ئەڤرۆ نیوز:
ئەندامەکێ سەرکرداتیا پارتی دیمۆکراتی کوردستان ئاشکراکر، ھەکە بزاڤا گۆڕان ل دۆر کریارێن ل ھەمبەر پارتی کرین داخوازا لێبۆرینێ بکەت، دێ دەست ب دانوستاندنان کەینە ڤە.
عەلی حسێن بۆ رۆژناما ئەڤرۆ گۆت: (مە ھەلویستەکێ سیاسی ل ھەمبەر گۆڕان وەرگرتیە، چونکو مە رێککەفتن ل گەل ھەبوو پێکڤە شریکبین د دەستھەلاتێ دا، لێ وێ ئەف شریکاتیە قەبوول نەکر و ل ٢٣ی خزیرانێ تێکدا، ئەو ھەلویستێ پارتی ھەمبەر سەرۆکێ پەرلەمانی و وەزیران بوو، لێ یا وەزیران ژی ھەر ل گەل گۆڕان بوو نەک شەخسێ وەزیران).
ئەندامێ سەرکرداتیا پارتی ئاشکرا ژی کر ھەکە گۆڕان ل سەر ھەلویستێ خوە یا بەردەوامبیت، ناھێلین گۆڕان ب چو شێوەیەکی ڤەگەڕیتە د دەستھەلاتێ دا.

ئه‌ڤرۆ نيوز:

ئه‌ندامه‌كێ جڤاتا نشتيمانيا گۆڕان ژڤانێ ڤه‌گه‌ريانا نه‌وشيروان مسته‌فا، رێكخه‌رێ گشتيێ زباڤا وان ئاشكه‌را دكه‌ت و ئاماژێ ب وێ چه‌ندێ دكه‌ت كو ژبلى نشته‌رگه‌ريه‌كێ بۆ بڕبڕا پشتا وى چ نه‌خۆشيێن دى ل ده‌ف نينن.

هشيار عه‌بدولا، ئه‌ندامێ جڤاتا نشتيمانيا گۆڕان، بۆ تۆڕا ميدياى يا رووداو ئاماژێ ب وێ چه‌ندێ دكه‌ت كو نه‌وشيروان مسته‌فا ژبلى ئه‌نجامدانا نشته‌رگه‌ريه‌كێ بۆ بڕبڕا پشتێ چ نه‌خۆشيێن دى نينن و دبێژيت: “ساخله‌ميا وى نوكه‌ گه‌له‌ك يا باشه‌”.

ئه‌ڤ ئه‌ندامێ جڤاتا نشتيمانى كو د هه‌مان ده‌م دا سه‌رۆكێ فراكسيۆنا گۆڕان ل جڤاتا نوونه‌رێن عيراقێ دده‌ته‌ زانين ژى كو هه‌تا هه‌يڤه‌كا دى ئه‌و دێ ڤه‌گه‌ريت، هه‌ر چه‌نده‌ پێشتر شه‌مال عه‌بدولوه‌فا ئه‌ندامێ جڤاتا نشتيمانيا گۆڕان راگه‌هاند بوو كو ئه‌و پێدڤى ب سێ هه‌يڤايه‌ هه‌تا ب ڤه‌گه‌ريته‌ كوردستانێ.

هشيار عه‌بدولا ده‌رباره‌ى ره‌وشا نوكه‌ يا گۆڕان ژى دا زانين كو نه‌وشيروان مسته‌فا يێ ئاگه‌هدارى هه‌ر تشتى يه‌ و “ئه‌م چو پێنگاڤان بێى وى ناهاڤێژين و به‌رده‌وام مه‌ پرسيارا خوه‌ يا پێكرى”.

ئەڤرۆ:

ئەندامەکێ سەرکردایەتیا پارتی دیموکراتی کوردستان راگەھاند، پشتی ئەنجامدانا رێککەفتنا ستراتیژی د ناڤبەرا پارتی و ئێکەتیێ دا، گەلەک کارێن باش پێکڤە یێن ھاتینە ئەنجامدان، وەکو ڤەگەراندنا ئێمناھیێ بۆ ھەموو ھەرێما کوردستانێ، لێ دبێژیت، قۆناغا پشتی ھەلاویستنا رێککەفتنێ ل چەند سالێن دووماھیێ دا، ب تایبەتی د ڤان دو سێ سالان دا، ھەکە بەراورد بکەین، دیسان نەئارامی و پرت و بەلاڤبوون و لێدانا پێگەھێ کوردان و تێکدان ل دووڤ خوە ئینان ب تایبەتی ل دەڤەرا سلێمانیێ کو ئەڤە ھەموو ژ ئەنجامێ ھەلاویستنا وێ رێککەفتنێ بوو.

