ئەڤرۆ نيوز:
پرۆژێ پێدانا قەرێن بچوک ب وەلاتیان ل سالا 2011 چویە بیاڤێ بجھکرنێ کو ژلایێ کابینا شەشێ یا حوکمەتا ھەرێمێ بریار ل سەر ھاتیە دا و پەرلەمانێ کوردستانێ پەسەندکربوو، ژ وی دەمی وەرە وەزارەتا کارۆبارێن جڤاکی ل ھەرسێ پارێزگەھان قەر داینە وەلاتیان، لگۆری ئاماران ل چوار سالێن رابوری 7 ھەزار و 800 کەس ژ وی قەری مفادار بوینە نێزیکی 20 ھەزار دەلیڤەیێن کاری بۆ وەلاتیان درۆست بوون بتنێ ئیسال 500 کەسان ئەو قەر وەرگرتینە .
ب ئەگەرێ قەیرانا دارایی ھاتینە راوەستاندن و چەندین پرۆژێن قەرێن بچوک شکەستن ئینایە ، لگۆری رێنمایان پێدانا قەرێن بچوک بو وەلاتیان ژ ئێک ملیۆن تا 15 ملیۆن دیناران دەست پێ دکەت لگۆری ھەلسەنگاندنا مەزاختیێن پرۆژەی، پێدڤیە ئەو کەسێن قەران وەردگرن خەلکێ کوردستانێ بن و ژیێ وان ژ 16 بۆ 35 سالیێ دا و کارمەندێ چ سازیێن حوکمی و نە حوکمی نەبیت و پرۆژە ژی بەردەوام بیت .

ئەڤرۆ نیوز:
پەرلەمانتارێ لژنا نەزاھە ل پەرلەمانێ کوردستانێ راگەھاند:نھا ل ھەرێما کوردستانێ رۆژانە 330 ملیۆن مەتر سێجا غازا سرۆشتی بەرھەم دئینیت.
گۆران ئازاد ئەندامێ لژنا نەزاھێ دیارکر کۆمپانیا دانە غاز بەرھەمئینانا غازا سرۆشتی دکەت، لێ نھا حوکمەتا ھەرێما کوردستانێ ل گەل کۆمپانیا دانە غازێ ئاریشەیە ھەیە و پشتی دووڤچونێ رێکەتنا ناڤبەرا حوکمەتا ھەرێمێ و دانەغازێ ل چارچوڤێ چەند بنەمایەکێن رێکەتنی بوو لێ نەھاتیەکرن و ب گرێبەستەکا تەمام وەکو گرێبەستێن ل گەل کۆمپانیێن نێڤ دەولەتی یێن پترۆلی ل ھەرێمێ ھاتیەکرن .
ناڤبری گوت ژی حوکمەتا ھەرێمێ ل دەمەکێ نێزک دو گرێبەست بۆ وەبەرئینانا غازێ گرێ دەت کو ئێک کۆمپانی رۆژانە 450 ملیۆن مەتر سێجا و یا دی 50 ملیۆن مەتر سێجا رۆژانە بەرھەم ئینیت.
گۆران ئازادی ئەو چەندە ژی دیارکر ھەر دو کۆمپانی تاکو سالا 2017 غازا سرۆشتی یا کوردستانێ رەوانەی دەرڤە کەن، دبیتە دەستپێکەک کۆمپانی 200 ملیۆن مەتر سێجا رۆژانە بۆ کارەبێ بەرھەم بینیت و ل ھەولێرێ بزاڤا ئەوێ چەندێ دەست پێکریە .
پەرلەمانتارێ کوردستانێ گۆت:ژبلی ھەرێما کوردستانێ دشیێن ل دەمەکێ نێزیک غازا سرۆشتی رەوانەی دەرڤە بکەین و ھەتا ئاستەکی ئاریشەیا کارەبێ و کێمکرنا مەزاختیان بھێتەکرن.
‭ دلشاد شەعبان جێگرێ سەرۆکێ لژنا سامانێن سرۆشتی ل پەرلەمانێ کوردستانێ راگەھاند:ل گۆری پلانێ ل چەند سالێن بھێت دشیاندایە غازا ھەرێما کوردستانێ رەوانەی دەرڤە بھێتەکرن و ل سالا 2017 بۆ 2018 ھند غاز بھێتە بەرھەم ئینان کو فرێکەنە دەرڤە و فرۆشنە ئەورۆپا.
دلشاد شەعبان ئەو چەندە ژی دیارکر تا کو نھا بوریا غازێ دناڤبەرا تورکیا و ھەرێما کوردستانێ نەھاتیە دانان لێ پلان ھەیە بۆ ھنارتنا غازا ھەرێمێ ل سالا 2017 بۆ 2018 و ھەرێم ژی دێ مفایی ژێ بینیت بۆ بکارئینانا بەرھەمئینانا کارەبێ ل شوونا پترۆلێ مفایی ژ غازێ وەربگرن.

ئەڤرۆ نیوز، بارزان مزووری:

جه‌نراله‌کێ مەزن یێ ناتۆ وه‌كو كارڤه‌دان ل سه‌ر كه‌فتنا فرۆكا رۆسى بۆ كه‌نالێ سى ئێن ئێن يێ ئه‌مريكى راگه‌هاند كو توركيا پشته‌ڤانيا داعش دكه‌ت.

