ئه‌ڤرۆ نيوز:

نێچیرڤان بارزانی سەرۆکوەزیرێن ھەرێما کوردستانێ، پەیاما ئاڤاکرن و ب پارێزگەھبوونێ د ده‌ته‌ وەلاتیێن شنگالێ.

د پەیامەکێ دا ئازادکرنا شەنگالێ ل گەلێ کورد ب ئاواکێ گشتی و ب تایبەتی ل کوردێن ئێزدی پیرۆز کر و رادگاند کو د دەما ھەری زوو دا دێ ھەموو ھەولێن خوە ژ بۆ گه‌ره‌نتیکرنا پرانیا خزمەتێن بنگەھێن ژ وەلاتیێن شەنگالێ بدەن. ھەر د پەیاما خوە دا سۆپاسیا ئه‌مەریکا دکەت ژ بۆ ئالیکاریا وانا د هێریشا کۆنترۆلکرنا شەنگال دا.

ده‌قێ په‌ياما سه‌رۆك وه‌زيران

دلشادم کو تەڤی ھەستا ھەموو گەلێ کوردستانێ و ئازادیخوازێن جیھانێ، ل سەر ناڤێ حوکمەتا ھەرێما کوردستانێ، پیرۆزباھیێ ل مەسعود بارزانی سەرۆکێ ھەرێما کوردستانێ و فەرماندارێ گشتییێ ھێزێن چەکدار و سەرپەرشتیارێ گشتییێ ئۆپەراسیۆنا ئازادکرنا شەنگالێ و ھەموو پێشمەرگەیێن قەھرەمانیێن ڤێ داستانێ بکه‌م، ھەروەسا پیرۆزباھیێ ل گەلێ کوردستانێ ب ئاواکی گشتی و ب تایبەتی ژی کوردێن ئێزدییێن خۆشتڤی و میرێ ئێزدیان و بابا شێخ و ئەندامێن جڤاتا رۆحانی و ھەموو وەلاتیێن دەڤەرا شەنگالێ دکه‌م ب ھەلکەفتنا ئازادکرنا شەنگالێ، سەرێ رێز و حورمەتێ ژی ژى بۆ جانێ پاقژێ شەھیدێن ڤێ قەھرەمانیا پێشمەرگەیان دتەوینم و ئەم ھەڤپارێن کۆڤانا کەسووکارێن وان نە و ھێڤیا چارەسەریا لەزگین ژ برینداران را دخوازم.

ل ڤێرێ ئەم سۆپاسیەکا مەزنیا سەرۆکاتی و ئیدارە و لەشکەر و گەلێ ئه‌مەریکا دکه‌ين ژ بۆ ئێکدەنگیا وان ل سەر ئالیکاریکرنا پێشمەرگەیان و ئالیکاریا وان یا د ئۆپەراسیۆنا ئازادکرنا شەنگالێ دا. ئەم ھەروەسا سۆپاسیا ھەموو وەلاتێن ناڤا ھەڤپەیمانیا ل دژی داعشێ دکه‌ين و سۆپاسیا ھەموو وەلاتێن جیران و دۆست دکه‌ين کو د ب روو ب رووبوونا داعشێ و دوورخستنا وێ ژ خاکا کوردستانێ و پاراستنا ئازادی و ب ھەڤرەژیانێ دا ل کوردستانێ، پشتگیرێن گەلێ کوردستانێ بوونە.

ئازادکرنا شەنگالێ ژ بۆ مە وەکو گەلێ کوردستانێ و ھەموو ئازادیخوازا و مرۆڤپەروەرێن جیھانێ، مانایەکا مەزنیا خوە ھەیە. تيرۆرستێن داعشێ کارێن پر قرێژ و ھۆڤانە ل سووریێ و عيراقێ و دەڤەرێ پێکئيناینە، لێ بەلێ کۆمکوژی و ھۆڤیتیا ھەری مەزن ل شەنگالێ پێک ئانی. داعشێ ئەنفالەکا نوو ل شەنگالێ د دەرھەقا نەتەوەیا کورد دا پێک ئينايه‌، ب سەدان ژن و کچێن کورد رەڤاندن، تەڤی کو ب ھەولێن حوکمەتا ھەرێما کوردستانێ ھژمارەکا مەزنا وان ھاتنە رزگارکرن ژی، لێ بەلێ مخابن ھێشتا گەلەک د بن دەستێ وان دا مانە و ھەتا یەک ژنا کوردا ئێزدی ژی د دەستێ داعش دا مابيت، کۆڤانا کۆمکوژیا شەنگالێ د دل و ھەستا مە دە ب دووماهی ناهێت. ئەم دێ ھەموو ھەولێن خوە ب کار بینن ژ بۆ رزگارکرنا ھەموو ژن و کەچێن مە یێن د دەستێ داعشێ دا،  ھەروەسا حوکمەتا ھەرێما کوردستانێ دێ ل سەر ھەولێن خوە بەردەوام بيت ژ بۆ کو کۆمکوژیا شەنگالێ د سەویا ناڤدەولەتی دا وەکو جينوسايد بێتە ناسکرن.

