ئه‌ڤرۆ نيوز، نيوار محه‌مه‌د سه‌ليم:
فه‌رماندێ ليوا 12 يا پێشمه‌رگێ كوردستانێ ل ناڤ شنگال بۆ ئه‌ڤرۆ نيوز راگه‌هاند كو پلانا قووناغا ئێكێ ژ پرۆسا رزگاركرنا شنگال ب سه‌ركه‌فتنه‌كا گه‌له‌ك مه‌زن و كێمترين خوساره‌تى ب دووماهى هات.
عزه‌دين سه‌يدۆ، فه‌رماندێ ليوا 12 يا پێشمه‌رگێ كوردستانێ سه‌ر ب وه‌زاره‌تا پێشمه‌رگه‌ى گۆت: “پشتى ده‌سپێكرنا قووناغا ئێكێ يا رزگاركرنا شنگال ل رۆژا پێنجشه‌مبى رێكه‌فتى 12ى چريا دويێ يا ئه‌ڤ ساله ده‌سپێكرى، له‌شكرێ كوردستانێ ب پشته‌ڤانيا هێزێن هه‌ڤپه‌يمانان شيان د ماوێ دو رۆژان دا پلانا بۆ هاتيه دارێژتن ب ره‌نگه‌كێ گه‌له‌ك سه‌ركه‌فتيانه و ب كێمترين زيان ب دووماهى بينن”.
ئه‌ڤى فه‌رماندێ پێشمه‌رگه‌ى دا زانين كو نوكه قووناغا ئێكێ با زرگاركرنا شنگال ب دووماهى هات و گۆت: “نوكه نه‌شێين ژڤان ده‌سپێكرنا قووناغا دويێ بكه‌ين”.
رۆژا پێنجشه‌مبى رێكه‌فتى 12ى چريا دويێ يا ئه‌ڤ ساله ب سه‌رپه‌رشتيا مه‌سعود بارزانى سه‌رۆكێ هه‌رێما كوردستانێ و فه‌رماندێ هێزێن چه‌كدار ل هه‌رێما كوردستانێ پرۆسا رزگاركرنا شنگال ب رێڤه‌چوو و تێدا شيان سه‌نته‌رێ قه‌زا شنگال و رێيا نێڤده‌وله‌تى يا 47 كو رێيا ناڤبه‌را ره‌قه و شنگال و مووسلێ يه و دووريانا گرعزێر كو رێيا سه‌ره‌كى يا تله‌عفه‌ر شنگاله ل گه‌ل چه‌ند ده‌ڤه‌رێن دى بگرن.
ئەڤرۆ نیۆز، قائید میرۆ:
رۆژ بۆ رۆژێ رەوشا قەزا خورماتوویا سەر ب پارێزگەھا کەرکووکێ ئالۆزتردبیت و چاڤدێرەکێ سیاسی ژی دبێژیت، پشتی شەڕێ داعش دێ شەڕێ کورد و میلیشیاتێن شیعەبیت.
ئاراس عەبدوڵا، چاڤدێرێ سیاسی بۆ ئەڤرۆ نیۆز راگەھان کو رەفتارێن حەشد شەعبی ل قەزا خورماتوو نیەتێن زۆر خراپ ھەنە و شەھیدکرنا وەلاتیان و تالانکرنا خەلکێ کورد دێ زیانێ ب پەیوەندیێن دیرۆکیێن شیعە و کورددان گەھینیت، چونکو رەوشا قەزایێ زۆر ئالۆزبوویە و پێدڤیە بھێتە تەناکرن.
ئاراسی گۆتژی” پشتی دوماھی ھاتنا شەڕێ تیرۆرستێن داعش و کۆنتڕۆلکرنەڤا دەڤەرێن کوردستانی دێ شەڕێ ھەرێما کوردستانێ و میلیشیاتان دەستپێکەت و پێشبینی دکەم رەوشا ڤان دەڤەران ئالۆزترببیت.
ئەڤرۆ نیوز، زنار تۆڤی:
بەری دو رۆژان شەر و ئالۆزی دناڤبەرا پێشمەرگەی و حەشدشەعبیدا ل سنۆرێ خوورماتوو روودابوون،لێ رەوش هاتبوو ئارامکرن،لێ ئەڤرۆ جارەکادی حەشدشەعبی هێرشکرە سەر پێشمەرگەی و هەروەسا قەناسێن وان ل سەر بانێن ئاڤاهیان تەقێ ل خەلکێ دکەن و هەروەسا وان هێرشکریە سەر بارەگایێن حزبی ل وی باژێری و جارەکادی شەر ئالۆزیان ل وی باژێری دەستپێکریە ڤە.
