ئەڤرۆ نیوز:
پشتی کو ھێزێن پێشمەرگێ کوردستانێ ل 13/11/2015 شنگال و دەردۆرێن وێ ژ دەستێ ڕێکخراوا تیرۆرستیا داعش ئینایە دەرێ، گەلەک گۆرێن بکۆم یێن کوردێ ئێزدی ھاتنە دیتن کو ب دەستێ تیرۆرستێن داعش ب کۆم ھاتینە کوشتن، وەسا بریار بوو ئەڤ ئیسالە زێدەتر ژ ھەشت گۆڕێن ب کۆم ژوان گۆڕان کو ھژمارا وان دگەھیتە زێدەتری 20 گۆڕێن ب کۆم، بھێنە کولان، لێ ھەیا نھا نەھاتینە کولان.
فوئاد عوسمان پەیڤدارێ وەزارەتا ئەنفالکری و شەھیدێن حوکمەتا ھەرێما کوردستانێ خویا کر کو د ڤان ڕۆژێن داھاتی دا بڕیارە کارێ کولانا گۆڕێن ب کۆم ێین حەردانێ دەست پێ بکەت و بۆ ڕۆژناما ئەڤرۆ گۆت “پشتی رزگارکرنا شنگالێ تیمێن مە سەرەدانا وان گۆڕێن ب کۆم کو ل حەردان و شنگاڵ و دەردۆرێن وان ھاتیە کرن و پشتی وێ ژی ژ بۆ کولانا وان گۆڕێن ب کۆم یێن دوریانا حەردانێ مە لیژنەک پێک ئینا و ڕێکێن یاسایی و ھونەری مە گرتینە بەر ، ھەروسا مە داخوازا بۆدجەی ژی ژ وەزارەتا داریی کر، کو ب خۆشحالی ڤە ئەو بۆدجا مە داخاز کری ژ ئالیێ وەزارەتا دارایی ڤە ھاتیە تەرخانکرن”.
پەیڤدارێ وەزارەتا ئەنفالکری و شەھیدێن حوکمەتا ھەرێما کوردستانێ دیار کر کو چ ئاریشە نینن، لێ کارێ لیژنا وان وەسا دخوازیت کو پشتی کارێن یاسایی ل دھۆکێ ب دووماھی دھێن، ھەروەسا ھەتا وان گۆڕێن ب کۆم ژ مین و تەقەمەنیان دھێنە پاقژکرن، ژ نوو ئەو دێ شێن وان گۆڕان کولن و گۆت “بڕیاڕە ئەڤرۆ یان سباھی لیژنا یاسایی یا دھۆکی پەیوەندیێ ب مە بکەت، کو ئەم دەست ب کارێن خوە بکەین و تیمێن خوە رەوانەی دوریانا حەردانێ بکەین و وان ھەشت گۆڕێن ب کۆم بکولین”.
د درێژایا ئاخفتنێن خوە دا فوئاد عوسمان پەیڤدارێ وەزارەتا ئەنفالکری و شەھیدێن حوکمەتا ھەرێما کوردستانێ گۆت “گەلەک گۆڕێن ب کۆم ژ سەنگەرێن پێشمەرگەی نێزیکن، ژبەر وێ یەکێ ئەم نھا نەشێین ھەموویان دەربێخین، ھەیا کو شەڕ ب تمامێ ل دەردۆرێن شنگاڵێ دووماھی نەھێت”.