ئەڤرۆ نیوز:
پەیڤدارێ کۆمسیۆنا بلندا سەربخۆیا ھەلبژارتنان و راپرسیا ھەرێما کوردستانێ ئاشکرا کر کو دامەزراندنا 535 کەسان ل کۆمسیۆنێ دێ پاش کەڤیت و گۆت “مە پێشبینی دکر کو 20 ھزار کەس دێ فۆڕمان پڕ کەن، نەکو 108 ھزار کەس”.
شێروان زرار، پەیڤدارێ کۆمسیۆنا بلندا سەربخۆیا ھەلبژارتنان و راپرسیا ھەرێما کوردستانێ د داخویانیەکێ دا بۆ (تۆڕا میدیا رووداو) دان ب وێ ئێکێ کر کو دامەزاندنا ئەوان 535 کەسان زۆر گیرو بوویە و گۆت “ئەم نەشێین ھیچ دەمەکی بۆ جوداکرنا تماما فۆرمان دیار بکەین، داکو ناڤێن کەسێن دامەزراندی بھێنە ئاشکراکرن”.
پەیڤدارێ کۆمسیۆنا بلندا سەربخۆیا ھەلبژارتنان و راپرسیا ھەرێما کوردستانێ ئاشکرا کر کو ل گۆر وان دەلیڤێن کاری کو بەری نھا کۆمسیۆنێ راگەھاندین، کۆمسیۆنێ 12 ڕێڤەبەرێن گشتی دڤێن کو ھەشت ژ وان بۆ ناڤ کۆمسیۆنێ نە و چارێن دی بۆ چار پارێزگەھێن ھەرێمێ نە و گۆت “نھا ئەم مژوولی جوداکرنا ناڤێن وان کەسانین کو بۆ وان 12 پۆستان فۆڕم پڕ کرینە”.
دەربارەی ئەگەرێن پاشکەفتنا راگەھاندنا ئەنجامان شێروان زرار گۆت “مە پێشبینی دکر کو 20 ھزار کەس دێ بۆ وان (535) فۆڕمان پڕ کەن، نەکو 108 ھزار کەس، ھەروەسا ھندەک حالەت ھەنە کو کەسەکی 12 جاران فۆرم پڕ کرینە، ئەڤە د دەمەکی دایە کو بەری نھا کۆمسیۆمێ تێکەست کربوو، کو ھەر کەسێ حەزا دامەزراندنێ ل کۆمسیۆنێ ھەبیت پێدڤیە ب تنێ ئێک جار فۆرمێ پڕ بکەت”.

ئەڤرۆ نیوز:
وەزارەتا خواندنا بلند و ڤەکۆلینێن زانستی بڕیار دا حەفت پەیمانگەھێن تایبەت ل ھەرێما کوردستانێ بھێنە ڤەکرن و پەیڤدارێ وەزارەتێ ژی رادگەھینە، ئەڤ سالە دێ ل پەیمانگەھێن نوو دەست ب خواندنێ ھێتەکرن و ئەڤە دەلیڤەکا باشە بۆ قوتابیێن تێکرایێ وان کێمتر ژ (55)ێ.
عەباس ئەکرەم، پەیڤدارێ وەزارەتا خواندنا بلند و ڤەکۆلینێن زانستی بۆ رۆژناما ئەڤرۆ گۆت “ھژمارەکا زۆرا داخوازیان ھەنە بۆ ڤەکرنا پەیمانگەھان ل ھەرێما کوردستانێ و چەندین داخوازی گەھشتبوونە وەزارەتێ، لەوڕا پشتی پێداچوون و پشتڕاستبوونێ ژلایێ پشکا دلنیایی یا جۆری، دوھی رۆژا دوشەمبی وەزیرێ خواندنا بلند ئیمزا ل سەر ڤەکرنا حەفت پەیمانگەھێن نوو ل ھەرێما کوردستانێ کر و ئێک ژ وان دێ ل پارێزگەھا دھۆکێ ھێتە ڤەکرن، ئەڤژی ب مەرەما وەرگرتنا قوتابیان ب تایبەت ئەو قوتابیێن پۆلا 12ێ ئامادەیی کو تێکرایێ وان کێمتر ژ (55)ێ و دکارن بۆ ئەڤ سالەیا خواندنێ داخوازیێن خوە ئاراستەی ئەڤان حەفت پەیمانگەھان بکەن و دەلیڤا خواندنێ بۆ ھاتیە ڤەکرن، بەرچاڤکرنا پێدڤیێن ھەرێما کوردستانێ بووینە ئەگەر بۆ ڤەکرنا ئەڤان پەیمانگەھان و ئەڤ سالە دێ دەست ب کارێ خوە کەن و قوتابیان وەرگرن”.
عەباسی گۆت ژی “ھەر حەفت پەیماگەھێن مۆلەتێ وەرگرن دێ یێن کەرتێ تایبەتن و ل گۆر رێنمایێن ھژمارە پێنج مۆلەتا ڤەکرنێ وەرگرتیە و ل گۆر رێنمایی و بڕیارێن وەزارەتا خواندنا بلند و ڤەکۆلینێن زانستی دێ کار کەن و ب ڤەکرنا ئەڤان حەفت پەیمانگەھا دێ ھژمارا پەیمانگەھێن ئەھلی ل ھەرێما کوردستانێ بیتە نەە پەیمانگەە و بێگومان دێ خزمەتەکا بەرچاڤ بیت بۆ تەخا قوتابیان”.

