ئەڤرۆ نیوز:
رێڤەبەرێ بەنگا ئاڤاھیان ل دھۆکێ بۆ ئەڤرۆ دیار کر کو بەری نوکە دەمێ کارمەندەکێ ئەمنی پێشینا ئاڤاھیان د وەختێ خوە یێ دەستنیشانکری دا نەئینابا زێدەھی دا کەڤیتە سەر، لێ ژ نھا پێڤە و ل دووڤ نڤیسارا ژمارە 45 ل 7/1/2016 بریار ھاتە دان چ زێدەھی نەچیتە سەر.
نافع بامەرنی رێڤەبەرێ بەنگا ئاڤاھیان ل دھۆکێ خویا ژی کر کو پێشینا ئاڤاھیان یێن ھەموو کارمەندێن وەزارەتا ناڤخۆیی و خانەشینی و پێشمەرگە و وەزارەتا پێشمەرگەی و ئەنجومەنێ ئاسایشا ھەرێما کوردستانێ ئەو ژی ب مەرجەکی پێدڤیە ھەر کارمەندەک پەسندەکێ ژ جھێن کارێ خوە بۆ بەنگا ئاڤاھیان بینت داکو قستێن ئاڤاھیان بکەڤنە سەر مووچێ وان و ئێدی زێدەھی نەچیتە سەر و گۆت “ھەر کەسەکێ کارمەندێ ڤان دەزگەھێن ئەمنی بیت پێدڤیە سەرا جھێن کارێ خوە بدەن بۆ دروستکرنا پەسندەکێ ئەو پەسەند بۆ بەنگا ئاڤاھیان بیت داکو پێرابوون بھێنە کرن بۆ برینا قستین پیشینا ئاڤاھیان”.
بامەرنی دیار ژی کر ھەکە مووچە ھەبن دێ قست ژ وان ھێنە وەرگرتن و ھەکە مووچە نەبن کارمەندێ دەزگەھێن ئەمنی زێدەھیا دکەڤیتە سەر پیشینا ئاڤاھیان نادەن و گۆت ژی “ھێشتا ب فەرمی چ نەگەھشتیە بەنگا ئاڤاھیان ل دھۆکێ بۆ راگرتنا پێشینا ئاڤاھیان ژ ھەموو فەرمانبەرێن حوکمەتێ، لێ پێشبینی دھێتە کرن حوکمەت بریارێ بدەت ئێدی چ پێشینە نەھێنە وەرگرتن، ھەتا قەیرانا دارایی چارەسەر دبیت نوکە ئەم زۆر ھەڤکاریا وەلاتیان ژی دکەین، چونکو راستی ژی خەلکی پارە نینە و نەشێت د وەختێ دەستنیشانکری دا قستێن خوە بۆ بەنگا ئاڤاھیان بینن ھەر چەندە نوکە رێژا وەلاتین قستێن ئاڤاھیان ددەن زۆر یا کێم بووی”.

ئەڤرۆ نیوز:
رێڤەبەرێ کۆمپانیا گشتیا بازرگانی یا ئاھێن خوارنێ ل دھۆکێ بۆ ئەڤرۆ دیار کر کو ھەتا نوکە بەغدا برنج و زەیت یێن بەھرا پاریزگەھا دھۆکێ نەھنارتینە، ئەم د بزاڤێن بەردەوام داینە د گەل بەغدا بۆ ھندێ وان ژی فرێکەت و گۆت: “بەغدا نێزیکی 400 تەنێن زەیتێ بۆ دھۆکێ ھنارتبوون، لەو ئەوێ تیرا پاریزگەھا دھۆکێ ھەموویێ نەکر”.
ئەحمەد تەھا، رێڤەبەرێ کۆمپانیا گشتیا بازرگانی یا ئاھێن خوارنێ ل دھۆکێ ئاشکرا کر، ئەو بەردەوام یێ بزاڤان دکەن، دا کو وان کەرەستێن خوارنێ یێن بەھرا پارێزگەھا دھۆکێ و ھەتا نوکە بەغدا نەھنارتین، ب زووترین دەم فرێکەت، چونکو مافێ وەلاتیانە و دڤێت بۆ بزڤریت و گۆت: “ئەو جۆرین ئاھێن خوارنێ یێن سالا بۆری ماین و ھەتا نوکە نەھاتینە بەلاڤکرن، پارە ژ پێش وان ڤە ل سەر وەلاتیان دێ ھێتە بەلاڤکرن، لێ جارێ دیار نینە دێ کەنگی ئەو پارە ھێتە بەلاڤکرن”.
خویا ژی کر، نوکە ئەو یێ پارێ ئاھێن خوارنێ یێ وان ھەیڤێن کەرەستە نەھاتینە دان ل سەر ئاواران بەلاڤ دکەن و گۆت: “دۆرین 57 ھزار کەسان پارێ ئاھێن خوارنێ دێ وەرگرن، کو یێ چار ھەیڤانە و ھەر کەسەک دێ 17 ھزار دیناران وەرگریت، رەنگە ل ڤان رۆژان پارە ل سەر ئاوارێن دەڤەرا شیخان و ئاکرێ ب ریێا بریکارێن ئاھێن خوارنێ بھێتە بەلاڤکرن”.
رێڤەبەرێ کۆمپانیا گشتیا بازرگانی یا ئاھێن خوارنێ ل دھۆکێ ئاماژە ب وێ چەندی ژی کر، نوکە ئار یێ ل سەر وەلاتیان دھێتە بەلاڤکرن، ھەروەسا ب رێژا 90% شەکرا ھەیڤا ئیک ژی یا ھاتیە بەلاڤکرن و ئەو 400 تەنێن زەیتێ ژی یێن گەھشتینە مە، ب تنێ ل سەنتەرێ دھۆکێ ھاتینە بەلاڤکرن و گۆت: “بزاڤێن مە دبەردەوامن، دا کو بەغدا پشکا ئاھێن خوارنێ یا خەلکێ ھەرێمێ ب گشتی و پارێزگەھا دھۆکێ ب تایبەتی بھنێریت”.