ئەڤرۆ نیوز:
ئەندامێ لژنا دارایی ل جڤاتا نوونەرێن عیراقێ، حاکم سرحان سلێڤانەی بۆ ئەڤرۆ دیارکر ھەکەر بەغدا د ڤێ ھەیڤێ دا پشکا ھەرێما کوردستانێ گوژمێ ئێک تریلیۆن و 50 ملیار دیناران رەوانەی ھەرێمێ نەکەت، دێ ئەندامێن کورد ل بەغدا ئێمزایان کۆم کەن و گەھینە فوئاد مەعسوم سەرۆکێ کۆمارا عیراقێ و داخوازێ ژ سەرۆک کۆماری ھێتە کرن حەیدر عەبادی ل ھۆلا پەرلەمانی بەرھەڤ بیت ودیاربکەت کا بۆچی رزقی خەلکی رەوانە ناکەت، چونکو دووڤ دەستۆری و قانوونێ نابیت مستحقاتێن ھەرێمێ ب سیاسیەتێ ڤە بھێتە گرێدان دێ فشارێن مەزن ل سەر حوکمەتا عەبادی ھێنە دروستکرن بۆ رەوانەکرنا پشکا ھەرێمێ.
حاکم سرحان سلێڤانەی ئەندامێ لژنا دارایێ ل جڤاتا نوونەرێن عیراقێ دیارکر ھەتا نوکە بەغدا چوو پارە رەوانەی ھەرێما کوردستانێ نەکریە د وەختەکی دا بۆدجا سالا 2016 یا عیراقێ چوو وارێ بجە ئینانێ دا و پێدڤیە بەغدا دوور بکەڤیت ژ ناکوکیێن سیاسی و دەست ب رەوانەکرنا پشکا ھەرێمێ ژ بۆدجا سالا 2016ێ بکەت و ھەیڤانە گوژمێ ئێک تریلیۆن و 50 ملیار دینار پێدڤیە بۆ ھەرێما کوردستانێ بھێنە رەوانەکرن.
ناڤبری ئەوژی دیارکر دەستھەلاتا بجە ئێنانێ ل بەغدا پێدڤیە رێژا 17% پشکا ھەرێمێ بدەت دووڤ دەستۆری و قانوونێ ب چوو رەنگەکی نابیت مستحاقات ب سیاسەتێ ڤە بھێنە کرن و دانا مۆۆچی فەرمانبەران و پێشمەرگەی و رەوانەکرنا دەرمانان و ئاھێن خوارنێ و ھەموو جۆرێن مستحاقاتێن ھەرێمێ پێدڤیە ڤێ ھەیڤێ دا ژ بەغدا بگەھنە ھەرێمێ، ھەکەر بەغدا رەوانە نەکەت دێ داخواز ژ سەرۆک کۆماری ھێتە کرن ب ریێا کۆمکرنا ئێمزایێن پەرلەمانتارێن کورد ل بەغدا حەیدر عەبادی سەرۆکێ ئەنجومەنێ وەزیران ل جڤاتا نوونەرێن عیراقێ بەرھەڤ بیت ھەموو فشار دێ ل سەر ھێنەکرن ب ریێا دەستۆری و قانونی بۆ رەوانەکرنا پشکا ھەرێما کوردستانێ.
حاکم سرحان سلێڤانەی گۆت ژێ بۆدجا عیراقێ 105 تریلیۆن دینارن و کورتھینان د بۆدجێ دا 24 تریلیۆن دینارن و داھاتێ عیراقێ 81 تریلیۆن دینارن و نوکە بھایێ ئێک برمیلا پترۆلێ ژ 27 دۆلاران دھێتە فروتن، پێدڤیە عیراق پێنگاڤان بھاڤێژیت خوە ژ قەیرانا دارایی رزگاربکەت، ب ریێا وەرگرتنا قەرێن دەرەکی و ناڤخۆیی و گەلەک ریێن دێ پشتی جڤاتا نونەرێن عیراقێ بۆدجە پەسەند کری و سەرۆک کۆماری ئێمزاکری و ل رۆژناما فەرمی یا عیراقێ دا بەلاڤ بووی دچیتە واری بجە ئینانێ دا، ژبەر نزمبوونا بھایێ پترۆلی پێشبینی دھێتە کرن کورتھینان زێدەتر بیت د بۆدجێ دا و بەغدا ھەموو شیوەیان یا کاردکەت وێ کورتھینانێ پر بکەت و ھەرێما کوردستانێ ژی نابیت بھێتە بیێ بەھرکرن ژ وان قەرێن بەغدا وەردگریت دووڤ دەستۆری و قانوونی ھەموو شیانێن خوە بکار ئینین بۆ رەوانەکرنا پشکا ھەرێمێ.
