ئەڤرۆ نیوز:
رێڤەبەرێ باژێرڤانیێن پارێزگەھا دھۆکێ راگەھاند، بەرھەڤی بۆ بەلاڤەکرنا پارچێن ئەردی ل پارێزگەھا دھۆکێ ھاتیەکرن و ب تنێ دێ چاڤەرێی بریارا ئەنجوومەنێ وەزیران بن. ئاشکراکر کو ل سالا بۆری شیان ھەموو خەلکی قەربوو یێن دیندارێن حوکمەتێ رازی بکەن.
ئەندازیار ھەڤال حسێن رێڤەبەرێ باژێرڤانیێن پارێزگەھا دھۆکێ بۆ رۆژناما ئەڤرۆ گۆت: ھەر چار پارێزگەھان بەرھەڤی کرینە بۆ بەلاڤکرنا پارچێن ئەردی و ب تنێ ھەکە بریار ژ ئەنجوومەنێ وەزیران دەرکەڤن و یا ب مە ڤە گرێدایی دێ کەین، نەخشە د بەرھەڤن وەک ماستەر پلان و ھەتا ئەم دبینە خودانێن پارچێن ئەردی دڤێت پرۆسە ژ ھندەک قۆناغان دەربازببیت، دیسان پێدڤی ب وەزارەتا چاندنێ ھەیە دا ئەردی بینیتە سەر ناڤێ مە و دیسا وەزارەتا دارایی ودیسا ل وەزارەتا باژێرڤانیێ ب ھەفکاری ل گەل رێڤەبەریا نەخشەدانانێ مژوولین و کار دکەین بۆ چێکرنا نەخشان.
ئەندازیار ھەڤال حسێن ھێشتا ژی گۆت: ھەتا نوکە کەسێن رازیبوون ل سەر وەرگرتنا ئەردی ھەی پتر ژ 21 ھزار ناڤانە بۆ تەرخانکرنا پارچێن ئەردی و ل گەل کەسێن قەرەبووکرنێ ئانکو نوکە ئەم ب 23 ھزار پارچێن ئەردی دەیندارین، ھەمبەر شاشی یا حوکمەتێ و بەلاڤەکرنا پارچێن ئەردی و ھزرکرن ل سەر چێکرنا شووقان کو کێمتر ئەرد بھێتە بەلاڤەکرن.
ناڤبری زێدەتر گۆت: دبینم ل سەر بەلاڤەکرنا پارچێن ئەردی دێ ڤەکۆلینان کەت و ل دووڤ دا دێ بریارێ ل سەر دەت، خەلکێ دھۆکێ و دەردوران شووقێن کێم دەرامەتان ھاتینە ئاڤاکرن و دیسان بۆچوون بەر ب وێ چەندێ دچوون کو ئاڤاکرنا ستوونی ھەبیت و پتر مفا د وێ چەندێ دایە، ئەڤە تشتەکێ سەرەکەفتیە و ھەکە حوکمەت بشێت شووقان چێکەت و بدەتە فەرمانبەران دێ چێتر بیت ژ بەلاڤەکرنا پارچێن ئەردی، دیسا ئەڤە ب قست بیت دێ باشتربیت، دیسان پێشتر ئەرد زیان ڤێ کەفتیان ل سەر مە بوو و ھاتنە قەرەبووکرن و شیاین خودانێن ئەردێ فرۆکخانێ ھەموویان رازی بکەین.
ھەمبەر زێدەبوونا باژێرڤانیان ل سنورێ پارێزگەھا دھۆکێ، رێڤەبەرێ باژێرڤانیێن پارێزگەھا دھۆکێ، گۆت: باژێرڤانیا (کەلات) ھاتیە زێدەکرن و ھەتا نوکە ستاف وەک فەرمانبەر بۆ نەھاتینە دامەزراندن ل قەزا ئاکرێ، دیسان کار ل سەر ڤەکرنا دو باژێرڤانیێن دی دھێتەکرن ل ھەر دو بریفکان تەنشت بێگوڤا و بریفکا دھۆکێ، ب ڤەکرنا ڤان باژێرڤانیان دێ بنە 49 باژێرڤانی ل پارێزگەھا دھۆکێ.
ئەندازیار ھڤال ئەو چەندە ژی ئاشکراکر، دێ پارچێن ئەردی یێن حوکمەتێ ھەبن بفرۆشن، لێ ھێشتا مە بەرھەڤ نەکرینە و دێ ئەو چەندە ژی ھەبن.

