ئه‌ڤرۆ نیوز: ڤه‌ده‌ر ره‌شاڤایی:
سترانبێژ ده‌لال زاخۆیی هه‌رێما كوردستانێ به‌ره‌ڤ ئه‌ورۆپا بجه هێلا، لێ پشتی به‌له‌ما ئه‌و و هه‌ڤژینا خوه تێدا نقۆم بووی، بكۆته‌ك بساخی ژ ئاڤا ده‌ریا ئیجه قورتال بوون.
پشتی سێ حه‌فتیان ل توركیا ده‌لال زاخۆیی ل نیڤاشه‌ڤێ سیاری به‌له‌مه‌كێ بوو به‌ره‌ڤ گزیرته‌كا یونانی.
زاخۆیی ل كه‌مپا لێسبۆس ل یونان بۆ ئاژانسا ئه‌سۆشیه‌تد پرێس گۆت: به‌له‌م گه‌له‌ك یا بچووك بوو، بتنێ جهێ 100 كه‌سان تێدا دكر، لێ قاچاخچییا ڤیا 300 كه‌سان لێ سیار كه‌ن، ده‌مێ مه خوه نه‌رازیكری كو گه‌له‌ك خه‌لكێ د به‌له‌مێ دا، شۆفێرێ به‌له‌مێ ته‌قه كره ئاسمانی و گۆت ئه‌ڤه نه خه‌لكه ، مافیایه”
” ل ده‌مێ به‌له‌م نێزیكی كنارێ لێسبۆس ل یونان بووی، پێلێن مه‌زن یێن ئاڤێ به‌له‌م شه‌ق كر، ئه‌م دو ده‌مژمێران د ئاڤێ دا ماین، من هه‌ڤژینا خوه و چه‌ند هه‌ڤال رزگار كرن، لێ گه‌له‌ك خه‌لك تێدا بوون، خه‌لك پێش چاڤێن مه مرن.”
زاخۆیی چیرۆكا خوه ڤه‌گێرا لده‌مێ به‌رهه‌ڤی دكرن بۆ بده‌ستڤه‌ئینانا به‌لگه‌یان بمه‌ره‌ما بجههێلانا گزیرتا لێسبۆس به‌ره‌ڤ ناڤه‌راستا یونان پاشی به‌ره‌ڤ باكۆرێ رۆژئاڤا ئه‌ورۆپا.
ناڤهاتی به‌لگه‌یێن پێدڤی ئه‌ڤرۆ رۆژا ئینی 30 مه‌هێ بده‌ستڤه‌ئینان پشتی شڤێدی دو به‌له‌م د ده‌ریا ئیجه‌دا نقۆم بووی و كه‌له‌خێ زارۆكان هاڤێتیه به‌ر كنارێن ده‌ریایێ.
ده‌لال زاخۆیی دیاركر كو وه‌لات بجهـ هێلایه ژبه‌ركو به‌رهه‌مێ كارێ وی وه‌ك سترانبێژ ل هه‌رێما كوردستانێ ل كێمیێ دایه و گۆت: هیڤیا منه بگه‌هینه ئه‌لمانیا و سترانان بۆ كوردان ل وێرێ بێژم.”
چیرۆكا قورتالبوونا ده‌لال زاخۆیی ژ نقۆمبوونا به‌له‌مێ ل ده‌ریا ئیجه
نيشاندان