ئه‌ڤرۆ نيوز:
ب گۆره‌يى نوچه‌كى كو مالپه‌رێ رووداو به‌لاڤكريه ل سه‌ربازگه‌ها دۆميز ل شنگال، سێ تيرۆرستێن داعش خوه ڤه‌شارت بوو و ده‌مێ پێشمه‌رگه چوويه د وى ئاڤاهى ڤه ده‌ست ب ته‌پێ كريه و پاشان ژى خوه په‌قانديه.
په‌يامنێرێ رووداو يێ ئه‌ڤ زانياريه گه‌هاندين چو به‌حس ل زيانێن هێزێن پێشمه‌رگه‌ى نه‌كر، به‌لێ ئاشكه‌را كر كو ئه‌ڤ شه‌ره ژ لايێ له‌شكرێ گۆلان و تايبه‌ت يێ ئێك ڤه هاته ئه‌نجام دان.
ئەو کريارێن تيرۆریستیێن شەڤا ١٣-١١-٢٠١٥ ل پاریسێ روو دا و ھژمارەکا زێدە يا کەسان بوونە قوربانی ئه‌م ژ كوور ڤە ئێشاندين. ب ناڤێ خوە و گەلێ کوردستانێ ھەڤخەمیا خوە ب جەنابێ هه‌وە و گەلێ فرانسا رادگه‌ھینم.
تيرۆر دوژمنێ ھەڤبپشكێ مە ھەموویانە و تيرۆریست دژی ھەموو بھایەکێ مرۆڤایەتیێ نە و ل ھەر جیھەکە ژیان و پێشکەفتن و ئارامی ھەبيت تيرۆریستێن دلرەش هێرش دکه‌نێ.
گەلێ کوردستانێ کو نھا د شەرەکێ دژوار یێ دژی تيرۆرێ دایە و قوربانى دەستێ تيرۆرێ يه، د ڤێ رۆژا نەخوەش دا، ل گەل هه‌وە ھەڤسۆزە و پشكدارێ خەما هه‌وە يه و پالپشتێ گەل و حکومەتا فره‌نسایە.
سەرخوەشیێ ل هه‌وەیێن به‌رێز و کەسوکارێن قوربانیان دکه‌ين و ھيڤیا باشبوونەکا ب لەز ژ بۆ برینداران دخوازین.
مەسعود بارزانی
سەرۆکێ ھەرێما کوردستانێ
١٤-١١-٢٠١٥
ئه‌ڤرۆ نیوز: ڤه‌ده‌ر ره‌شاڤایی :
ژێده‌ره‌كی ژ پۆلیسێن فره‌نسا بۆ میدیایێ راگه‌هاند كو كو هه‌ژمارا بارمتێن د هێرشێن تیرۆرییێن پاریسێ دا ل هۆله‌كا كونسێرتان ل جادا باتاكلان هاتیه كوشتن گه‌هشته 120 كه‌سان، و د شه‌ر و په‌ڤچوونان دا ژی 6 تیرۆرستێن هێرش كری هاتینه كوشتن.
هنده‌ك ژ كه‌سێن خوه رزگاركری وه‌سا خویا كر كو هێرشكه‌ر د گه‌نجن و د بێ ماسكن هه‌ر بێهنه‌كێ ته‌قێ ل بارمته‌كی دكه‌ن.
سه‌رۆك و سه‌رۆك وه‌زیران و وه‌زیرێ ناڤخۆیێن فره‌نسا به‌ره‌ڤ هۆلا كۆنسێرتا یا جادا باتاكلان جهێ ده‌سته‌سه‌ركرنا بارمتا ڤه چووینه.
ئه‌ڤرۆ نیوز:
مالپه‌رێ (RT English) چه‌ند وێنه به‌لاڤكرن كو دبێژیت یێن كه‌مپا (جانگل)ن ل ناوچا (كالێی) ل باكۆرێ فره‌نسا كو وه‌سا دیار دبیت دهێـه سوتن و ئاگره‌كێ مه‌زن پێڤه‌یه.
ئه‌ڤ رودانه ئێكسه‌ر پشتی هێرشێن تیرۆری ل پاریسێ دهێت، هه‌ژماره‌كا مه‌زن یا په‌نابه‌ران د وێ كه‌مپێ دانه و زیان نه‌هاتینه زانین.
