ئه‌ڤرۆ نيوز:
ب فه‌رمانا دادوه‌ر و د چارچوڤێ چاكسازيێن سه‌رۆكێ هه‌رێما كوردستانێ، چه‌ند به‌رپرسێن رێڤه‌به‌ريا كوچ و كوچبه‌ران يا سه‌ر ب وه‌زاره‌تا ناڤخو هاتينه گرتن.
مالپه‌رێ رووداو به‌لاڤكريه كو ب فه‌رمانا دادوه‌رێ ده‌سته‌يا نه‌زاهێ و د چوارچوڤێ چاكسازيێن مه‌سعود بارزانى سه‌رۆكێ هه‌رێما كوردستانێ، ب تومه‌تا گه‌نده‌ليێ فه‌رمانا گرتنێ بۆ چه‌ند به‌رپرسێن رێڤه‌به‌ريا كوچ و كوچبه‌ران يا سه‌ر ب وه‌زاره‌تا ناڤخو ڤه ده‌رچوويه.
ئەڤرۆ نیۆز، قائید میرۆ:
ھاتن وچوونا ھەولێرێ رادگەھینیت ھژمارەک شوفێرێن تەکسیێ ھەمبەر مۆل و نەخۆشخانا داگیرکریە ناھێلێن شوفێرێن دی کاربکەن.
رائید فازل حاجی، پەیڤدارێ پۆلیسێن ھاتن وچوونا ھەولێرێ ب ئەڤرۆ نیۆز راگەھاند” رێڤەبەرایەتیا ھاتن وچوونێ بڕیاردایە چو تەکسیا بۆنینە ھەمبەر دەرگەھێ بازاڕ و مۆل و جھێن گشتی داگیربکەن و بەرۆڤاژی دێ ھێنە سزادان، ھژمارەک شوفێر رێکێ نادەن شوفێرێن دی ھەمبەر نەخۆشخانە و مۆل و جھێن گشتی راوەستن و ئەڤەژی دەرڤەی قانوونێ یە.
رائید فازلی گۆتژی” مە بڕیارەکادی دەرکریە بۆ ڤان تەکسیێن لۆگۆیێن مۆل و جھێن بازرگانی بکار دئینن ھەر شوفێرەکێ سەرپێچیێ بکەت، ئەڤە دێ ھێتە سزادان.
ئه‌ڤرۆ نيوز:
سه‌رۆكێ جڤاتا نوونه‌رێن عيراقێ يێ لاداى، سه‌ليم جبۆرى، ب رێيا نامه‌كا مۆبايلێ گه‌ف ل مه‌شعان جبۆرى يێ نوونه‌ر ل جڤاتا نوونه‌ران كرن.
ئه‌ڤ نامه ژ لايێ مه‌شعان جبۆرى ڤه ل تۆڕا جڤاكيا فه‌يسبۆكى هاتيه به‌لاڤكرن و ل گه‌ل نڤيسيه: “ڤێ نامێ به‌رچاڤى گه‌لێ عيراقێ دكه‌م ئه‌وا ژ لايێ سه‌رۆكێ جڤاتا نوونه‌ران يێ به‌رى بۆ من ب رێيا مۆبايلێ هاتى و تێدا گه‌فان ل من دكه‌ت كو ژ هه‌لويستێ خوه لێڤه بم و من ب كه‌سه‌كێ قه‌رقۆزێ مالكى و شيعان ب ناڤ دكه‌ت”.
ئه‌ڤرۆ نيوز:
ئه‌ڤرۆ رۆژا ئێكشه‌مبى خۆنيشانده‌ران ل ده‌ڤه‌ران كه‌سك رێيا خوه گوهۆڕى و هێرش كره سه‌ر چار وه‌زاره‌تان و خواست كو به‌رپرسێن وان وه‌زاره‌تان ده‌ست ژ كارێ خوه به‌رده‌ن.
ل به‌غدا يا پايته‌ختێ عيراقێ خۆنيشاندانان ده‌سپێكر و چار وه‌زاره‌ت ئابلۆقه‌دان و خۆنيشانده‌ر داخوازا ده‌ست ژ كاركێشانا به‌رپرسێن وان چار وه‌زاره‌تان دكه‌ن.
هێزێن ئه‌منى يێن وان وه‌زاره‌تان رێيێن چوونا ناڤ ئاڤاهيێن وان وه‌زاره‌تان گرتينه و رێ ب خوه‌نيشانده‌ران ناده‌ن بچنه ژوور و فه‌رمانبه‌ر ژى نه‌شێن نوكه ب ده‌ركه‌ڤن.
ب گۆره‌ى ژێده‌رێن ده‌نگوباسێن عيراقى، خۆنيشانده‌ران باره‌گايێن هه‌ر ئێك ژ وه‌زاره‌تا داد و ده‌رڤه ل ده‌ڤه‌را سالحيه و ره‌وشه‌نبيرى ل ده‌سپێكا جادا حه‌يفا و ئاڤه‌دانكرن و بنه‌جهكرنێ ل ده‌ڤه‌را عه‌لاوى دوورپێچكرينه و داخواز ژ به‌رپرسێن وان دكه‌ن ده‌ست ژ كارێ خوه به‌رده‌ن.