نووترين نووچه
- نڤیسینا رەشنڤیسێ كارێ حوكمەتا نوو د قووناغێن دووماهیێ دایە
- پرسا هنارتنا پەترۆلا هەرێمێ ئێك ژ بابەتێن هەرە گرنگ یێن گوهۆڕینێن دەڤەرێیە
- شاندێن حوكمەتا هەرێمێ و ئیراقێ ل گەل كۆمپانیێن بەرهەمئینانا پەترۆلێ كۆمبوون
- پڕۆژەیێ پارێزگەهبوونا شنگالێ دێ هنێرینە جڤاتا نوونەرێن ئیراقێ
- سەرۆك بارزانی و جێگرێ وەزیرێ دەرڤەیێ توركیایێ پرۆسەیا چارەسەریێ و ئاشتیێ گەنگەشە كر
- سەرۆك بارزانی پێشوازی ل هەژمارەكا نڤیسەر و ئەدیب و رەوشەنبیرێن عەرەب كر
- سەرۆك بارزانی پێشوازی ل سەرۆكێ هەڤپەیمانییا عەزم كر
- نێچیرڤان بارزانی پشتەڤانییا هەرێمێ بۆ پرۆسەیا ئاشتیێ دوپاتكر
- پێدڤییە هەموو كێشەیێن ل پێشبەری هنارتنا پەترۆلا هەرێمێ نەمینن
- د قووناغا بەلاڤكرنا پۆستانداینە
سه‌ره‌كى نووترين نووچه
وەزارەتا پەروەدێ داخوازەکێ ژ مامۆستایان دکەت
ئەڤرۆ نیوز:
وەزارەتا پەروەردێ یا حوکمەتا ھەرێما کوردستانێ ئاشکرا کر کو قەیرانا دارایی کارتێکرن یا ل سەر پلان و پڕۆژێن وان کری، ب تایبەتی ژ لایێ چاپکرنا پرتووکان ڤە ژبەر ڤێ چەندێ وەزارەتا ناڤھاتی داخوازێ ژ ھەموو رێڤەبەر و مامۆستایان دکەت کو ئەو پرتووکێن ل سەر قوتابیان بەلاڤ دکەن بپارێزن و سالانە ژێ وەرگرن.
وەزارەتا پەروەردێ نڤیسارەک ب ئیمزایا د.پشتیوان سادق، وەزیرێ پەروەردێ ل حوکمەتا ھەرێما کوردستانێ ل سەرە ئاراستەی ھەموو رێڤەبەرێن پەروەردێ ل پارێزگەھێن ھەرێمێ کریە و د وێ نڤیسارێ دا ھاتیە کو قەیرانا دارایی کارتێکرن یا ل سەر پلان و پڕۆژێن وان کری ب تایبەتی چاپکرنا پرتووکان کو 50% کێم بوویە، ژبەر ڤێ چەندێ داخوازێ ژ قوتابخانان دکەین کو لژنەکێ بۆ وەرگرتنا پرتووکان ژ قوتابیان پێک بینن و د عمباران دا ب پارێزن داکو جارەکا دی ئەو پرتووک ل سەر قوتابیان بھێنە بەلاڤکرن.
