ئەڤرۆ نیوز:
دامەزرێنەرێ حزبا ئومە یا عیراقی رەخنێن توند ل سیاسەتا سەرۆک وەزیرێن عیراقێ حەیدەر عەبادی و چاکسازیێن وی دگریت و دبێژیت ئەو چاکسازیە ب تنێ ئاخڤتنە و ب کریار چو ژ وان چاکسازیان یا دیار نینە.
میسال ئالۆسی سیاسەتمەدارێ عیراقێ و دامەزرێنەرێ حزبا ئومە یا عیراقی و پەرلەمانتارێ عیراقی بۆ گولان گوت” دڤێت ئەو راستیە بھێتە گوتن کو چاڤێَن ھەموویان یێن ل وان چاکسازیێن حوکمەتا عیراقێ راگەھاندین، ب تایبەتی تورەیی و داخوازیێن وەلاتیێن عیراقێ کو حوکمەتا عەبادی نەچار کری رابگەھینیت کو دێ چاکسازیان ئەنجام دەت”.
میسال ئالۆسی زێدەتر گوت” ئەم ھەموو دزانین کو حەیدەر عەبادی کوڕێ حزبا دەعوە یا ئیسلامی یە، لەوما بزاڤا وێ چەندێ دکەت کو بەری ھەر تشتەکی پارێزگاریێ ل دەستکەفتێن حزبا خوە بکەت، ھەکە وەسا نینە، بلا بھێت و بەری ھەموو تشتەکی پێنگاڤێن ئەنجامدانا چاکسازیێ دناڤ سەرکردێن حزبا دەعوە یا ئیسلامی دا ب ھاڤێژیت کو وان دەستێ خوە یێ دانایە سەر ھەموو بیاڤێن گرنگ یێن دەولەتێ، لەوما ئەز چو چاکسازیان ل سەر ئەردی نابینم و سۆزا عەبادی دای ل دۆر ئەنجامدانا چاکسازیان تنێ ئاخڤتن بوون و د راستیێ دا چو ھەبوون بۆ وان چاکسازیان نینە”.
ئالۆسی خویاکر ژی” ھەموو گەندەلیێن ل عیراقێ ھاتینە ئەنجامدان د ستوویێ مالکی دانە و ئەو بەرپرسیارێ سەرەکێ یە ژ وان گەندەلیان، بەلێ چاوان دێ باوەریا مە ب وێ چەندێ ھەیت کو حوکمەتێ دڤێت چاکسازیێ بکەت، د ھەمان دەم دا ئەو یێ دھێت و خرابیێن مالکی یێ دڤەشێریت، دیسا حوکمەتا عەبادی داواکارێ گشتی کارا نەکریە ھەتاکو تاوانباران سزا بدەت، سەرۆک وەزیرێن عیراقێ حەیدەر عەبادی لەوما یێ چاڤێ خوە ل مالکی دنقینیت، یان ژبەر کو ژ مالکی دترسیت، یان ژی نەڤێت مالکی بدەتە دادگەھێ ل گەل وان کەسان یێن کو ھەڤکارێن وی بوون، ھەروەسا یا دیارە حوکمەتا عەبادی یا لاواز پشت بەستنێ ب لایەنێ زانستی و ئیداریێ دروست د ب رێڤەبرنا وەلاتی دا ناکەت”.

ئەڤرۆ نیوز:
سەرۆکێ لیژنا دەڤەرێن کوردستانی یێن دەرڤەی ئیدارا حوکمەتا ھەرێما کوردستانێ راگەھاند، دەڤەرێن پێشمەرگە تێدا ناھێنە چۆلکرن و خورماتوو و شنگال و کەرکووک ھەر دێ مینن بن کۆنتڕۆلا ھەرێما کوردستانێ ڤە و پشکەکن ژ ئاخا کوردستانێ، ل دۆر شەڕێ کورد و میلیشیێن شیعی ژی دیارکر، ئەم سەپاندنا مەرجان ژ میلیشیێن شیعی و چو ھێز و لایەنەکێ دی قەبوول ناکەین و دێ ب توندی بەرسڤا وان دەین.

