NO IORG
نووترين نووچه
نووترين نووچه

ئه‌ڤرۆ نيوز:

بريكارێ وه‌زاره‌تا ناڤخۆ ل حوكمه‌تا هه‌رێما كوردستانێ راگه‌هاند كو ژڤانێ به‌لاڤكرنا مووچێ وه‌زاره‌تا ناڤخۆ هاته‌ پێش و لژنه‌ك ژى بۆ پێداچوونێ د كێمكرنا مووچێ وێ وه‌زاره‌تێ هاته‌ پێكئينان.

جه‌لال شێخ كه‌ريم بريكارێ وه‌زاره‌تا ناڤخۆ ل حوكمه‌تا هه‌رێما كوردستانێ بۆ خه‌ندان گۆت: “ئه‌ڤرۆ 9ى شوباتا 2016ێ ل گه‌ل وه‌زيرێ ناڤخۆ و رێڤه‌به‌ريا ژمێرياريێ ل وه‌زاره‌تێ ل گه‌ل سه‌رۆكاتيا جڤاتا وه‌زيران كۆمبوون و د كۆمبوونێ دا بڕيار هاته‌ دان كو مووچێ وه‌زاره‌تا ناڤخۆ بهێته‌ نێزيككرن و وه‌سان بڕياره‌ د ڤێ حه‌فتيێ دا بهێته‌ به‌لاڤكرن”.
گۆتژى: “د كۆمبوونێ دا بڕيار هاتيه‌ دان لژنه‌ك ب نوونه‌راتيا وه‌زاره‌تا ناڤخۆ بهێته‌ پێكئينان بۆ پێداچوونێ د كێمكرنا مووچێ فه‌رمانبه‌رێن سه‌ر ب وه‌زاره‌تا ناڤخۆ”.