ئۆباما چاوان بەحسێ ھەڕفینا سکرێ مووسل دکەت؟
ئەڤرۆ نیوز:
سەرۆکێ ئەمریکی باراک ئۆباما ھوشداری دا سەرۆک وەزیرێن عیراقێ و رادگەھنیت، ھەڕفینا سکرێ مووسلێ دێ بیتە ئەگەرێ گوھۆرینا نەخشێ عیراقێ.
باراک ئۆباما د پەیوەندیەکا تەلەفونی دا ل گەل حەیدەر عەبادی سەرۆک وەزیرێن عیراقێ، ل دووڤ باسنیۆز، ترس و دلتەنگیا خوە بۆ دیارکریە و گوتیێ ژی” خەونێن بێزارکەر ل دۆر ھەڕفینا سکرێ مووسل دبینیت”.
ددەمێن بۆریدا بەردەوام ئەمریکا حوکمەتا عیراقی ل دۆر ھەڕفینا سکرێ مووسلێ یا ئاگەھدارکری، بەلێ حوکمەتا عیراقێ دبێژیت چو مەترسی ل سەر سکرێ ووسل نینن.
سکرێ مووسل دکەڤیتە باکوورێ باژێرێ مووسلێ و نێزیکی 50 کیلۆمەتران ژ سەنتەرێ وی باژێری یێ دوورە و ھەکە ھات و ئەو سکرە ب ھەڕفیت، باژێرێ مووسل و پشکەک ژ باژێرێ بەغدا بۆ دەمەکی دێ کەڤنە دبن ئاڤێ دا.
يا ب سه‌رێ سونيان ئيناى دێ ب سه‌رێ كوردان ژى ئينيت
ئەڤرۆ نیوز:
ئێک ژ ڕاسپاردەیێن کۆمبوونا سەرۆکێ ھەرێما کوردستانێ دگەل پارت و لایەنێن سیاسی یێن ھەرێما کوردستانێ بەرھەڤیێن ب ڕێڤەچوونا ڕیفراندۆمێ بووینە بۆ دیاریکرنا چارەنڤیسێ خەلکێ ھەرێما کوردستانێ و جۆدابوون ژ دەولەتا عیراقێ، ئەوژی بەری ھەلبژارتنێن ئەمریکی، پەرلەمانتارەکێ کورد ل بەغدا ژی رادگەھینیت، دەم یێ گونجایە بۆ پڕۆژێ ڕیفراندۆمێ و بەغدا باوەری ب مافێ کوردان نینە، ھەروەسا دیارکر، راگەھاندنا دەولەتا کوردی ژی قوربانی دڤێت.
سیروان سیرینی، ئەندامێ فڕاکسیۆنا پارتی ل جڤاتا نوونەرێن عیراقێ بۆ رۆژناما ئەڤرۆ گۆت” ئەز ئێکم ژوان کەسێن گەھشتیمە وێ باوەریێ کو چو دەمەکی بەغدا دانپێدانێ ب مافێ کوردان ناکەت، ب درێژیا دیرۆکێ ژی ئەڤ چەندە خویا بوویە، عیراقێ باوەری ب دیموکراتیێ و ب پارچەبوونا عیراقێ نینە و ھەر بەحسێ سەروەریا ئاخا عیراقێ دھێتەکرن، بەغدا دەستھەلاتدارە و ھەموو تشتەکی د بەرژەوەندیا خوەدا تمام دکەت، دڤێت ئەم پشتڕاست بین عیراقێ چو ب سەرێ عەرەبێن سونی ئینایە، دێ ھەمان سیناریۆ ب سەرێ کوردان ژی ئینیت، لەوما پێدڤیە ئەم ڕیفراندۆمێ ل ھەرێما کوردستانێ بکەین و چارەنڤیسێ خوە دیاربکەین، ئەڤە ژی ب ساناھی ناھێتەکرن و دڤێت بەرھەڤی بۆ پڕۆژێ سەربخوەیێ بھێتەکرن، ھەکە ھەرێما کوردستانێ بخوازیت پڕۆژەکێ وەسا بەرھەڤبکەت و گەلێ کوردستانێ دەنگی بۆ بدەت، قوربانی بۆ دڤێت و ب ھەروە نابیت. دەمێ ئیسڕائیل دەولەتا سەربخوە راگەھاندی، نە پەتڕۆل ھەبوو، نە ئابوریەکا ب ھێز، ئیسڕائیل دەمێ بڕیاردای بیتە دەولەت، لیژنەک ھاتە پێکئینان کو ھەر مالەک دۆلارەکی پێشکەش بکەت، ھەر مالەکا ئیسڕائیلی کێمتر ژ 10 دۆلاران پێشکەش نەکر، چونکی بۆ راگەھاندنا دەولەتێ بوویە.
