ئاشووری ھێزەکا چەکداری یا پێکئینای کو ھژمارا وان 100 کەسن و ئەو دبێژن کو ئەو ھێزە سەر ب بەغدا ڤەیە وبارەگایێ وێ ھێزێ یێ ل ئەلقووشێ و سەر ب حەشد شەعبی ڤەیە”.
یەعقووب گورگیس ئەندامێ لژنا پێشمەرگەی ل پەرلەمانێ کوردستانێ ژ فراکسیۆنا بزاڤا دیموکراتیا ئاشووری وڕێکخەرێ سیاسی یێ ھێزا ( یەکینەیێن پاراستنا دەشتا نەینەوا) بۆ ئەڤرۆ گۆت” یا مە نە ھێزەکا حزبی یە، بەلکو ئەڤە (یەکینەیێن پاراستنا دەشتا نەینەوا) یە کو خەلکێ دەڤەرا دەشتا نەینەوانە و نە میلیشیایە و ئارمانج ژ پێکئینانا وێ ھێزێ ئەوە پشکداریێ بکەت ل گەل ھێزێن پێشمەرگەی ولەشکرێ عیراقێ د ئازادکرنا دەشتا نەینەوا دا، دیسا پشتی ئازادکرنا دەشتا نەینەوا و مووسلێ ئەڤ ھێزە ببیتە پشکەک ژ وان ھێزێن فەرمی ل دەڤەرێ و پشکداریێ د ئیدارا بادەکا ئەمنی دا بکەت”.
یەعقووبی دیارکر ژی” حزبا دیموکراتی بێت نەھرێن 10 ھەتا 15 کەس یێن تللسقوفێ ھەین و مەفرەزەکا حزبی یە و یێن مە ( یەکینەیێن پاراستنا دەشتا نەینەوا) سەربازگەھەک یا ھەی و ھژمارا وان ژی 500 کەسن و مەشق و ڕاھێنانان ژی دکەن”. د بەرسڤا پرسیارەکا ڕۆژناما ئەڤرۆ دا، ئایا ھێزا یەکینەیێن پاراستنا دەشتا نەینەوا سەر ب وەزارەتا پێشمەرگەی ڤەیە یان سەر ب حەشد شەعبی ڤەیە؟
یەعقووب گورگیس دبێژیت “نە ب سەر وەزارەتا پێشمەرگەی ڤەیە و نەژی سەر ب حەشد شەعبی ڤە، بەلکو ھەتا نوکە خوەبەخشن و ل گەل فەرمانداریا ئۆپەراسیۆنێن نەینەوا دایە کو بارەگایێ وێ یێ ل مەخموورێ”.
عه‌بادى په‌شيمان بوو.. سێ وەزارەتێن عیراقێ دێ بۆ کوردان بن
ئه‌ڤرۆ نيوز:
تنێ چەند ڕۆژێن کێم بۆ پەسەندکرنا کابینا نوو یا حوکمەتا عیراقێ ماینە و حەیدەر عەبادی سەرۆک وەزیرێن عیراقێ ژی مەرجێن خوە یێن بۆ کابینا تەکنۆکرات دیارکرین یێن کێمتر کرین و گۆھۆڕین یا کەفتیە ھەلویستێ عەبادی، پەرلەمانتارەکا پارتی ژی دبێژیت، عەبادی یێ رازیە سێ وەزارەت بۆ کوردان بن و لیستێن سیاسی بەربژارێن خوە دەستنیشان بکەن.
