ئه‌ڤرۆ:

هاریكارێ وه‌زیرێ ده‌رڤه‌ یێ ئه‌مریكا راگه‌هاند، سه‌رۆك مه‌سعود بارزانی و گه‌لێ كوردستانێ هه‌ڤپشكێن گرنگێن ئه‌مریكانه‌ د شه‌رێ دژی داعشێ دا.

جۆی هود، هاریكارێ وه‌زیرێ ده‌رڤه‌ یێ ئه‌مریكی بۆ كاروبارێن رۆژهه‌لاتا ناڤین، د هژمارا تایبه‌ت یا خوه‌ دا ل سه‌ر تۆرا جڤاكی یا تویته‌ری نڤیسی” بۆ زانینا بیر و بۆچوونێن واشنتۆن، خوه‌شحالین ب پێشوازیكرنێ ل هه‌ڤالێن كورد یێن ئیراقی”.

هاریكارێ وه‌زیرێ ده‌رڤه‌ یێ ئه‌مریكی هه‌روه‌سا دبێژیت” سه‌رۆك مه‌سعود بارزانی و گه‌لێ كوردستانێ هه‌ڤپشكێن گرنگ یێن ئه‌مریكانه‌ د شه‌رێ دژی داعشێ دا”.

جۆی هود گۆت ژی” د وێ دیالۆكا د ناڤبه‌را ئه‌مریكا و ئیراقێ دا ب رێڤه‌ دچیت، ئه‌مریكا رۆلێ گه‌لێ كوردستانێ ب بلند دنرخینیت”.

دهێته‌ زانین ل رۆژا شه‌مبیا بۆری 22 ته‌موززا 2021 ئێكه‌م كۆمبوونا فه‌رمی ل ئاڤاهیێ وه‌زاره‌تا به‌رگری یا ئه‌مریكی (بنتاگۆن) د ناڤبه‌را شاندێ ئیراقێ و یێ ئه‌مریكا هاتبوو ئه‌نجامدان ب پشكداریا نوونه‌ره‌كێ وه‌زاره‌تا پێشمه‌رگه‌ ل دۆر هه‌ماهه‌نگی و په‌یوه‌ندیا ستراتیژی د ناڤبه‌را ئه‌مریكا و ئیراقێ دا، د وێ كۆمبوونێ دا رۆلێ وه‌زاره‌تا پێشمه‌رگه‌ ب گرنگ هاته‌ به‌حسكرن، هه‌روه‌سا داخوازیێن وه‌زاره‌تا پێشمه‌رگه‌ و هێزێن ئه‌منی یێن هه‌رێما كوردستانێ راده‌ستی وه‌زاره‌تا به‌رگری یا ئه‌مریكی هاتن كرن.

شاندێ له‌شكریێ بلند یێ ئیراقی د وێ كۆمبوونێ دا ب سه‌رۆكایه‌تیا فه‌ریقێ ئێكێ (عه‌بدولئه‌میر شمه‌ری) و ئه‌ندامه‌تیا قاسم ئه‌عره‌جی و نوونه‌رێ وه‌زاره‌تا پێشمه‌رگه‌ عه‌مید روكن (هه‌ژار عومه‌ر) و شاندێ ئه‌مریكی ژی پێكهاتبوو ژ جه‌نه‌رال (ئۆستن) وه‌زیرێ به‌رگریێ ئه‌مریكا و (جۆی هود) هاریكارێ وه‌زیرێ ده‌رڤه‌ یێ ئه‌مریكی و جه‌نه‌رال (كالڤێرد) فه‌رماندێ هێزێن ئه‌مریكی ل ئیراقێ و سووریێ و جێگرێ وه‌زیرێ به‌رگریێ ئه‌مریكا.

ئه‌ڤرۆ:

وه‌زاره‌تا پێشمه‌رگه‌ ل هه‌رێما كوردستانێ ل سه‌ر ته‌قه‌كرنا چه‌كدارێن pkk ل هێزا پێشمه‌رگێ كوردستانێ به‌یاننامه‌ك ده‌ركر و تێدا ئاماژه‌كر كو ژ ئه‌گه‌رێ وان چه‌كداران هژماره‌كا مه‌زن یا وه‌لاتیان ئاواره‌ی ده‌ڤه‌رێن دی یێن هه‌رێما كوردستانێ بووینه‌.