ئه‌ڤرۆ نیوز : ڤه‌ده‌ر ره‌شاڤایی:
ژ ئه‌نجامێ 7 هێرشێن تیرۆری یێن جودا ل پاریسا پایته‌ختێ فره‌نسا پتری 60 كه‌سان هاتنه كوشتن و پتری 60 كه‌سان بریندار بوون .
نێزیكی 100 كه‌سان ژ ئالیێ تیرۆرستان ڤه وه‌ك بارمته هاتینه ده‌سته‌سه‌ركرن و چه‌ندین ته‌قه‌كرن و په‌قین په‌یدابووینه، فرنسا ره‌وشا نه‌ئاسایی راگه‌هاند و سه‌رۆكێ فره‌نسا فرانسوا هۆلاند ئه‌ڤ هێرشه ب “كێموێنه” د دیرۆكا نوو یا فره‌نسا دا وه‌سف كر.
تێ زانین ئه‌ڤ په‌قینه دده‌مه‌كی دایه كو گۆپیتكه‌كا مه‌زن لبه‌ره پشتی دو حه‌فتیێن دی ب ئاماده‌بوونا 89 سه‌رۆكێن جیهانێ ل پاریس برێڤه‌بچیت.
ئه‌ڤرۆ نيوز:
مه‌سعود بارزانى سۆپاسنامه‌ك ل دۆر رزگاركرنا قه‌زا شنگال به‌لاڤكر و تێدا سۆپاسيا وان هه‌موو لايه‌نان كر يێن بووينه ئه‌گه‌رێن ڤێ سه‌ركه‌فتنێ و ئه‌ڤێ ل خوارێ ده‌قێ سۆپاسناما وى يه:
ئازادکرنا شنگالێ ل بن دەستێ تيرۆریستێن داعش ژ روویێ له‌شكرى و سیاسی و دیرۆکی ڤە سەرکەفتنەکی مەزن بوو ژ بوو گەلێ کوردستانێ کو ل سەر دەستێ پێشمەرگەیێن مەیێن قەھرەمان ھاتە تۆمار کرن. ئەڤ سەرکەفتنه ب ھەموو ئالیەکى را دبێژيت ئێدی ئەو رۆژ چوو داگیرکەر و ستەمکار گەلێ کوردستانێ ب چەوسێنن. نھا گەلێ کوردستانێ سەربلندانە بەره‌ڤانيێ ژ خوە دکەت و دوژمنى دشکێنيت و پارێزەرێ بھایێن مرۆڤایەتیێیە ژی.
پشتی داگیرکرنا شنگالێ و ئەو کارەساتا ب سەرێ خووشک و برایێن مە یێن ئێزیدیان دا ھاتى ئەم ئامادە بوون ھەموو رێیەکێ ل بەر بگرین و ھەموو بهايه‌كى بده‌ین کو شنگالێ ئازاد بکه‌سن بۆ کو باوەری ب خوە بوون ژ بۆ گەلێ کوردستانێ و خووشک و برایێن مە یێن ئێزیدیان ڤەگەرينين و دوژمن و تيرۆرستان ژ ئاخا پیرۆزا کوردستانێ دەربێخین.
د دەمێن دەرباسبوویی دا خووشک و برایێن مە یێن ئێزیدی دو جاران زولم ل وان ھاتبوو کرن، ب سەدەما کوردبوونا وان ستەم ل وان ھاتیە کرن و ب سەدەما ئۆلێ ڤە ژی ھاتنە چەوساندن و نه‌خۆشى ديتينه. دخوازم خووشک و برایێن ئێزیدیان ژ وێ یەکێ پشت راست بكه‌م کو ھەردەم گەلێ کوردستانێ پالپشتێ وانن و ئەو بەشەکی ئەزیزێ کوردستانێ نە و پێشمەرگەى ب خوین و قوربانیدانا خوە ئه‌و ئێك سەلماند. کوردستان ژی وەلاتێ پێکڤەژیان و برایەتی و لێبۆرینا ئۆل و نەتەوەیێن جودايه و دڤێت ئەو چاندا گەلێ کوردستانێ وەکی خوە بمینيت و بهێته زه‌نگينكرن.
