ئەڤرۆ نیوز:
بالیۆزێ رووسیا ل تورکیا دیار کر کو بۆ وێ یەکێ وەلاتێ وی ل تورکیا ببوریت، سێ مەرج داناینە دا کو جارەکا دی پەیوەندیێن وان ئاسایی ببن.
“ئەنری کارلۆف” گۆت:(پێدڤیە تورکیا داخوازا لێبۆرینێ ژ رووسیا بکەت و وان کەسان سزا بدەت یێن فرۆکا رووسی ئێخستی و رووسیا قەرەبوو بکەت).
بالیوزێ رووسیا ئاشکرا ژی کر کو ھەکە تورکیا ڤان خالان بجھـ نەئینیت، ئاخافتنا ل گەل بەرپرسێن وی وەلاتی چو ئەنجام نابن.
ئه‌ڤرۆ نيوز:
رێڤەبەرێ پەروەردا کوردی ل قەزا شنگال بۆ ئەڤرۆ دیار کر کو دەزگەھێ خێرخوازیێ بارزانی قوتابخانەکا پێکھاتی ژ 11 پۆلان ل چیایێ شنگال دانا و ھەتا 350 قوتابیان دێ تێدا خوینن و داخوازێ ژ ھەموو رێکخراوان و دەزگەھێن خێرخوازی دکەن کو ل دەڤەرا شنگال دەست ب چێکرنا قوتابخانەیان بکەن.
حسێن خدر رێڤەبەرێ پەروەردا کوردی ل قەزا شنگال دیار کر کو دگەل دانانا قوتابخانەکا 11 پۆلی ل چیایێ شنگالێ دەزگەھێ خێرخوازی یێ بارزانی دابینکرنا ھەموو پێدڤیێن خواندنێ یێن وان قوتابیێن ل ڤێ قوتابخانێ دخوینن ب ستۆیێ خوەڤە گرتینە و گۆت “ژبلی دەزگەھێ بارزانی ھەتا نوکە چ دەزگەھێن دی ل شنگالێ پووتە ب پرۆسا خواندنێ نەدایە، ل دەمەکی پێدڤیە ھەموو دەزگەھێن خێرخوازی و رێکخراو وەکو دەزگەھێ بارزانیێ نەمر دەست ب چێکرنا قوتابخانەیان بکەن ل دەڤەرا شنگال”.
رێڤەبەرێ پەروەردا کوردی ل قەزا شنگال گۆت ژی “شنگال پێدڤی ب ئاڤاکرنا زۆر قوتابخانەیان ھەیە و داخوازێ ژ حوکمەتا ھەرێمێ و ھەموو رێکخراوان دکەین ھەر ژ نوکە دەست ب ئاڤاکرنا قوتابخانەیان بکەن، داکو سالا بھێت د ناڤ سەنتەرێ قەزا شنگال دا دەست ب رێڤەبرنا پرۆسا خواندنێ بھێتە کرن”.
ئەڤرۆ نیوز:
پەیڤدارێ جڤاتا سەرکرداتیا پارتی دیمۆکراتی کوردستان ل سلێمانیێ راگەھاند بالەکێ ناڤ گۆڕان پرۆپاگندا دروستکرنا ھێزەکا چەکدار بۆ گۆڕان دکەت و ب کریار ژی خەمێ ژێ دخون، چونکو وان پێخۆشە ھێز ھەبیت و ھەم ژی دێ کەنە کارتا فشارێ.
فارس نەورۆلی ئاشکرا ژی کر کو دروستکرنا ھێزەکا ب ڤی رەنگی، ژ روویێ ستراتیجی سیاسی ڤە گەلەکا نەبەرئاقلە، چونکو کورد یێن چووینە قوناغەکا نوو، ئەڤ پێنگاڤا گۆڕان پاشڤە زڤڕینە بۆ خالا سفر و وەلاتی بەر ب ملیشیاگەریێ دبەت و بۆ مالپەرێ فەرمی یێ پارتی گۆت:(گۆڕان گەلەک پرۆپاگندا دیۆکراسیێ و فشارا راگەھاندنێ و پێنگاڤێن مەدەنی دکر، ئەرێ خێرە نوکە دڤێت ھێزا چەکداری دروست بکەت).
ئه‌ڤرۆ نیوز:
تیرۆرسته‌كێ داعش كو ده‌ست د سه‌ربرینا 5 پێشمه‌رگه‌یێن دیل دا ل حه‌ویجه هه‌بوو ژ ئالیێ ئاژانسا پاراستن و زانیاریێ یا هه‌رێما كوردستانێ ڤه هاته ده‌سته‌سه‌ركرن.