سیرینی گۆت ژی”راستە ئەم یێ دڕەوشەکا ئابوریا خراپ دا و قەیرانا دارایی ب سەر ھەرێما کوردستانێ دا ھاتیە، بەلێ پشکا ڤێ چەندێ ژی مە یا ھەی کو بەھرا راگەھاندنا دەولەتا کوردی بکەت، نابیت ژبیر بکەین مللەتێ کورد رۆژێن بەرتەنگتر یێن دیتین و دکاودانێن گەلەک نەخوەش دا دەربازبووینە، ئەم مللەتەکین مە ئەنفال و کیمیاباران و کۆمکوژی دەربازکرن، ھەکە ئیرادەکا ب ھێز ھەبیت، دێ ڤێ ڕەوشێ و قەیرانێ ژی دەربازکەین، ئەنجامدانا ڕیفراندۆمێ باوەریەکا ب ھێز و رژد ژی دڤێت”.
بۆ ڤێ مه‌ره‌مێ ئەڤرۆ شاندێ ھەرێما کوردستانێ دێ سەرەدانا بەغدا کەت
ئەڤرۆ نیوز:
ل دووڤ سازیێن دەنگوباسان، ژڤانە ئەڤرۆ سەرۆکێ حوکمەتا ھەرێما کوردستانێ نێچیرڤان بارزانی سەرەدانا بەغدا بکەت، سەرۆکێ فراکسیۆنا ئێکگرتوو ئیسلامی کوردستان ل جڤاتا نوونەرێن عیراقێ، سەرەدانا سەرۆکێ حوکمەتێ ب شاشی ل قەلەم ددەت و دبێژیت، مە چو پێزانین ل سەر سەرەدانا سەرۆکێ حوکمەتا ھەرێما کوردستانێ بۆ بەغدا نینن و ب باوەریا مە ئەڤە شاشیە و چەندین جاران دوبارە دبیت حوکمەتا ھەرێما کوردستانێ دھێتە بەغدا و فراکسیۆنێن کوردی ل بەغدا ھاژێ نینە دیسا دئاگەھدار نینن ل سەر رێککەفتنێن دھێنە گرێدان و پێدڤی بوو ئەڤ تشتە مە ب راگەھاندنێ نەزانیبان، بەلکو پێدڤی ب کۆمبوونەکا راستەوخوە بوویە.
موسەنا ئەمین گۆت ژی” پێدڤیە ئەو رێککەفتنا د ناڤبەرا ھەرێمێ و عیراقێ دا ل سەر ھنارتنا پەترۆلێ ھاتیەکرن بھێتە بجھئینان، دبینم رێککەفتن نەیا ب ساناھی یە بھێتە بجھئینان، چونکی ھەر دو حوکمەتان ئیرادەکا سیاسی نینە کو ئەان کێشان چارەسەر بکەن، سەرەرایی خرابیا کاودانان”.
سەرۆکێ فراکسیۆنا ئێکگرتوو ب دووری نەزانی کو سەرۆکێ حوکمەتا ھەرێما کوردستانێ دڤێ سەرەدانێ دا داخوازیێن پێشتر بکەت وەک پشکا کوردان ژ بۆدجا عیراقێ دا و پشکا کوردان ژ ئاھێن خوارنێ و دەرمانان و دیسا پارێ جوتیارێن ھەرێما کوردستانێ، ژ دەرڤەی ئەڤان بابەتان من باوەری نینە دڤێ قوناغێ دا حوکمەتا بەغدا ھاریکاریا خەلکێ کوردستانێ بکەت.
