ئه‌ڤرۆ:
نێچیرڤان بارزانی، جێگرێ سه‌رۆكێ پارتی دیموكراتی كوردستان دوهی 2/10/2021 د هه‌وا هه‌لبژارتنا حزبا خوه دا ل شێخان راگه‌هاند، ئه‌ڤ هه‌لبژارتنه گه‌له‌ك دگرنگن و ده‌رگه‌هه‌كێ نوو دێ ڤه‌كه‌ن، له‌و داخواز ژ خه‌لكی كر بچنه سه‌ر سندۆقێن ده‌نگدانێ، ب ده‌نگده‌رێن بازنێ سێ ژی گۆت: به‌ربژارێن پارتی بهنێرنه به‌غدا، داكو به‌رگریێ ژ مافێن وه بكه‌ن.
جێگرێ سه‌رۆكێ پارتی د گۆتارا خوه دا باسێ بزاڤێن حزبا خوه بۆ كوردستانێ كر و راگه‌هاند، ئاڤه‌دانیه‌كا مه‌زن ل سه‌ر ده‌ستێ پارتی ب ده‌ستڤه هاتیه، ل هه‌ر جهه‌كی ژی پارتی ده‌ستهه‌لاتدار بیت، ئارامی و خۆشگوزه‌رانی ل وێرێ یه.
ل دۆر شێخان ژی گۆت: “گرنگه ئه‌و پێكڤه‌ژیانا ل شێخان بمینیت و جوانیا كوردستانێ ب وێ پێكڤه‌ژیانێ یه”.
نێچیرڤان بارزانی گۆتژی: “سه‌ركه‌فتنا پارتی، سه‌ركه‌فتنا خه‌باتا ملله‌تێ كورده و پارتی بۆ پاراستنا ده‌ستكه‌فتێن كوردان دێ چیته به‌غدا”.
جێگرێ سه‌رۆكێ پارتی خویا ژی كر، ده‌ستكه‌فتێن نڤیسی ل سه‌ر ده‌ستێ پارتی ب ده‌ستڤه هاتینه و به‌رێ بنیاتێ دیموكراسیێ ل ڤی وه‌لاتی ب پێشنیارا پارتی بوویه.
نێچیرڤان بارزانی ئاشكرا كر، د ده‌مێ بۆری دا پلانه‌ك بۆ لاوازكرن و ئێخستنا پارتی هه‌بوو، به‌لێ پشته‌ڤانیا گه‌لێ كوردستانێ نه‌هێلا ئه‌و پلانه سه‌ربگریت و گوت: “پارتی سه‌ربلند و سه‌رفرازه ده‌مێ دبینیت ئه‌ڤ جه‌ماوه‌رێ هه‌ی، هه‌تا ئه‌ڤ حزبه ژی یا به‌رده‌وام بیت و ملله‌ت ژی ل پشته‌ڤانیا پارتی یێ به‌رده‌وام بیت، چو هێزه‌ك نه‌شێت پارتی بچه‌مینیت”.
نێچیرڤان بارزانی، جێگرێ سه‌رۆكێ پارتی گۆت: “ده‌مێ دبێژین: حسابه‌كا رژد بۆ پارتی دهێته كرن، مه‌به‌ستا مه ئه‌و نینه چو حزب و لایه‌نه‌كی ب كێم بزانین، به‌لكو مه‌به‌ستا مه ئه‌وه كو به‌رپرسیاره‌تیه‌كا مه‌زن دئێخیته سه‌ر ملێن مه و پێدڤیه ئه‌م ل گه‌ل هه‌موو حزبێن دی ببینه خیڤه‌ته‌ك بۆ كۆمكرنا هه‌موو حزبان، ڤێجا ب كه‌یفا وانه بۆ هه‌لبژارتنا درووشمان دژی پارتی بێژن، یان خوه ب هندێ ڤه مژوول بكه‌ن و یا ژ وانڤه هه‌كه ب خرابی باسێ پارتی بكه‌ن، ده‌نگێن زێده‌تر دێ ئینن، خه‌لكێ مه دزانیت، كی پشته‌ڤانیا ده‌ستكه‌فتێن ڤی ملله‌تی دكه‌ت و بڕیارا خوه یا دای پشته‌ڤانیا كیژ حزبێ بكه‌ن”.
هه‌ر دوهی جێگرێ سه‌رۆكێ پارتی دیمۆكراتی كوردستان ل زاخۆ د رێوره‌سمه‌كێ تایبه‌تێ هه‌وا هه‌لبژارتنان دا، د په‌یڤه‌كێ دا راگه‌هاند، باژێرێ زاخۆ باژێره‌كێ گرنگه بۆ پارتی ژ به‌ر كو د هه‌موو هه‌لبژارتنان دا پارتی ده‌نگه‌كێ باش ل زاخۆ بده‌ستڤه ئینایه و ئه‌ڤه ژی وێ چه‌ندێ دگه‌هینیت خه‌لكێ باژێرێ زاخۆ هه‌موو ده‌مان د گه‌ل پارتی دا بوویه و دێ دگه‌ل پارتی دا بیت ژی، ڤان هه‌لبژارتنان گرنگیه‌كا تایبه‌ت هه‌یه، ژ به‌ر كو وه‌كو پارتی ئه‌م دخوازین دلێ دوژمنێ خوه نه‌خوه‌ش بكه‌ین و دلێ دوستێن خوه خوه‌ش بكه‌ین و ده‌نگێن باش ب ده‌ستڤه بینین و مه ئه‌و باوه‌ری ب خه‌لكێ زاخۆ ژی هه‌یه كو ب شێوه‌یه‌كێ به‌رفره‌ه به‌ر ب سندوقێن ده‌نگدانێ ڤه بچن و ده‌نگێن خوه بده‌نه به‌ربژارێن پارتی دیمۆكراتی كوردستان، لێ پێدڤی یه وێ چه‌ندێ ژی ژبیر نه‌كه‌ین زاخۆ دلێ پارتی یه.
ل دووماهیا گۆتارا خوه ژی گۆت: “من دڤێت پیرۆزباهیا ئیداره‌یا سه‌ربخوه یا زاخۆ ل خه‌لكێ ده‌ڤه‌رێ بكه‌م، ژ به‌ر كو زاخۆ باژێره‌كێ گه‌له‌ك گرنگه و تایبه‌تمه‌ندیا خوه هه‌یه و ڤێ چه‌ندێ ژی ژ هه‌ژی ڤی باژێری دبینین و ب هیڤیا وێ چه‌ندێ ڤه ژی خزمه‌ته‌كا باشتر بهێته كرن”.
نيشاندان
