ئه‌ڤرۆ نیوز: ڤه‌ده‌ر ره‌شاڤایی:
سه‌رۆكا حكومه‌تا سكۆتله‌ندا كو ب وه‌زیرا ئێكی ل بریتانیا دهێـه‌ نیاسین ل په‌رله‌مانێ سكۆتله‌ندا لدۆر گیان ژده‌ستدانا زارۆكێ كورد كو كه‌ڤتبوو سه‌ر كناره‌كێ توركیا گۆت كو بدیتنا وێنه‌یێ ته‌رمێ وی زارۆكی ل شه‌ڤا ده‌ربازبووی روندكێن وێ هاتنه‌ خار و چ پێنه‌ڤیت وێ بتنێ لبه‌ر وی وێنه‌ی نه‌كرییه‌ گری .
نیكۆلا ستورجۆن  گۆت : وی زارۆیی هه‌ستێن دلێ مه‌ هه‌میان لڤاندن لێ ئه‌ڤه‌ تراجیدیه‌كا دوور نینه‌ و ژیانا بهزاران زارۆكێن دی یێن وه‌كی وی د مه‌ترسیێ دایه‌ و به‌رپرساتیا ئالیه‌كی نینه‌ هاریكاریێ بكه‌ت به‌لكو به‌رپرساتیا هه‌مییانه‌.”
هه‌روه‌سا گۆت ” به‌لێ ئه‌ز یا توره‌ مه‌، ئه‌ز گه‌له‌كا توره‌ مه‌ ، و ژ ده‌یڤید كامیرۆن سه‌رۆك وه‌زیرێ بریتانیا دخازم هه‌ر زوو هه‌لوه‌ستێ خوه‌ لسه‌ر په‌نابه‌ران بگوهریت.”
“ئه‌ز وه‌ك وه‌زیرا ئێكێ یا سكۆتله‌ندا سۆزێ دده‌م كو ئه‌م د ئاماده‌بین بۆ هه‌ر په‌نابه‌ره‌كێ پێدڤی هاریكارییا مه‌، چێنابیت ویژدانا مه‌ تراجیدیێن هوسا قه‌بیل بكه‌ت..”
پارچه‌ك ژ ڤیدیۆیێ:

ئەڤرۆ نيوز:

رزا کەریمی چاڤدێرێ سیاسی ل رۆژھەلاتێ کوردستانێ بۆ رۆژناما ئەڤرۆ راگەھاند کو دەمێ حەسەن رۆحانی خوە بۆ پۆستێ سەرۆک کۆماریا ئیرانێ بەربژار کری گەلەک سۆز دانە کوردان و ئێک ژ سۆزێن رۆحانی ئەو بوو دێ مافێ پەروەردا ب زمانێ کوردی و مافێ کەلتوری دەتە کوردان و دێ زۆرداریا ل سەر کوردان راکەت و بێگومان ل گەل وێ ژی سۆز دابوو کو پارێزگارێن باژارێن کوردان ژ کوردان ب خوە بیت و گۆت: (لێ مخابن چەند سال بۆرین و رۆحانی چو سۆزێن خوە بجە نەئینان و بەرۆڤاژی وێ یەکێ ژی زۆرداریا ل سەر کوردان گەلەک زێدە بوویە، راستە دەمێ ئەحمەدی نەژاد سەرۆک کۆمارێ ئیرانێ بوو، گەلەک سازی و دەزگەھێن راگەھاندنێ و یێن کەلتوری یێن کوردان ھاتنە قەپات کرن، لێ دەمێ رۆحانی دەست ب کارێ خوە کری وی ژی گەلەک دەزگەھێن کوردی قەپات کرن).