ئەشواق جاف، ئەنداما جڤاتا نوونەرێن عیراقێ ژ فراکسیۆنا پارتی دیموکراتی کوردستان بۆ ڕۆژناما ئەڤرۆ گۆت” سەرۆکێ جڤاتا نوونەرێن عیراقێ (سەلیم جبووری) ددووماھی کۆمبوون دا ل گەل ھێزێن سیاسی یێن عیراقی ئەڤ چەندە ئاشکراکریە، پێدڤیە ئەڤ کابینا نوکە یا حوکمەتا عیراقێ بھێتە گۆھۆڕین و کەسایەتیێن تەکنۆکرات بھێنە بەربژارکرن بۆ پۆستێن وەزاری، ھەروەسا دکۆمبوونێ دا دووپاتی ل سەر وێ چەندێ ھاتەکرن کو ھژمارا وەزارەتان نەھێتە کێمکرن و لیستێن سیاسی ب خوە بەربژارێن پۆستێن وەزاری دیار بکەن، ھەتا نوکە لیستێن سیاسی یێن گەھشتینە ڤان خالان”.
ئەشواقێ زێدەتر گۆت” حەیدەر عەبادی ب مە ڕاگەھاندیە کو ئەو یێ ھاتیە نەچارکرن ناڤێن بەربژاران بدەتە جڤاتا نوونەران و ئیدی عەبادی ڕازیبوویە کو لیستێن سیاسی بەربژارێن خوە دیاربکەن، بەلێ دڤێت مەرجێن دیاریکری تێدا ھەبن و کەسێن تەکنۆکرات و ژێھاتی بن، بەری نوکە لیستێن سیاسی د جڤاتا نوونەران دا بەحسێ وێ چەندێ کربوو کو ھەکە کابینا حوکمەتێ دێ ھێتە گۆھۆڕین، دڤێت سەرۆک وەزیران حەیدەر عەبادی ژی بھێتە گۆھۆڕین، بەلێ نوکە ئەو دەنگێن بەحسێ گۆھۆڕینا عەبادی دکر یێن کێمتر بووین، ھەرچەندە دھەر دەمژمێرەکێ دا بڕیارەک دھێتەدان، بەلێ دووماھی بۆچوونا عەبادی ئەوە کو سێ وەزارەت بۆ کوردان بن، ئەوژی وەزارەتێن پەترۆلێ و پیشەسازیێ و ئاڤەدانکرنێ، ھەرچەندە عەبادی ئەوژی گۆتیە کوردان کو دشێن وەزارەتێن بەرێ وەربگرنەڤە، بەلێ ب مەرجەکی ئەوژی وەزیرێن نوو بھێنە دانان و کەسێن تەکنۆکرات بن”.
ڤێ پەرلەمانتارێ خویاکر ژی” ب دیتنا من مەرەما عەبادی ژڤان گۆھۆڕینان حوکمەتا تەکنۆکرات نینە، بەلکو عەبادی بەری نوکە ب شەرعیەتا پەرلەمانی ھندەک کەسێن پشتی ئازادکرنا عیراقێ ھاتینە سەر دەستھەلاتێ ب گۆھۆڕیت و دڤان چاکسازیێن نوکە ژی دخوازیت ھەمان سیناریۆ دوبارە بکەت، ئەڤرۆ ل بن پەردا چاکسازیێ، دێ عەبادی ھندەک نەیارێن خوە گۆھۆڕیت، چونکی ھندەک کەسێن سیاسی دناڤ حوکمەتێ دا یێن ھەین کو سەرۆک وەزیران دڤێت ئەو کەس نەمینن و ھەموو کەسێن کابینا حوکمەتێ دبن کۆنتڕۆلا عەبادی دا بن، ئەم کورد تنێ بەڕەڤانیێ ژ پشکا 20%ێ یا کوردان دناڤ حوکمەتێ و دەستەیێن سەربخوە دا دکەین و ھەلویستێ مە ناھێتە گۆھۆڕین، بەلێ وەکو من دیارکری ئاریشە ئەوە ھەر دەمژمێرەکێ عەبادی ھەلویستەکی ڕادگەھینیت، نیەتا وی ئەوە ھەتا دەمژمێرێن دووماھیێ یاریێ بکەت و ل دووماھیێ ژی دێ بۆچوونا خوە سەپینیت و وێ بکەت یا ئەو دزانیت”.
