ئەڤرۆ نیوز:
ب مەرەما سڤککرنا بارگرانیا دارایی ل سەر حوکمەتێ، حوکمەتا ھەرێما کوردستانێ لژنەک بۆ کێمکرنا وەزارەتان و چاڤخشاندنێ ب ھەیکەلێ کارگێریێ یێ حوکمەتێ پێکئینایە.
فەرسەت سۆفی، ئەندامێ پەرلەمانێ کوردستانێ ئاشکرا کر کو مەرەم ژ پێکئینانا ڤێ لژنێ ئەوە کو کاری رێکبێخیت و ئەو بارگرانیا دارایی یا ل سەر ملێن حوکمەتێ سڤک بکەت و بۆ خەندان گۆت: “ڤی کاری پێدڤی یا ب پێشکێشکرنا پرۆژە پێشنیازەکێ یە ژ لایێ حوکمەتێ ڤە داکو پەرلەمان ب شێوەکێ قانوونی رێ یێ بۆ پێنگاڤێن وان خوەش بکەت”.

ئه‌ڤرۆ نيوز:
پەیڤدارێ وەزارەتا ئەوقاف و کاروبارێن ئایینی ل حوکمەتا ھەرێما کوردستانێ بۆ رۆژناما ئەڤرۆ دیار کر کو وەزارەتا ناڤبری ئەڤ سالە دەست ب چاکسازیان د بکارئینانا مۆلکێن وەزارەتێ و داھاتێ وێ دا کریە و بۆ پتری سێ ملیار دیناران زێدەبوویە و گۆت: “پتریا وی داھاتی ژی یێ سنوورێ پارێزگەھا دھۆکێ یە، لێ مەزاختنێن وەزارەتێ ژ داھاتێ وێ پترن”.
مەریوان نەقشبەندی، پەیڤدارێ وەزارەتا ئەوقاف و کاروبارێن ئایینی ل حوکمەتا ھەرێما کوردستانێ ڕاگەھاند، سالێن بۆری داھاتێ مۆلکێن وەزارەتا ئەوقافێ د سالەکێ دا دو ملیار دینار بوون، لێ پشتی وان چاکسازی د بکارئینانا مۆلکێن وەزارەتێ دا کری و دووڤچوون ل سەر کرین، داھاتێ وەزارەتێ بۆ ئەڤ سالە زێدەبوویە و گەھشتیە پتری سێ ملیار دیناران و گۆت :”پتریا داھاتێ مۆلکێن وەزارەتا ئەوقافێ، ل سنوورێ پارێزگەھا دھۆکێ یە، کو سالانە دگەھیتە ملیارەک و 300 ملیۆن دیناران، پارێزگەھا دویێ سلێمانیێ یە کو نێزیکی ملیار دینارانە و یێ ھەولێرێ کێمترین داھاتە و سالانە نێزیکی 700 ملیۆن دینارایە”.
ناڤھاتی خویا ژی کر، مەزاختنێن وان گەلەکن، بۆ نموونە د سالا بۆری دا ب تنێ کرێیا کارەبا مزگەفت و کەنیسە و جھێن ئایینی یێن وەزارەتا ئەوقاف و کاروبارێن یا حوکمەتا ھەرێمێ نێزیکی شەش ملیار دیناران بوون.
نەقشبەندی ئاماژە ب وێ چەندێ ژی کر، پتریا مزگەفتان پیڤەرێن کارەبێ نینن، چونکو ھەتا سالا 2010 مزگەفت و کەنیسان کرێیا کارەبێ نەددان، لێ پشتی ھینگێ مەزاختنێن وان ئێخستنە سەر بودجا وەزارەتێ.

ئەڤرۆ نيوز:
جڤاتا وەزارەتا خواندنا بلند و ڤەکۆلینێن زانستی یا حوکمەتا ھەرێما کوردستانێ د ڕاگەھاندنەکێ دا بڕیار دا، ھەموو قوتابیێن تەرقین قەید یێن خواندنا بەرایی بۆ سالا بھێت یا خواندنێ 2016 – 2017 ڤەگەرنە سەر خواندنا خوە، لێ ل زانکۆیێن حکومی دێ ب شێوێ پارالێل بیت.
ل دووڤ وێ ڕاگەھاندنا جڤاتا وەزارەتا خواندنا بلند و ڤەکۆلینێن زانستی، ئەڤ بڕیارا جڤاتا وەزارەتێ د کۆمبوونا وێ یا دوھی 22/2/2016 دا ھاتە دان و تێدا ھاتیە: “قوتابیێن زانکۆیێن ئەھلی ژی ب ھەمان رێنمایا دارایی کو ل زانکۆیێن ئەھلی دھێتە پەیرەوکرن، قوتابیێن تەرقین قەید ڤەگەرنە خواندنا خوە، لێ ئەو قوتابیێن ژ ئەگەرێ قوپیایێ یان ب بڕیارا لژنا رێکاریا قوتابیان ھاتینە تەرقین قەیدکرن، ئەڤ بڕیارە وانا ڤەناگریت”.
ئاماژە ب وێ چەندێ ژی کریە، ھەر قوتابیەکێ خواندنا بلند، پشتی تمامبوونا دەمێ وی یێ قانوونی، داخوازا درێژکرنا دەمێ خواندنێ بکەت، خواندنا وی دێ بۆ بیتە سیستەمێ پارالێل.

