ئەڤرۆ نيوز:
پتریا خەلکێ کوردستانێ یێ دەیندارە ژحوکمەتێ و ھەتا دگەھیتە نزمترین ئاست و ھەر ئێک ل دووڤ سەنگ و ئاستێ خوە دەین ھەنە، شارەزایەکێ ئابووری ژی ڤێ چەندێ بۆ چەند ھۆکاران ڤەدگەرینیت، دیسان ب ھیڤی نە سالا ٢٠١٦ قەیرانا ئابووری ل سەر ھەرێمێ دەربازبیت.
د.خەلیل غازی، مامۆستایێ زانکۆیێ بۆ بەرپەرێ بازار ل رۆژناما ئەڤرۆ گۆت: ژەبەر کو سیاسەتا حوکمەتا ھەرێما کوردستانێ ل سەر وێ چەندێ بوویە کو پتریا خەلکێ کوردستانێ وەک داھات ب حوکمەتێ ڤەیێ گرێدایی بوو، لەورا دەمێ داھاتێ حوکمەتێ کێم بووی داھاتێ خەلکی ژی کێم بوو و دەمێ حوکمەتا ھەرێما کوردستانێ دەیندار بوو، خەلک ژی دەیندار بوو چونکە نەشێن پێدڤیێن خوە وەربگرن و فێربوونە سیستەمێ بەرێ و پێدڤیێن ژیانا خوە ژ حوکمەتێ وەربکریت و ھەتا نوکە ئەو داھات ناھێت،چونکە حوکمەت دەیندار بوو و لەورا خەلک ژی کەفتە ھەر ئەوێ گرفتا حوکمەت کەفتیە تێدا و ئەوژ دەیندار بوون.
د.خەلیل غازی گۆت: چەند سیاسەتا حوکمەتا ھەرێما کوردستانێ بڤی رەنگی بیت و خەلک گرێدایی حوکمەتێ بیت و مەتحە ب پاران بھێنەکرن دێ ئەڤ قەیرانە یا بەردەوام بیت، مووچە نە ب شێوەیەکێ رێکخستی بوون و نە ب شێوەیەکی بوون کو ل دووڤ پێدڤیێن حوکمەتێ بووینە، ئەگەر ئەڤ پارە بۆ خەلکێ کەتیف چووبا ئەڤ ئاریشە پەیدا نەبوو، بەرۆڤاژی ئەڤ پارێ دھاتە دان بتنێ بۆ بێ دەنگکرنا وەلاتیان بوویە، کو ھەر کەسەکی مووچە ھەی و خێزانا خوە برێڤە دبەت.
مامۆستایێ زانکۆیێ، ھەمبەر چارا بابەتی کو ئێدی وەلاتی و حوکمەت دەیندار نەبیت، گۆت: پێدڤی یە حوکمەت لێ زڤرینەکێ بکەت و چارەکێ ل دامەزراندنێ بکەت و دووڤ پێدڤیێن خوە خەلکی دامەزرینیت و کەسێ دھێتە دامەزراندن بەرھەم ھەبیت و خودان بسپور بیت یان پێداچوونەکێ ل ھەیکەلێ خوە یێ کارگێری دا بکەت، پشتەڤانیا کەرتێ تایبەت و خەلکەکی ب کاربێخیت و نەخاسمە حوکمەت کارکرنا وان کەسێن ل کەرتێ تایبەت ھەموو ماف ھەبن وەک فەرمانبەرێ میری داکو ئێدی خەلکێ مە ژی چاڤ ل دامەزراندنێ نەبیت،ئەو ژی دێ کاری ل کەرتێ تایبەت کەت و ژ ژیانا خوە یا پاشەرۆژێ ناترسیت .
مامۆستایێ زانکۆیێ دھۆکێ گۆت: ئاخفتنێن بەرپرسێن مە ھەموو گاڤا جھێ باوەریێ نە و ئەوا دبێژن ئەگەر بھێتەکرن و ئەگەر رێکەفتنێ ل گەل حوکمەتا عیراقێ بکەن و دەرھینانا پەترۆلێ زێدە بکەن، دیسان گرێبەست و فرۆتن و ڤەگوھاستنا پەترۆلێ ژ ھندەک کۆمپانیان دەربێخێن و کار بکەن، رێژەکا مەزن یا وێ پەترۆلێ بۆ حوکمەتێ بیت، وی دەمی دێ گەلەک ئاریشە چارەسەربن،چونکە کوردستانێ ئابوورەکێ گەلەکێ مەزن نینە کو بزحمەت ئاریشە چارەسەربن، لێ ئەڤێ چەندێ ژی شەفافیەت و کێمکرنا رێژا گەندەلیێ پێ دڤێت.
مامۆستایێ زانکۆیێ ھێشتا گۆت: رێژا بەغدا داخاز دکەت گەلەک کێمتر ژ شیانێن ھەرێما کوردستانێ، دشێن دو مفان ژێ وەربگرین، رێکەفتن ل گەل بەغدا باشە چونکە پەیوەندیێن ھەرێمێ ل گەل بەغدا بھێز دکەڤن د ھەموو بیاڤ دا و وەرارێ کەت و دیسان ئەڤ پەیوەندیە چێترە ل گەل وەلاتەکێ جیران بکەت، دڤێت پشتا خوە ب بەغدا گەرم کەین و چێترە پەیوەندیا نەخوەش بکەین یان ببرین، دیسان رێژا ب رێکا بەغدا دچیت دێ داھاتێ وێ پتر بیت یا راستەوخۆ دھێـە فرۆتن چونکە ھەر تشتەک دێ ل سەر سۆمۆ بیت، ئەگەر ب سەربەخۆ بھێـتە فرۆتن دێ بھایێ چوونێ و ڤەگوھاستنێ گەلەک کەڤیت و ھەرێم دێ کێم قازانجێ کەت.
مامۆستایێ زانکۆیێ زێدەتر گۆت: ئەگەر ئەڤە بھێـە بجھئینان دێ قەیرانا ئابووری ل سالا ٢٠١٦ بەر ب نەمانێ چیت و ئەگەر نە نابینم ل سالا داھاتی ژی ئەڤ قەیرانە ل سەر مللەتێ کورد دا دەرباز بیت.
بۆچی کوردستان ھەموو یا دەیندارە
نيشاندان