ئەڤرۆ نیوز:
سایتێ (جیروسەلام ئۆنلاین) د ڕاپۆرتەکێ دا دنڤیسیت، ئیران دخوازیت ب مەرەما لاوازکرنا ھەرێما کوردستانێ، ب ڕێیا پەکەکێ یا بریکارا وێ، دەست ب سەر مووسلێ و چیایێ شنگالێ بگریت.
ئەو دەڤەرا کو ل سالا 1991 ێ، حوکمەتا سەدام حوسێنی ژبۆ توپبارانکرنا ئیسرائیلێ ب کارئینای، ئانکو ئیران دشێت وێ دەڤەرێ بکەتە بنگەھەکێ سیخوڕی و ببیتە مەترسیەکا مەزنل سەر ئاسایشا ئیسرائیلێ.
ڕاجێل ئەفراھام، د وێ ڕاپۆرتێ دا ل سەر زارێ ژێدەرێن (جیروسەلام ئۆنلاین) دناڤ عیراقێ دا، ئاماژە ب وێ چەندێ کریە کو چیایێ شنگالێ گەلەک یێ گرنگە بۆ ئیرانێ و حوکمەتا بریکارا وێ ل عیراقێ، جھەکێ گونجایە بۆ چاندنێ و ل وێرێ دشێت زال ببیت ل سەر پتریا پشکێن ڕووبارێ دیجلە.
د وێ ڕاپۆرتێ دا ھاتیە ژی” نوکە، پشکا پتر ژ دەڤەرا چیایێ شنگالێ ل بن دەستێ پێشمەرگێ کوردستانێ دایە کو مەسعود بارزانی فەرماندەییا وی دکەت و دۆستێ ڕۆژئاڤایە”.
ژێدەری ھۆشداری دا ھەکە ئیران زال ببیت ل سەر چیایێ شنگالێ، دێ وێ دەڤەرێ ب سووریێ ڤە گرێدەت و ئیران دشێت ژوێرێ ب ڕێیا ھنارتنا چەکی و ھاریکاریا دارایی، ھاریکاریا بەشار ئەسەدی بکەت، ئەو چەندە ژی کاریگەریەکا نەرێنی دێ کەتە سەر ئیسرائیلێ و ئۆپۆزسیۆنا سووری یا ئازاد، بەلێ ھەکە کونترۆلا چیایێ شنگالێ ددەستێ پێشمەرگەی دا بمینیت، وی دەمی ئیسرائیل دێ یا پاراستی بیت.
د بەردەوامیا ڕاپۆرتا سایتێ ناڤبری ئاماژە ب وێ چەندێ کریە کو حوکمەتا ناڤەندی یا بەغدا مووچەی ددەتە پەکەکێ، بەلێ مووچەی نادەتە پێشمەرگەی، ھەروەسا نیازا حوکمەتا بەغدا ئاشکرا کریە کو دخوازیت پێشمەرگە کونترۆلا وێ دەڤەرێ ژدەست بدەت.
تێدا ھاتیە ژی” ئیران ب گەلەک ڕژدی دژی سەربخوەیا کوردستانێ کاردکەت و بزاڤا لاوازکرنا ئابوورێ دەڤەرێ دکەت، ئەو چەندە ژی ب ڕێیا ڕاکێشانا سەرمایەگوزارێن ناڤخوە بۆ ئیرانێ، ھەروەسا پشتەڤانیێ ل کارێ میدیایا دژی بارزانی و کوردستانێ دکەت”.
ل دووڤ ژێدەران، پەکەکە کوردێن دی د چەوسینیت بۆ پرسا ھاریکاریا ئیرانێ، ل 21 ئادارێ دا، دو پێشمەرگە و سێ ئێزدی یێن مەدەنی ب ناڤێن (حسێن ئەلحسێن، سامی ئەلحسێن و ئیسماعیل خودادا) کوشتن ژبەر وێ چەندێ ل نەورۆزێ دخواستن ئالایێ کوردستانێ ل سەر ترومبێلێن خوە ھەل بدەن.
پەکەکە دژی ئالایێ کوردستانێ یە و ل دەڤەرێن دبن کونترۆلا وان دا، بلندکرنا ئالایێ کوردستانێ و ل بەرکرنا جلکێن کوردی ھاتیە قەدەغەکرن، ئەو پێرابوونە ژی بوویە ئەگەرێ وێ چەندێ کو حزژێکەرێن ئالایێ کوردستانێ و ل بەرکرنا جلکێن کوردی ل نەورۆزێ، دەڤەرێن خوە ب جە بھێلن.
ژێدەرێ (جیروسەلام ئۆنلاین)، پەکەکێ وەکو پشکەک ژ چەکدارێن حەشد شەعبی دھەژمێریت و سەرۆک وەزیرێن عیراقێ کو لایەنگرێ ئیرانێ یە، سەرپەرشتیا حەشد شەعبی دکەت، دیسا بەحسێ پەکەکێ دکەت کو ھزار و 600 گەریلا بۆ ئۆپەراسیۆنەکێ یێن بەرھەڤکرین و ئەوژی پشکەکن ژ حەشد شەعبی و ژلایێ نڤیسینگەھا حەیدەر عەبادی ڤە پارە پێ دھێتە دان و ب میلیشیا ئیرانی ھژمارت و ئاماژێ ددەت کو حەشد شەعبی و پەکەکە یێن بووینە ئێک.
ب گۆرەی ڕاپۆرتا(جیروسەلام ئۆنلاین)، ژبلی بزاڤا ئیرانێ بۆ دەست ب سەرداگرتنا چیایێ شنگالێ ژلایێ بریکارێن وێ، بزاڤێ دکەت کو پەکەکێ پشکدار بکەت د ئازادکرنا باژێڕێ مووسلێ، ئەوژی ب مەرەما زێدەتر لاوازکرنا ھەرێما کوردستانێ و ھەروەسا ڕێگری ل دروستبوونا ھەرێما سونی، ئیران دخوازیت ب ڕێیا ئازادکرنا مووسلێ، شەڕی دژی سەربخوەیا کوردستانێ بکەت، ئەڤە ددەمەکی دایە سونەیان نەڤێت پەکەکە پشکداریێ د ئازادکرنا مووسلێ دا بکەت، بەلکو دخوازن ھێزێن سونی و پێشمەرگە و لەشکرێ عیراقێ پشکداریێ د پرۆسا ئازادکرنا مووسلێ دا بکەن، کو ئەوچەندە ژی د بەرژەوەندا ئیرانێ دا نینە، لەوما پەکەکێ پالددەت بۆ پشکداریێ دوێ پرۆسێ دا، ل دووڤ وی ژێدەری” پلانا نوکە ئەوە، پێشمەرگە و ھێزا نیشتمانی یا سونی ل گەل لەشکرێ عیراقێ پشکداریێ د پرۆسا ئازادکرنا مووسلێ دا بکەن، بەلێ حوکمەتا ناڤەندیا عیراقێ دژی وێ چەندێ یە و ئیران ژی ل گەل ئازادکرنا مووسلێ نینە بێ پشکداریا پەکەکێ و حەشد شەعبی”.
ئیران بزاڤا کونترۆلکرنا شنگال و مووسلێ دکەت
نيشاندان