ئەڤرۆ نیوز:
دلڤین محەمەد سەلیم ئەنداما جڤاتا پارێزگەھا ھۆکێ و سەرۆکا لژنا باژێرڤانی و خزمەتگوزاریێن گشتی بۆ ئەڤرۆ دیارکر بۆ کێمکرنا بھایان، ئەم یێن ل سەر کەرتان ھاتینە پارڤەکرن و نوکە کارێ من ل سەر کێمکرنا بھایێن ڤەگوھاستنێ یە دکەین کو ل گەل ژیارا وەلاتیان ب گونجیت.
دلڤینێ گوت ژی”نوکە ئەم مژوولی دانانا میکانزما کێمکرنا بھایا نین و ئەم یێن ل گەل ھەموو سازیێن گرێدای ب ھاتنوچوونێ ڤە روونشتین و ھەموو لایەن دھەڤکار بوون، بەلێ ھێشتا ئەم نە گەھشتینە ئەنجامان” .
محەمەد شیکەیی سەرۆکێ سەندیکا ڤەگوھاستنێ ل دھۆکێ دیارکر، ھێشتا ئەم یێن د قۆناغا دانوستاندنێ دا وھەتا نەگەھینە ئەنجامەکی، نەشیێن چ دیار بکەین.
حەسەن ئیسماعیل شوفێرێ تەکسیێ یە، ب تورەیی ڤە گۆت” دەمێ پانزین بۆ 900 دیناران بلند بووی، من ھەر نەفەر ب سێ ھزاران دبڕن، نوکە ژی ھەر ب سێ ھزاران نەفەران دئینم و دبەم” گوت ژی” نیڤەکا ترومبێلا قەرە ل سەر من و ئەز نەشێم نەفەران بۆ ھەر جھەکی بکەمە دو ھزار دینار، چونکی رەوشا من یا ئابووری گەلەک یا نەخوەشە، دسەر ھندێ ڕا ئەم ژی ھزرا ڕەوشا خەلکی دکەین”.
دلشێر محەمەد عەلی، فیتەرە، دبێژیت”ڕەوشا کارێ مە یێ پێشەسازیێ یا خرابە و ھەر کارێ ئەم دکەین، دێ بێژن ب قەر و ئەم ب ھەیڤان وان کەسان نابینین ھەتا کو جارەکادی ترۆمبێلا وان ژ کاردکەڤیت و پێدڤی مە دبنەڤە، ژبەر ھندێ ئەو تشتێ ب ساناھی بیت، ئەم دشێین بھایێ وان کێم بکەین بۆ یێن دزانین دێ پاران دەن، چونکی کارێ مە ژی ل کێمیێ دایە و ئێدی مە ئەو باوەریا بەرێ ب کاری نەمایە، بەلێ ژبەر ڤێ ڕەوشێ و قەیرانێ، ھەتا ڕادەکێ باش مە بھا و حەق دەستێ خوە یێن کێمکرین”.

ئه‌ڤرۆ نيوز:

بڕیارە ب شێوەیەکێ فەرمی سەرۆکایەتیا جڤاتا وەزیران بڕیارێ ل دۆر کێمکرنا قستێن وەبەرھێنانێ بۆ ئەڤان وەلاتیان دەر بکەت یێن یەکێن ئاکنجیبوونێ ب شێوەیێ قست کڕین، بەرپرسەکێ دەستەیا وەبەرھێنانێ ژی دبێژیت “دێ رێنما و بڕیار بۆ دانا قستان ھێنە دەرکرن، ب مەرجەکی دگەل قەیرانا دارایی بگونجن”.
سامان عەرەب، ئەندامێ دەستەیا گشتیا وەبەرھێنانێ ل ھەرێما کوردستانێ بۆ رۆژناما ئەڤرۆ گۆت “ژبەر قەیرانا دارایی و گیروبوونا مووچێ فەرمانبەران وەلاتیێن ھەرێما کوردستانێ نەشێن وەکە پێدڤی قستێن خوە یێن کڕینا یەکێن ئاکنجبوونێ بدەن، لەوڕا جڤاتا بلندا وەبەرھێنانێ و ئێکەتیا وەبەرھێنەران چەندین کۆمبوون بۆ ڤێ مەرەمێ ئەنجام داینە و دانوستاندن ل دۆر ڤەدیتنا میکانیزمەکێ بۆ دانا قستان ھاتینەکرن، ب مەرجەکی رەوشا وەلاتیان بەرچاڤ بھێتە وەرگرتن و بڕیارە ب نڤیسارەکا فەرمی سەرۆکایەتیا جڤاتا وەزیران بھێتە ئاگەھدارکرن و جڤاتا وەزیران ب شێوەیەکێ فەرمی کۆمپانیێن وەبەرھێنانێ ئاگەھدار بکەت و قستێن وەلاتیان کێم بکەن و ل دەمەکێ نێزیک دێ ئەڤ پێنگاڤ ھێتە ھاڤێتن”.
سامانی گۆت ژی “مە داخواز کریە ھژمارێن حسابی ل بانکێ بۆ ڤەگەڕاندنا پارێ قستێن یەکێن ئاکنجیبوونێ بھێنە ڤەکرن و دەستەیا وەبەرھێنانێ ژی چاڤدێریا پڕۆسێ بکەت د ناڤبەرا وەبەرھێنەر و وەلاتیان دا، ئەم پشتڕاستین حوکمەت دێ پێنگاڤێن باش ھاڤێت بۆ بەرژەوەندیا وەلاتیێن ھەرێما کوردستانێ و رەوشا ئابوورا وەلاتیێن قستی ددەن بەرچاڤ دێ ھێتە وەرگرتن”.

ئەڤرۆ:
حوکمەتا ھەرێما کوردستانێ ژ بڕیارا خوە یا وەرنەگرتنا پێشینان لێڤە بوو، بڕیاردەرێ لژنا ناڤخۆ و ئاسایش و جڤاتێن خوە جھی ل پەرلەمانێ کوردستانێ دیار کر کو ئەو ژ لایێ ھێزێن ئاسایش و پێشمەرگەی ڤە ھاتینە ئاگەھدار کرن کو حوکمەت پێشینێن ھەڤژینیێ ژ وان وەردگریت و پشکەک ژ مووچێ وان ھاتیە بڕین.
قادر رەزگەیی بڕیاردەرێ لژنا ناڤخۆ و ئاسایش و جڤاتێن خوە جھی ل پەرلەمانێ کوردستانێ ئاشکرا کر کو ئەو وەکو پەرلەمان دێ دووڤچوونا ڤی بابەتی کەن داکو بزانن ئەگەرێن وەرگرتنا پێشینان ژ ھێزێن ئاسایشێ و پێشمەرگەی چنە و بۆ SNNگۆت: “مە پەیوەندی ب بریکارێ وەزارەتا دارایی و ئابووری یا حوکمەتا ھەرێما کوردستانێ کریە دا کو روھنکرنێن پێدڤی ل دۆر ڤی بابەتی بدەتە مە”.