پیرۆزباھیا ئازادبوونا شنگالێ ل ھەموو ھەڤوەلاتیێن کوردستانێ دکه‌م کو ب دەست و پازویێ پێشمەرگەیێن قەھرەمان پێکھات. سەرکەفتنەکا مەزن کو ھەردەم دیرۆک ژ بیر ناکەت. ل ڤێرێ دا ب پێدڤى دزانم سۆپاسیا ئه‌مەریکا و ھێزێن ھەڤپەیمانان بکه‌م کو ل ئازادکرنا شنگالێ دا ب پالپشتیا ئاسمانیا بێ وێنە هاريكارێن پێشمەرگەى بوون. سۆپاسی وان ھەموو ھێزێن پشكداربوویێن پێشمەرگە و فەرماندەیێن وان دکه‌م کو ئه‌ڤ دەستانا مەزن تۆمار کر. سۆپاسیێن خوە یێن بێ پایان پێشکێشی پێشمەرگەیێن فەرماندەیا زێرەڤانی و یەکینەیێن پێشمەرگەیێن رۆژاڤا، فەرماندەیا شنگال، فەرماندەیا دھۆک، فەرماندەیا ھێزێن پشتەڤانی ئێك، فەرماندەیا بارزان، لەشکەرێ تایبەتی ئێك، لەشکەرێ گولان، لەشکەرێ تایبەتی دو، ھێزا دژی تيرۆر، ھێزا تایبەتا ئێك، ھێزا ٣٢، ھێزا ژینگەھا دھۆک، لیوایا ھەڤبەشێن سەر ب وەزارەتا پێشمەرگە، لیوایا ٤، لیوایا ٨، لیوایا ١٢، لیوایا ١١١ێ سەر ب یەکینەیا حەفتێ و ھێزێن خوەبەخشان دکه‌م کو ب ئیرادەیەکا پۆلایی بەشداری ئۆپەراسیۆنا ئازادکرنا شنگالێ بوون. سۆپاسیا یەکینەیێن سەر ب جڤاتا ئاساییشا ھەرێما کوردستانێ دکه‌م کو رۆلەکی وان یێ ب باندۆر ل برێڤەچوونا ئۆپەراسیۆنێ و گه‌ھاندنا زانیاریێن دروست و ھەماھەنگی ل گەل ھێزێن ھەڤپەیمانان و دانانا پلانا رزگارکرنا شنگالێ دا ھەبوو.
ئازادکرنا شنگالێ دەستانا قەھرەمانیا بێ وێنەیا زارۆک و گەدەیێن گەلێ کوردستانە و باندۆرەکا مەزن ل سەر باوەری ب خوە بوون و پاشه‌رۆژا گەلێ کوردستانێ ب جیھانێ دھێليت ژ بوو وێ یەکێ پێدڤى بوو گەلێ کوردستانێ ئاگاھداری رۆلێ وان ھێزان بيت کو پشكداری ئۆپەراسیۆنێ بوون و دیرۆک وان ب بیر بینيت.
ل دووماهیێ ھزاران سلاڤ ژ بوو گیانێ پاکێ شەھیدێن مە یێن نەمر را دشینم و ھيڤى ژ خودایێ مەزن دکه‌م کو شیفایا خێرێ بدەته برینداران و ھيڤیا پاشارۆژەکا گەش ژ بۆ گەلێ کوردستانێ دخوازم.
مەسعود بارزانی
سەرۆکێ ھەرێما کوردستانێ
١٣-١١-٢٠١٥
ئه‌ڤرۆ نيوز:
پشتى ژ دوهى رۆژا پێنجشه‌مبى رێكه‌فتى 13ى چريا دويێ يا 2015ێ شه‌ر د ناڤبه‌را كورد و حه‌شه‌د شه‌عبى ل خورماتۆ ده‌سپێكرى و هه‌تا ئه‌ڤرۆ ئێڤارى ژى به‌رده‌وام بووى، چه‌نده‌كێ به‌رى نوكه رێكه‌فتنه‌ك بۆ ب دووماهى هاتنا شه‌رى هاته مۆركرن.
نيشاندان