ئه‌ڤرۆ نيوز:
فه‌رمانده‌يه‌كێ هێزا پێشمه‌رگه‌ى ل شنگال راگه‌هاند، ئه‌ڤرۆ چو خوه‌كوژێن داعش ل سنورێ شنگال خوه نه‌په‌قانديه و ئه‌وێ ئه‌ڤ نوچه به‌لاڤكرى ژى راست نينه و دبێژيت: “نوكه كاودانێن شنگال د ئاسايى نه و تيمێن ئه‌نده‌زيارى مژوولى پاقژكرنا ناڤ باژێرى نه ژ مينێن چاندى”.
فه‌رماندێ هێزن پێشمه‌رگه‌ى عه‌ميد ئاشتى كۆچه‌ر ل شنگالێ بۆ مالپه‌رێ فه‌رميێ پارتى ديموكراتى كوردستان گۆت: “ئه‌ڤرۆ چو هێرشێن خوه‌كوژى ژ لايێ چه‌كدارێن تيرۆرستێن داعش ڤه نه‌هاتينه ئه‌نجام دان، ب تنێ دوهى ل سه‌ربازگه‌ها دۆميز چار خوه‌كوژ ب مه‌ره‌م بوون خوه ب سه‌رنگه‌رێن پێشمه‌رگه‌ى ڤه ب په‌قينن، ئه‌ڤه ژى هه‌ر زوو هێزێن پێشمه‌رگه‌ى لێ هاتبوونه ئاگه‌هداركرن و خوه‌كوژه‌كى په‌قانديه و چو زيان ژى ل پاش خوه نه‌هێلاينه”.
كۆچه‌ر گۆتژى: “نوكه كاودانێن شنگال د ئاسايى نه و تيمێن ئه‌نده‌زيارى مژوولى پاقژكرنا ناڤ باژێرى نه ژ مينێن چاندى و نوكه دو تيم كار دكه‌ن و بڕياره چه‌ند تيمه‌كێن دى ژى بهێنه ره‌وانه‌كرن، چونكو ره‌نگه پاقژكرنا شنگال 10 رۆژان ڤه‌كێشيت”.
ئه‌ڤرۆ نيوز:
نێچيرڤان بارزانى، سه‌رۆك وه‌زيرێن هه‌رێما كوردستانێ، د په‌يامه‌كێ دا ژ ئه‌گه‌رێ هێرشێن تيرۆرستى يێن دوهى رۆژا ئه‌ينى رێكه‌فتى 13ى چريا دويێ بۆ سه‌ر پاريس پشته‌ڤانيا گه‌لێ فره‌نسا كر و دبێژيت: “تيرۆرزم دێ شكێت”، ئه‌ڤه ده‌قێ په‌ياما سه‌رۆك وه‌زيرێن هه‌رێما كوردستانێ يه:
ب دله‌كێ پر په‌ژان ڤه من نوچه‌يێ هێرشێن ترسناك ل دژى خه‌لكێ پاريسێ بيهيست، ژ نيڤا دلێ خوه ڤه سه‌ره‌خۆشيێ لێ دكه‌م و پشته‌ڤانيا خوه و گه‌لێ كوردستانێ پێ رادگه‌هينم.
د شه‌رێ دژى تيرۆرزمێ دا، فره‌نسا بێ ڤه‌قه‌تيان ل گه‌ل هه‌رێما كوردستانێ راوه‌ستيايه و د شه‌رێ وان دا، ئه‌مژى ل گه‌لين. ته‌حه‌دا سه‌ركه‌فتنێ ب سه‌ر وان گه‌فان ژى گه‌له‌ك ملله‌ت و نه‌ته‌وان ل سه‌ر ئاستێ جيهانێ ب ئێك دگريت، ئه‌ڤه ژى تێكوشينا شارستانيه‌تێ يه دژى ده‌مارگێرى و دڕنده‌يێ.