په‌رله‌مانتارێ ئاخافتن ده‌رحه‌ق كچێن ئێزدي كرى، دێ سه‌رێ وێ هێته تراشتن
حه‌فتيا بهێت تيروپشك دێ بۆ ناڤێن حه‌جيان هێته كرن
دو رۆژ د ڤێ هه‌يڤێ دا بهێنڤه‌دانن
ئه‌ڤرۆ نيوز:
سه‌فين دزه‌يى په‌يڤدارێ حوكمه‌تا هه‌رێما كوردستانێ راگه‌هاند ب هه‌لكه‌فتا ئازادكرنا عيراقێ و سه‌رسالا ئێزديان كو دبێژنێ جه‌ژنا سور، ل سه‌رجه‌م دام و ده‌زگه‌هێن هه‌رێمێ دو رۆژ بهێنڤه‌دانن.
سه‌فين دزه‌يى په‌يڤدارێ حوكمه‌تا هه‌رێما كوردستانێ راگه‌هاند رۆژا 9 ڤێ هه‌يڤێ ب ب هه‌لكه‌فتا ئازادكرنا عيراقێ و رۆژا 20 ڤێ هه‌يڤێ ب هه‌لكه‌فتا سه‌رسالا ئێزديان كو دبێژنێ جه‌ژنا سور ل هه‌موو دام و ده‌زگايێن حكومى بهێنڤه‌دانن.
ئه‌مریكا ب عه‌بادى ڕاگه‌هاندیه نابیت كورد بهێنه پشت گوه هاڤێتن
ئه‌ڤرۆ نیوز:
جه‌مال كوچه‌ر جێگرێ سه‌رۆكێ فراكسیۆنا ئێكگرتوو ئیسلامى كوردستان ل جڤاتا نوونه‌رێن عیراقێ، دیاركر كو كوردان كاخه‌زێن گڤاشتنێ ل سه‌ر عه‌بادى یێن هه‌ین وبۆ ڕۆژناما ئه‌ڤرۆ گۆت” كورد د جڤاتا نوونه‌رێن عیراقێ دا ب هێزن و 20% كورسیێن وێ یێن هه‌ین، پێگه‌هێ له‌شكرى مه كوردان یێ هه‌ی و سنوره‌كێ درێژ د ده‌ستێ مه‌دایه ل شه‌ڕێ دژی داعشێ، دیسا كوردان پێگه‌هه‌كێ سیاسى یێ هه‌ی و كوردان پێگه‌هه‌كێ نێڤده‌وله‌تی ژی یێ هه‌ی و و نابیت بهێنه لاوازكرن.
جه‌مال كۆچه‌ری زێده‌تر بۆ ئه‌ڤرۆ گۆت” ئه‌مریكا ب عه‌بادى ڕاگه‌هاندیه كو ب چو ڕه‌نگان نابیت كورد بهێنه پشت گوه هاڤێتن و كورد ڤێ قوناغێ دگرنگن بۆمه و مه ئێك كێشه ل ڕۆژهه‌لاتا ناڤین یا هه‌ی و بۆمه خه‌مه ئه‌وژى شه‌ڕێ دژی داعشێ یه، ئیدارا ئۆبامای دڤێت به‌رى هه‌لبژارتنێن ئه‌مریكا داعشێ بشكێنیت، یان گه‌له‌ك لاواز بكه‌ت و ئه‌ڤه بێ كوردان ناهێته‌كرن و نه مووسل بێ كوردان دهێته ئازادكرن و شه‌ڕ ژی ل گه‌ل داعشێ بێ كوردان ناهێته‌كرن، نه ل عیراقێ و نه ژی ل سووریێ”.