ئەڤرۆ نیوز:
رێڤەبەرێ گشتیێ کۆچ و رەڤەندا کوردی ل ھەرێما کوردستانێ راگەھاند، ھژمارەکا قاچاخچیان ل ھەرێما کوردستانێ و تورکیا و یونان ھاتینە دەستەسەرکرن و ھژمارا وەلاتیێن چووینە دەرڤە ناھێتە زانین و ئامارێن دھێنە بەلافکرن چو راستی بۆ نینن و گۆت: چارەنڤیسێ 300 ئاکنجیێن ھەرێما کوردستانێ یێن چووینە ئورۆپا دیار نینە و ھژمارەکا زۆر ناڤێن خوە تۆمارکرینە بۆ ھندێ ڤەگەڕنە ھەرێما کوردستانێ.
نەزھەت حوسێن، رێڤەبەرێ کۆچ و رەڤەندا کوردی ل وەزارەتا نافخۆیا ھەرێما کوردستانێ بۆ رۆژناما ئەڤرۆ زانیاریێن ھوور ل دۆر کۆچا وەلاتیێن ھەرێما کوردستانێ ئاشکراکرن و گۆت “گەلەک دەزگەە و کەس ئامارێن ڤان وەلاتیان بەلاف دکەن، بەلێ ھەتا نوکە چو ئامارێن فەرمی نینن ل دۆر ھژمارا وەلاتیێن ھەرێما کوردستانێ یێن چووینە دەرڤە و کۆچکری، ئەڤ ئامارێن ل راگەھاندنێ دھێنە بەلافکرن ب تنێ بۆ سەردابرنا خەلکیە و چو راستی بۆ نینن، چونکو کەسێن دچنە دەرڤە ب رێیا قاچاخ ل چو لایەنەکیڤە ناھێتە تۆمارکرن.
ناڤبری زێدەتر دبێژیت: ل دەستپێکا ژیانێ کۆچ ھەبوویە و ھەتا نوکە یا بەردەوامە، پشتی شەڕێ داعش ھەوەکا کۆچکرنێ ھەرێما کوردستانێ ڤەگرتیە و ھەتا نوکە ھژمارەکا بەرچاڤ یا وەلاتیان چووینە دەرڤە، حوکمەتا ھەرێما کوردستانێ ھەموو بزاڤێن خوە کرینە بۆ رێگریکرنێ ل کۆچا وەلاتیان و پۆلیسێن ئینتەرپۆل و پۆلیسێن تورکیا ل سەر بازرگانیکرن ب وەلاتیێن ھەرێما کوردستانێ ھاتینە ئاگەھدارکرن، ژ بەر کو قاچاخچی یاریێ ب ژیانا وەلاتیان دکەن و کڕین و فرۆتن ب کۆچبەران د ناڤبەرا قاچاخچیاندا دھێتەکرن، بۆ زانیاریێن وەلاتیێن ھەرێما کوردستانێ ل پارێزگەھێن ھەولێر و دھۆک و سلێمانی و رانیە ھژمارەک کەسێن قاچاخچی ھاتینە دەستەسەرکرن و دێ گەھنە سزایێ خوە یێ قانوونی، ھەروەسا ل وەلاتێن یونان و تورکیا ژی ھژمارەکا قاچاخچیان ھاتینەگرتن کو ھژمارەک ژ وان بیانینە و یێن دی ژی کوردن.
رێڤەبەرێ گشتیێ کۆچ و رەڤەندا کوردی گۆت ژی “مە رێنمایی داینە وەلاتیێن ھەرێما کوردستانێ بەرەف دەرڤە نەچن و ئەڤ یەختە و چوپێن کۆچبەر پێ دھێنە دەربازکرن جھێ باوەریێ نینن و دێ وەلاتی بنە قوربانی، وەلاتێن ئەورۆپا ژی ب شێوەکێ فەرمی رەتکریە پەنابەرێن بیانی وەربگرن، ب تنێ ھندەک پەنابەرێن گەھشتینە باژێڕان ھاتینە وەرگرتن وەکی حالەتێ مرۆڤایەتی، بۆ نموونە بریتانیا نەھێلایە ئێک کۆچبەر بچیتە ناڤا باژێڕێن وان و دناڤا دارستان دانە، مە زانیاری ھەنە ل ئەلمانیا ھەموو پەنابەر برینە دەڤەرەکێ ب تنێ ئاڤا ڤەخوارنێ دەست ناکەڤیت، ھندەک تشت دھێنە نیشادان راست نینن.
نەزھەت حوسێن خویاژی کر، ب ھزاران وەلاتیێن کۆچکری ناڤێن خوە تۆمارکرینە ڤەگەڕێنە ھەرێما کوردستانێ، بەلێ سیاسەتا ھەرێما کوردستانێ ئەڤە ب چو شێوەیەکی نابیت پەنابەر ب زۆر بھێنە ڤەگەڕاندن، بەلێ وەکی دیار پەنابەر یێن بێزاربووین، ب تنێ ل ئەلمانیا دو ھزار کەس ڤەگەڕیاینە، حوکمەتا عێراقێ پاسپۆرتێن وەختی ھنارتینە بالیۆزخانێن خوە ب سەر کەمپێن پەنابەران بھێنە بەلافکرن، بۆ ڤان کەسێن بخوازن ڤەگەڕن عێراقێ و ھەرێما کوردستانێ”.
نەزھەتی دیار کر، ھەتا دەستپێکا ڤێ حەفتیێ حوکمەتا ھەرێما کوردستانێ نێزیکی 90 تەرمێن پەنابەران ڤەگەڕاندینە ھەرێمێ و رادەستی کەس و کارێن وان ھاتینەکرن، ھژمارەک تەرمێن دی ماینە دێ ل ڕۆژێن داھاتی ھێنە ڤەگەڕاندن، خەلک بەردەوام پەیوەندیێ ب رێڤەبەرایەتیا گشتیا کۆچ و کۆچبەران ل ھەرێما کوردستانێ دکەت و بەلگێن خوە پێشکێشکرینە، کو کەس و کارێن وان د رێیا ئورۆپا دا بەرزەنە و دیار نەماینە، ئەم ژی ژ لایێ خۆڤە دووڤچوونێ بۆ کەسێن بەرزە دکەین و فۆتۆکۆپی و بەلگێن وان کەسێن چووینە ژ دەرڤە تۆماردکەین، ھند ئەم ھاتینە ئاگەھدارکرن ژ لایێ خێزانێن وان ڤە پتری 300 وەلاتی دیارنینن و چارەنڤیسێ وان ناھێتە زانین”.