ئاژانسا پاراستن و زانیاریێ یا هه‌رێما كوردستانێ وه‌سا به‌لاڤكرییه كو ئه‌ڤ تیرۆرسته یێ بناڤێ (عه‌لی قه‌حتان عه‌بدولوه‌هاب مه‌حمود عوبه‌یدی) دئۆپه‌راسیۆنه‌كا وان دا هاتیه ده‌سته‌سه‌ركرن و دانپێدانكرییه كو ئه‌و هه‌ڤالێ تیرۆرست مه‌لا شوان بوویه و جهێ باوه‌ریا وی بوویه و بفه‌رمانا مه‌لا شوان وی 5 پێشمه‌رگه سه‌ربرینه.
ئه‌ڤ تیرۆرسته به‌ری ببیته داعش دگه‌ل رێكخستیا تیرۆریا ئه‌لقاعیده دابوو و ده‌ست د كوشتنا چه‌ندین كه‌سان دا هه‌بوو، بۆ ئه‌نجامدانا ل سێداره‌دانان دا خۆله‌كا 24 ده‌مژمێری ژ ئالیێ داعش وه‌رگرتبوو.
ئه‌ڤرۆ نیوز:
ئه‌و مامۆستایێ ئه‌ڤرۆ ل پاریسێ گۆتی پشته‌ڤانه‌كێ داعش ب كێرێ هێرش كرییه سه‌ر وی و دگه‌ل هێرشێ گۆتییه “ئه‌ڤه بۆ داعشه”، دانپێدانكر كو وی دره‌و كرییه و ئه‌ڤ چیرۆكه ل ده‌ڤ خوه چێكرییه.
پشتی ئه‌و مامۆستا ب برینێن سڤك بۆ نه‌خۆشخانێ هاتیه هنارتن ناڤهاتی وه‌سا خویاكر بوو كو كه‌سه‌كی ئه‌و دایه به‌ر كێران و دگه‌ل هێرشێ گۆتییه ئه‌ڤه بۆ داعشه و ره‌ڤییه، لێ پشتی ده‌مژمێره‌كێ ل نه‌خۆشخانێ مای دانپێدانكر كو وی راستی نه‌گۆتیه و ئه‌ڤ روودانه ژ ده‌ڤ خوه چێكرییه.
پۆلیسێن فره‌نسی ده‌ست ب دووڤچوونێ كرییه بۆ زانینا وێ یه‌كێ مامۆستای چاوا خوه بریندار كرییه و بۆچی ئه‌ڤ چیرۆكه ژ ده‌ڤ خوه چێكرییه.
ئه‌ڤرۆ نیوز:
پشتی حكومه‌تا توركیا قه‌ده‌غه‌كرنا هاتنوچوونێ ل چه‌ندین باژێرێن كوردستانێ ژ وان ژی باژێرێ جزیرێ، سلۆپی، سوور و كه‌ربۆران 7 كه‌سێن كورد گیانێ خوه ژ ده‌ست دا.
به‌رپرسێن نه‌خۆشحانا ئامه‌دێ خویاكر كو ل باژێرێ ئامه‌دێ دو كه‌سێن سڤیل د خوه‌نیشاندانێن دژی قه‌ده‌غه‌كرنا هاتنوچوونێ گیانێ خوه ژ ده‌ست دایه.
ل ناوچا كه‌ربۆران ل مێردینێ 5 شه‌رڤانێن كورد د شه‌ر و په‌ڤچوونان دا دگه‌ل له‌شكه‌رێ توركیا گیانێ خوه ژ ده‌ست دا.
پشتی په‌رله‌مانتارێن هه‌ده‌پێ خوه‌نیشاندان ل ئامه‌دێ لدژی قه‌ده‌غه‌كرنا هاتنوچوونێ كری ب گازا روندك رێژ و ئاڤا خورت ژ ئالیێ هێزێن ئێمناهیێ ڤه به‌رسڤا وان هاته دان.
هه‌ر ژ ئه‌گه‌رێ بزاڤێن له‌شكه‌رێ توركیا ل سلۆپی ده‌رگه‌هێ سنۆریێ ئیبراهیم خه‌لیل دناڤبه‌را هه‌رێما كوردستانێ و باكۆرێ كوردستانێ هاته داخستن.