د ئەنجاما هێریشا ھۆڤانەیا تيرۆریستێن داعشێ دا، شەنگال راستی وێرانکاریەکا مەزن ھاتیە، بەریا نھا ژی مە ل سەر مەزارێ شەرفەدین ل دەڤەرا شەنگالێ راگەھاندبوو و نھا ژی دوبارە دکه‌م کو گه‌ره‌نتیکرنا خزمەتێن گشتی و ئاڤاکرن و پێشدابرنا باژێرێ شەنگالێ و دەڤەرێ ب ئاوايه‌کی گشتی، دێ ژ کارێن پێشنیێن حوکمەتا ھەرێما کوردستانێ بيت، ئەم ژ جڤاکا ناڤنەتەوەیی ژی دخوازين کو د ڤی واری دا ئالیکاریا مە بکەن. ھەروەسا ژ خەلکێ خۆشتڤیێ شەنگالێ را ژی دبێژم کو ئەمێ ھەموو ھەولێن خوە د وارێ یاسایی و ئیداری دا ب کار بینن ژ بۆ کو پشتگیریا داخوازێن وەلاتیێن دەڤەرێیێن ب پارەزگەھبوونێ بکه‌ن.

جاره‌كا دى ئەڤ سەرکەفتنه‌ ل ھەموو گەلێ کورد پیرۆز بيت.

نێچیرڤان بارزانی

سەرۆکوەزێرێن ھەرێما کوردستانێ

١٣-١١-٢٠١٥

ئەڤرۆ نیۆز، قائید میرۆ:
جێگرێ سەرۆکێ لیژنا نافخۆ لپەرلەمانێ کوردستانێ ئاشکراکر، ئازادکرنا شنگالێ سەرکەفتنەکا مەزنە و دڤێت کار بۆ پارێزگەھبوونا شنگالێ بھێتەکرن.
نازم کەبیر، جێگرێ سەرۆکێ لیژنا نافخۆیا پەرلەمانێ کوردستانێ ب ئەڤرۆ نیۆز راگەھاند” پڕۆسا ئازادکرا شنگالێ پڕۆسەیەکا گرنگ و سەرکەفتیانەبووە بسەر پەرشتیا راستەوخۆیا سەرۆک بارزانی و دێ کاریگەریەکا زۆر لسەر ئازادکرنا مووسل ھەبیت، ژبەرکو رێیا سەرەکیا رەققە بۆ نەینەوا کەفتیە بن کۆنتڕۆلا ھێزێن پێشمەرگە و چو پەیوەندی دناڤبەرا داعشێن نەینەوا و رۆژئاڤا نامینیت.
کەبیر گۆتژی” پێدڤیە پشتی ئازادکرنا شنگالێ قۆناغەکادی دەسپێبکەت ئەوژی قۆناغا ئاڤاکرنا شنگالێ و کارکرن بۆ ب پارێزگەھبوونا شنگالێ یە، چونکو پێدڤیە تایبەتمەندیا شنگالێ بەرچاڤ بھێتە وەرگرتن و ببیتە پارێزگەھەک سەر ب ھەرێما کوردستانێ.

ئه‌ڤرۆ نيوز:

پشتى رزگاركرنا سه‌نته‌رێ قه‌زا شنگال نوكه‌ كار ژ بوو رزگاركرنا ده‌ڤه‌رێن ده‌وروبه‌رێن شنگال دهێته‌ كرن و بۆ ڤێ چه‌ندێ ژى هێزێن پێشته‌ڤانيا ئێك يا له‌شكرێ كوردستانێ ده‌ست ب بۆردۆمانكرنا گۆندێ ره‌مبۆسێ كر.

په‌يامنێرێ ئه‌ڤرۆ نيوز ل گه‌ل ئۆپه‌راسيۆنا هێزێن پێشمه‌رگه‌ى بۆ سه‌ر شنگال، ئۆمێد وه‌لاتى، راگه‌هاند كو نوكه‌ هێزێا پشته‌ڤانيا ئێك يا له‌شكرێ كوردستانێ ده‌ست ب بۆردۆمانكرنا گۆندێ ره‌مبۆسێ ب چه‌كێن گران كريه‌ و دا كو پێشمه‌رگه‌ هێرشى وان گۆندان ژى بكه‌ت.

گۆندێ ره‌مبۆسێ دكه‌ڤيته‌ دووراتيا 10 كيلۆمه‌تران ل باشوورێ شنگال و پتريا خه‌لكێ وێ كوردن دكه‌ڤيته‌ د ده‌ڤه‌رێن كوردستان يێن ده‌رڤه‌ى ئيدارا هه‌رێما كوردستانێ.

ئەڤرۆ نیۆز، قائید میرۆ:
نوونەرەکێ کوردێن ئێزدی سۆپاسیا سەرۆک بارزانی دکەت بۆ سەرکەفتنا پێشمەرگەی و دبێژیت: “تنێ مایە سەرۆک مزگینیا شنگالێ را بگەھینیت”.
سەیدۆ چەتو، نوونەرێ کوردێن ئێزدی ل جڤاتا پارێزگەھا نەینەوا بۆ ئەڤرۆ نیۆز گۆت: “ئەڤرۆ ھێزێن پێشمەرگەی شیاینە رووبەرەکێ زۆرێ سەنتەرێ شنگالێ ئازاد بکەت و ل ھەردو ئالیێن رۆژھەلات و رۆژئاڤا پێشڤەچوونێن بەرچاڤ ھەبووینە و ٩٠%ێ یا شنگالێ نوکە ل بن کۆنتڕۆلا پێشمەرگەیە”.
چەتۆ گۆتژی: “ب ناڤێ کوردێن ئێزدی سۆپاسیا سەرۆک بارزانی دکەین بۆ ڤێ سەرکەفتنێ و چاڤەڕێی مزگینیا سەرکەفتنێ دکەین ل سەرۆک بارزانی کو چەند دەمژمێرەکێن کێم ماینە بۆ راگەھاندنا سەرکەفتنا ئێکجاریا شنگالێ”.