ئەڤرۆ نیوز:
شیرەتکارێ سیاسی یێ سەرۆکێ ھەرێما کوردستانێ د. محەمەد جومعە بۆ ڕۆژناما ئەڤرۆ دبێژیت، نوکە ھەرێما کوردستانێ د ڕەوشەکا گەلەک ئالۆز و تەنگ دایە ژلایێ ئابووری و سیاسی و جڤاکی ڤە ،چو دەمان وەکو ئەڤرۆ د ھەموو دیرۆکا کوردان دا، پشتی قۆناغا فیدرالیەتێ، تەنگاڤیەکا ھوسا ل کوردستانێ نەھاتیە دیتن، ئەڤە ژ ئەنجامێ تەڤایا سیاسەتا کوردان و ھەروەسا ژ ئەنجامێ سیاسەتا دوژمنێن مە و داگیرکەرێن کوردستانێ پەیدابوویە، ژبەرکو ئەم گەھشتینە قۆناغا سەرخوەبوونێ، لەورا دوژمنێن مە دخوازن ب ھەر ئاوایەکی نەھێلن کورد بگەھنە مافێن خوە، بەلێ ئەم دێ ژڤێ قۆناغێ قورتالبین پشتی خەباتەکا دژوار و ب ھەڤکاریا ھەڤالبەندێن مە.
د. محەمەد جومعە بۆ ئەڤرۆ گوت” بۆ چارەکرنا قەیرانێن ئابووری دەمەکێ درێژ دڤێت، لەورا ئەڤ چەندە ژ ئەنجامێ نەزانینا مە و ژ دەستێ مە پەیدابوویە، ژبەرکو مە ب رەنگەکێ زانستی تەماشەی ئابووریا خوە نەدکر و مە نەزانی چاوان چارەکەین، مە نە دزانی کو ڕۆژەکێ دوژمنێن مە دێ ب ڤی ڕەنگی ب ھەر ئاوایەکی دژی مە راوەستن، ھەروەسا ئەڤ چەندە ژ ئەنجامێ نە دادپەروەریێ بوویە، لەورا دوژمنێن مە ھەول ددەن ھەموو دەمان ئاریشەیێن ئابووری بۆ مە پەیدا بکەن و ئەم تێنەدگەھشتین کو مە چ دڤێت و ئەم دێ چاوان پرسێن خوە چارەکەین،ل ێ مە دخواست ئەم سەربەخوەیا ئابووری ب دەستخوەڤە بینین، گەلۆ ما ژڤێ نەزانتر ھەبوو، لەورا دڤێت مە ئازادیا سیاسی ھەبا، پاشی مە داخوازیا ئابوورەکێ سەربەخوە کربا، مە ب چاڤەکێ نەزانی تەماشەی ڤێ پرسێ دکر”.
گوت ژی” ھەر ئاریشەکا ھاتیە سەرێ مە، بەغدا ئەگەر بوویە، لەورا ھەر تشتێ ژ دەستێ بەغدا ھاتی دەرھەقێ مە کوردان دا یا کری، ژبوو تێکدانا ڕەوشا ئابووری و سیاسەتا ھەرێمێ، ھەر چەندە مە شەرێ داعشێ کریە، لێ بەغدا ھاریکاریا مەنە کر ، لەورا دۆژمناتیا بەغدا بۆ کوردان ژ یا داعشێ کێمتر نینە ، بەغدا ب پشتەڤانیا ئیرانێ دوژمنکاریا مە دکەت، لەورا ھندی ئەم زوو ژ بەغدا ڤە ببین، ئەم دێ باشتر ئابوورێ خوە ب دەست ئێخین، چونکی بەغدا چو جاران نەڤێت پرسگرێکێن مە چارە بکەت، ب وی چاڤی تەماشەی مە دکەت کو ب چ ڕێ مە ژناڤ قادێ ڕاکەت، لەورا چو جۆداھی د ناڤبەرا سەدامی و بەغدا و ھەروەسا داعشێ و بەغدا دا نینە بۆمە کوردان.ئەم چەند خوە ژ بەغدا جودا بکەین، دێ شێین زووتر ئاریشێن خوە چارەکەین، ھندی ئەم ل گەل بەغدا بین، دێ پتر ئاریشە بۆمە پەیدا بن، لەورا باشتربوو کو ھەرێم نوکە خۆدان جۆرەکێ پارەی با، داکو شیاباین ئابوورێ خوە ب ڕێکوپێک کەین و ھەموو ئاریشێن مە دا چارەبن، ئەڤە مافەکێ مەیە وەک ھەرێمەک فیدرالی”.