هێزێن ئه‌منى ژى ب ره‌نگه‌كێ گه‌له‌ك به‌رفره‌هـ ل وان ده‌ڤه‌ران دهێنه ديتن و فرۆكێن كۆپته‌ر يێن هێزێن ئه‌منى ژى ل هنداڤى خۆنيشانده‌ران هاتنوچوونێ دكه‌ن.
ئەڤرۆ نيوز:
رێڤەبەرێ گشتیێ باژێرڤانیان ل پارێزگەھا دھۆکێ ئاشکرا کر کو د ماستەر پلانا دھۆکێ دا کو بۆ ماوێ 25 سالان ھاتیە دانان، تۆنێلەکا مەزن و ھەڤچەرخ د ناڤبەرا دھۆکا نوو و دھۆکا کەڤن دا دێ ھێتە چێکرن.
ئەندازیار ھەڤال ئەحمەد ئامێدی، رێڤەبەرێ گشتیێ باژێرڤانیان ل پارێزگەھا دھۆکێ دیار کر، ماستەر پلانەک ژ لایێ کۆمپانیا ڤۆسینگ یا ئەلمانی ڤە بۆ پارێزگەھا دھۆکێ ھاتیە چێکرن و تێدا دھۆکا نوو ل پشت چیایێ زاوا ل رۆژئاڤایێ دھۆکێ ھاتیە چێکرن و بۆ ئەڤرۆ گۆت: “ئەو ماستەرپلانا ھاتیە بەرھەڤکرن، پێدڤیە د دەمێ 25 سالان دا بھێتە ب جھئینان”.
گۆتژی: “د دەمێ دیارکری دا و ھەر سالەکا مە شیانێن دارایی ھەبن و ب مەرەما پێکڤەگرێدانا ھەردو دھۆکان تۆنێلەک دێ ھێتە چێکرن”.
ناڤبری ئاماژە ب وێ چەندێ ژی کر، ھەتا نوکە دھۆکا نوو ب تنێ ماستەرپلانە و جھێ وێ ھاتیە دیارکرن، بەلێ ھەتا نوکە چو پارچە ئەرد لێ نەھاتینە بەلاڤکرن.
رێڤەبەرێ گشتیێ باژێرڤانیان ل پارێزگەھا دھۆکێ خویا ژی کر، ل گۆرەی وێ ماستەرپلانا نوو، باژێرێ دھۆکێ دێ بەرفرەھتر لێ ھێت و چیایێ زاوا یێ گەشتیاری دێ بیتە پرەک د ناڤبەرا دھۆکا نوو و کەڤن دا و گۆت: “ماستەرپلانا دھۆکێ ھەتا سالا 2032 دێ کار تێدا ھێتەکرن و ل دووڤ وێ ماستەرپلانێ دێ دھۆکا نوو ھێتە چێکرن و حەفت تاخێن نوو دێ لێ ھێنە زێدەکرن”.
ئەڤرۆ نيوز:
وەزارەتا دارایی و ئابووری یا حوکمەتا ھەرێما کوردستانێ بڕیار دا باجا ل سەر ئینانا ترۆمبێلان بۆ ناڤ ھەرێما کوردستانێ ب رێژەکا بەرچاڤ زێدە بکەت، د چەند رۆژێن بھێن ژی دا رێنمایێن تایبەت ب وێ بڕیارێ دێ ئاراستەی رێڤەبەریێن باجا دەرامەتی یێن کۆمپانیان ھێنەکرن.
د نوکە دا باجا ل سەر ئینانا ترۆمبێلێن مەزن 200 ھزار دینار و ترۆمبێلێن بچووک ژی 120 ھزار دینارن و ل دووڤ وان پێزانینێن وەزارەتا دارایی و ئابووری یا حوکمەتا ھەرێما کوردستانێ بۆ SNN ئاشکرا کر، حوکمەتا ھەرێما کوردستانێ بڕیار دایە ئەوان باجان زێدەتر لێ بکەت.
ھەروەسا ل گۆرەی پێزانینان، ل دۆر چەوانیا شێوازێ زێدەکرنا باجێ ل سەر ئینانا ترۆمبێلان، وەزارەتا دارایی و ئابووری بڕیار دایە د دەمەکێ نێزیک دا رێنمایان ئاراستەی رێڤەبەریێن باجا دەرامەتی یێن کۆمپانیان بکەت.
ئاماژە ب وێ چەندێ ژی کریە کو وەزارەتا دارایی باجا ل سەر ترۆمبێلێن مەزن ژ 200 ھزار دیناران بۆ 750 ھزار دیناران زێدەکرینە، ھەروەسا باجا ل سەر ترۆمبێلێن بچووک ژی ژ 120 ھزار دیناران کرینە 500 ھزار دینار.
