ئەڤرۆ نیوز:
ل دووڤ پێزانینێن ل چەند دەزگەھێن راگەھاندنێ ھاتینە بەلاڤکرن، گۆڕان و پەکەکێ ل بەرە دەستھەلاتا دەڤەرێن سلێمانیێ و گەرمیان بگرنە دەست و بۆ ھەیڤێن داھاتی پیلانان بجھبینن، بەرپرسەکێ پارتی دیموکراتی کوردستان ژی دبێژیت، پەکەکێ ل بەرە وەکو ڕۆژئاڤایێ کوردستانێ، ھەرێم و کانتۆنا دابمەزرینیت و ڕۆژانە چەکدارێن وان ھاتنوچوونێ دکەن و وەکو ھێزەکا دەستھەلاتدار ڕەفتارێ دکەت.
نەجات حەسەن، بەپرسێ لقا 11 یا پارتی دیموکراتی کوردستان بۆ ڕۆژناما ئەڤرۆ گۆت” چەکدارێن پەکەکێ لڤینێن مەزن ل سنورێ دەڤەرا راپەڕین کو ژ ھەردو قەزایێن قەلادزێ و ڕانیە پێکدھێت یێن ھەین و ل سنورێ پارێزگەھا سلێمانیێ ب گشتی، پەکەکێ دەستھەلاتەک یا ھەی و ب ئاشکرا ھاتنوچوونێ دکەن و چالاکیێن خوە ژی ل وێ دەڤەرێ دکەن و ل بەرچاڤێن مە ھاتنوچوونێ دکەن، نەخشەیا سیاسی و ئەمنی یا دەڤەرێ ب شێوەیەکی یە، پێشبینیا ھەموو تشتەکی دھێتە کرن”.
نەجاتی زێدەتر گوت”ئالۆزیێن ڕۆژێن بۆری د ناڤبەرا سعودیێ و سووریێ و رۆسیا دا و لڤینێن ل دەڤەرێن سنوری یێن ئیرانێ ئاماژەیە بۆ وێ چەندێ کو ئاسایشا دەڤەرێ بکەڤیتە مەترسیێ، ئەم پێشبینیێ دکەین پەکەکێ نیازەک ھەبیت کانتۆنەکێ دابمەزرینیت، بەری چەند ڕۆژان ژی کۆنفڕانسەک ژلایێ پەکەکێ ڤە ھاتبوو ڕێکخستن و ل بەیانناما دووماھیێ ژی داخوازا پێکئینانا ھەرێما راپەڕین دکەن”.
بەرپرسێ لقا 11 یا پارتی گۆت ژی” پەکەکێ ل بەرە ل دەڤەرێن سلێمانیێ و گەرمیان ب ھەمان شێوێ ڕۆژئاڤایێ کوردستانێ کانتونێن خوە دابمەزڕینیت، لڤینێن وان ژی ڤێ ڕاستیێ بەرچاڤ دکەن، چونکی نوکە پەکەکە وەکو دەستھەلاتدار ل دەڤەرێ یە و ھەموو گومان لێ دھێتەکرن، مە وەکو پارتی پەیوەندی ب ھێزێن سیاسی و ئەمنی ڤە نەکریە ل دۆر لڤینێن پەکەکێ، چونکی دەزگەھێن ئەمنی ب خوە ڤان چەکداران دبینن، ئێکەتی ژی ڕاستە ھەڤپەیمانا مەیە وەکو پارتی، بەلێ دەمێ ئێکەتی ڤێ ڕاستیێ بزانیت کو چەکدارێن پەکەکێ نیەتەکا وەسا یا ھەی، دێ بۆچی ئاگەھدار کەین؟، بەلێ ئەو پێزانینێن ل راگەھاندنێ دھێنە بەلاڤکرن، کو پەکەکە و گۆران نیەتا کۆدەتایێ ل نەورۆزێ یا ھەی، ئەم دئاگەھدار نینین وەکو پارتی دیموکراتی کوردستان، بەلێ پیلانەک یا ھەی و دووبارە دکەم ژی کو لڤینێن پەکەکێ یێن ڤێ دووماھیێ ل دەڤەرێ جھێ گومانێ نە”.
سەرکردەکێ پارتی: پەکەکێ ل بەرە ل سلێمانیێ و گەرمیان کانتۆنان دروست بکەت
نيشاندان