د به‌یانناما دوهی 24 ته‌مووزێ یا وه‌زاره‌تا پێشمه‌رگه‌ دا هاتیه‌” چه‌كدارێن pkk  ل چیایێ مه‌تینی، ته‌قه‌ ل هێزێن پێشمه‌رگه‌ی كر” هه‌روه‌سا دیاركر” پێشمه‌رگه‌ هێزا پاراستنا هه‌رێما كوردستانێ یه‌، مافێ وی یه‌ ل هه‌ر جهه‌كێ هه‌رێما كوردستانێ هه‌رێمێ بپارێزیت”.

ژلاییچ خوه‌ڤه‌، فه‌ریق (جه‌مال محه‌مه‌د) سه‌رۆك ئه‌ركانێ وه‌زاره‌تا پێشمه‌رگه‌ گۆت” ئه‌ڤه‌ چه‌ندین جاره‌ pkk ته‌قێ ل هێزا پێشمه‌رگه‌ی دكه‌ت”.

گۆت ژی” ژ ئه‌گه‌رێ شه‌رێ د ناڤبه‌را pkk و توركیا دا، چه‌ندین گوند یێن هاتینه‌ چۆلكرن و هژماره‌كا مه‌زن یا وه‌لاتیان یێن ئاواره‌ی ده‌ڤه‌رێن دی یێن هه‌رێما كوردستانێ بووین”.

ل دووماهیا به‌یانناما وه‌زاره‌تا پێشمه‌رگه‌ دا هاتیه‌” pkk رێزێ ل ئاخا هه‌رێما كوردستانێ ناگریت و یا بوویه‌ هۆكاره‌ك بۆ سنووربه‌زاندنا له‌شكرێ توركی”.

ئه‌ڤرۆ:

وه‌زاره‌تا ده‌رڤه‌ یا سووریێ راگه‌هاند كو ئه‌و ب چو ره‌نگه‌كێ رێڤه‌به‌ریا خوه‌سه‌ر یا باكورێ سووریێ قه‌بوول ناكه‌ن، چونكو رێڤه‌به‌ریا خوه‌سه‌ر پشكه‌كه‌ ژ پرۆژێ ئه‌مریكا بۆ دابه‌شكرنا سووریێ و ئه‌و رێ ناده‌ن پرۆژێ ئه‌مریكا و هنده‌ك وه‌لاتێن دی ل سووریێ سه‌ر بگریت.

وه‌زاره‌تا ده‌رڤه‌ یا سووریێ راگه‌هاند كو رێڤه‌به‌ریا خوه‌سه‌ر یا باكورێ سووریێ پشكه‌كه‌ ژ پرۆژێ ئه‌مریكا و هنده‌ك وه‌لاتێن دی یێن داگیركه‌ر كو وان دڤێت ئاخا سووریێ پارچه‌ بكه‌ن، چونكو ئه‌مریكا و وه‌لاتێن دی نه‌ڤێن ره‌وشا سووریێ ئارام بیت و ئه‌و پشته‌ڤانیا ل هنده‌ك گرۆپان دكه‌ن و نها ژی دخوازن ل باكورێ سووریێ رێڤه‌به‌ریه‌كا جودا ئاڤا بكه‌ن، ئه‌و یه‌ك ب چو ره‌نگه‌كێ ناهێته‌ قه‌بوول كرن و شام ب چو ره‌نگه‌كێ دانپێدانێ ب رێڤه‌به‌ریا خوه‌سه‌ر ناكه‌ت.

