ئه‌ڤرۆ نيوز:

ھێزێن لەشکرێ عیراقێ دۆرپێچەکا توند ل سەر باژێرێ فەلوجە ل رۆژئاڤایا پارێزگەھا ئەنبار دانایە، کو بویە سەدەمێ مرنا 10 کەسان ھەتا نھا ب ئەگەرێ نەگەھاندنا ئاھێن خوارنێ و ئاڤێ ھەر وەکی رۆژناما وولترستریت یا ئەمریکی راگەھاندی.
فەلوجە ئەوا ئەڤە بۆ دەمێ دو سالایە کەفتینا ددەستێن تیرۆرستێن داعشێ دا، ئەڤرۆ کەفتیە ژێر دۆرپێچەکا توند و دژوار ژ ئالیێ ھێزێن لەشکرێ عیراقێ و میلیشیاتێن حەشدا شەعبی ڤە، وەک بزاڤەک بۆ ھندێ چەکادرێن داعشێ بێ ھێز بکەن و زێدەباری نەچارەکرنا خەلکێ فەلوجە ژی کو بزاڤا رەڤین و دەرکەفتنا ژوی باژێری بکەن.
دەرخستنا خەلکێ سڤیل ژ باژێرێ فەلوجە ب مەرەما بکارنەئینانا وانە ژ ئالیێ داعشێ ڤە وەک مەرتالەکێ بۆ بەرسینگرتنا ھێرێن لەشکرێ عیراقێ، ھەژی گۆتنێ یە پتر ژ 10 ھەزار مرۆڤ د باژێرێ فەلەوجە دا ھەتا نھا ھەنە کو تووشی برس و ترسەکا مەزن بووینە.

ئەڤرۆ نیوز:
ئێک ژ ڕاسپاردەیێن کۆمبوونا سەرۆکێ ھەرێما کوردستانێ دگەل پارت و لایەنێن سیاسی یێن ھەرێما کوردستانێ بەرھەڤیێن ب ڕێڤەچوونا ڕیفراندۆمێ بووینە بۆ دیاریکرنا چارەنڤیسێ خەلکێ ھەرێما کوردستانێ و جۆدابوون ژ دەولەتا عیراقێ، ئەوژی بەری ھەلبژارتنێن ئەمریکی، پەرلەمانتارەکێ کورد ل بەغدا ژی رادگەھینیت، دەم یێ گونجایە بۆ پڕۆژێ ڕیفراندۆمێ و بەغدا باوەری ب مافێ کوردان نینە، ھەروەسا دیارکر، راگەھاندنا دەولەتا کوردی ژی قوربانی دڤێت.
سیروان سیرینی، ئەندامێ فڕاکسیۆنا پارتی ل جڤاتا نوونەرێن عیراقێ بۆ رۆژناما ئەڤرۆ گۆت” ئەز ئێکم ژوان کەسێن گەھشتیمە وێ باوەریێ کو چو دەمەکی بەغدا دانپێدانێ ب مافێ کوردان ناکەت، ب درێژیا دیرۆکێ ژی ئەڤ چەندە خویا بوویە، عیراقێ باوەری ب دیموکراتیێ و ب پارچەبوونا عیراقێ نینە و ھەر بەحسێ سەروەریا ئاخا عیراقێ دھێتەکرن، بەغدا دەستھەلاتدارە و ھەموو تشتەکی د بەرژەوەندیا خوەدا تمام دکەت، دڤێت ئەم پشتڕاست بین عیراقێ چو ب سەرێ عەرەبێن سونی ئینایە، دێ ھەمان سیناریۆ ب سەرێ کوردان ژی ئینیت، لەوما پێدڤیە ئەم ڕیفراندۆمێ ل ھەرێما کوردستانێ بکەین و چارەنڤیسێ خوە دیاربکەین، ئەڤە ژی ب ساناھی ناھێتەکرن و دڤێت بەرھەڤی بۆ پڕۆژێ سەربخوەیێ بھێتەکرن، ھەکە ھەرێما کوردستانێ بخوازیت پڕۆژەکێ وەسا بەرھەڤبکەت و گەلێ کوردستانێ دەنگی بۆ بدەت، قوربانی بۆ دڤێت و ب ھەروە نابیت. دەمێ ئیسڕائیل دەولەتا سەربخوە راگەھاندی، نە پەتڕۆل ھەبوو، نە ئابوریەکا ب ھێز، ئیسڕائیل دەمێ بڕیاردای بیتە دەولەت، لیژنەک ھاتە پێکئینان کو ھەر مالەک دۆلارەکی پێشکەش بکەت، ھەر مالەکا ئیسڕائیلی کێمتر ژ 10 دۆلاران پێشکەش نەکر، چونکی بۆ راگەھاندنا دەولەتێ بوویە.
سیرینی گۆت ژی”راستە ئەم یێ دڕەوشەکا ئابوریا خراپ دا و قەیرانا دارایی ب سەر ھەرێما کوردستانێ دا ھاتیە، بەلێ پشکا ڤێ چەندێ ژی مە یا ھەی کو بەھرا راگەھاندنا دەولەتا کوردی بکەت، نابیت ژبیر بکەین مللەتێ کورد رۆژێن بەرتەنگتر یێن دیتین و دکاودانێن گەلەک نەخوەش دا دەربازبووینە، ئەم مللەتەکین مە ئەنفال و کیمیاباران و کۆمکوژی دەربازکرن، ھەکە ئیرادەکا ب ھێز ھەبیت، دێ ڤێ ڕەوشێ و قەیرانێ ژی دەربازکەین، ئەنجامدانا ڕیفراندۆمێ باوەریەکا ب ھێز و رژد ژی دڤێت”.