ئەڤرۆ نیوز:
کچەکا کوردا ئێزدی پشتی خوە ژ دەستێن تیرۆرستێن داعشێ رزگارکری، ل پارێزگەھا کەرکووکێ و دناڤبەرا سەنگەرێن پێشمەرگەی و سنوورێ داعشێ دا مینەک پێڤە دپەقیت و گیانێ خوە ژ دەست ددەت.
ئەو کچا کوردا ئێزدی پشتی بۆ دەمێ پتر ژ سالەکێ مایە د دەستێن تیرۆرستێن داعشێ دا، شیا خوە ژ دەستێن وان رزگار بکەت، لێ بەری بگەھیتە ناڤ کەسوکارێن خوە، ل ژێریا پارێزگەھا کەرکووکێ و د ناڤبەرا سەنگەرێن پێشمەرگەی و سنوورێ داعشێ دا، ل رۆژا پێنجشەمبیا بۆری 14/4/2016 مینەک پێڤە پەقی و گیانێ خوە ژ دەست دا.
ئەو کچا ئێزدی بناڤێ (کاترین ئلیاس موراد)ە و ژ دایکبوویا سالا 1996 و دبیتە دۆتماما (نادیا مورد)ێ بالیۆزا ئاشتیێ و بەربژارا خەلاتێ نۆبل.
ئەڤرۆ نیوز:
رێڤەبەرێ حەج و عومرێ ل پارێزگەھا دھۆکێ بۆ ئەڤرۆ دیار کر کو ناڤێن حەجیێن بڕیارە ئەڤ سالە گەشتا حەجێ بۆ وەلاتێ سعودیێ ئەنجام بدەن ھاتنە دیارکرن، ئەڤ سالە سێ ھزار و 656 کەس دێ چنە حەجێ و چەندین گوھۆرین کەتینە مەرجێن ئەڤ سالە یێن چوونا حەجێ کو 891 ژ وان یێن پارێزگەھا دھۆکێ نە.
شێخ شەمسەددین تاھر، رێڤەبەرێ حەج و عومرێ ل پارێزگەھا دھۆکێ ئاشکرا کر، دوھی 16-4-2016 ل ھەولێرێ پشککێشان بۆ ناڤێن 78 ھزار و 830 حەجیێن ھەرێما کوردستانێ ھاتەکرن کو ھەموو ئەو بوون یێن ل سالا 2010 ھاتینە نڤێسین و گۆت: “332 وەلاتیێن دھۆکێ یێن حەجا خوە پاشئێخستی دێ ئەڤ سالە چنە حەجێ، ب رەنگەکێ گشتی ل سەرانسەری پارێزگەھا دھۆکێ 891 کەس ئەڤ سالە دێ قەستا وەلاتێ سعوودیێ کەن بۆ ب جھئینانا فەریزا حەجێ”.
شێخ شەمسەدینی خویا ژی کر، مەرجێن چوونا حەجێ بۆ ئەڤ سالە ھاتینە گوھۆرین و گۆت: “بریار ھاتیەدان، ئەڤ سالە کەسێ ناڤێ وی دەرکەڤیت و ھەتا ژ ئەوان کەسان ژی بیت یێن پار بۆ ئەڤ سالە ھاتینە پاشخستن مافێ وی دێ ھێتە سۆتن و کەسەک ناھێتە جھێ وی، ئەڤ سالە لێک گوھارتن نینە، کو ئێک بچیتە جھێ ئیکی، دیسا داگێران ژی نینە، کو وەلاتیەک بۆ بابێ خوە یان کەسەکی بکەت و پێشڤە بچیتە حەجێ و پاشخستن ژی نینە، ھەر کەسەکێ ناڤێ وی دەرکەت د ماوەکێ کێم دا دڤێت بھێت پارێن خوە بدەت و یێ ل دووڤ ژڤانێ خوە نەھات مافێ وی دێ ھێتە سۆتن”.
ل دۆر وێ چەندێ کانێ ھەر حەجیەک دێ چەند پارەی بۆ ئەڤ سالە دەت؟ شێخ شەمسەددین گۆت: “بۆ ئەڤ سالە ھەر حەجیەکێ ھەرێما کوردستانێ دێ سێ ھزار و 300 دۆلاران دەت”.
ژ لایەکێ دیڤە مەریوان نەڤشبەندی، رێڤەبەرێ پەیوەندیان ل وەزارەتا ئەوقاف و کاروبارێن ئاینی ل حوکمەتا ھەرێما کوردستانێ دا زانین کو ئەڤە دووماھی پێشککێشانە بۆ ناڤێن ل سالا 2010 ھاتینە نڤیسین دھێتەکرن و گۆت: “سالا بھێت دێ دەست ب نڤێسینا ناڤێن نوو ھێتەکرن”.
نيشاندان