ئه‌ڤرۆ نيوز:

ل تاخێ په‌نجه‌ عه‌لى ل كه‌ركووك ته‌قينه‌ك روودا و ژ ئه‌گه‌رێ وێ چه‌ندێ سێ كه‌سان گيانێ خوه‌ ژ ده‌ست دا، سه‌رۆكێ لژنا ئه‌منى ل جڤاتا پارێزگه‌هێ ژى دبێژيت: “ته‌قين يا تيرۆرستى نه‌بوو”.

ئازاد جه‌بارى، سه‌رۆكێ لژنا ئه‌منى ل جڤاتا پارێزگه‌ها كه‌ركووك بۆ رووداو گۆت: “سپێده‌هيا ئه‌ڤرۆ رۆژا شه‌مبى رێكه‌فتى 9ى شوباتا 2016ێ ل تاخێ په‌نجه‌ عه‌لى ل كه‌ركووك ته‌قينه‌ك روودا، به‌لێ ته‌قين يا تيرۆرستى نه‌بوو، به‌لكو تانكه‌ره‌كێ پانزينێ ل ده‌مێ له‌حيمكرنێ په‌قى”.
ب گۆره‌ى گۆتنێن ئازاد جه‌بارى د وێ ته‌قينێ دا شوفێرێ تانكه‌رێ و دو كه‌سێن دى گيانێ خوه‌ ژ ده‌ست دا و ژماره‌ك ژى يێن بريندار بووين.

 

ئەڤرۆ نیوز:
ل گۆر راپۆرتەکا مالپەرێ نێرینا ئازاد چەند تەن چەک و تەقەمەنی ب رێیا فرۆکەخانا باژێرێ قامشلۆ ژ ئالیێ ھێزێن سەربازی یێن رژێما سووریێ ڤە گەھشتنە دەستێ ھێزێن YPG و ل گۆر زانیاریان ئەو چەکە ب رێیا چەند فەرماندارێن رژێما سووریێ ل قامشلۆیێ رادەستی ھێزێن YPG ھاتینە کرن و بریارە ھێزێن رژێما سووریێ ل رەخ قامشلۆ و حەسەکێ پێکڤە دەست ب ئۆپەراسیۆنێن ھەڤپشک ل دژی داعشێ و گرۆپێن دی یێن ھشکباوەر بکەن و گەھاندنا وان چەکان ژی بۆ ھندێ نە دا کو YPG بەرھەڤیێن خوە باش بکەت.
د پشکەکا دی یا راپۆرتێ دا ھاتیە دیار کرن کو نوکە ل حەلەبێ و چەندین دەڤەرێن دی یێن سووریێ ژی ھێزێن YPG ل گەل سەربازێن رژێمێ پێکڤە شەرێ داعشێ و گرۆپێن دی یێن تیرۆرستی دکەن.
سەبارەت ب گەھاندنا وان چەکان کو دھێتە گۆتین چەکێن گران ژی تێدا ھەنە ھەتا نھا بەرپرسێن YPG و ھێزێن سووریا یا دیموکراتیک چو داخۆیانیێن فەرمی بەلاڤ نەکرینە لێ چەندین مالپەرێن عەرەبی ژی د راپۆرتێن خوە دا ئەو یەک بەلاڤ کرینە کو ھێزێن سووریێ چەند رۆژن چەکان ب رێیا فرۆکەخانا قامشلۆ دگەھیننە ھێزێن YPG دا ئەو پێکڤە ل حەسەکێ و دەڤەرێن دی داعشێ ژناڤ ببەن.

پەیڤدارێ وەزارەتا دەرڤە یا ئەمریکا جۆن کێربی ل بەرنامەیەکێ تەلەفزیۆنێ دا گۆت: راستە تورکیا ھەڤپەیمانا مەیە، بەلێ پەکەکێ ژی ب رێکخراوەکا تیرورستی نا ھەژمێرین.

ئەڤ چەندە ھات پشتی تورکیا گۆتیە ئەمریکا تە ئەم یان تە پەکەکە، لێ ھەر ئەمڕیکا نە گۆت، دێ پشت دەینە پەکەکێ و جۆن کێربی بو تورکیا دیارکر کو دێ ھەڤکاریا پەکەکێ کەن.