ل ئالیێ دی به‌رپرسه‌كێ رێڤه‌به‌ریا خوه‌سه‌ر یا سووریێ ژی به‌رسڤا وه‌زاره‌تا ده‌رڤه‌ یا سووریێ دا و راگه‌هاند كو ئێدی ل سووریێ ره‌وشه‌كا نوو هاتیه‌ پێش، گه‌له‌ك تشت هاتینه‌ گوهۆرین و كه‌س نه‌شێت وه‌كو به‌ری سالا ٢٠١١ سووریێ برێڤه‌ ببه‌ت، كوردان ل باكورێ سووریێ د شه‌رێ ل دژی داعشێ دا گه‌له‌ك قوربانی داینه‌ و دڤێت به‌رپرسێن شامێ راستیا نها هه‌ی قه‌بوول بكه‌ن، چونكو هه‌تا رژێما سووریێ ل سه‌ر هه‌لویستێ خوه‌ یێ نها ل هه‌مبه‌ر كوردان و نه‌ته‌وێن دی یێن ل باكورێ سووریێ به‌رده‌وام بیت بێگومان قه‌یرانا سووریێ ژی ناهێته‌ چاره‌سه‌ركرن و دێ ره‌وش ئالۆزتر لێ هێت.

ئه‌و یه‌ك د ده‌مه‌كێ دایه‌ كو دو حه‌فتیان به‌ری نها سیرگێی لاڤرۆڤ وه‌زیرێ ده‌رڤه‌ یێ روسیا راگه‌هاند كو دڤێت كورد خوه‌ ژ ئه‌مریكا دوور بكه‌ن، چونكو پرسا كوردی ل سووریێ دێ ل شامێ هێته‌ چاره‌سه‌ركرن و دڤێت كورد به‌رێ خوه‌ بده‌نه‌ شامێ و پرسێن هه‌ی ل گه‌ل شامێ چاره‌سه‌ر بكه‌ن، چونكو هه‌لویستێ ئه‌مریكا دێ بیته‌ ئه‌گه‌ر كو پرسا كوردی و پرسێن دی ل سووریێ وه‌سا بمینن.

چاڤدێرێن سیاسی ژی دیار دكه‌ن كو هه‌لویستێ روسیا ل هه‌مبه‌ر مافێن ره‌وا یێن گه‌لێ كورد ل سووریێ گه‌له‌ك خرابه‌، چونكو روسیا هه‌تا نها ژی نه‌ڤێت كورد وه‌كو هه‌موو نه‌ته‌وێن دی یێن ل رۆژهه‌لاتا ناڤین بگه‌هنه‌ مافێن خوه‌، به‌ری نها ژی روسیا گه‌له‌ك جاران داخواز ژ رێڤه‌به‌ریا خوه‌سه‌ر یا باكورێ سووریێ كریه‌ كو هه‌موو ئاخا ل ژێر كۆنترۆلا خوه‌ راده‌ستی شامێ بكه‌ن، لێ ئه‌و یه‌ك ژ ئالیێ هێزێن سووریا دیموكرات و رێڤه‌به‌ریا خوه‌سه‌ر ڤه‌ هاتیه‌ ره‌ت كرن، ئاشكرایه‌ كو شام پشتا خوه‌ ب روسیا و ئیرانێ گه‌رم كریه‌ و نه‌ڤێت كورد ل سووریێ بگه‌هنه‌ مافێن خوه‌ و هه‌لویستێ ڤێ دووماهیێ یێ رژێما به‌شاری ژی باش نیشا دده‌ت كو هه‌كه‌ شام ب هێز كه‌ڤیت دێ هێرشی كوردان كه‌ت.

ئه‌و یه‌ك د ده‌مه‌كێ دایه‌ كو ده‌مه‌كه‌ هێزێن سه‌ر ب ئیرانێ ل دێرازۆرێ و ده‌ڤه‌رێن دی بنگه‌هێن نوو یێن سه‌ربازی ئاڤا دكه‌ن و هه‌تا نها ژی چه‌ندین جاران هێرشی هێزێن ئه‌مریكا ل سووریێ كرینه‌ و ده‌زگه‌هێن راگه‌هاندنا جیهانێ ژی دیار دكه‌ن كو ئیرانێ دڤێت ئه‌مریكا هێزێن خوه‌ ژ سووریێ ڤه‌كێشیت و ژ به‌ر هندێ ژی ب رێیا گرۆپێن چه‌كدار و ب چه‌كێن گران به‌رده‌وام هێرشی هێزێن ئه‌مریكا ل هنده‌ك ده‌ڤه‌ران دهێته‌ كرن، ئانكۆ د ئێك ده‌م دا روسیا و ئیران كار بۆ هندێ دكه‌ن كو ئه‌مریكا هێزێن خوه‌ ژ باكورێ سووریێ ڤه‌كێشیت كو ئه‌و یه‌ك دێ بیته‌ ئه‌گه‌رێ ب هێزبوونا پێگه‌هێ به‌شاری و بۆ كوردان ژی باش نابیت.