شوان شێخ ئەحمەد، سەرۆکێ لیژنا دەڤەرێن کوردستانی یێن دەرڤەی ئیدارا ھەرێمێ بۆ رۆژناما ئەڤرۆ گۆت” پشتی ئازادکرنا عیراقێ مادێن دستووری بۆچارەکرنا پرسا ڤان دەڤەران ھاتینە دانان، بەلێ مخابن ھەتا نوکە نەھاتینە بجھئینان و ب ھەلاویستی ماینە و نەڤەگەڕیاینە سەر ھەرێما کوردستانێ ڤە، چونکی پێنگاڤێن باش نەھاتینە ھاڤێتن بۆ ڤێ مەرەمێ، ھەکە ھندەک جاران وەکی پێنگاڤا ئێکێ قەرەبوویا خەلکی ژی ژلایێ حوکمەتا عیراقێ ھاتبیتەکرن، ئەڤە گۆرەی حەزێن وان نەبوویە و خەلکێ زیانڤێکەفتی نەھاتیە قەرەبووکرن بۆ ڤەگەڕیانێ”.
شوانی زێدەتر گوت” پشتی ھاتنا تیرۆرستێن داعشێ، حەشد شەعبی ھاتیە ڤان دەڤەران، ب تایبەتی خورماتوو و جەلەولا و دەوروبەرێن کەرکووکێ، ئەڤە ژی ب ھەڤکاریا لایەنەکێ کوردی بوویە، وی دەمی سەرۆک بارزانی سەرەدانا کەرکووکێ کر و رەتکر چو ھێزەکا دی ژبلی ھێزا پێشمەرگەی بھێتە کەرکووکێ و دەڤەرێن کوردستانێ، مخابن ل قەزا خورماتوو ئاریشە گەھشتە وی رادەی شەڕ و پێکدادان د ناڤبەرا ھێزێن پێشمەرگەی و میلیشیێن شیعی دروست ببن و د ئەنجامدا ھەتا نوکە حەفت وەلاتیێن کورد ھاتینە شەھیدکرن و شەش چەکدارێن شیعە ژی ھاتینە کوشتن، ژبلی ڤێ چەندێ میلیشیێن شیعی دەست ب سۆتن و تالانکرنا مالێن وەلاتیێن کورد کریە و ھەتا نوکە ھژمارەکا وەلاتیێن کورد یێن ھاتینە رەڤاندن و ھژمارەکا دی ژی مالێن وان ھاتینە تالانکرن”.
شوانی گۆت ژی” ئەم وەکی کورد ب چو شێوەیەکی ڕەفتارێن ھوسا قەبوول ناکەین و چو تشتەک نابیت ل سەر مە بھێتە سەپاندن، ھەکە لایەنەک بخوازیت تشتەکی ل سەر مە ب سەپینیت ل ڤان دەڤەران، د بەرھەڤین ب ھەموو شیانێن خوەڤە بەرھەنگارببین و قوربانیێ بۆ بدەین، ژ بەر کو سیاسەتا خوەسەپاندنێ مە ژ (سەدام حسێنی) قەبوول نەکریە، ھەتا ژ خەلک و لایەنەکێ دی قەبوول بکەین، ئەف دەڤەرێن کوردستانی یێن دەرڤەی ئیدارا حوکمەتا ھەرێما کوردستانێ ھێزێن پێشمەرگەی تێدا ھاتینە بجھکرن و ب چو شێوەیەکی ژی ناھێنە چۆلکرن، چونکی ئەڤ دەڤەر پشکەکن ژ کوردستانێ و پێشمەرگەی خوینا خوە یا دانای، ب ھەر بھایەکێ ھەبیت پشتی دەرکرنا تیرۆرستان، دەڤەرێن کوردستانێ ناھێنە بەردان و دێ ھەر سەر ب ھەرێما کوردستانێ ڤە مینن، ل گەل ڤێ چەندێ ئەم ناخوازین شەڕ ل گەل چو لایەنەکی رووبدەت و بکەڤینە ھەڤڕکیێ”.