شیرەتکارێ سەرۆکێ ھەرێمێ ئەوژی دیارکر”چوونا شاندێ ھەرێمێ بۆ بەغدا سەرکەفتنەکا دبلۆماسی یا مەزن بوو بۆ کوردان، ژبەرکو چوونا نێچیرڤان بارزانی وەسا بۆ خەلکێ جیھانێ دیارکر،کو مە دڤێت ب ئاشتیانە ئاریشێن خوە ل گەل عیراقێ چارە بکەین، چونکی ئەم پشکەکین ژ فیدرالیەتێ، لێ عیراقێ دڤێت ل سەر داخوازیا ئیرانێ مللەتێ مە کۆلە و بەندە بکەتن، ژبەرکو ئیران دوژمنێ مەیە و وێ داعش یا دروستکری”.
ل دۆر پەیدابوونا دەولەتا کوردی، دبێژیت”مللەتێ کورد یێ بندەست بوو، ئەڤ چەندە ژ نەزانینا وان بوو، تەڤایا نەزانینا مە دەرد و کول ئیناینە سەرێ مە، نەبوونا پشتەڤانیێ بۆ مللەتێ مە ھەر ژ ئەگەرێ نەزانینا مەبوو، لێ نوکە ب سایا سەرۆک بارزانی مە پشتەڤانی ھەیە و پتری 63 وەلاتێن جیھانی پشتەڤانیێ ل ھەبوونا دەولەتەکا کوردی دکەن، لێ دڤێت ئەم پشتا ئێکبگرین، لەورا د دیرۆکێ دا چێنەبوویە کەس بێژیتە کەسێ ئەم دێ بۆ ھەوە وەلاتەکی ئاڤاکەین، نوکە ھەموو جیھان دبێژیت دەولەتا خوە چێکەن، ئەم دێ ھاریکاریا ھەوەوە کەین، دەمێ کوردان بەحسێ ڕیفراندۆمێ کری، ئیران و جەتێن داعشێ ھەموو ھەولێن خوە خستنەگەر، کو ڕیفراندۆم ل ھەرێمێ نەھێتە ئەنجامدان، لێ ئورۆپا و نەتەوێن ئێکگرتی پشتەڤانیێ ل مە دکەن، ژبۆ سەرخوەبوونا کوردستانێ، دوژمنێن مە بلەزن ژبۆ گێرانا پیلانان، لێ ھەموو پلانێن وان سەرناگرن”.
ھەروەسا گۆت”ئیرانێ و تورکیا و عیراقێ ھەر تشتێ ژ دەستێ وان ھاتی دەرھەقێ کوردان دا کریە، وان نەڤێن کورد ببنە دەولەت، نەڤێن سنۆرێن (سایکس – بیکۆ) بھێتە ڕاکرن، لەورا د رۆژھەلاتا ناڤین دا عێراق و سووریا نامینن و دێ پارچە بن، ھەروەسا ئیرانێ بەری سێ ھەیڤان نوونەرەکێ خوە ھنارتیە تورکیا ژ پێخەمەت ھەردو وەلات پێکڤە دوژمنکاریا کوردان بکەن، ژبەرکو ھەردو وەلات ژ خوە دترسن کو ئەوژی پارچە ببن، لێ تورکیا ئەڤ چەندە ڕەتکر و تورکیا نەڤێت چارەنڤیسێ خوە ب ئیرانێ ڤە گرێبدەت، ژبەرکو ئیسرائیل و ئەمریکا و ناتۆ پشتەڤانیێ ل کوردان دکەن، نوکە ھەولێن ئیرانێ د بەردەوامن ژبۆ ژناڤبرنا کوردان، لێ ھەولێن وێ سەرناگرن و ئەم دێ ھەر سەرخوەبوونا خۆ وەرگرین، نوکە مللەتێ مە یێ خۆرتە، چونکی ئیسرائیلێ دیارکریە کو ئەو دێ ب لەشکرێ خوەڤە پشتەڤانیێ ل کوردستانێ کەت، ھەر دەمێ سەربەخوەیا خوە راگەھاند، چ مەترسی ل سەر سەربەخوەیا کوردستانێ نینە و ل نێزیک دێ نەخشێ رۆژھەلاتا ناڤین ھێتە گوھۆڕین”.