حاکم سەرحان سلێڤانەی ئەندامێ جڤاتا نوونەرێن عیراقێ ژ فراکسیۆنا پارتی بۆ رۆژناما ئەڤرۆ گۆت” گەلەک کێشە و ئاریشە د ناڤبەرا ھەولێرێ و بەغدا دا یێن ھەین و ھەتا نوکە نەھاتینە چارەکرن و ھەلاویستی ماینە، دبینم ب ھاتنا سەرۆکێ حوکمەتێ نێچیرڤان بارزانی دێ دەستپێکەک بیت بۆ ئەنجامدانا دانوستاندنان د ناڤبەرا ھەر دو حوکمەتان دا و بگەھنە رێککەفتنەکێ ل سەر قەیرانا دارایی و ھەموو بزاڤ بھێنەکرن کو کێشە بەر ب چارەبوونێ بچن” . سەرحانی گۆت ژی” مە پێزانین نینن کو حوکمەتا ھەرێمێ داخوازا ھاریکاریێن دارایی بکەت ژ بەغدا، بەلێ کۆمبوون گرێدایی کاودانێن دارایی نە، دیسا رێککەفتنا ھەیڤا 12/یا سالا 2014 ھێشتا مایە وبۆ ھەر دو سالێن 2015 و 2016 بوویە قانوون و پێدڤیە بھێتە بجھئینان، چونکی یا کەفتیە دەنگدانێ وھەموو ئەندامێن جڤاتا نوونەران دەنگ ل سەر دایە، ل دووڤ قانوونێ دڤێت حوکمەتا کوردستانێ 550 ھزار بەرمیلان ب رێیا کومپانیا (سۆمۆ) رۆژانە ب ھنێریت.
بهايێ په‌ترۆلێ هێشتا گران بوو
پشتى ل ناڤه‌راستا ڤێ هه‌يڤێ بهايێ په‌ترۆلێ گه‌له‌ك هاتيه خوار، جاره‌كا دى بهايێ په‌ترۆلێ بلند بوو ڤه
ب گۆره‌ى راپۆرتا ئاژانسا رۆيترز بهايێ په‌ترۆلێ ل بازارێن جيهانێ بلندبوونه‌كا نوو ب خوه ڤه تۆماركر، ئه‌و بلند بوون ژى د ده‌مه‌كى دايه كو به‌رى نوكه بهايێ په‌ترۆلێ ل بازاران د بن 28 دۆلاران دابوو.
ئاژانسێ ئاماژه ب وێ چه‌ندێ كريه كو نها بهايێ ئێك به‌رميلا په‌ترۆلا برێنت د بازاران دا ب 34 دۆلار و 74 سه‌نتابه، د ده‌مه‌كى دا ل ناڤه‌راستا ڤێ هه‌يڤێ بۆ 27 دۆلار و 10 سه‌نتان هاتبوو خوار، ئه‌ڤه ژى مه‌زنترين هاتنه خوار بوو ژ 2003ێ وه‌ره، بهايێ به‌رميله‌كا په‌ترۆلا خاڤ ژى 34 دۆلار و 40 سه‌نته.
به‌له‌مه‌كا دژى يا كۆچبه‌ران ب كورد ڤه به‌رزه بوو
ئه‌ڤرۆ نيوز:
به‌له‌مه‌كا دى يا ب 100 كۆچبه‌ر ل ده‌ريا ئيجه به‌رزه بوو و فيدراسيۆنا كۆچبه‌ران ژى گۆمان يا هه‌يى كو ئه‌و به‌له‌م نقۆم ببيت.
ب گۆره‌ى پێزانينان د ئه‌وێ به‌له‌مێ دا وه‌لاتيێن باشوورى و رۆژئاڤايێ كوردستانێ ل گه‌ل هنده‌ك وه‌لاتيێن سورى يێن تێدا.
فيدراسيۆنا كۆچبه‌ران ژى ده‌رباره‌ى چاره‌نڤيسێ به‌له‌مێ راگه‌هاند: گۆمان دهێته كرن كو ئه‌و به‌له‌م بن ئاڤ ببيت.