ژ ئالیێ خوه‌ڤه په‌كه‌كێ ئاشكرا كر كو هێزێن وان ل ناوچا بسمیلێ ل ئامه‌دێ و ل نسێبینێ ل مێردینێ 10 سه‌رباز و پۆلیسێن تورك كوشتینه.
ئەڤرۆ نیوز: کاروان باعەدری:
کچەکا کوردا ئێزدی ب ناڤێ (لوسی سیمون) کو ئاکنجیا روسیایە و ل باژیرێ موسکۆ ژیانا خوە بەردەوام دکەت و نھا بوویە فرۆکەڤانا فرۆکەیا رۆسی و چەندین بنگەھین داعشی تۆپبارانکرینە.
چالاکڤان فەھد داود ژ ئەلمانیا کو کەسەکێ نێزیکی فرۆکەڤان لوسی سیمۆنێ یە بۆ ئەڤرۆ نیوز گۆت: “کچەکا ئێزدی بوویە ڤروکەڤانا فرۆکەیەکا رۆسی و نھا چەندین جاران بنگەھێن داعش ل سوریێ تۆپبارانکرینە و گۆت: “لوسی سیمۆنی سۆز دایە تۆلا کچ و ژنێن ئێزدی ئەوێن رەڤاندی د دەستێن داعش دا ڤەکەت و دێ بەردەوام بیت ل سەر تۆپارانکرنا بنگەھێن داعش ل سوریایێ”.
ئەڤرۆ نیوز، بارزان مزووری:
د فارس بریفکانی، سەروکێ لژنا ساخله‌ميێ ل جڤاتا نوونه‌رێن عێراقێ بۆ ئەڤرۆ نیوز دیار کر کو ئەو نوشدارێن نھا ل بن دەستھەلاتا داعش هه‌كه ل دووڤ وان رێنمایێن وان کار نەکەن دھێنە سزادان ب سزایێ گولەباران کرن یان سێدارەدان تایبەت پارێزگەھا مووسل نھا رێیا وان ھاتیە گرتن کو ژ ناڤ مووسل دەرکەڤن.
ناڤبری دیار کر کو نەخوشخانەیێن مووسل ھەموو یێن بووینە پارە وەکو کلینیکێن ئیڤاریان ب بھایەکێ گران چارەسەریا نەخوشان دکەن رۆژانە ل سەر وان بەرتەنگتر لێ دھێت دەرمان بۆ وان ژ رەقە دهاتن، به‌لێ ئەڤە پتر ژ ھەشت ھەیڤانه دەرمانێن بۆ مووسل دچوون ھاتینە برین.
بريفكانى گۆتژى: “پتریا نوشدارێن وان یێن نھا ل مووسل ژ سوریا ئیناینە، ب تایبەت برینپێچ ئەوێن ل سوریا سەرکردەیێن وان چارەسەردکرن نھا ئیناینە مووسل، ناھێلن نوشدارێن عيراقی وان چارەسەر بکەن”.
ئه‌ڤى نوونه‌رێ جڤاتا نوونه‌رێن عيراقێ دا زانين ژى كو ل بەغدا ژی یا بوویە ئەزمەیەکا مەزن ل سەر نوشدارا یێ دچنه ژ دەرڤەی وەلاتی ئەگەر بەردەوام ب ڤی شێوەی بمینیت دێ بیتە مەزنترین ئالوزی بۆ حوکمەتا بەغدا.
ئەڤرۆ نیۆز، قائید میرۆ:
سپێدەھیا ئەڤرۆ رۆژا دوشه‌مبى رێكه‌فتى 14ى كانوونا دويێ تیرۆرستێن داعش ب تڕۆمبێلەکا بۆمبەکری ھێرشی سەر ھێزێن پێشمەرگەی کر و ھاتە پەقاندن.
ژێدەرەکێ له‌شكرى بۆ ئەڤرۆ نیوز گۆت: “سپێدەھیا ئەڤرۆ ل گوندێ حاجی فازل یێ سەر ب ناحیا عیازیە یا قەزا تلەعفەر تڕۆمبێلەکا بۆمبڕێژکری ھێرشی سەنگەرێن پێشمەرگەی کر، بەلێ ژ لایێ پێشمەرگەی ڤه ب چەکێ گران ھاتە ژناڤبرن”.
ژێدەرێ کو نەڤیاى ناڤێ وى بھێتە بەلافکرن گۆتژی: “چەکدارەکێ خوەکوژێ داعش د ناڤ ترۆمبێلێ دا ھاتیە کوشتن و چو زیان نەگەھاندینە ھێزێن پێشمەرگەی ل دەڤەرێ”.
نيشاندان