ئەحمەد شێخ لەنگەری، بەرپرسێ لژنا ناوچا پارتی دیموکراتی کوردستان ل خورماتوو بۆ ئەڤرۆ گوت” شاندەکێ پایە بلندێ عیراقێ یێ گەھشتیە خورماتوو و یێ ل گەل لایەنێن ئەمنی و ئیداری کۆمبووی و ل سەر دو خالان رێککەفتن یا ھاتیە کرن، خالا ئێکێ وەلاتیێن ھاتینە رەڤاندن ژلایێ پێشمەرگە و چەکدارێن شیعی ڤە بھێنە ئازادکرن، شەڤا بۆری ھژمارەک ھاتینە ئازادکرن و ھژمارەک ماینە، خالا دویێ ھێزەک بۆ تەناکرنا رەوشێ یا ھاتیە پێکئینان کو ٧٥ ژوان کوردن و ٧٥ ژی چەکدارێن شیعەنە”.
ئەحمەدی گوت ژی”ل رۆژێن بۆری پتری ٢٠ کەسان ژ ھەردو لایانان یێن ھاتینە کوشتن و نێزیکی ٢٠٠ کەسان ب بارمتە ھاتینە گرتن، ئەڤە ژبلی سوتنا ب دەھان خانی و دوکان و جھێن بازرگانی، ھەردولا د سەنگەری دانە بەرامبەر ئێک و نوزانین دێ چو روو دەت”.
ژلایەکێ دی ڤە، پەیڤدارێ لیوا ١٦ یا پێشمەرگێ کوردستانێ ل سنۆرێ قەزا خورماتوو ئاشکراکر” دوھی بۆ ئاساییکرنا رەوشا خورماتوو، ھێزا پێشمەرگەی و حەشد شەعبی کۆمبوون و رێککەفتنەکا دی ئیمزاکر” لێ گوت ژی” ئەز یێ گەشبین نینم ئەو رێککەفتنە بھێتە بجھئینان”.
رێکەوت محەمەد پەیڤدارێ لیوا ١٦ یا ھێزا پێشمەرگێ کوردستانێ بۆ مالپەرێ فەرمیێ پارتی دیموکراتی کوردستان گوت” بەری دو رۆژان ل خورماتوو، پێشمەرگەی و حەشد شەعبی رێککەفتنەک ئیمزاکر بۆ وێ چەندێ دووماھیێ ب وان ئالۆزیێن خورماتوو بینن، بەلێ ئەو رێککەفتن نەھاتە بجھئینان و دوھی دیسان ھەردو لایەن کۆمبوون، نوونەرێ سەرۆک کۆماری و چەند پەرلەمانتاران ژی پشکداری د وێ کۆمبوونێ دا کر و تێدا بریار ھاتە دان کو رەوشێ دەڤەرێ ئاسایی ببیت و دیل ژی بھێنە ئالۆگورکرن و دووماھی ب ڤێ ئالۆزیێ بینن”.
گوت ژی” رەوش ژ دەست دەرکەفتبوو و بریارە دەستھەلات ب قایمقامێ خورماتوو بھێنە دان و رەوش ئاسایی ببیت، ھەر چەندە ئەڤە ژ سالا ٢٠١٠ ێ وەرە رەوشا خورماتوو یا ئاسایی نینە و باوەرناکەم ئەڤ رێککەفتنە ژی بھێتە بجھئینان”.
رائید فاروق ئەحمەد رێڤەبەرێ ئاسایشا خورماتوو ل دۆر رەوشا وێ دەڤەرێ راگەھاند” دەمێ سێ رۆژانە تەقە ل خورماتوو ھەی و رەوش گەلەک یا ئالۆزە و خورماتوو یا بوویە دو پشک، پشکەک کوردە و یا دی شیعە و دوھی ژی دو کەس برینداربوون”.