ویسلی کلارک، جه‌نراله‌كێ مه‌نێ ناتۆيه‌ ل سه‌ر ئێخستنا فرۆكا رۆسى ژ لايێ وه‌لاتێ توركيا ڤه‌ راگه‌هاند كو توركيا پشته‌ڤانيا داعش دكه‌ت ژ به‌ر كو ئه‌و گرۆپه‌ دژى شيعان شه‌رى دكه‌ت.

ئاماژه‌ ب وێ چه‌ندێ ژى كر كو داعش بۆ به‌رژه‌وه‌نديا توركيا كارى دكه‌ت، “په‌ترۆلێ ب بهايه‌كێ كێم دده‌ته‌ توركيا و نوكه‌ هه‌تا 800 مليۆن دۆلاران توركيا په‌ترۆل ژێ كريه‌”.

ئه‌ڤى سه‌ركردێ ناتۆيێ نه‌ڤه‌شارت ژى كو هه‌تا نوكه‌ ب هزاران بريندارێن چه‌كدارێن تيرۆرستێن داعش د نه‌خۆشخانێن وه‌لاتێ توركيا ڤه‌ چاره‌سه‌ريێ وه‌ردگرن.

ئەڤرۆ نیوز:
بریاردەرێ لیژنا ئاسایش و بەرگریێ ل جڤاتا نونەرێن عێراقێ، شاخەوان عەبدۆلا بۆ رۆژناما ئەڤرۆ خویاکر:د پرۆژێ بودجا سالا 2016 چ پارە بۆ ھێزێن پێشمەرگێ کوردستانێ نەھاتینە دابینکرن، لەورا دمادەیا 9 و بەندێ پێنجێ دا وەسا ھاتیە نڤێسین دڤێت دبۆدجێ دا ھێزێن پەیادە یێن عێراقی دا پارە بۆ پێشمەرگەی بھێتە تەرخانکرن،لێ لدووڤ پێشبینیێن مە چ پارە نەھاتینە دانان بۆَ پێشمەرگەی، لەورا ئەز وەک بریاردەرێ لیژنا ئاسایش و بەرگریێ ل جڤاتا نوونەرێن عێراقێ، پرۆژە یاسایەک دایە ھەر پێنج فراکسیۆنێن کوردی و ئەندامێن لژنا دارایی ل بەغدا، ژ پێخەمەت ھندێ ب شێین بۆ ماوێ سالەکێ مووچەی بۆ 100ھەتا 150 ھزار پێشمەرگەیان بۆ ھەموو ھەیڤان دابین بکەین، چونکە پێشمەرگە سازیەکا شەرعیە ل عێراقێ و گۆت ژی:نوکە ل عێراقێ پتری ملیۆن کەسان ل سازیێن ئەمنی مووچەی وەردگرن و ئەو پارێ بۆ ھێزێن پێشمەرگەی دیارکری کو نێزیکی 2 ترلیۆن دینارانە نە گەلەکن،ھەروەسا حەشدا شەعبی مووچێ خۆ ژ بۆدجا عێراقێ وەردگرن، لێ ئەم دگەشبینین کو ئەم بشێن ڤێ رێژا پارەی دابین بکەین و کارتێن گڤاشتنێ ھەنە و ئەم دشیێن گڤاشتنێ ل سەر حوکمەتا بەغدا بکەین.
دەرباری نە دانانا بودجا پێشمەرگەی بۆ سالا 2016 ناڤھاتی گۆت:حوکمەتا عێراقێ وێ ھزرێ دکەت کو دێ کوردستان جۆدابیت ژ عێراقێ لەورا بودجێ بۆ تەرخان ناکەن،نەڤێت پێشمەرگە تەجھیز بیت ژ ھەموو لایان ڤە،لێ ئەم ھەر دێ بەرەڤانیێ ژمافێن پێشمەرگەی کەین،مە ھیڤی ھەیە کو ئەم بشێن وەک پۆلیس و لەشکەر و ھەوو ھێزێن دی یێن عێراقێ پارەی بۆ پێشمەرگەی دابین بکەین،ھەکە ئەڤ پارە بۆ پێشمەرگەی ھاتنە دانان حوکمەتا عێراقێ نەچارە ب مەزێخیت،لێ ھەکە پارە نەدا ئەم دەنگی ل سەر بۆدجا سالا 2016 نادەین و دێ بەرەنگاریا وان کەین،چونکی خالێن لاواز یێن حوکمەتا عێراقێ لبەر دەستێ مە ھەنە،ئەم دشێن مفای ژێ بینین،ھەروەسا دبێژیت:نوکە کوردان ئەو رۆلێ بەرێ ل بەغدا نەمایە و ژیانا وان کەفتیە د مەترسیێ دا،لێ دڤێت ئەم فشارێ ل سەر بەغدا درۆست بکەین و بۆ ماوێ ھەیڤەکێ دەوامێ نەکەین و بالیۆزێن وەلاتێن بیانی ئاگەھدار بکەین،کو حوکمەتا عێراقێ زۆریێ لمە دکەت،ژ پێخەمەت بشێین بۆدجێ بۆ پێشمەرگەی دابین بکەین،لێ مخابن ھەتانوکە ئەم ئێک ھەلویست نەبووینە و پێکھاتەیا کوردان ددەستھەلاتا تەنفیزی دا ل بەغدا وەکو جاران نەمایە.