ئەڤرۆ نیوز:
ئاژانسا BBC د راپۆرتەکێ دا دیار دکەت کو ئازادکرنا شنگالێ د دەمەکێ کورت و بێی کو پێشمەرگێن کوردستانێ شەھیدێن زێدە بدەن نیشا ددەت کو کورد شیان ستراتیژی و نھینێن شەرێ داعشێ ئاشکرا بکەن و شنگال جھەکێ ستراتیژی و گرنگ بوو و ب ئازادکرنا شنگالێ دەرگەە بۆ ئازادیا مووسل و رەقە خوەش بوویە.
ئاژانسا BBC دوھی راپۆرتەک سەبارەت ب شەرێ ل دژی داعشێ و رۆلێ پێشمەرگێن کوردستانێ بەلاڤ کر و د راپۆرتێ دا ھاتیە دیار کرن کو شنگال جھەکێ گەلەک ستراتیژی و گرنگ بوو و کەسێ باوەر نەدکر کورد بشێن د ماوەیەکێ وەسا کورت و بێی کو شەھیدێن زێدە بدەن وی جھێ ستراتیژی ئازاد بکەن، لێ پێشمەرگێن کوردستانێ ب فەرمانداریا سەرۆکێ ھەرێما کوردستانێ مەسعود بارزانی شیان تەکتیکەکا باش یا شەری دارێژن و د دەمەکێ کورت دا شیان شنگالێ ئازاد بکەن، ئازادیا شنگالێ د راستی دا نیشا لاوازیا داعشێ یە و نھا قۆناغا ژناڤچوونا داعشێ دەستپێ کریە.
د پشکەکا دی یا راپۆرتێ دا ھاتیە دیار کرن کو ئازادکرنا شنگالێ نیشا دا کورد شیاینە تەکتیکا شەری یا داعشێ ئاشکرا بکەن و پێرابوونێن پێدڤی ل ھەمبەر وان وەربگرن، ژ بەر ھندێ ژی دڤێت نھا لەشکرێ عیراقێ ژی وەک ھێزێن پێشمەرگەی شەرێ وێ رێکخراوا تیرۆرستی بکەن و وان ژ عیراقێ دەربخینن، چونکو کوردان یا پێدڤی کر و ھەموو ئاخا خوە ژ دەستێ داعشێ ئازاد کرن و نھا دڤێت لەشکرێ عیراقێ ژی بسەلمینیت کو ئەو دشێن شەرێ داعشێ بکەن، پێدڤی بوو پشتی ئازادکرنا شنگالێ لەشکرێ عیراقێ ھێرشی وان جھان کربان یێن کو نھا د دەستێ داعشێ دانە و شکەستنا داعشێ ل شنگالێ دەستپێکەک گرنگ بوو دا لەشکرێ عیراقێ ژی مفای ژێ ببینن و پارێزگەھێن نھا د دەستێ داعشێ دا ئازاد بکەن، لێ مخابن ھەتا نھا ژی لەشکرێ عیراقێ نەشیایە وەک لەشکرەکێ شەری بکەت و ئەو یەک ژی دێ کاریگەریا خوە ل سەر ئازادکرنا مووسلێ و پارێزگەھێن دی یێن عیراقێ کەت کو ھەتا نھا ژی د بن دەستێ داعشێ دانە.
د بەردەوامیا راپۆرتێ دا ئاماژە ب ھندێ ژی ھاتیە کرن کو پێشمەرگە و شەرڤانێن کورد دربێن مەزن ل داعشێ دان و پشتی ئازادکرنا شنگالێ دەرگەە بۆ ئازادکرنا مووسلێ و رەقایێ خوەش بوویە، لێ ژ بۆ وێ یەکێ ژی دڤێت کو حوکمەتا عیراقێ سیاسەتا خوە یا شاش ل ھەمبەر کوردان ب گوھۆریت و ئەو دۆرپێچا ئابووری یا کو چەند سالن ل سەر ھەرێما کوردستانێ ھەیە ب دووماھی بھێت، چونکو شەرێ ل دژی داعشێ نیشا دا کو کورد ھێزەکا گەلەک کاریگەرن و نھا بۆ حوکمەتا عیراقێ و سووریایێ ژی یا باش ئەوە کو بزاڤێ بکەن پەیوەندیێن خوە ل گەل کوردان باش بکەن و وەک بەرێ دوژمناتیا کوردان نەکەن و بزاڤێ بکەن ل گەل کوردان ببنە جیرانێن باش، چونکو ئەو یەک بۆ پاشەرۆژا عیراقێ و سووریایێ ژی یا گرنگە.
د دووماھیا راپۆرتێ دا ئەو یەک ژی ھاتیە دیار کرن کو پشتی ھێرشێن ل پاریسێ وەلاتێن ئورۆپا ب رەنگەکێ جدی ھەست ب مەترسیا رێکخراوا تیرۆرستی یا داعشێ کرن و دھێتە چاڤەرێ کرن کو وەلاتێن ئورۆپی ب رەنگەکێ باش ھاریکاریا کوردان بکەن دا ئەو داعشێ ژناڤ ببەن، چونکو ھەتا داعش ل عیراقێ و سووریایێ ھەبیت و ب ھێز بیت ھەردەم دشێت کریارێن تیرۆرستی ل ئورۆپا و ھەر جھەکێ دی یێن جیھانێ ئەنجام بدەت، ژ بەر ھندێ ژی ھەکە وەک پێدڤی ھاریکاریا کوردان بھێتە کرن دێ مەترسیا داعشێ ل سەر ئورۆپا رابیت.