پۆليسێن ده‌رياى يێن يونا ژى ده‌ست ب گه‌ريا ل دووڤ به‌له‌ما به‌رزه دا كريه، به‌لێ هه‌تا نوكه نه‌شياينه وێ به‌له‌مێ ببينن.
ژ بەر ڤی ئەگەری ئەڤ سالە فرۆکە ب عیراقێ ناھێنە دان
ئەڤرۆ نیوز، بارزان مزووری:
باقر جەبر زوبەیدی، وەزیرێ ڤەگوھاستنا عیراقێ د رێورەسمێ سال یادا 70ێ یا دەمەزراندنا ھێلا ئاسمانی یا عیراقێ ل بەغدا راگەھاند: گرێبەستا وەرگرتنا فرۆکا د گەل کۆمپانیا “بوینگ” ل سالا 2008 ھات بوو ئیمزا کرن، ژڤان بوو کو ئەڤ سالە بگەھنە عیراقێ، بەلێ ژبەر کەڤنیا مودێلا وان ل سالا 2017 جورێ نووتر دێ گەھنە عیراقێ.
ناڤبری دیار کر کو کۆمپانیا “بوینگ” رەزامەندیا خوە دیار کریە کو ل سەر گورینا گرێبەستێ ئەو فروکە د سالا 2016 دا نەگەھنە عیراقێ چونکو ئەوێن د گرێبەستێ دا ئیمزا کرین مودێلا وان دکەڤن بوون، ئەوێن ل سالا 2017 بگەھن ژبەر کو فروکێن نووتر ژ وی جوری بۆ عیرقێ فرێ کەن.
ناڤبری گۆت: ” ئەو فروکەیێن دێ فرێ دکەت ژ جورەکێ نوو یە، وان فروکا ئامیرەک تێدایە ژینگەھی د پارێزیت، ژبلی ژمارا کورسیان پتری یێن مودێلا کەڤنن ژمارا وان 60 کورسی نە”.
مێژوویا دامەزراندنا ھێلا ئاسمانی یا عیراقێ بۆ 18 ئادارا 1938 د ڤەگەریت دەمێ فروکەڤانێن عیراقێ رێنما دان بۆ کرینا سێ فروکەیێن ژ جورێ “دارکن رابید” ئەو فروکە ل 1 تەشرینا ئێکێ 1938 گەھشتنە بەغدا.
ره‌وشا سه‌قايێ سوبه‌هى
ئه‌ڤرۆ نيوز:
رێڤه‌به‌ريا كه‌شناسى و بيڤه‌له‌رزێ ل دهۆكێ راگه‌هاند كو سوبه‌هى رۆژا پێنجشه‌مبى رێكه‌فتى 31ى كانوونا دويێ يا 2016ێ ئه‌سمان دێ ساهى و هنده‌ك ئه‌ورێن كێم بيت.
پشكا پێشبينيان ل رێڤه‌به‌ريا گشتيا كه‌شناسى و بيڤه‌له‌رزێ ل هه‌رێما كوردستانێ د نڤيساره‌كێ دا كو دانه‌ك بۆ ئه‌ڤرۆ نيوز ره‌وانه كرينه راگه‌هاند كو ژ ئه‌نجامێ هاتنا فشارێن نزمێن ده‌ريا سۆر بۆ سه‌ر هه‌رێما كوردستانێ دهێته پێشبينيكرن ئه‌سمان دێ ساهى و هنده‌ك ئه‌ورێن گه‌له‌ك كێم بيت.
پشكا پێشبينيان دايه زايه زانين كو دێ ئاراستێ باى ژى دێ باشوورێ رۆژهه‌لات بيت ب ره‌نگه‌كى د ناڤبه‌را 5 هه‌تا 10 كم دا و هنده‌ك و ماوێ ديتنێ ژى 10 بۆ 20 كم بيت، پلێن گه‌رمێ ژى دێ د ناڤبه‌را (0 بۆ 10) پلان دا بيت.