ئه‌ڤرۆ نيوز:

بریاردەرێ لژنا دەستپاکیێ ل جڤاتا نوونەرێن عیراقێ راگەھاند، لژنا وان کۆمبوونەکا ئەرێنی ل گەل عەبادی کر و بادەکێن گەندەلیێ ل وەزارەتا بەرگریێ بابەتێ سەرەکیێ کۆمبوونێ بوو.

جمعە بەھادلی، ل دووڤ ئاژانسا دەنگوباسێن عیراقێ، گوت” د کۆمبوونێ دا مە ل گەل عەبادی بەحسێ بەرھنگاریا گەندەلیێ د دامودەزگەھێن حوکمەتێ دا کر ب ڕێیا ئاشکراکرنا گەندەلان و ھنارتنا وان بۆ دادگەھێ”.

گوت ژی” د رۆژێن بھێت دا، دێ گەلەک بادەکێن گەندەلیێ ھێنە ڤەگرن و دێ ڤەکۆلین تێدا ھێتە کرن و پاشی دێ ھێنە بەرچاڤکرن بۆ جڤاتا نوونەران ژبۆ وەرگرتنا بریاران”.

خویاکر ژی” بادەکێن گەندەلیێ ل وەزارەتا بەرگریێ، بابەتێ سەرەکیێ کۆمبوونا ل گەل عەبادی بوو، ب تایبەتی کو ل ڤی دەمی ئەم یێ شەڕێ تیرۆرێ دکەین و ئەم پێدڤی ب سیستەمەکێ دروست یێ پڕچەککرنێ نە، زێدەباری ھەبوونا بادەکێن گەندەلیێ ل وەزارەتا ناڤخوەیی ژی”.

ئەڤرۆ نيوز:
سکرتێرێ رۆژنامەڤانی یێ سەرۆکێ حوکمەتا ھەرێما کوردستانێ ئاشکرا کر کو سەرۆک و جێگرێ سەرۆکێ حوکمەتا ھەرێما کوردستانێ بزاڤێ دکەن ب رێیا ھەڤال و ھەڤپەیمانان و کۆمەلگەھا نێڤدەولەتی پنگاڤێن ب لەز بۆ چارەکرنا قەیرانا دارایی یا ھەرێمێ ب ھاڤێژن.
سامی ئەرگوشی، سکرتێرێ رۆژنامەڤانی یێ (نێچیرڤان بارزانی) سەرۆکێ حوکمەتا ھەرێما کوردستانێ دیار کر کو ل گەل وان رێکارێن دەمکی یێن ژ نەچاری ژ لایێ حوکمەتا ھەرێما کوردستانێ ھاتینە دانان بۆ دەربازبوون ژ قەیرانا دارایی، د ھەمان دەم دا حوکمەت ب تایبەت سەرۆک و جێگرێ سەرۆکێ حوکمەتا ھەرێما کوردستانێ د بزاڤان دانە کو ژ بلی وان رێیە چارەیێن دەمکی ب رێیا ھەڤال و ھەڤپەیمانان و کۆمەلگەھا نێڤدەولەتی پنگاڤێن ب لەز بۆ چارەکرنا قەیرانا دارایی یا ھەرێمێ ب ھاڤێژنو بۆ باسنیۆز گۆت: “شاندێ ھەرێما کوردستانێ د دووماھی سەرەدانا خوە دا بۆ وەلاتێ ئەمریکا رەوشا گرانا دارایی یا ھەرێم تێدا دەربازدبیت و کارتێکرنا نەرێنی یا وێ رەوشێ ل سەر بەرۆکێن شەری ل دژی تیرۆرستێن داعش بۆ بەرپرسێن وەلاتێ ئەمریکا رۆنکر”.
ناڤھاتی گۆت: “دھێتە چاڤەرێکرن د پاشەرۆژەکا نێزیک دا دەرئەنجامێن ئەرێنی یێن وێ سەرەدانێ دیاربن و نوکە ناڤەندێن ئەمریکی بزاڤان دکەن داکو پشتەڤانیەک بۆ ھەرێما کوردستانێ و ب تایبەت بۆ پێشمەرگەی بھێتەکرن”.