ئەڤرۆ نیوز:
بڕیارە ئەڤرۆ کۆنگرێسێ ئەمریکا بڕیارێ ل سەر پارچەبوونا عیراقێ بدەت و ل دووڤ وێ بڕیارێ وەک دەولەتێن جودا سەرەدەری ل گەل ھەرێما کوردستانێ و سوننا بھێتە کرن.
پەرلەمانتارەکێ عیراقێ یێ بەرێ ژی ژ بەر بھێنڤەدانا پەرلەمانی داخوازێ ژ حوکمەتێ دکەت، بالیۆزێ ئەمریکا ل عیراقێ دەربێخیت و بالیۆزخانا وێ ژی بگریت.
فەوزی کەریم ترزی ئەڤ پێنگاڤا ئەمریکا ب دەستێوەردانا کاروبارێن ناڤخوە یێ عیراقێ وبجھئینا پرۆژێ جۆ بایدن جێگرێ سەرۆکێ ئەمریکا بۆ بۆ دابەشکرنا عیراقێ ل سەر سوننە و کورد و شیعان وەسفکر و گۆت:(پێدڤیە پەرلەمان روونشتنەکا نەئاسایی ئەنجام بدەت و ڤان پێنگاڤێن کۆنگرێسی گەنگەشە بکەت و بڕیارەکا دیرۆکی و نیشتمانی د ڤی واری دا بدەت).

ئەڤرۆ نیوز، ئەیاد بەرواری:

سەرۆکێ سووری بەشار ئەسەد راگەھاند، د مەھا ئێکێ دا ژ ھێرشێن ئەسمانی یێن روسی ل سەر گرۆپێن تیرۆرستی ل سووریێ، ب ھزارەھا چەکدارێن وان گرۆپان یێن بەر ب تورکیا و ئورۆپا و یەمەنێ ڕەڤین.
بەشار ئەسەد سەرۆکێ سووریا د دیدارەکێ دا ل گەل تەلەڤزیۆنا (فینیکس) یا چینی گوت” ژ ئەنجامێ ھێرشێن ئەسمانی یێن ھەڤپەیمانیا نێڤدەولەتی ب سەرکێشیا ئەمریکا پشتی پتر ژ سالەکێ ژ دەستپێکرنا وان ھێرشان، تیرۆرستان گەلەک دەستکەفتی ب دەستڤەئینان و ھژمارەکا مەزن ژی ژ چەندین دەڤەرێن جیھانێ گەھشتنە رێزێن تیرۆرستان”.
سەرۆک سووری گوت ژی” روسیا پشت بەستنێ ل سەر ھێزێن ئەردی یێن لەشکرێ سووری دکەت، بەرۆڤاژی ئەمریکا کو چو ھەڤکاریێ ل گەل ھێزێن ل سەر ئەردی ناکەت و دشیاندا نینە شەڕێ تیرۆرێ ب ھێرشێن ئەسمانی ب تنێ بھێنە کرن”.
گوت ژی” رەوشا لەشکرێ سووری ل سەر ئەردی گەلەک یا باشتر لێھاتی پشتی پشکداریا فرۆکێن روسی د شەڕێ دژی تیرۆرێ دا و لەشکرێ سووری ل گەلەگ دەڤەران یێ پێشڤەچووی”.