ئەڤرۆ نیوز:
سەرۆکێ بەرێ یێ سازیا ھەوالگیریا تورکیا دیار دکەت کو رۆژھەلاتا ناڤین بلەز بەر ب گوھۆرینان ڤە دچیت و ھەر روودانەکا ل دەڤەرێ دێ کاریگەریا خوە ل تورکیا کەت، دڤێت سەرۆک کۆمارێ تورکیا جارەکا دی دەست ب قۆناغا ئاشتیێ و چارەکرنا پرسا کوردی بکەت و دڤێت ئەو یەک ژی باش بھێتە دیتن کو پرسا کوردی تنێ ب رێیا ئۆجەلانی و قەندیلی چارە نابیت و دڤێت گرنگی ب رۆلێ زانا و کەسایەتیێن کورد ژی بھێتە دان.
جەواد ئونەش سەرۆکێ بەرێ یێ سازیا ھەوالگیریا تورکیا (میتێ) بۆ رۆژناما جمھوریەت یا تورکیا دیار کر کو ئەو گەنجێن نھا ل باژێرێن کوردان خەندەقان چێ دکەن و ھێرشی ھێزێن ئێمناھیێن تورکیا دکەن ھەر ئەو زارۆنە کو ل سالێن ١٩٩٣ بەر دھاڤێتنە ھێزێن ئێمناھیێ و نھا ئەو مەزن بووینە و شەرێ ھێزێن مە دکەن، ئەو یەک ژی نیشا ددەت کو ھەتا پرسا کوردی ل تورکیا چارە نەبیت دێ بەربابێ نوو ھەردەم دەولەتێ وەک دوژمنێ خوە بینیت و دێ مەترسیێن ل سەر پاشەرۆژا تورکیا ب گشتی ژی مەزنتر لێ ھێن و ژ بەر ھندێ ژی جارەکا دی ئەردۆگانی دەست ب پرۆسا چارەکرنا پرسا کوردی بکەت و گۆت: (ئەڤرۆکە ل تورکیا ھەموو تشتەک د دەستێ ئەردۆگانی دایە و ئەو یەک ژ ئالیێ ھەر کەسەکێ ڤە دھێتە دیتن، پشتی ئەنجامێن ھەلبژارتنێن یەکێ مژدارێ و شکەستنا پارتیا بزاڤا نەتەوەپەرست و پارتیا دیموکراتیک یا گەلان ئەردۆگان و ئاکپارتی وەک سەرکەڤتیێن ھەلبژارتنان دەرکەڤتنە مەیدانان و جارەکا دی ئەردۆگان شیا ھەموو ھێزێ د دەستێ خوە دا کۆم بکەت و ژ بەر ھندێ ژی نھا ئەردۆگان دشێت بریارا چارەکرنا پرسا کوردی بدەت و ئەز باوەرم ناکەم چو ھێزەک ھەبیت کو بشێت دژبەریا وی بکەت).
سەبارەت ب چاوانیا چارەکرنا پرسا کوردی ژی ناڤھاتی دیار دکەت کو دڤێت ئەم باش بزانین کو پرسا کوردی تنێ ب رێیا ئۆجەلانی و قەندیلی ناھێتە چارەکرن. ئەنجامێن ھەلبژارتنێن یەکێ مژدارێ ژی ئەو یەک نیشا ھەموو ئالیەکێ دا، ژ بەر ھندێ دڤێت کەسایەتی و ئالیێن دی یێن کوردی ژی ببنە پشکەک ژ پرۆژێ چارەسەریێ و دڤێت دەولەت ل گەل وان ژی ھەڤدیتنان بکەت و گوھداریا وان بکەت و گۆت: (ژ بۆ برێڤەچوونا پرۆسا ئاشتیێ و چارەکرنا پرسا کوردی دڤێت پارتیا کرێکارێن کوردستانێ دەستان ژ چەکی بەردەت، ھەتا چەک د دەستێ وان دا بن ئالیێن سیاسی نەشێن چو رۆلەکێ بگێرن، دڤێت ئەو دەلیڤێ بدەنە پارتیا دیموکراتیک یا گەلان دا بشێن د مەیدانا سیاسی دا خوەدان رۆل بن).
ناڤھاتی بەحسێ مەترسێین ل سەر پاشەرۆژا تورکیا ژی دکەت و دیار دکەت کو شەرێ نھا ل تورکیا نیشا ددەت کو دڤێت بلەز پرسا کوردی بھێتە چارەکرن، بەری ھەلبژارتنان دەلیڤەکا گەلەک باش ھەبوو، لێ مخابن ئەو دەلیڤە نەھاتە بکارئینان و جارەکا دی شەری دەستپێکر و ب دەستپێکرنا شەری رەوشا ناڤخوەیی ل تورکیا گەلەک ئالۆز بوویە، لێ ڤێجارێ رەوش وەک جاران نینە، چونکو رەوشا رۆژھەلاتا ناڤین گەلەک ئالۆز بوویە و مەترسیا پارچەبوونا گەلەک وەلاتان ھەیە و ھەکە تورکیا پرسا کوردی چارە نەکەت دێ تورکیا ژی تووشی شەرێ ناڤخوەیی ھێت و دێ پارچە بیت و گۆت: (ڤەکۆلین و راپۆرتێن دەزگەھێن راگەھاندنێ و سازیا ھەوالگیری باش نیشا ددەن کو رەوشا باژێرێن کوردان گەلەک ئالۆز بوویە و ل گەلەک دەڤەران کۆنترۆل ژ دەستێ ھێزێن دەولەتێ دەرکەڤتیە، دڤێت ئەو ئالۆز درێژ نەبیت و رەوش ئارام بیت و ژ بۆ وێ یەکێ ژی دڤێت بلەز دەست ب چارەکرنا پرسا کوردی بھێتە کرن و پێنگاڤێن بەرچاڤ بھێنە ھاڤێتن، ھەکە ئەو یەک نەھێتە کرن مەترسیەکا مەزن دێ ل سەر تورکیا دروست بیت و کەس نەشێت رێگریێ ل پارچەبوونا تورکیا بگریت).