هێرشێن ژ ڤى ره‌نگى ب مه‌ره‌ما به‌لاڤكرنا ترسێ يه، به‌لێ كۆمه‌لگه‌ها نێڤده‌وله‌تى دڤێت ب باوه‌رى ب خوه بوونه‌كا زێده به‌رسڤا وان بهێته دان. د راستى دا، ئه‌ڤ تراژيديايه رۆژه‌كێ پشتى شكه‌ستنا مه‌زن يا داعش ل شنگال هات، ئه‌م دشێين و دڤێت شكه‌ستنێ ب تيرۆرزمێ بينين.
نێچیرڤان بارزانى
سه‌رۆك وه‌زیرێن هه‌رێما كوردستانێ
ئەڤرۆ نیوز، بارزان مزووری:
هێزێن پێشمه‌رگه‌يێ كوردستانێ راگه‌هاند كو سپێده‌هيا ئه‌ڤرۆ ژ ئه‌نجامێ پێشڤه‌چوونێن پێشمه‌رگه‌ى شيان سێ گۆندان ئازاد بكه‌ن.
رائيد به‌درخان حه‌جى، ل ميحوه‌رێ شنگال سه‌ر ب فه‌وجا سێ يا ليوا 12 سه‌ر ب وه‌زاره‌تا پێشمه‌رگه‌ى ڤه، بۆ مالپه‌رێ ئه‌ڤرۆ نيوز ئاشكه‌را كر كو سپێده‌هيا ئه‌ڤرۆ رۆژا شه‌مبى رێكه‌فتى 14ى چريا دويێ هێزێن پێشمه‌رگه‌ى ل باشوورێ شنگال سێ گۆند “حه‌يده‌ر خودێدا و گرێ جامعى و زك دخان” ژ چه‌كدارێن تيرۆرستێن داعش پاقژ كرن.
ناڤبرى دا زانين ژى كو چو زيانێن گيانى ئه‌ڤرۆ د پرۆسا رزگاركرنا ڤان گۆندان دا نه‌داينه و به‌رامبه‌ر وێ چه‌ندێ زيانێن مه‌زن ب چه‌كدارێن داعش گه‌هاندينه.
ئه‌ڤرۆ نيوز:
جڤاتا نشتيمانيا كوردى ل سوريا “ئه‌نه‌كه‌سه” خرڤه‌بوونه‌ك ل دژى “بڕيارێن تاكانه” يێن پارتيا ديموكراتيك “په‌يه‌ده” يا بالێ پارتيا كرێكارێن كوردستانێ “په‌كه‌كه” ل رۆژئاڤايێ كوردستانێ رێكخستن.
د ڤێ خرڤه‌بوونێ دا ئه‌وا ل رۆژا ئه‌ينى 13ى چريا دويێ ل باژێرێ قامشلۆ ب رێڤه چووى، وه‌لاتيێن رۆژئاڤايێ كوردستانێ داخواز ل په‌يه‌دێ و ئيدارا خوه‌رێڤه‌به‌رى كريه كو ب له‌شكركرنا زۆره‌ملى و پرۆگرامێ خواندنێ ب ئايدۆلۆژيا ڤه‌كرى هه‌لبوه‌شينيت.
حه‌سه‌ن سالح، ئه‌ندامێ جڤاتا كوردى راگه‌هانديه، كو ئه‌و ژى حودانێن زمانێ كوردى نه، “مه بهايێ ئه‌وى زمانى يێ دايى و چووينه د زيندانێ دا ل ده‌سپێكێ و هه‌تا دووماهيا ژيانا خوه ژى دێ پارێزگاريێ لێ كه‌ين”.
ئه‌ڤى ئه‌ندامێ جڤاتا كوردى راگه‌هانديه ژى كو ئه‌و قه‌بوول ناكه‌ن زمانێ كوردى بۆ “به‌رژه‌وه‌نديا حزبى” ب كار بينن.
فه‌سله يوسف، جێگرێ سه‌رۆكێ ئه‌نه‌كه‌سێ به‌حس ل رۆلێ جڤاتێ دكه‌ت و رادگه‌هينيت كو ده‌مێ وێ چه‌ندێ هاتيه كو “بێژن به‌سه” بۆ ئه‌و بڕيارێن نه‌يێن دروست يێن په‌يه‌دێ.