ئه‌ڤرۆ نیوز شێوازێ پاشكه‌فتنا موچێن فه‌رمانبه‌ران به‌لاڤ دكه‌ت
ئه‌ڤرۆ نیوز ، نه‌وزاد زاده هلۆرى:
ل گوره‌ى پرۆژه‌یێ پێشنیاره‌كریێ هێزێن پێشمه‌رگه‌ى چوو كوژمێن موچه‌یان بو وان ناهێنه پاشكه‌فتن و فه‌رمانبه‌رێن پله ئێك ژى دێ ئێك لسه‌ر چوارێ یا موچه‌یێن وان هێته‌دان ، و راوێژكاره‌كێ حكومه‌تا هه‌رێمى ژى ل وێ باوه‌رێ یه كو سیسته‌مێ نویێ موچه‌ى دادگه‌ریه‌كا زور تێدا هه‌یه.
لگوره‌ى پروژێ پێشنیاركرى ل بارا پاشكه‌فتنا موچه‌یێ هه‌یڤانه‌یا فه‌رمانبه‌ران كو شاره‌زا و بسپورێن وارێ ئابوورى كو ماموستایێن زانكویێ دارژتیه و ئاراسته‌یێ لیژنا داهات و خه‌رجیان یا حكومه‌تا هه‌رێما كوردستانێ هاتیه‌كرن هێزێن پێشمه‌رگه‌ى چوو كوژمێن موچه‌یان بو ناهێنه پاشكه‌فتن و موچه‌یێن هێزێن نافخوه و هێزێن ئاسایشى ژى دێ ل گوره‌ى پله‌یێن وه‌زیفی دێ موچه‌یێن وان هێنه پاشكه‌فتن كو ژ 5% ده‌ستپێ دكه‌ت هه‌تاكو دگه‌هیته 20% ، و ل بارا پله‌دارێن وه‌زاره‌تا نافخوه و هێزێن ئاسایشێ ئه‌و دى َوه‌كو فه‌رمانبه‌رێن مه‌ده‌نى موچه‌یێن وان پاشكه‌ڤیت.
ده‌رباره‌ى موچه‌یێ فه‌رمانبه‌رێن پله‌یێن تایبه‌ت بى ( b) دێ 70% ژ سه‌رجه‌مێ گشتیێ موچه‌یێن وان پاشكه‌ڤیت.
وه‌زاره‌ت و ئه‌ندامێن په‌رله‌مانى و سه‌روكێ دیوانا سه‌روكاتیان ئه‌وێن كو پله‌یا A ب خوڤه دگرن دێ 75% ژ موچه‌یێ وان پاشكه‌ڤیت.
ده‌رباره‌ى موچه‌یێن پله‌یێن نزم ( 8.10.9) دێ كێمترین موچه بۆ وان پاشكه‌ڤیت، و بو ڤى َمه‌ره‌مێ ژى سێ پێشنیار هاتینه‌كرن ، ئه‌و فه‌رمانبه‌رێن موچه‌یێن وان 300 هزار دینار كێمتره چوو كوژمه‌كێ پاره‌ێ وان پاشكه‌ڤیت، و پێشنیارا دوویێ و سێیێ ئه‌وه كو فه‌رمانبه‌رێن موچه‌یێ وان ژ 400 هزار دینار یان ژى 500 هزا دیناره دێ موچه‌یێ ژى پاشكه‌ڤیت..
پێشنیاره‌كا دن ئه‌وه كو ئه‌و فه‌رمانبه‌رێن موچه‌یێ وان ژ ملیون دیناران كێمتره 20% یا موچه‌یێ وان پاشكه‌ڤیت، كو ئه‌و ژى پله‌یێن ( 5.6.7) بخوڤه دگریت.
ل گه‌ل پاشكه‌ڤتنا موچه‌یێ فه‌رمانبه‌ران بریار هاتیه‌دان كو ئه‌و فه‌رمانبه‌رێن ده‌رماله‌یێن نه ژ هه‌ژى وه‌ردگرن بهێنه برین ، و ل گه‌ل ژێوه‌رگرتنا ناڤ و نیشانێن وه‌زیفیێن فه‌رمانبه‌رێن نه‌قانونى .
