ئه‌ڤرۆ نيوز:
چاڤدێرەکێ سیاسی و ئەندامێ جڤاتا نوونەرێن عێراقێ ئاماژە بڤێ چەندێ دکەت، گەفێن حەیدەر عەبادی بۆسەر تورکیا چو بھایێ خوە نینە و تنێ بۆ رازیکرنا ئیرانێ یە، ھەروەسا دیارکر، دەڤەر یا د گوھۆڕینێن مەزندا و دڤێت کورد خوە بپارێزن ل ھەڤڕکیێن دەولەتێن زلھێز، بەلێ ئەگەر عێراق یا رژدە لسەر سیاسەتا خوە کو ئیران رێڤەببەت دڤێت کورد خوە ئێکلا بکەن.
دکتۆر عەرەفات کەرەم، ئەندامێ فرَکسیۆنا پارتی دیموکراتی کوردستان لپەرلەمانێ عێراقێ بۆ رۆژناما ئەڤرۆ گۆت” گەفێن حەیدەر عەبادی سەرۆک وەزیرێن عێراقێ لدۆر ھاتنا سوپایێ تورکیا نێزیک باژێڕێ مووسل چو بەھایێ خوە نینە، ژبەرکو تورکیا ب ئاگەھداریا عێراقێ تیمێن خوە ھنارتینە و گەفێن عەبادی مینا کەفا سەر ئاڤێ دێ دەربازبن و بھوژن، چونکو تشتەک نەمایە بناڤێ سەروەریا عێراقێ، سالا 2003ێ پەیکەرێ سەدام حسێن ل مەیدانا فیردەوسا بەغدا ھاتە شکاندن، مخابن نوکە پەیکەرێ خومەینی ھاتیە دانان ل بەغدا، واتە عێراق ھێشتا رزگارنەبوویە و دەولەتێن دەڤەرێ ھەر ئێکی پشکا خوە خەلک ھنارتیە عێراقێ تنێ تورکیا نینە، من زانیاری ھەنە چەکدارێن حزبولایا لبنانێ ژی ل عێراقێ چالاکی ھەنە، بھازاران کەتیبەیێن ئیرانێ یێ چالاکیان د ناڤا ئاخا عێراقێ دا ئەنجامدەن، ھەموو دنیا دزانیت، کو قاسم سلێمانی یێ ل عێراقێ ب کەیفا خوە ھاتن وچوونێ دکەت، باشە بۆچی عەبادی چو ھەلوێست نینە؟.
دکتۆر عەرەفاتی گۆت” دەڤەرا رۆژھەلاتا ناڤین یا د قۆناغەکا مەترسیداردا دەربازدبیت و ھاتنا رووسیا بۆ سووریا و بەرفرەھبوونا شەڕێ بەرەنگاربوونا داعش، گوھۆڕین ئێخستینە دەڤەرێ، لەوڕا دڤێت کورد ب شەھرەزایی سەرەدەریێ ل گەل رەوشێ بکەن و بەرژەوەندیێن خوە بپارێزن، وەکی شەڕێ چالدێران نەبیت کورد ببنە زیان ڤێکەفتیێن ئێکێ، یا فەرە گورەی گوھۆڕینێن دھێنەکرن، ھەرێما کوردستانێ خوە بگونجینیت ل گەل رەوشێ و بەرژەوەندیێن خوە ل گەل ھەموو دەولەتا ب ئێک رێک دەربازبکەت، شیعە دخوازن دەڤەرێ داگیربکەن و ئەڤ ھێلا ئیرانێ بۆ عێراقێ و سووریایێ و لبنانێ ئەڤا دبێژنێ ھیلالا شیعی بتەمامی کۆنتڕۆل بکەت، پێدڤیە کورد خوە دگەل سوننەیان ژێکڤەنەکەت، تازە دەڤەر یا بسەر ھەردو بەرەیێن رووسیا و ئەمریکا دا بەلاڤ دبیت و ھندەک چووینە بەرەیێ شیعی کو ژ رووسیا ، ئیرانێ ، عێراقێ ، سووریایێ ، لبنانێ پێکھاتیە، بەرەیێ سوننەژی ئەمریکا یا پشتەڤانیێ لێ دکەت پێکھاتیە ژ تورکیا ، قەتەر و سعودیێ ل گەل عەرەبێن سوننە یێن عێراقێ، ھەکە عێراق ھەر بخوازیت بچیتە دناڤ بەرەیێ رووسیا و ئیرانێ دا، ئەڤە کورد ژی دڤێت بڕیارا خوە بدەن.
نيشاندان