ژێده‌ر: باسنيۆز
ئه‌ڤرۆ نيوز:
جڤاتا دوما “په‌رله‌مان”ێ رۆسيا ره‌زامه‌ندى نيشان دا، ل سه‌ر ره‌وانه‌كرنا هێزا ئه‌ردى بۆ عيراقێ، ئه‌ڤه ژى پشتى وێ چه‌ندێ هات كو لژنا ئاسايش و به‌ره‌ڤانيێ ل جڤاتا نوونه‌رێن عيراقێ، د كۆمبوونه‌كێ دا ل گه‌ل لژنا به‌ره‌ڤانى و كاروبارێن ده‌رڤه يێن جڤاتا ئاسايش و به‌ره‌ڤانيێ ل جڤاتا دوما يا رۆسيا، دانوستاندن ل سه‌ر وى بابه‌تى كريه و هه‌ردولا گه‌هشتينه رێكه‌فتنێ و ڤه‌ديتنا رێيێن پێدڤى بۆ ئينانا وان هێزان.
هه‌ر دوهى ژى عه‌دنان ئه‌سه‌دى، ئه‌ندامێ لژنا ئاسايش و به‌ره‌ڤانيێ ل جڤاتا نوونه‌رێن عيراقێ د به‌ياننامه‌كێ دا راگه‌هاند كو رۆسيا ره‌زامه‌ندى نيشان دايه ل سه‌ر هنارتنا هێزێن ئه‌ردى بۆ پشته‌ڤانيكرنا هێزێن عيراقێ ل شه‌رێ دژى داعش و دبێژيت: “رۆسيا ره‌خنه يێن هه‌ين ل سه‌ر شێوازێ مامه‌له‌كرنا هه‌ڤپه‌يمانێن نێڤده‌وله‌تى ب سه‌رۆكاتيا ئه‌مريكا دژى داعش و ئه‌و وه‌سان دبينن د رژد نينن ل بۆردۆمانكرنا وێ رێكخراوێ”.
ئه‌ڤرۆ نيوز:
هێزه‌كا عيراقێ به‌ر ب خورماتۆ ب رێ كه‌فت و ل زالگه‌هه‌كا پێشمه‌رگه‌ى رێگرى لێ هاته كرن و شێخ جه‌عفه‌ر ژى گه‌فان لێ دكه‌ت.
ب گۆره‌يى ئه‌و پێزانينێن ئه‌ڤرۆ نيوز ب ده‌ست خوه ئێخستين، سپێده‌هيا ئه‌ڤرۆ رۆژا شه‌مبى رێكه‌فتى 13ى چريا دويێ فرقا پێنج يا سه‌ر ب هێزا له‌شكرێ عيراقێ كو ب هێزا ديجله يا به‌رنياسه و ژ دو ليوا پێك دهێت، به‌ر ب خورماتۆ ب رێ كه‌فت و ژ لايێ زالگه‌هه‌كا هێزا پێشمه‌رگه‌ى ژى رێگرى لێ هاته كرن و رێ نه‌دا بچيته ناڤ خۆرماتۆ ژ به‌ر هندێ ژى نوكه ئه‌و هێز ل سلێمان به‌گ يا راوه‌ستانديه.
شێخ جه‌عفه‌ر شێخ مسته‌فا، فه‌رماندێ هێزێن 80ێ يێ له‌شكرێ كوردستانێ ژى ل لاپه‌رێ تايبه‌ت يێ خوه ل سه‌ر فه‌يسبۆكى نڤيسيه: “خوه سه‌پاندنێ ژ كه‌سێ قه‌بول ناكه‌ين و رێ ناده‌ين كه‌س زۆلمێ ل گه‌لێ كورد بكه‌ت”.
ئاماژه ب وێ چه‌ندێ ژى كريه كو ئه‌وان ژى هێزه‌كا مه‌زن بريه خۆرماتۆ و دبێژيت: “هه‌كه مه نه‌چار بكه‌ن دێ شه‌رى كه‌ين و ب چاڤێ دوژمن ته‌ماشه‌ى ئه‌وان دكه‌ين”.
پشتى دوهى رێكه‌فتن د ناڤبه‌را هێزێن پێشمه‌رگه‌ى و چه‌كدارێن حه‌شه‌د شه‌عبى دا روودايى، نوكه كاودان هه‌تا راده‌كى كاودان هێمن بووينه و چاڤدێر وه‌سان دده‌نه زانين برنا هه‌ر هێزه‌كا له‌شكرێ عيراقێ دێ كاودانان خرابتر لێ كه‌ن.
نيشاندان