ئه‌ڤرۆ نيوز:
گرۆپەکێ جڤاکێ مەدەنی ئامارەکا نوو ل دۆر وان کەسێن ل ھەرێما کوردستانێ چووینە ژ دەرڤەی وەلاتی بەلاڤکر و تێدا ئاشکرا کریە کو بتنێ ددەمێ 11 ھەیڤێن بۆری دا 28 ھزار وەلاتیێن ھەرێما کوردستانێ چووینە ژ دەرڤەی وەلاتی و ل پارێزگەھا دھۆکێ ژی کێمترین رێژە تۆمارکریە.
محەمەد گومەشینی، بەرپرسێ گرۆپێ خەمێت خەلکی بۆ رۆژناما ئەڤرۆ دیار کر کو گەلەک ئامار ل دۆر ئەو کەسێن ل ھەرێما کوردستانێ چووینە ژ دەرڤەی وەلاتی دھێنە بەلاڤکرن، بەلێ مخابن ھندەک ژوان کەس و دەزگەھێن راگەھاندنێ یێن ئاماران بەلاڤ دکەن ئاگەە ژ ھویردەکاریێن چوونا وەلاتیان بۆ دەرڤەی وەلاتی نینە و گۆت: ” ل دووڤ دووماھی ئامارێن ھاتینە ئەنجامدان د یازدە ھەیڤێن بۆری دا 28 ھزار وەلاتیێن ھەرێما کوردستانێ ب رێ یێن نەقانوونی چووینە ژ دەرڤەی وەلاتی و رێژا 80% ێ ژ وان کەسان گەنجن”.
ناڤھاتی ئاماژە دا وێ چەندێ ژی کو نێزیکی 100 ژ وان کەسێن چووینە ژ دەرڤەی وەلاتی خەندقینە یان ب ھەر ئەگەرەکێ ھەبیت د بەرزەنە و چارەنڤیسێ وان یێ دیار نینە، بەلێ بەھرا پتریا ئەو کەسێن بەرزە ژنن و گۆت: ” ھەتا نوکە تەرمێ 23 کۆچبەرێن ھەرێما کوردستانێ گەھشتینە دەستێن کەس و کارێن وان، ژبلی ئەوێن ب خێزانڤە چووینە ژ دەرڤەی وەلاتی”.
ل دووماھیێ بەرپرسێ گرۆپێ خەمێت خەلکی ئاشکرا کر کو ل سەر ئاستێ پارێزگەھان ئەو کەسێن چوینە ژ دەرڤەی وەلاتی ل پارێزگەھا ھەولێرێ پترین خەلک چووینە ژ دەرڤەی وەلاتی و دووڤدا پارێزگەھا سلێمانیێ دھێت و خەلکێ پارێزگەھا دھۆکێ کێمتر ژ ھەر دو پارێزگەھێن دی چووینە ژ دەرڤەی وەلاتی.