خواكر ژی” كورد ناهێنه پشت گوه هاڤێتن و عه‌بادى ژى گۆتیه كوردان و پشتى گوتارا خوه ل جڤاتا نوونه‌ران خواندی، به‌ر مێزا مه هه‌ر پێنچ فراكسیۆنێن كوردى دا هات و گۆت من سێ وه‌زیر بۆ هه‌وه داناینه و ئه‌ڤه نه سه‌پاندنه وهین دشێن ب گوهۆڕن ب تنێ هنده‌ك ته‌كنوكراتان بۆمه ڤرێكه‌ن”.
دییاركر ژی” مه وه‌زیر و بریكارێن وه‌زیران و بالیۆز و كه‌سانێن له‌شكرى یێن هه‌ین و ئه‌ڤه دستوورى داناینه و هه‌كه گوهۆڕین بهێته‌كرن و ڕێژا مه مسوگه‌ر بوو، دێ داهات مه‌زنتر بیت و دڤێت حوكمه‌تا هه‌رێمێ ب گه‌رمى بهێته سه‌ر هێلێ و هه‌تا به‌رسڤا هه‌رێمێ ڤه‌كێشان ژى بیت، هه‌كه مه پێگه‌هه‌كێ ب هێز هه‌بیت، مه چو ده‌مێ دڤێت ئه‌م دشێین ڤه‌گه‌رین كوردستانێ”.
جه‌مالى هێشتا گۆت” مه پێدڤى ب به‌غدا یا هه‌ی ژ چه‌ند خالان، هه‌تا نوكه مه ل هه‌رێما كوردستانێ بڕیار نه‌دایه، مه پێدڤى پێ هه‌یه هه‌تا بڕیارێ دده‌ین، چونكی دڤێت ژێكڤه‌بوونا مه و عیراقێ یا قانوونى و دستوورى بیت، ژ به‌ر كو دبیت وه‌لاتێن زلهێز قه‌بوول نه‌كه‌ن و هه‌كه ب شه‌ڕ ژێ ڤه‌بین و جیران دوژمن بن و هه‌ڤپه‌یمان نه ڕازیبن ژ مه، دێ كه‌ڤینه ئاریشه‌كێ، هه‌تا هه‌كه سه‌ربخوه‌یێ ژى وه‌ربگرین وببینه ده‌وله‌ت، بلا جیرانیا مه یا خوه‌ش بیت و نه هه‌موو ده‌مان شه‌ڕ بیت، چونكی مه ده‌رگه‌ه ئازاد نینن، هه‌ر جارا ئه‌و هه‌ر چار وه‌لاتێن ده‌وروبه‌ر خوه بكه‌نه ئێك، دشێن مه برسی بكه‌ن”.
ئاماژه دا” بۆچوونه‌ك دناڤ سه‌رۆكێن فراكسیۆنان و كه‌سانێن شاره‌زا و ئالیێن سیاسى هه‌یه كو ئه‌و پێرابوونێن عه‌بادى دكه‌ت، دو بۆچوون ل سه‌ر هه‌نه، بۆچوونه‌كا هه‌ى كو ئه‌و پێرابوون ددستوورى نینن و ب تنێ سه‌رۆك وه‌زیران بمینیت، بۆچوونه‌كا دى یا هه‌ى كو ئه‌و پێنگاڤێن بۆ وان پێرابوونان د قۆناغێن قانوونى دا نه‌هاتیه هاڤێتن و نابیت وه‌زیره‌ك بهێته‌دانان و به‌حسێ هه‌لبژارتنا وى بهێته‌كرن و هێشتا وه‌زیرێ حوكمه‌تا دى دكارى دابیت و ده‌ست ژ كاری نه‌كێشا بیت “.