ئه‌ڤرۆ، سالار محه‌مه‌د دۆسكی:

به‌رپرسێ‌ لقا پێنچ یا پارتی دیموكراتی كوردستان ل به‌غدا، راگه‌هاند، به‌رهه‌ڤیێن تمام هاتینه‌كرن بۆ هه‌لبژارتنێن داهاتی ل ئیراقێ‌ و پارتی به‌ربژار ل به‌غدا یێن هه‌ین و ب هیڤی نه‌ دێ‌ ده‌نگێن باش بده‌ست ڤه‌ ئینن، ل  هه‌لبژارتنێن بۆری ژی دا گه‌له‌ك ره‌وشه‌نبیر و كه‌ساتیێن توركمان و عه‌ره‌ب ده‌نگدایه‌ به‌ربژارێن كورد.

شوان محه‌مه‌د تاها، به‌رپرسێ‌ لقا پێنچ یا پارتی دیموكراتی كوردستان ل به‌غدا بۆ رۆژناما (ئه‌ڤرۆ) گۆت” هه‌ر هه‌لبژارتنه‌كا بهێته‌كرن ئارمانج ژێ‌ ئه‌وه‌ به‌رنامێ‌ حوكمه‌تێ‌ بهێته‌دانان و  حوكمه‌ت دهێته‌ گوهۆرین وه‌ك پروسه‌كا دیموكراتی و گوهۆرین به‌ر ب پێشڤه‌برنا وه‌لاتی، لێ‌ ل ئیراقێ‌ هه‌تا ئاسته‌كی ئاسته‌نگ یێن هه‌ین ژ روویێ‌ سیاسی، ئابووری، ئێمناهیێ‌ ڤه‌ د ره‌وشه‌كا نه‌ ساخله‌م دایه‌، وه‌كو پارتی ئه‌م د ئاماده‌باشیێ‌ داینه‌ بۆ هه‌لبژارتنان نه‌ بتنێ‌ ل كوردستانێ‌، به‌لكو ل ده‌ڤه‌رێن كورستانی یێن ده‌رڤه‌ی ئیدارا هه‌رێمێ‌ و ل به‌غدا”.

به‌رپه‌رسێ‌ لقا پێنچ یێ‌ پارتی ئه‌و ژی گۆت” هه‌لبژارتنێن ڤێجارێ د جودانه‌ ژ هه‌لبژارتنێن سالێن بۆری و بۆ جارا ئێكێ‌ یه‌ ل ئیراقێ‌ وهه‌رێما كوردستانێ‌ دهێته‌ په‌یره‌وكرن و كارتێكرن دێ‌ هه‌بیت و پێشبینی دهێـته‌كرن كو گوهۆرینه‌كا ریشه‌یی بهێته‌ پێش”.

پتر رۆهنكر” ل دووف وی به‌رنامێ‌ ژلایێ‌ سه‌ركرداتیا پارتی دیموكراتی كوردستان ڤه‌ هاتیه‌ دانان وه‌ك پارتی خودان پێگه‌هه‌كێ‌ ب هێزین و خودان شه‌نگسته‌كێ‌ موكمین و ل دووف وی شه‌نگسته‌ی پارتی به‌ر ب پێشڤه‌چوونێ‌ یه‌”.