ل گوره‌ى ئاماره‌كا حكومه‌تا هه‌رێما كوردستانێ سه‌رجه‌مى َموچه‌خورێن حكومه‌تا هه‌رێما كوردستانێ ( 1401215 )فه‌رمانبه‌رن و ژ وێ رێژه‌یێ ( 466719 ) هزار فه‌رمانبه‌رێن هه‌میشه‌یى و سه‌ربازینه.
هژمارا فه‌رمانبه‌رێن سه‌ربازى ژى ( 348221 ) هزار فه‌رمانبه‌رێن كو دكه‌تن48% فه‌رمانبه‌رێن هه‌میشه‌ی ، و یا فه‌رمانبه‌رێن مه‌ده‌نى ( 387141 ) ژى دكه‌ته 52%.
هه‌ر ل گوره‌ى ئاماره‌كا حكومه‌تا هه‌رێمێ ( 32 ) هزار فه‌رمانبه‌رێن گرێبه‌ست و ( 428873 ) هزار فه‌رمانبه‌رێن چاڤدێری و بیمه‌یا جڤاكى و كه‌س و كارێن شه‌هیدان و ( 229972 ) هزار فه‌رمانبه‌رێن خانه‌نشینێن هه‌میشه‌یى هه‌نه.
سه‌رجه‌مێ گشتیێ هه‌یڤانه‌یا موچه‌یێ فه‌رمانبه‌رێن هه‌رێما كوردستانێ ( 765 ) ملیار دیناره ، و ژ وێ رێژه‌یێ ژى ( 671 ) ملیار دینار بو فه‌رمانبه‌رێن هه‌میشه‌یێن مه‌ده‌نى و سه‌ربازى نه.
ده‌رباه‌رى موچه‌یێن خانه‌نشینان هه‌یڤانه ( 109 ) ملیار دیناره كو دگه‌هیته 16% ژ موچه‌یێ گشتى ، و گرێبه‌ست ژى ( 16 ) ملیار دیناره و ئه‌و ژى دگه‌هیته 2% ژ موچه‌یێ گشتى ، و چاڤدێرى و بێمه‌یا جڤاكى و كه‌س و كارێن شه‌هیدان ژى ( 69 ) ملیار دیناره كو ئه‌و ژى دكه‌تن 8%ژ سه‌رجه‌مێ گشتیى َموچه‌یى.
ل گه‌ل پێشنیاركرنا پاشكه‌ڤتنا موچه‌یێن فه‌رمانبه‌ران پێشنیار هاتیه‌كرن ل گه‌ل زێده‌بوونا داهاتیێ حكومه‌تێ و بلندبونا بهایێ په‌ترولێ دێ رێژه‌یا پاشكه‌ڤتنا موچه‌یێ فه‌رمانبه‌ران هێـته كێمكرن.
ئاراس قادر راوێژكارێ كارگێرى و دارایی ل ئه‌نجومه‌نا وه‌زیران ئاماژه ب وێ یه‌كێ كر كو حه‌فتیا بهێت ئه‌نجومه‌نا وه‌زیران دێ بریارێ لسه‌ر پێشنیاركرنا پاشكه‌ڤتنا موچه‌ی ده‌ت و دوڤدا دێ هێته ڤه‌گوهاستن بو وه‌زاره‌تا دارایى ب مه‌ره‌ما دیاركرنا رێژه‌یا پاشكه‌ڤتنێ.
ئاراس قادر گۆت ژى : ( ژبلى پاشكه‌ڤتنا موچه‌یێ فه‌رمانبه‌ران بریار ژى هاتیه‌دان كو لیژنه‌ك ل پارێزگه‌هان ژى بهێته پێكئینان ب مه‌ره‌ما دانانا بهایى لسه‌ر كه‌لوپه‌لێن خوارنێ و پێدڤیێن وه‌لاتیان )
نيشاندان
WP Facebook Auto Publish Powered By : XYZScripts.com