دیاركر ژی” هه‌كه مه‌ره‌ما عه‌بادى لادانا هنده‌ك كه‌سان و ئالیان بیت، دێ ڕه‌فتار به‌رامبه‌ر مه هه‌بیت، به‌لێ هه‌كه مه‌ره‌ما وى ئاڤاكرنا حوكمه‌ته‌كێ بیت ل گه‌ل نوكه ب گونجیت و ئه‌و مه‌رجێن هه‌ردو بانكێن نێڤده‌وله‌تی و ئیسلامى و نه‌ته‌وێن ئێكگرتى بجهبینیت، پێدڤیه حوكمه‌تا كارا بیت و ژ كه‌سانێن شاره‌زا بیت، وى ده‌مى دبیت به‌ر ب ده‌ست ژ كاركێشانا وێ نه‌چین، هه‌كه مافێ كوردان هاته به‌رزه‌كرن كو دڤێت 20% بیت ژ حوكمه‌تا نوو و مه سێ وه‌زاره‌ت دێ هه‌بن و هه‌كه ئالیێن سیاسى وه‌زیرێن خوه نه گوهۆڕین، ئه‌م ژى ناگوهۆڕین و هه‌كه گوهۆڕین دێ بیته بابه‌ته‌كێ دى، پێنگاڤا دویێ، هه‌كه مه‌ره‌ما عه‌بادى یا دروست نه‌بیت، وى ده‌مى دێ پێگه‌هێ كوردى لاواز كه‌ت و نه‌چارین به‌ر ب هه‌لوه‌شاندنا حوكمه‌تا عه‌بادى بچین”.
ب دیتنا جه‌مال كۆچه‌ری” چو تشت ل ده‌ڤ كوردان ناهێته گوهۆڕین و دبیت وه‌زیر بهێنه گوهۆڕین، به‌لێ نابیت وه‌زاره‌ت بهێنه گوهۆڕین كو سێ وه‌زاره‌تن و هه‌ر ئێكێ وه‌زاره‌ته‌ك ل گه‌ل هاتیه لێكدان و ب تنێ به‌حسێ وه‌زیرى كریه”.
جه‌مالی دیاركر كو كورد ژ وه‌زیرێن خوه درازینه و گۆت” نه‌بوونا بۆدجێ ژلایێ وه‌زاره‌تا دارایى ڤه، نه كێشا وه‌زیرى یه ئه‌و ڕێككه‌فتنه‌كا سیاسى یه و به‌رامبه‌ر په‌ترۆلێ یه و هه‌رێم په‌ترۆلێ بۆ به‌غدا ناهنێریت و به‌غدا ژی بۆدجێ ناڤرێكه‌ت”.
ل دووڤ بۆچوونا جه‌مال كۆچه‌ری” شیعان دڤێت حوكمه‌تا زۆرینه پێكبینن كو ل ده‌سپێكێ هنده‌ك وه‌زیر بهێنه‌دانان كو پێگه‌هێ حزبى یێ وانیێ لاواز بیت ونه ب ڕێیا فراكسیۆنێن كوردى بیت و پێنگاڤا دویێ نه‌شێن چ بكه‌ن، چونكی چ پاره نینه دێ وه‌زیر چ كه‌ت و دڤێت بۆدجه‌كا ب هێز هه‌بیت، له‌وما پشتى ده‌مه‌كى دێ هنده‌ك وه‌زیرێن دى ئینیت و پاشی دێ لاده‌ت وحوكمه‌ته‌كێ پێكئینیت و كا چاوان جێگرێن خوه و یێن سه‌رۆك كۆمارى لاداین و كه‌سه‌كێ نه ئاخڤتى، له‌وما دڤێت هه‌رێما كوردستانێ ب ڕژدى بهێته سه‌ر هێلێ كا دێ چ بریارێ ده‌ت”.