زێده‌تر گۆت” ل هه‌ر دو باژێرێن به‌غدا و كوت مه‌ ده‌نگده‌ره‌كێ‌ باش یێ هه‌ی و بهیڤی نه‌ وه‌كو پارتی ده‌نگێن باش ب ده‌ست خوه‌ ڤه‌ بینن ل ڤان هه‌ر دو باژێران و نه‌بتنێ‌ ده‌نگده‌رێ‌ كورد مه‌ هه‌یه‌، به‌لكو ده‌نگده‌رێ‌ عه‌ره‌ب و توركمان ژی مه‌ یێ هه‌ی كو ده‌نگی دده‌ته‌ به‌ربژارێن پارتی، چونكه‌ ئه‌زموونا هه‌رێما كوردستانێ‌ یا دلخوه‌شكه‌ر و سه‌ركه‌فتی یه‌ و خه‌لكه‌كی چاڤ ل سه‌ر هه‌یه‌ و ئه‌ڤه‌ فاكته‌ره‌كێ‌ گرنگه‌ بۆ ده‌نگده‌رێن نه‌ته‌وێن دی و د هه‌لبژارتنێن بۆری دا گه‌له‌ك وه‌لاتیێن عه‌ره‌بێن ده‌نگێ‌ خوه‌ دا به‌ربژارێن كورد و ئه‌ڤ رێژه‌ یا دیار و به‌رچاف بوو”.

ل دو رێككه‌فتنا ره‌وتا سه‌دری ل گه‌ل پارتی دیموكراتی كوردستان، به‌رپرسێ‌ لقا پێنج یا پارتی ل به‌غدا دبێژیت” پشتی هه‌وا هه‌لبژارتنان هه‌ر لایه‌نه‌كێ‌ سیاسی یێ‌ ئازاده‌ رێككه‌فتنێ‌ ل گه‌ل چ لایه‌نه‌كێ‌ دی بكه‌ت، لێ‌ ئه‌نجامدانا رێككه‌فتنا پارتی ل گه‌ل هه‌ر لایه‌نه‌كی مه‌به‌ست ژێ‌ نه‌ ئه‌وه‌ بۆ گڤاشتنێ‌ بیت ل سه‌ر لایه‌نه‌كێ‌ دی، به‌لكو مه‌به‌ستا هه‌ره‌ سه‌ره‌كی ئه‌وه‌ به‌رژوه‌ندیا ملله‌تێ‌ كورد ل به‌رچاڤ بهێته‌ وه‌رگرتن”.

ل دۆر وه‌رگرتنا پۆستێن سه‌رۆكاتیا كۆمارێ یان سه‌رۆكاتیا جڤاتا نوونه‌ران ژلایێ‌ پارتی دیموكراتی كوردستان ڤه‌ پشتی هه‌لبژارتنان، ناڤبری گۆت” نوكه‌ گه‌له‌ك زوویه‌ به‌حسێ‌ وه‌رگرتنا ڤان پۆستان بهێته‌كرن و ئه‌ڤ بابه‌ته‌ دێ‌ هێته‌ پاشخستن بۆ پشتی هه‌لبژارتنان”.

ئه‌ڤرۆ:

كۆمسیۆنا بلند یا سه‌ربخوه‌ یا هه‌لبژارتنان ل ئیراقێ راگه‌هاند، ئه‌ڤرۆ دوشه‌مبی 12 ته‌مووزا 2021، تێستا ده‌نگدانا گشتی و تایبه‌ت بۆ هه‌لبژارتنێن پێشوه‌خت یێن جڤاتا نوونه‌رێن ئیراقێ دێ هێته‌ ئه‌نجامدان.

كۆمسیۆنا ناڤبری راگه‌هاند ژی كو د چارچۆڤێ به‌رهه‌ڤیێن ئه‌نجامدانا هه‌لبژارتنێن داهاتی یێن جڤاتا نوونه‌رێن ئیراقێ كو چاڤه‌رێ دهێته‌ كرن ل 10 چریا ئێكێ یا داهاتی بهێنه‌ ئه‌نجامدان و پشتی ب دووماهی هاتنا پرۆسا تیرۆپشكا پێدانا هژماران ب به‌ربژاران كو هژمارا وان 3244 كه‌سن و ژ لایێ جڤاتا كۆمسیاران ڤه‌ هاتینه‌ په‌سه‌ندكرن، رێ ب به‌ربژاران هاتیه‌ دان كو ل هه‌شتێ ڤێ هه‌یڤێ ده‌ست ب هه‌وا هه‌لبژارتنان بكه‌ن كو هه‌تا رۆژا 7/10 به‌رده‌وام بیت.