ئەڤرۆ نیوز:
فڕاکسیۆنا پارتی دیموکراتی کوردستان دەست ب بەرھەڤکرنا پڕۆژەکێ چاکسازیێ دناڤ حوکمەتا ھەرێما کوردستانێ و پارتی دیموکراتی کوردستان کریە و جێگرا سەرۆکێ فڕاکسیۆنی َژی دبێژیت، لژنەک بۆ ڤێ مەرەمێ یا ھاتیە پێکئینان و دێ ڕاپۆرتەکا تمام ل دۆر گەندەلیێ دەینە سەرۆک بارزانی و مفا ژ پڕۆژێن وەلاتێن بیانی یا ھاتیە وەرگرتن بۆ نەھێلانا گەندەلیێ، ھەروەسا دیارکر، بڕیارە ل دەمەکێ نێزیک دو لژنە بۆ بجھئینانا پڕۆژێ چاکسازیێ یێ سەرۆک بارزانی بھێنە پێکئینان و مەکتەبا سیاسی دێ ڕێنمایان بۆ لژنێ دەرکەت.
ئامینا زکری، جێگرا سەرۆکێ فڕاکسیۆنا پارتی دیموکراتی کوردستان ل پەرلەمانێ کوردستانێ، بۆ ڕۆژناما ئەڤرۆ گۆت” نوکە فڕاکسیۆنا پارتی مژوولی بەرھەڤکرنا پڕۆژەکێ چاکسازیێ نە بۆ سەرۆک بارزانی وەکو پشتەڤانیەک بۆ بڕیارێن سەرۆکێ ھەرێما کوردستانێ ل دۆر چاکسازیێ دناڤ حوکمەتێ و پارتی دیموکراتی کوردستان دا، دوھی مە کۆمبوونا خوە یا ئێکێ گرێدا و لیژنەک بۆ بەرھەڤکرنا پڕۆژەی یا ھاتیە پێکئینان، ھەم بۆ چاکسازیێ دناڤ حوکمەتێ دا و ھەم ژی بۆ چاکسازیا دناڤ پارتی دا دێ ڤەگریت”.
ئامینایێ گۆت ژی” ھندەک پڕۆژێن وەلاتێن دەوروبەر یێن تایبەت ب بیاڤێ چاکسازیێ ڤە مە یێن ئیناین و دێ مفا ژ سەربۆرا وەلاتێن دی ھێتە وەرگرتن و ڕاپۆرتە ھێتە بەرھەڤکرن و بلندکرن بۆ سەرۆک بارزانی، پشتی سەرۆک بارزانی ڤەگەڕیایە ھەرێما کوردستانێ، بڕیارە ڕێنمایی بھێنە دەرکرن و لیژنەک بۆ بجھئینانا بڕیارێن سەرۆک بارزانی بۆ چاکسازیێ بھێتە پێکئینان، ناڤەڕۆکا پڕۆژێ فڕاکسیۆنا پارتی ھێشتا نەھاتیە دارێشتن، تنێ مە ب شێوەکێ گشتی مە دانوستاندن یێن ل دۆرکرین و دێ بڕیار ل سەر ھێتەدان، چونکی لژنە دێ بڕیارێ دەت کا چ پێدڤیە بھێتە نڤیسین بۆ سەرۆک بارزانی”.
خویاکر ژی” د پڕۆژێ خوەدا، سەرۆک بارزانی دەستێ خوە دانایە سەر ھەموو ڤان خالێن پێدڤیە بھێنە چارەسەرکرن و گەندەلی بھێتە بنبڕکرن، ھەر ژوان کەس و کۆمپانیێن ل سەر حیسابا پارتی دەولەمەند بووین و …ھتد، دو لژنە دێ ھێنە پێکئینان بۆ پرۆژێ چاکسازیا سەرۆکی ڕاگەھاندی کو ئێک ل سەر ئاستێ حوکمەتێ و یا دی ژی ل سەر ئاستێ پارتی، بەلێ ڕێنمایی دێ ژلایێ مەکتەبا سیاسی یا پارتی دیموکراتی کوردستان ڤە ھێنە دەرکرن، ھەتا ئاسانکاری بۆ لژنێ بھێنەکرن و ھەر ژبارەگایێن حزبی ھەتا وەبەرھێنانێ و چاندنێ و گەلەک بیاڤێن دی دێ ڤەدگریت”.
دیارکر” دەربارەی چاکسازیا حوکمەتێ ژی، پەرلەمانێ کوردستانێ ل سالا 2011 قانوونا دەستەیا دەستپاکیێ دەرکریە و ھەرێما کوردستانێ دەستەیا دەستپاکیێ یا ھەی و ل دووڤ قانوونێ، دەستەیا ناڤبری دەستھەلاتا چاڤدێریێ و کۆمکرنا کۆمکرنا پێزانینان ل دۆر گەندەلیێ یا ھەی”.