قه‌یرانا ئابورى لڤینه‌كا مه‌زن ئێخستیه بازارێ چاندنێ
ئه‌ڤرۆ نیوز:
ئه‌ندازیار و شاره‌زا د بوارێ چاندنێ دا كه‌مال جه‌لال عه‌بدولا دیار دكه‌ت كو قه‌یرانا ئابوورى یا ب سه‌ر هه‌رێمێ دا هاتى و نه‌بوونا مووچه‌یان كارتێكرنه‌كا ئێكجار مه‌زن ل سه‌ر كه‌رتێ چاندنێ كریه و لڤینه‌كا به‌رچاڤ ئێخستیه بازارێ چاندنێ ل هه‌رێما كوردستانێ و ب تایبه‌ت ل دهوكێ و گۆت ( به‌لێ ئه‌ڤ چه‌نده ب جوتیارى ب تنێ ناهێته كرن و فه‌ره حوكمه‌تا هه‌رێما كوردستانێ كارێن ڕاسته‌قینه د هنده‌ك خالان دا بكه‌ت و دڤێت ئه‌ڤ پێنگاڤه د ئێكسه‌ر بن ژ بۆ هندێ ببنه هانده‌ر كو بزاڤا چاندنێ به‌رفره‌هتر ببیت و خه‌لكێ مه به‌ر ب چاندنا گوند و زه‌ڤیێن خوه بزڤرن).
شاره‌زاییێ چاندنێ كه‌مال جه‌لال زێده‌تر بۆ ئه‌ڤرۆ دبێژیت” خالا هه‌ره گرنگ كو پێدڤیه بهێته كرن ئه‌وه كو هندى به‌رهه‌مێ خومالى هه‌بیت نه‌هێلن ب چ ڕه‌نگه‌كى به‌رهه‌مێ ژ ده‌رڤه بهێته ناڤا پارێزگه‌هێن هه‌رێمێ، خالا دویێ ژى ئه‌وه كو پارێزگه‌هێن هه‌رێمێ و ب تایبه‌ت پارێزگه‌ها دهوكێ گه‌له‌ك پێدڤى ب كوگه‌هێن ته‌زیكه‌ر هه‌یه ژ بوى كو ل ده‌مێ به‌رهه‌م زێده دبیت، لێ بهێنه هه‌لگرتن و پاراستن دا پیچ پیچه بكه‌ڤیته بازاری”.
كه‌مالی ئه‌و چه‌نده ژى دیار كر كو پێدڤیه حوكمه‌تا هه‌رێمێ پرۆژه‌یێن مه‌زن بۆ چوتیاران دابین بكه‌ت ژبۆ وێ چه‌ندێ كو بشێن د ناڤا ڤان پرۆژان دا كار بكه‌ن، مینا پرۆژێن ب خودانكرنا ئاژه‌لان و كێلگێن مه‌زن یێن چاندنێ وخانیێن پلاستیكى و خانیێن شوشه‌ى و كارگه‌هێن داگرتنێ.
ئه‌ڤ شاره‌زایێ چاندنێ دبێژیت” پێشكه‌فتن ل هنده‌ك وه‌لاتان گه‌هشتیه وێ چه‌ندێ كو پرۆژه‌یێن ژیێ وان دو سال، به‌رهه‌مێ زه‌ڤیێن بیست سالى به‌رهه‌م دئینیت. هیڤیه ئه‌و پێشڤه‌چوون و ئه‌و پێدڤیێن زانستى بگه‌هنه وه‌لاتێ مه ژى و ئه‌م بشێین ب ڕێیا زانستى وه‌لاتێ خوه پێشبێخین ژ لایێ چاندنێ، نوكه ل جیهانێ دو جورێن به‌رهه‌مى هه‌نه ئێك ژ وان به‌رهه‌مێ سروشتى یه و یێ دى ئه‌و به‌رهه‌مه یێ كو ب هورمونان دروست دبیت و دبیت خه‌لك حه‌ز ژ یی هورموناتان ناكه‌ت، به‌لكو حه‌ز دكه‌ت به‌رهه‌مێ سروشتى بخوت و ئه‌و گه‌له‌ك ساخله‌متره”.