ناڤھاتی د بەردەوامیا ئاخڤتنا خوە دا ئەو یەک ژی دیار کر کو رێژا سێدارەدانێ د دیرۆکا کۆمارا ئیسلامی یا ئیرانێ دا ھەری زێدە د سەردەمێ سەرۆک کۆماریا رۆحانی دا بوویە، چونکو ل گۆر ئامارێن فەرمی یێن حوکمەتا ئیرانێ پشتی رۆحانی بوویە سەرۆک کۆمارێ ئیرانێ ھەتا نھا ب سەدان لاوێن کوردی ھاتینە سێدارەدان، لێ تشتێ ئەم دزانین رێژە گەلەک زێدەترە و ھەروەسا گرتن و ئەشکەنجەدانا رۆژنامەڤان و نڤیسەر و چالاکڤانێن کورد ژی رۆژ ب رۆژێ بەرفرەھتر دبیت و گۆت: (مخابن رۆحانی ھەری زێدە دەنگ ژ باژارێن کوردان بدەستڤە ئینابوو و مە چاڤەرێ دکر کو ئەو ھندەک گوھۆرینان بکەت و زۆرداریا ل سەر کوردان راکەت و سێدارەدانێ بدەتە راگرتن، لێ مخابن وەسا نەبوو و خرابتر ژ سەردەمێ ئەحمەدی نەژادی ئینا سەرێ کوردان).
شیرین فاتمی مامۆستایا زانکۆیێ ل ئورمیێ ژی بۆ رۆژناما ئەڤرۆ راگەھاند کو رەنگە نھا گەلەک کەس دبێژن کو ژ بەر رێککەڤتنا ئیرانێ ل گەل وەلاتێن زلھێز دێ رەوشا ئیرانێ باش بیت، لێ براستی ژی وەسا نینە. نھا رەوشا ئابووری ل ئیرانێ گەلەک خرابە، خرابیا رەوشا ئابووری ژی وەسا کریە کو ئاریشێن جڤاکی، سیاسی و گەلەک ئاریشێن دیتر ژی دروست ببن و گۆت: (ئەم دزانین کو دەولەتا ئیرانێ چ گرنگیەکێ نادەتە دەڤەرێن کوردی، پشتی کو کۆمارا ئیسلامی ھاتیە سەر کاری ھەتا نھا ھەردەم بۆدجا دەڤەرێن کوردی بۆ دەڤەرێن دیتر یێن ئیرانێ دھێتە مەزاختن و ژ بەر ھندێ ژی ل گەل بێکاریێ گەلەک ئاریشێن دیتر یێن جڤاکی ژی ل دەڤەرێن کوردی ھەنە).
سەبارەت ب سۆزێن کو رۆحانی دابوونە کوردان ژی ناڤھاتیێ دیار کر کو ھەموو سەرکردێن ئیرانێ وەسا دکەن. تنێ د دەمێ ھەلبژارتنان دا کورد دھێنە بیرا وان و ئەو سەرەدانا باژارێن کوردی دکەن و ھندەک گۆتنێن خوەش دبێژن دا کو کاریگەریێ ل سەر دەنگدەران بکەن و پاشی ژی دەمێ دبنە سەرۆک ھەموو تشتەکێ ژبیر دکەن، خاتەمی و ئەحمەدی نەژادی ژی بەرێ وەسا کرن و رۆحانی ژی وەکو وان دکەت و گۆت: (ب ھەلبژارتنا کەسان و گوھۆرینا سەرۆکان چ گوھۆرینەک د رەوشا کوردان دا ل ئیرانێ دروست نابیت، چونکو سیستەمێ ئیرانێ چو جھەک بۆ کوردان دەستنیشان نەکریە، کەسێن دھێنە سەر دەستھەلاتێ ژی وەک ئەرکدارێ سیستەمی کار دکەن و ژ بەر ھندێ ژی چو گوھۆرینەکا بەرچاڤ د سەردەمێ دەستھەلاتا کۆمارا ئیسلامی دا ل ئیرانێ دروست نەبوویە و رۆژ ب رۆژێ رەوشا کوردان د ھەموو بیاڤان دا خرابتر دبیت).
ل گۆر راپرسیێن سازیا مافێ مرۆڤی یا رۆژھەلاتێ کوردستانێ پشتی کو رۆحانی بوویە سەرۆک کۆمارێ ئیرانێ رێژا سێدارەدانا لاوێن کورد ل گۆر سەردەمێ ئەحمەدی نەژادی ١٠% زێدە بوویە و چارەنڤیسێ ب سەدان گرتیێن سیاسی یێن کورد ژی دیار نینە و گەلەک گرتی سزایێن وان یێن سێدارەدانێ بەری نھا ھاتبوونە راگرتن لێ پاشی بێی دەستووریا دادگەھێ ھاتینە سێدارەدان.