ئەڤرۆ نیوز: مللەت جەمال:

خشتێ نوبەداریا رادارێن رێڤەبەریا ھاتن و چوونا پارێزگەھا دھۆکێ بۆ رۆژا سێ شەمبی رێککەفتی9/2/2016 دێ بڤی رەنگێ خوارێ بن لسەرانسەری پارێزگەھا دھۆکێ

 

ل ناڤ سەنتەرێ باژێرێ دھۆک دێ بڤی شێوەی بن:

دانێ سپێدێ : 1- جاددا زرکا نێزیک گولخانا مالتا

2 – جاددا بارزان شندوخا

ب شەڤ : 3- جاددا بارزان قایمقامیێ

4- جاددا شەھیدێن ئێکی شواتێ نێزیک ھولا دیلان

5- جاددا بارزان شندوخا

تێبینی: ژبەر زوربونا روودانان 24 دەمژمێران رادار دێ ل جاددا بارزان شندوخا یا دانای بیت

 

رادارێن قەزا شێخان دێ لڤان جھان ھێنە دانان

1-    جاددا سەرەکی یا شێخان نێزیک گومەلگەھا مەھەتێ

2-    جاددا سەرەکی یا باعەدرێ

 

رادارێن قەزا بەردەرەش دێ لڤان جھان ھێنە دانان:

1-    جاددا بەردەرەش بۆ ناحیا رۆڤیا نێزیک گوندێ مەم و زین

2-    جاددا بەردەرەش بۆ ناحیا کەلەک نێزیک گوندێ گەویلان

 

رادارێن قەزا ئاکرێ دێ لڤان جھان ھێنە دانان

1-    لسەر جاددا سەرەکی یا راپەرین دناڤبەرا ترافیکا قەلعێ بۆ ترافیکا بەلدێ

 

رادارێن قەزا سێمێل دێ لڤان جھان ھێنە دانان

1-    جاددا سەرەکی دناڤبەرا سێمێل بۆ کومەلگەھا دوومیز

2-    جاددا سەرەکی یا دوبانێ

3-    جاددا سەرەکی یا تەناھی بۆ سێمێل

 

راداراێن قەزا زاخو دێ لڤان جھان ھێنە دانان

1-    جاددا سەرەکی یا بێرسڤێ نێزیک گوندێ مەلا عەرەب

2-    جاددا سەرەکی یا تلکەبەرێ

 

رادارێن قەزا ئامێدیێ دێ لڤانا جھان ھێنە دانان

1-    جاددا سەرەکی یا دێرەلووکێ

2-    جاددا سەرەکی یا ئامێدی بۆ دێرەلووک نێزیک گوندێ گوھەرزێ

 

رادارێن ناحیا زاویتە دێ لڤان جھان ھێنە دانان

1-    جاددا زاویتە بۆ دھۆک

2-    جاددا ئێتیت بۆ دھۆک

سەرکردەکێ پێشمەرگەێ ھەرێما کوردستانێ دلگرانیا خوە دەربڕی ھەمبەری ھاریکاریێن بۆ ھێزێن پێشمەرگی دھێنە ھنارتن، و گۆت: ھێزێن پێشمەرگەی ھێزەکا نێڤدەولی یە و دڤێت ھاریکاریێن مەزن بۆ بھێنە پێشکێشکرن.
دداخویانیەکێ دا بۆ مالپەرێ پارتی دیموکراتی کوردستان، قادر قادر سەرکردێ ھێزێن پێشمەرگەێ ھەرێما کوردستانێ ل میحوەرێ گوێر گۆت: حوکمەتا عیراقێ نھا نەشێت ب شێوەکێ رێک و پێک رەوشا دەڤەرێ کونترۆل بکەت و ھێزێن وێ ھەموو شەکەستی ینە، ددەمەکێ دا ھەموو ھاڤلێن وان پشتەڤانیا چەکی و فرۆتنا چەکێ دگەل دکەن.
قادرھەروەسا گۆت: حوکمەتا عیراقێ بتنێ قویتێ مللەتێ کوردستانێ دبڕیت و ھاریکاریا پێشمەرگەی ژی ناکەت، ئەم باش دزانین حوکمەتا عیراقێ نەدشیانێن وێ دایە و نەدڤێت باژێرێ مووسل ئازاد بکەت.
قادر ئاشکراکر، عیراق یا بوویە سویکەکا بەرفرەھا کڕین و فرۆتنا چەکێ و ل پارێزگەھا رەمادی و ژێریا عیراقێ لەشکرێ عیراقێ چەکێ دفرۆشنە چەکدارێن داعشێ.

