ئه‌ڤرۆ نيوز:

ب گۆره‌يى گۆتنێن ژێده‌ره‌كێ باوه‌رپێكرى، يوسف محه‌مه‌د د ڤى ماوێ ل نڤيسينگه‌ها سلێمانيێ يا په‌رله‌مانێ كوردستانێ ده‌وام كرى، بڕيارا مه‌زاختنا 60 مليۆن ديناران ل سه‌ر بودجا سه‌رۆكاتيا په‌رله‌مانى دايه‌، سه‌رۆكێ ديوانا سه‌رۆكاتيا په‌رله‌مانى ژى ژ به‌ر ده‌وام نه‌كرنێ ل پۆستێ خوه‌، دوورخستيه‌، به‌لێ وه‌كو ئه‌و د بێژن ل سلێمانيێ ده‌وامێ دكه‌ن.

ژێده‌ره‌كێ ئاگه‌هدار ل مه‌زاختيێن سه‌رۆكاتيا په‌رله‌مانێ كوردستانێ بۆ “باس” راگه‌هاند: د ڤى ماوه‌يى دا، يوسف محه‌مه‌د ل نڤيسينگه‌ها په‌رله‌مانى ل سلێمانيێ ده‌وان كرى، كۆژمێ 60 مليۆن ديناران ل سه‌ر حسابا بانكێ يا سه‌رۆكاتيا په‌رله‌مانێ كوردستانێ راكێشاينه‌ و بۆ بابه‌تێن جودا مه‌زاختينه‌.

ئەڤرۆ نيوز:
رێڤەبەریا گشتی یا پەروەردێ ل سلێمانیێ چەندین رۆژێن حەفتیێ بۆ مامۆستایان کرینە بھێنڤەدان و ئەو دشێن د حەفتیێ دا بۆ دەمێ دو یان سێ رۆژان بۆ مامۆستایێن سلێمانیێ بکەنە بھێنڤەدان، رێڤەبەرێ گشتی یێ پەروەردێ ل پارێزگەھا دھۆکێ ل دۆر ڤێ بڕیارێ بۆ رۆژناما ئەڤرۆ ئاشکرا کر کو چ بڕیارێن ب ڤی رەنگی ل پارێزگەھا دھۆکێ نەھاتینە دان.
نازدار محەمەد، رێڤەبەرا پەروەردا رۆژھەلات ل سلێمانیێ دیار کر کو نە یا گرنگە دو یان سێ رۆژ د حەفتیێ دا بۆ مامۆستایێن سلێمانیێ ببنە بھێنڤەدان، یا گرنگ ئەوە پرۆسا خواندنێ یا بەردەوام بیت و قەرەبوویا وان رۆژێن دەوام ھاتیە راوەستاندن بھێتەکرن و بۆ snn گۆت:” مە رێڤەبەر یێن ئازادکرین کو ل دووڤ وانێن مامۆستایان رۆژێن بھێنڤەدانێ بۆ وان بھێنە دیارکرن و مە داخوازکریە بھێنڤەدان بۆ وان مامۆستایێن دچنە ژ دەرڤەی باژێری زێدەتر بن داکو بارێ دارایی ل سەر وان گران نەبیت”.
ناڤھاتیێ ئاماژە دا وێ چەندێ کو ئەو مامۆستایێن کێم وانە ھەین دشێن ل دووڤ ھژمارا وانێن خوە بچنە دەوامێ و بەری دەوام ب دووماھی بھێت دشێن بچنە مالێن خوە.
دلێر قادر عەباس، رێڤەبەرێ پەروەردا شار باژێر گۆت:” ئەڤ بڕیارە ژبەر ئاریشا گیروبوونا موچەی د حەفتیا بھێت دا دێ ھێتە جێبەجێکرن و ھەتا ئەڤ ئاریشە ب دووماھی دھێت ئەڤ بڕیارە دێ یا بەردەوام بیت”.
عەبد یوسف، رێڤەبەرێ گشتی یێ پەروەردێ ل پارێزگەھا دھۆکێ بۆ رۆژناما ئەڤرۆ گۆت:” ل پارێزگەھا دھۆکێ چ بڕیارێن ب ڤی رەنگی نەھاتینەدان و چ رێنما ژی نەھاتینە کو د حەفتیێ دا سێ رۆژ بۆ مامۆستایان ببنە بھێنڤەدان”.

ئەڤرۆ نیوز:
سەرۆکێ باژێرڤانیا زاخۆ بۆ رۆژناما ئەڤرۆ ئاشکرا کر کو نوکە کار د چێکرنا پارکا کوردستان دا ل قەزا زاخۆ دھێتە کرن و سەرەرایی ڤێ چەندێ جھێ قوتابخانا بھار د ناڤ بازاڕێ زاخۆ دا ل گەل جھێ نەخوەشخانا بھار ب پشتەڤانیا بەرپرسێ لقێ زاخۆ یێ پارتی ئەو شیان ژ بن کۆنترۆلا ھندەک کەسایەتیان دەربێخن و وان جھان بۆ جھێن گەشتیاری دابینبکەن.
ئەندازیارێ مافپەروەر بژار مۆنیب، سەرۆکێ باژێرڤانیا زاخۆ دیار کر کو پشتی قوتابخانا بھار د ناڤ بازارێ زاخۆ دا ھاتیە خرابکرن، نوکە نەخۆشخانا خابوور ل زاخۆ کەلوپەلێن خوە ڤەدگوھێزیت و ل بەرە ئاڤاھیێ وێ ژی بھێتە ھەرفاندن، بەلێ ژبەر کو ئەڤ ھەر دو جھە گەلەک ب بھانە د ماستەر پلانا زاخۆ دا بۆ جھێن گەشتیاری گەلەک کەسایەتی و دەولەمەندان پێکولکرن وان جھان بکەنە گۆرەپان و مۆل و گۆت:” ب پشتەڤانیا سەربەست لەزگین، بەرپرسێ لقێ پارتی ل زاخۆ ئەم شیاین وان گڤاشتنان ل سەر ئەردێ ناڤبری راکەین و وی ئەردی بۆ بەرژەوەندیێن گشتی بکاربینین”.
ناڤھاتی ئاماژە دا وێ چەندێ کو ل جھێ وان ھەر دو پارچێن ئەردی پارکا شەھیدان دێ ب کۆژمێ نێزیکی ملیارەک و ٢٥٠ ملیون دیناران ھێتە دانان و کۆژمەکێ دی ژی دێ بۆ خرابکرنا ھەر دو جھان ھێتە دابینکرن و گۆت:” دوریانا ئەکادیمیا لەشکەری ل زاخۆ نوکە یا د قووناغێن بجھئینانێ دا و ب ناڤێ پێشمەرگەی یا ھاتیە ب ناڤکرن و سەرەرایی ڤێ چەندێ نوکە دوریانا شقان ژی ل زاخۆ د قووناغێن دووماھیێ دایە و ب ناڤێ دوریانا کوردستان ل دەمەکێ نێزیک دێ ھێتە ڤەکرن”.