كۆمسیۆنێ دیاركر” ل رۆژا دوشه‌مبی 12 ته‌مووزێ، ئێكه‌م تێستا ده‌نگدانا گشتی و تایبه‌ت دێ هێته‌ ئه‌نجامدان، پرۆسه‌ ژی ل ئێك ویستگه‌ها ده‌نگدانێ ل بنگه‌هێن تۆماركرنێ كو هژمارا وان 1079 بنگه‌هن ل ئیراقێ دێ هێته‌ ئه‌نجامدان، ئه‌وژی ب ئارمانجا پشت راستیێ ژ ئامیرێن ئه‌لكترۆنی یێن هه‌لبژارتنان و له‌زاتیا وان و شیانێن وان بۆ هنارتنا ئه‌نجامان ب ساناهی ژ ویستگه‌هان بۆ نڤیسینگه‌ها نیشتمانی”.

ل دووڤ كۆمسیۆنێ، تێستا ده‌نگدانا گشتی و تایبه‌ت ب هه‌ماهه‌نگی ل گه‌ل كۆمپانیا (میرۆی كۆری) و سه‌رپه‌رشتیا كۆمپانیه‌كا ئه‌لمانی یا تایبه‌ت ب پشكنینا ئامیران دێ هێته‌ ب رێڤه‌برن كو تیما نه‌ته‌وێن ئێكگرتی بۆ هاریكاریكرنێ د هه‌لبژارتنان دا و تیما نێڤده‌وله‌تی بۆ رێكخستنا پرۆسا هه‌لبژارتنان دێ به‌رهه‌ڤ بن.

هه‌روه‌سا كۆمسیۆنا هه‌لبژارتنێن ئیراقێ به‌حس ل وێ چه‌ندێ كر كو ب گۆره‌ی مادا 39 ژ قانوونا هه‌لبژارتنان یا هژمار 9 بۆ سالا 2020، پێدڤیه‌ به‌ری 48 ده‌مژمێران ژ ده‌ستپێكرنا پرۆسا ده‌نگدانا گشتی، پرۆسا ده‌نگدانا تایبه‌ت تنێ ب كارتا بایۆمه‌تری دێ هێته‌ ئه‌نجامدان، ده‌نگدانا تایبه‌ت یا هێزێن ئه‌منی یێن سه‌ر ب (وه‌زاره‌تا به‌رگری، وه‌زاره‌تا ناڤخوه‌، ده‌زگه‌هێ دژی تیرۆر، وه‌زاره‌تا ناڤخوه‌یا هه‌رێما كوردستانێ، وه‌زاره‌تا پێشمه‌رگه‌ ل هه‌رێما كوردستانی) بخوه‌ڤه‌ دگریت كو هژمارا وان ئێك ملیۆن و 75 هزار و 727 ده‌نگده‌رن ل 595 بنگه‌هێن ده‌نگدانێ.

ئه‌و چه‌نده‌ ژی هاته‌ به‌رچاڤكرن كو ل دووڤ خشتێ دووماهیێ ئاواره‌ و په‌نابه‌ران ژی، 120 هزار و 126 ئاواران ل ئیراقێ مافێ ده‌نگدانێ یێ هه‌ی كو دشێن ب كارتا بایۆمه‌تری ل جهێن نوكه‌ یێن ئاكنجیبوونا وان ل 86 بنگه‌هێن ده‌نگدانێ ده‌نگێ خوه‌ بده‌ن.

دهێته‌ چاڤه‌رێ كرن هه‌لبژارتنێن پێشوه‌خت یێن ئیراقێ ل 10 چریا ئێكێ یا داهاتی بهێنه‌ ئه‌نجامدان كو تێدا 25 ملیۆن و 139 هزار و 375 ده‌نگده‌ران مافێ پشكداریێ د پرۆسێ دا یێ هه‌ی.