ئەحمەد کانی ئەندامێ سەرکردایەتیێ و بەرپرسێ پەیوەندیێن نیشتمانی یێن پارتی بۆ مالپەرێ فەرمیێ پارتی گوت” پارتی و ئێکەتیێ دیرۆکەکا دوور و درێژ پیکڤە یا ھەی، ب راستی ژی ژ ئەنجامێ رێککەفتنا ستراتیژی کارێن گەەلک باش یێن ھاتینە کرن، ئارامی و پێشکەفتن ل ھەموو ھەرێما کوردستانێ دیاربوو ھەر ژ زاخۆ و ھەتا خانەقینێ، بارێ ئێمناھیێ ژی باش یا پاراستی بوو، نوکە ژی ھەر باش یێ پاراستی یە، مە پێکڤە شیا ژ ئەنجامێ رێککەفتنا ستراتیژی پێگەھێ کوردان ل بەغدا ل دەمێ ئازادکرنا عیراقێ ل سالا ٢٠٠٣ ێ گەلەک ب ھێز بچینە دناڤ پرۆسا سیاسی یا عیراقێ دا، وی دەمی سەرۆک بارزانی و مام جەلال ل بەغدا بوون و کارێ وان بۆ جھێ سەرنجا ھەموو نەیاران و مافێن کوردان ب رێکوپێکی د دستوورێ عیراقێ دا ھاتە چەسپاندن و ٨٠% ژ گەلێ عیراقێ دەنگی بۆ بدەت، دیسا پشکداریا کوردان د حوکمەتا عیراقێ و جڤاتا نوونەران دا پتر پێگەھا کوردان ل سەر ئاستێ نێڤدەولەتی ب ھێزکر”.

ئەحمەد کانی گوت ژی” بنبرکرنا شەڕێ ناڤخوەیی ئەوژی دەستکەفتەکێ مەزن بوو، کو پشتی وی شەڕی، ئێکرێزیا ناڤمالا کوردی و ب ھێزکرنا پێگەھێ ئابووریێ کورستانێ پەیدابوو و پێدڤیە وێ رۆژێ ژبیر نەکەین کو سەرۆک بارزانی و مام جەلال بەرھەڤبووین ل ھۆلا سەعد عەبدوللا بۆ ھنارتنا پەترۆلا ھەرێمێ کو رۆژەکا دیرۆکی بوو”.

خویاکر ژی” ھەلاویستنا وێ رێککەفتنێ د چەند سالێن بۆری دا نەئارامی و پرت و بەلاڤبوون و لێدانا پێگەھێ کوردان و پەیدابوونا ئاژاوێ ب تایبەتی ل دەڤەرێن سلێمانیێ ل دووڤ خوەدا ئینا”. لێ گوت ژی” ئەم نابێژین ھەموو خالێن وێ رێککەفتنێ د روستن، ب تایبەتی ل گەل گوھۆرینا دەم و پێشھاتان، دبیت ھندەک خالان پێدڤی ب ھندەک گوھۆرینان ھەبیت کو بگونجن ل گەل روودانێن نوکە، بەلێ ھەڤکاریا د ناڤبەرا پارتی و ئێکەتیێ گرەنتیەکا مەزنە بۆ پاراستنا ئەزموونا ھەرێما کوردستانێ”.

ڤی ئەندامێ سەرکردایەتیا پارتی گوت ژی” ب پێدڤی دزانم پارتی و ئێکەتی پێکڤە ل بن ھەر ناڤەک و درووشم و ھەڤپەیمانیەک بیت، ئێک بگرن و ھەر ئەو دشێن پاشەرۆژا ھەرێما کوردستانێ بپارێزن، بەلێ نابیت د رێککەفتنا نشتمانی یا پارتی و ئێکەتیێ لایەنێن دی پشت گوە ب ھاڤێژین، دشیان دایە ھەموو لایەن فاکتەرەکێ ب ھێز بن د وێ رێککەفتنێ دا”.