ئەڤرۆ نیوز:
پشتی پێکئینانا ھەڤپەیمانیا چار قۆلی ب سەرکێشیا روسیا بۆ لێدانا داعشێ و داخۆیانیێن سەرکردێن ئەمریکا ل دۆر مەترسیا روسیا ل سەر ئەردێ سووریێ، چاڤدێرێن سیاسی پێشبینی دکەن شەڕەکێ مەزن ل دەڤەرێ رووبدەت و کاریگەری ل سەر کوردستانێ ژی ھەبیت، پەرلەمانتارەکێ بەرێ ژی دبێژیت، جوگرافیا دەڤەرێ دێ ھێتە گۆھۆڕین و ئەوا نوکە روسیا دکەت، د بەرژەوەندیا شیعان دایە.
شادمان مەلا حەسەن، چاڤدێرێ سیاسی بۆ رۆژناما ئەڤرۆ گۆت” روسیا یا ب تنێ نینە د شەڕێ سووریێ، بەلکو وەلاتێ چینێ ژی یا ھاتیە دناڤ ھەڤپەیمانیا روسی دا و ئەڤە ژی بۆ ب ھێزکرنا پێگەھێ خوەیە ل دەڤەرێ، چونکی ئەوان وەلاتان رێککەفتنەک ھەیە ب ناڤێ (رێککەفتنا شەنگھای) چین و روسیا و ھند و وەلاتێن ئاسیا ناڤین تێدا دپشکدارن، ئەڤە دەمێ سالەکێ یە پێنگاێن ئەمریکا بۆ لێدانا داعشێ گەلەک ل سەرخوە بوویە، لڤێ دووماھیێ ھژمارەکا مەزن یا پەنابەران بەر ب ئورۆپا چووینە و کاریگەری ھەبوو کو ئورۆپا بۆچوونا خوە ب گۆھۆڕیت، ئەڤە بۆ ئەگەر روسیا دەلیڤێ وەربگریت کو ھێزا خوە ببەتە سووریێ، بەلێ ئەمریکا و روسیا دو وەلاتێن ئاسایی نینن بێ ڤەخواندنا رەوشێ و رێککەفتنێ پێنگاڤا ب ھاڤێژن، پشتڕاستم ژی رێککەفتنەکا نھێنی د ناڤبەرا روسیا و ئەمریکا دا یا ھەی بۆ لڤاندنا ھێزێ، دو زلھێزێن وەک ئەمریکا و روسیا دەمێ ھێزێن خوە دناڤ وەلاتەکێ بچووک وەک سووریێ دا کۆم دکەن بێ رێککەفتن نینە، چونکی ب لڤاندنا ھێزێ شەڕ دێ روودەت ھەکە بێ ئاگەھداریا ھەڤدوو بیت، ئەز پێشبینیا شەڕی ناکەم د ناڤبەرا روسیا و ئەمریکا دا، بەلکو دبیت شەڕەکێ سار ب ڕێڤەبچیت”.
شادمانی گۆت ژی” سالا بھێت سەدسالیا رێککەفتنا (سایکس – بیکۆ) یە، پێشبینی دھێتەکرن نەخشێ رۆژھەلاتا ناڤین بھێتە گۆھۆڕین، ئەڤ نەخشە یێ دیارە، نوکە نەخشێن عێراقێ و سووریێ و یەمەنێ و لیبیا وەک بەرێ نەماینە، تنێ سەر کاغەزێ ئەڤ دەولەتە یێن ماین، دڤێت کورد ببیتە ھێلا سیێ و نەبیتە لایەن ل گەل چو بەرەیەکی، بەلکو مفای ژ ھەردو بەرەیان ببینیت، ئەمریکا و روسیا ژی دزانن ھێزێن کوردی ل ھەرێما کوردستانێ و رۆژئاڤایێ کوردستانێ پتر ژ ھەموو ھێزێن دی یێن عیراقی و سووری شەڕێ داعشێ دکەن، لەوما چوونا کوردان بۆ ناڤ ئێک ژ بەرەیێن نوکە ھەین، دێ زیان ھەبن و دڤێت ژ ھەردو بەرەیان مفای وەربگرن، نابیت کورد لەزێ بکەن و زوو بچنە دناڤ بەرەیەکی یان تنێ خوە ب ئەمریکا ڤە گرێبدەن، ژ بەر کو مە ئەزموون دگەل ئەمریکا ژی یا ھەی، نابیت کورد ببنە پشکەک ژ پاراستنا بەرژەوەندیێن چو دەولەتان، بەلکو مفای ژێ وەربگرین”.
مەھدی حاجی، پەرلەمانتارێ بەرێ یێ عیراقێ ل سەر لیستا پارتی بۆ رۆژناما ئەڤرۆ دیارکر، دێ دەڤەر بیتە دو بەرە، بەرەیێ ئەمریکا و بەرەیێ روسیا، کاریگەریێن مەزن دێ ھەبن ل سەر دەڤەرێ، نوکە ب شێوەکی ئێکەتی و پەکەکە پشتەڤانیا بەرەیێ روسیا دکەن، چونکی بەرەیێ شیعی یە و روسیا د بەرژەوەندیا شیعان دا کاردکەت، ھەتا ئیران و عیراق و لبنان ژی تێدا ئەندامن، لەوما پتر دێ د بەرژەوەندیا شیعان دابیت، بەرەیێ ئەمریکا ژی خویایە پشتەڤانیا بەرژەوەندیێن سونان دکەت، ئەز پێشبینیا شەڕەکێ مەزن دکەم، مەرج نینە ئەمریکا و روسیا ڤی شەڕی راستەوخوە بکەن، دبیت شەڕ ب وەکالەت بھێتەکرن، لەوما پێدڤیە پتر ژھەر دەمەکی کورد دئێکگرتی بن بۆ کارڤەدانێن ڤی شەڕێ ل پێش مە، ئەڤ شەڕە دێ یێ ئێکلاکەر بیت بۆ دوبارە دارشتنا جوگرافیا دەڤەرێ ب سەر زلھێزێن جیھانێ، ھەکە کورد دئێکگرتی نەبن و خوە بەرھەڤ نەکەن، گومان تێدا نینە دێ زیاندارێن مەزن بن”.
نيشاندان