خویاکر ژی”سیاسەتا کونگرێسێ ئەمریکی ب تەڤایی پشتەڤانیێ ل کوردان دکەن و کۆماری دخوازن کوردێن ھەموو پارچان ببنە دەولەت و دژی تورکیا ژی ڕادوەستن، ھەروەسا تەڤایا سیاسەتا کۆماریێن ئەمریکا ل گەل کوردایە، ژبەرکو پشتی ڕیفراندۆمێ و بھاتنا کۆماریان سەربەخوەیا کوردستانێ دێ ھێتە ڕاگەھاندن و گرەنتیا سەربەخوەیا کوردستانێ ل سەر دەستێ کۆماریانە، ئەڤرۆ ئەمریکا دو ستوون یێن ھەین و ئێک ئیسرائیلە و ئێک ژی کوردستانە و ل نێزیک دێ (سایکس – بیکۆ) ب دووماھی ھێت”.
شیرەتکارێ سەرۆکێ ھەرێمێ ئەوژی گۆت”مخابن نوکە ل کوردستانێ چەندین لایەن نۆکەرێن ئیرانێ نە، ئەو لایەن دژی سەربەخوەیا کوردستانێ نە، بەلێ نەشێن چ کارتێکرنێ ل سەر سەربەخوەیا کوردستانێ بکەن، ھەرچەندە ئیرانێ دڤیا ل شنگالێ و سلێمانیێ و ل چەندین جھان کانتۆنان دروست بکەت و ئیران چ ژ نۆکەرێن خوە داخواز بکەت، دێ بۆ کەن و ئەو لایەن ھەموو دژی سەربەخوەیا کوردستانێ نە، لێ نوکە ئیرانێ دۆژمنێن خۆرت یێن ھەین ئەوژی ئیسرائیل و کوردستان و سعودیە نە”.
ب دیتنا د. محەمەد جومعەی” گۆران و ئێکەتی و حزبێن ئیسلامی ھەڤالبەندێن ئیرانێ نە و دێ ل دژی ڕیفراندۆمێ ڕاوەستن و دێ ب ھەموو ڕەنگان دژی سەربەخوەیا کوردستانێ کارکەن، لەورا وان حزبان ھەولدا پەرلەمانی ژکاربێخن و ئاریشا بۆمە چێکەن، لێ ڕیفراندۆم بھێتە کرن، یان نەھێتەکرن، ئەم دێ بینە دەولەت و ھەموو ھەولێن ئیرانێ و ھەڤالبەندێن وان دێ پووچ بن، نوکە عیراق ژی تنێ ل دۆرێن 15_16 کیلۆمەتران دگەل مەدا ھەڤسنۆرە و نەشێت چو ئاریشان بۆمە دروست بکەت”.
سەبارەت پشتی قوناغا ڕیفراندۆمێ ناڤھاتی گۆت” بۆ سەربەخوەیا کوردستانێ ھەر چ ژ دەستێ ئیران و عێراق و سووریێ بھێت د دەرھەقێ کوردان دا دێ کەن، لێ دۆستانی دێ د ناڤبەرا مە و تورکیا دا باشتر بیت، چونکی تورکیا دزانیت مە چەند پشتەڤانیا جیھانی ھەیە، ھەروەسا ژلایێ ئابووری ڤە کوردستان وەلاتەکێ زەنگینە ب ھەبوونا سامانێن سرۆشتی و ئەم دێ بینە ئێک ژ وەلاتێن پێشکەفتی ل رۆژھەلاتا ناڤەراست،لێ دڤێت مەزنترین دۆستانی د ناڤبەرا مە و ئیسرائیلێ دا بھێتەکرن، بەلێ ڕەوشا مە نە گرێدایە ب عەرەب و ئیرانێ ڤە، بەلکو یا گرێدایە ب تورکیا ڤە، چونکی سنۆرێن مە دێ گەھنە دەریا سپی و تورکیا ژڤێ چەندێ دترسیت و ئەو ژی دزانیت دەمێ ئەمریکا بھێتە عیراقێ، دێ دەولەتا کوردستانێ ھێتە راگەھاندن و سنۆرێن وێ دەولەتا نوو دێ گەھنە دەریا سپی”.