ئەڤرۆ نیوز:
ئەندامەکێ سەرکردایەتیا پارتی دیموکراتی کوردستان راگەھاند، پارتی یا بەرھەڤە ل گەل ھەموو لایەنان کۆمببیت و پەیوەندیێن بەردەوام ژی یێن ھەین کو ھندەک کۆمبوون د فەرمی نە و ھندەک ژی ل گەل سەرکردانە و بیروڕا ئالوگۆر دکەین و دووماھی کۆمبوون ژی ل گەل ئێکەتی نیشتمانی کوردستان بوو.
دلشاد شەھاب ئەندامێ سەرکردایەتیا پارتی و ئەندامێ شاندێ دانوستاندکارێ پارتی زێَدەتر گوت” د دووماھی کۆمبوونا پارتی و ئێکەتیێ دا من ھەست ب وێ چەندێ کر کو ھەردو لایەنان بۆچوونێن ھەڤپشک ھەبوون بۆ روو ب رووبونا ھەموو پرسان”.
دلشادی خویاکر ژی” د وێ کۆمبوونێ دا، مە پتر بەحسێ پەیوەندی و کارێ ھەڤپشکێ پارتی و ئێکەتیێ کر و مە بەحسێ چو لایەنێن دی نەکر، چونکی ئەو کۆمبوون یا پارتی و ئێکەتیێ بوو نەکو ل سەر رەوشا لایەنەکێ دی، کۆمبوون ژی یا گرنگ بوو”.
دیاکر ژی” دو رۆژە چەند جھان گەشتێن خوە یێن راگرتین، ژ بەر وێ چەندێ دبێژین، مۆشەکێن وەلاتێن زلھێز دئەسمانێ کوردستانێ دا یێن دچن، ھەکە وەلات د رەوشەکا ھوسا دابیت و دو ھێزێن کاریگەر وەکو پارتی و ئێکەتی ل بەرامبەر ڤان ھەموو مەترسیان کۆمببن گرنگیا خوە یا ھەی ب تایبەتی ئەو دەلیڤێن بۆمە ھاتینە پێش پێدڤی یە مفای ژێ وەرگرین و بەرھەڤ بین بۆ گوھۆرینیان د نەخشێ سیاسی و جوگرافیێ دەڤەرێ دا، لەوما ھەم ئومێد و ھەم مەترسی ل بەردەم پاشەرۆژا کوردستانێ ھند یا زەقە، کو وەسا دخوازیت ب تایبەتی بەرپرسێن پارتی و ئێکەتیێ د ئاستێ وان پرسێن مەزن دا د ئێک دەنگ بن و ھەموو لایەن ژی وێ دزانن و چاڤەڕێ ژ وان ھەردو ھێزان ژی دکەن کو بگەھنە بۆچوونەکا ھەڤپشک بۆ مەترسی و دەستکەفتان د ڤێ رەوشێ دا”.

ئه‌ڤرۆ نيوز:

مه‌سعود بارزانى سه‌رۆكێ هه‌رێما كوردستانێ د ساليادا مشه‌ختبوونا دانيال ميتران ل باژێرێ هه‌ولێرێ گۆتاره‌ك پێشكێش كر و راگه‌هاند هه‌ر ده‌م ب چاڤێ هه‌ڤال و پشته‌ڤان ته‌ماشه‌ى فره‌نسا دكه‌ين.

بارزانى د وه‌سفێ دانيال ميتران دا، هه‌ڤژينا فرانسۆا ميتران سه‌رۆكێ مشه‌تخبوويێ فره‌نسا كو دوسته‌كێ نێزيكى كورد بوويه‌ و ب دايكا كوردان يا به‌رنياس بوو، راگه‌هاند كو دانيال ميتران كه‌سا ئێكێ يا بيانى بوو ب چاڤێ خوه‌ ديتبيت و رووندك بۆ كوردان رێتبن.

سه‌رۆكێ هه‌رێما كوردستانێ گۆتژى: “دانيال ميتران دلسۆزه‌كا ب وه‌فا يا گه‌لێ كورد بوو، ژ به‌ر هندێ هه‌رده‌م بيره‌وه‌ريا وێ ب زيندى رادگرين”.

بارزانى گۆتژى: “هه‌ر ده‌م ب چاڤێ دوستان پشته‌ڤانيا گه‌لێ كورد ل فره‌نسا ته‌ماشه‌ دكه‌ين، فره‌نسا هاريكاره‌كا سه‌ره‌كى يا گه‌لێ كوردستانێ يه‌ د شه‌رێ دژى داعش دا”.