ئه‌و چه‌نده ژى دا خویا كرن كو ل دهۆكێ گه‌له‌ك جاران جوتیار و ب تایبه‌ت یێن زه‌ڤیێن مه‌زن هه‌ین، نه‌شێن سوته‌مه‌نیێ بۆ زه‌ڤیێن خوه دابین بكه‌ن، یان ئه‌و به‌رهه‌مێ به‌رهه‌م دئینن بهایێ وێ سوته‌مه‌نیێ نا ده‌ریخیت یێن لێ مه‌زاختین، له‌وما فه‌ره حوكمه‌تا هه‌رێمێ كار ل سه‌ر وێ چه‌ندێ ژى بكه‌ت كو سوته‌مه‌نیان ل سه‌ر جوتیاران به‌لاڤ بكه‌ت، داكو پتر پشته‌ڤانیا جوتیارى بهێته‌كرن .
كه‌مال جه‌لال دبێژیت” ل ئه‌ڤ ساله ب ده‌هان ته‌نێن سێڤێن ده‌ڤه‌را به‌رواری بالا كه‌فتنه ئه‌ردى و خراب بوون و چ مفا ژێ نه‌هاته وه‌رگرتن ل ده‌مه‌كى كو مه كیلۆیا سێڤێن رۆمانى ب هزار هه‌تا دو هزار دیناران دكڕی، بۆچی سێڤان ژ توركیا و ئیرانێ و سووریێ و ئه‌مریكا دئینن، ل ده‌مه‌كى كو سێڤێن مه د بێ خودانن، هه‌كه كوكه‌هێن ته‌زیكه‌ر و كارگه‌هێن داگرتنێ هه‌بان، دا ب هزاران خه‌لك كار كه‌ن و بیته داهاته‌ك بۆ ملله‌تێ مه و دهه‌مان ده‌م دا به‌رهه‌مه‌كێ خومالى و ب تام”.
شاره‌زایێ چاندنێ ئه‌و چه‌نده ژى دیار كر كو دڤێت حوكمه‌تێ به‌رنامه‌یه‌ك هه‌بیت كا دێ چه‌وا به‌رهه‌مى ژ جوتیارى وه‌رگریت و بكارئینیت، ئه‌ردێ مه و جوتیارێن مه و ده‌رچویین كولیژێن چاندنێ هه‌موو هاریكارن كو هه‌رێم بشێت به‌رهه‌مى تێرا خوه و هه‌موو عیراقێ به‌رهه‌م بینیت و ئه‌ڤ چه‌نده دێ بیته ئه‌گه‌ر كو ژێرخانا ئابوورى ل هه‌رێمێ بهێز بكه‌ڤیت و پاره‌یه‌كێ مه‌زن نه‌چیته ده‌رڤه‌ى وه‌لاتى.
هانده‌ره‌كێ ریال ترۆمبێلا خوه سووت
هه‌ولێر، قائید میرۆ
شه‌ڤا بۆری هانده‌ره‌كێ یانا ریال مه‌درید ژبه‌ر ده‌ربڕینا كه‌یفخۆشیا خوه بۆ سه‌ركه‌فتنا ریال مه‌درید ترۆمبێلا خوه سووت.
كه‌سه‌كێ نێزیكی روویدانێ ب ئه‌ڤرۆ نیۆز راگه‌هاند” شه‌ڤا بۆری پشتی سه‌ركه‌فتنا یانا ریال مه‌درید بسه‌ر یانا به‌رشلۆنه د یاریا كلاسیكۆدا جه‌ماوه‌رێ یانا ریال مه‌درید رژیانه سه‌ر جاده‌یان ده‌ست و ب ئاهه‌نگێن خوه‌شیێ كرن. ل ناحیا رزگاریا سه‌ر ب قه‌زا خه‌بات روویدانه‌كا ئاگربه‌ربوونێ ژی لێكه‌فت.
ژێده‌ری گۆت ژی” پشتی گه‌نجه‌كێ هانده‌رێ ریال بۆ چه‌ندین جارا ترۆمبێلا دجهدا زڤڕاندی ترۆمبێلا وی ئاگر به‌ربوویئ و ب ئیكجاری سووت.
نيشاندان
WP Facebook Auto Publish Powered By : XYZScripts.com