ئەڤرۆ نیوز:
سکرتێرێ حزبا سوشیالیستا دیموکراتی کوردستان ڕاگەھاند، نوکە چو تشت نەمایە بەغدا و کوردستانێ پێگڤە گرێ بدەت و نوکە باشترین دەمە کورد بڕیارێ ل سەر چارەنڤیسێ خوە بدەن و دیارکر تنێ ب وێ ھێزا پێشمەرگەی ئەوا مە نوکە ھەی، ئەم دشێین کوردستانێ بپارێزین و نەھێلین چو ھێزەک ھێرشی کوردستانێ بکەت.
محەمەد حاجی مەحموود ددیدارەکێ دا ل گەل گۆڤارا گۆلان گۆت” کوردان جە ل بەغدا نەمایە و نوکە چو تشت نەمایە بەغدا و کوردستانێ پێکڤە گرێ بدەت، ئەو بودجا کوردستانێ و یا ھاتیە بڕین و نەمایە، سەبارەت پرۆسا سیاسی ژی، بەری دەمەکی بەغدا جێگرێ سەرۆک وەزیران و ھژمارەکا وەزیرێن کورد ھنارتنە کوردستانێ، چەند ڕۆژە ژی ئەو سێ وەزیرێن کورد یێن ل بەغدا ماین، بێ زڤرین بۆ کوردان دێ وان ژی لادەن، بەری نوکە ژی سەرۆک ئەرکانێن لەشکرێ عیراقێ کو کوردبوو ھاتبوو لادان، کوردەک فەرماندێ ھێزا ئەسمانی یا عیراقێ بوو ئەوژی ھاتە لادان، لەوما ھەکە عیراق نیشتمانێ ھەڤپشکێ کورد و عەرەبان بیت، پێدڤیە عیراق وەکو نەتەوێ سەرەکی ڕەفتارێ ل گەل کوردان بکەت، ھەکە کورد دگەلدا نەمینیت، عیراق ژی وەکو سعودیا عەرەبی و یەمەنا عەرەبی و مەغربا عەرەبی دێ لێ ھێت و بوون نامینیت”.
گۆت ژی” کورد ب خوە بەغدا بجە ناھێلن، ھەکە نە عیراق ل سەر دەستی شیعە و سونەیان یا بوویە سێ دەولەتێن جودا و پێدڤیە کورد بەغدا بجە بھێلن و بزڤرن کوردستانێ” دیسا گۆت” باشە ما چ ل بەغدا مایە ھەتا لایەنێن سیاسی یێن کوردی ل سەر ئێک ھەلویست بن؟، ھەکە ڕاست دبێژن بلا ل سەر ئەنجامدانا ڕیفراندۆمێ ئێک ھەلویست بن، بلا ئێک ھەلویست بن ل سەر شەڕێ دژی داعشێ و ئەو ھەموو پشکداریێ تێدا بکەن، بلا ئێک ھەلویست بن ل سەر قۆناغا پشتی ئازادکرنا مووسلێ، بلا ئێک ھەلویست بن ل سەر سەربخوەیا کوردستانێ”.
ناڤبری گۆت” پێدڤیە کورد د ئێکگرتی بن، بۆ چارەکرنا کێشان ژی ئەرکی مەزن یێ ل سەر ملێ پارتی دیموکراتی کوردستان و ئێکەتی نیشتمانی کوردستان، لەوما پێدڤیە ئەو دو لایەنە بڕیارێ بدەن و ل سەر چو لایەکی ڕانەوەستن و پێکڤە ھەموو حزبێن سیاسی کۆم بکەن و بزاڤێ بکەن بڕیارێ ل سەر چارەکرنا کێشان بدەن ھەتاکو ئەڤ ڕەوشا ھاتیە پێش ژدەست نەدەین”.
خویاکر ژی” بڕیارا سەربخوەیێ پەیوەندی ب پشتەڤانیا نێڤدەولەتی ڤە نینە و چو جارەکێ دەولەتێن جیھانێ ل سەر سێنیەکا زێرێن سەربخوەیێ بۆ چو نەتەوەکی نابەن، لەوما پێدڤیە گەلێ کوردستانێ بڕیارێ بدەت کو سەربخوە بیت”.

ئه‌ڤرۆ نيوز، ئۆمێد وه‌لاتى:

ژێده‌ره‌كى ژ راگه‌هاندنا فه‌رمانده‌يا هێزێن پشته‌ڤانيا ئێك ميحوه‌رێ خازر ل گۆندێن “ترجله‌، شێخ ئه‌مري، به‌ده‌نه‌يا مه‌زن، زه‌هرا خان و تل ئه‌سوه‌د” چه‌كدارێن تيرۆرستێن داعش ب دژوارى سه‌نگه‌رێن پێشمه‌رگه‌ى ل گۆندێن خه‌سه‌ن شام تۆپبارانكرن، به‌لێ هه‌ر زوو ژ لايێ تۆپخانێن فه‌رمانده‌يا هێزا پشته‌ڤانيا ئێك ب چرى باره‌گايێن تيرۆرستان تۆپبارانكرن و شيان ب زووترين ده‌م تيرۆرستان بێ ده‌نگ بكه‌ن.

ب گۆره‌ى ژێده‌رێن مه‌يدانى ژى زيانێن مه‌زنێن ب به‌ر چه‌كدارێن داعش كه‌فتين.