ئەڤرۆ نیوز:
پەیڤدارێ نڤیسینگەھا سەرۆک وەزیرێن عیراقێ دیارکرکو چو رێککەڤتن ل گەل ئەمریکا نەھاتینە کرن بۆ ئازادکرنا مووسلێ بتنێ دێ ھێزێن عیراقێ مووسلێ ئازادکەن و چو ھێزێن بیانێ شەرێ ئازادکرنا مووسلێ دا پشکدار نابن ، سەرۆکێ لیستا برایەتی و پێکڤەژیانێ ل جڤاتا پارێزگەھا نەینەوا بۆ ئەڤرۆ دبیژیت مەحالە ھێزێن عیراقێ ب تنی بشێن مووسلێ ئازاد بکەن.
سەیدو چەتۆ سەرۆکێ لیستا برایەتی و پێکڤەژیانێ ل جڤاتا پارێزگەھا نەینەوا دیارکرکو ئازادکرنا مووسلێ بیێ ھێزێن پێشمەرگەی و لەشکرێ ئەمریکی ئەستەمە ومەحالە مووسل ب تنێ ل سەر دەستێ لەشکرێ عیراقێ بھێتە ئازادکرن وگۆت” پشتی تیرۆرست ل رومادی شکەستین، نوکە مووسل یا بوویە بنگەھێ سەرەکیێ وان،ژبەر ڤێ چەندی ژێ یا ب زەحمەتە لەشکرێ عیراقێ ب تنێ بشێت تیرۆرستان ل مووسل ژناڤ ببەت”.
سەیدو چەتۆ راگەھاند ژی، چەندین جاران دانوستاندن د ناڤبەرا بسپۆرێن ئەمریکی و وەزارەتا بەرگریا عیراقێ و وزارەتا پیشمەرگە یێن ھاتینە کرن بۆ شەرێ ئازادکرنا مووسل وسەرکردێن عیراقێ باش دزانن بیێ پێشمەرگەی و لەشکرێ ئەمریکی، ئازادکرنا مووسلێ گەلەک یا ب زەحمەتە و ئەو داخویانیێن ھندەک سەرکردێن عیراقێ ددەن دبیت تنێ دیتنا وان یا کەسوکی بیت، چونکی ھەموو جیھان ولایەنێن عیراقی ب چاڤێن خوە دیتن کا چاوان ھەیبەتا تیرۆرستان ب تنێ ل سەر دەستێن پێشمەرگەی ھاتە شکاندن.
سەعد حەدیسی پەیڤدارێ نڤیسینگەھا سەرۆک وەزیرێن عیراقێ دیارکرکو ب تنێ ھێزێن عیراقێ دێ د شەرێ ئازادکرنا مووسلێ دا پشکدار بن و چو ھیزێن بیانێ پشکدار نابن.
دەربارەی ھەماھەنگیێ د ناڤبەرا واشتنون و بەغدایێ، راگەھاند کو چو رێککەڤتن د ناڤبەرا ئەمریکا و عیراقێ دا بۆ ئازادکرنا مووسلێ نەھاتینە کرن ب تنێ ئەمریکا دێ ب ڕیێا فروکێن شەرکەر وان دەڤەران تۆپباران کەن یێن تیرۆرست تێدا وچو ھێزێن ئەمریکی د شەرێ ئازادکرنا مووسلێ دا پشکدار نابن وعیراقێ پێدڤی ب ھێزین بیانی نێنە.
بەلێ سەیدو چەتۆ، ئاشکرا کرکو ھێشتا بەغدا چو پێنگاڤ بۆ ئازادکرنا مووسلێ نەھاڤێتینە و چو ژڤانێن دروست بۆ ئازادکرنا مووسلێ ھێشتا نەھاتینە دیارکرن، ھەر جار بەغدا دبێژیت دەمژمیر سفر بۆ ئازادکرنا وێ یا ھاتیە دیارکرن، لێ کەنگی وچاوان؟، چو دیارنینە.

website security
WP Facebook Auto Publish Powered By : XYZScripts.com