ئەڤرۆ نیوز، زنار تۆڤی:
هیوا میرزا سابر پەیڤدارێ مەکتەبا سیاسیا ئێکگرتوویا ئیسلامی کوردستان دەست ژ کارکێشا و ئاشکەرا کر: نوکە پەیڤدارێ فەرمیێ ئێکگرتوو نینم و ب ناڤێ ئێکگرتوویێ داخۆیانیا نادەم.
هیوا میرزا سابر کارگێرێ مەکتەبا سیاسیا ئێکگرتوو د په‌يجێ خوە یێ تۆرا جڤاکیا فێسبووکێ راگەهاند: نوکە پەیڤدارێ فەرمیێ ئێکگرتوویێ نەمایمە و داخوازا من ژ راگەهاندنێ ئەوە کو هەر بابەتەکێ ب ناڤێ هیوا میرزا پەرلەمانتارێ خانەنشین بووی بیته ناڤكرن و نە چ دی.
ئەڤرۆ نیوز:
رێڤەبەرێ پیشنە و بازارکرنێ ل وەزارەتا چاندنێ و ژێدەرێن ئاڤێ ل ھەرێما کوردستانێ بۆ ئەڤرۆ دیارکر خویک چوو سەر ئێنانا ھنارێن بیانی ل رۆژا ١/٩ بریارا دانانا بخویکێ بۆ سەر ھنارێن بیانی چوو واری بجە ئینانێ دا،بۆ ھەر کیلۆیەکا بھێتە ئینان ژ دەرڤە دێ ٣٥٠ دینار چنە سەر، وەکو خویک ئەڤ پێنگاڤ ھاتە ھاڤێتن داکو جوتیارێن ھەرێما کوردستانێ پتر مفاداربن و بشێن بەرھەمێن خوە بفروشن.
نوری ئیسماعیل رێڤەبەرێ پیشینە و بازارکرنێ ل وەزارەتا چاندنێ و ژێدەرێن ئاڤێ ل حوکمەتا ھەرێما کوردستانێ دیارکر بەری نوکە خویک ل سەر ئینانا ھنارێن بیانی نەبوو بۆ ناڤ بازارێ ھەرێما کوردستانێ و بازرگانان زور ھنار دئینان و ڤێ چەندی کارتێکرن ل بەرھەمێ خۆمالی یێ ھناران دکر،لەورا وەزارەتا چاندنێ بریار دا خویک بکەڤیتە سەر ئینانا ھنارێن بیانێ ل دەسپێکا ڤی ھەیڤێ و بریار چوو وارێ بجە ئینانێ دا، ئەڤە دێ بیتە ھاندەر و پالدەرەکێ جوتیارێن ھەرێما کوردستانێ،پتر مفاداربن و بشێن بەرھەمێ خوە ل ناڤ بازاری ب فروشن.
جیھاد محەمەد ھاریکاری رێڤەبەرێ گشتی چاندنێ ل پاریزگەھا دھۆکێ بۆ ئەڤرۆ دیارکر ل ڤان سالان پیتەپێدانەکا مەزن ب بەرھەمێ جوتیاران ھاتیەدان و حوکمەتا ھەرێما کوردستانێ سالانە زور پشتەڤانیا جوتیاران دکەت،داکو بەرھەمی خۆمالی بھێتە زێدەکرن دناڤ بازاری دا، گۆتژی ل گەلەک دەڤەرێن ھەرێما کوردستانێ جوتیار، ھناران دچینن و سالانە ژی بەرھەمەکێ زور باش ژی دھێت و دانانا خویکێ ل سەر ھناران بیگومان دێ بیتە ئەگەر بازرگان بەرھەمێ ھناران ژ دەرڤەی وەلاتی نەئینن دێ یی خۆمالی بھایەکێ باشتر ناڤ بازاری دا ھێنە فروتن.
ھاریکاری رێڤەبەرێ گشتی چاندنێ ل پارێزگەھا دھۆکێ دیارکر ھەکە پارێزگەھا دھۆکێ گەلەک رەز و باغێن ھناران نەبن ژێ ل ھندەک دەڤەرێن کوردستانێ زور ھەنە دێ تێرا بازاری کەن،ل دووڤ پلانا حوکمەتا ھەرێما کوردستانێ ھەر جۆرە بەرھەمەکێ خۆمالی دەرکەڤیت، یێ بیانی دھێتە قەدەغەکرن یان ژێ خویک دکەڤتە سەر و دانانا خویکێ ل سەر ھناران زور بریارەکا باشە چونکو ھەکە سەر بازرگانی گران بیت ئەو بخوە ناھێنیت و دێ جوتیار بەرھەمێ خوە یێن ھناران ل بازاری ب باشیی فروشن و داھاتەکێ باش دەست جوتیاری کەڤیت و بیتە ھاندەر سالێن بھێت جوتیار باشتر رەز و باغی خوە سەخبیر بکەت، داکو داھاتەکێ باشتر ژێ بگەھتێ و ھەکەر جوتیار سالێ ھەموویێ بەرھەمی خوەڤە بیت و داھاتەکێ باش نەگەھتێ سالا دووڤدا دا دەستا ژ بەرھەمی خوە بەردەت.
ئەڤرۆ نیوز:
سەرۆکێ بەرێ یێ پارتیا ماف و ئازادیان ل باکورێ کوردستانێ راگەھاند کو قۆناغا ئاشتیێ تشتەکێ گەلەک باش بوو، لێ د چاوانیا برێڤەبرنا وێ پرۆسێ دا زەلال نەبوو و د ناڤبەرا دو کەسان دا ھاتبوو دەستپێکرن و حوکمەتێ و گەلەک سازیێن دەولەتێ ژی نەدزان کا براستی دێ ئەو قۆناغ چاوا برێڤە چیت و ژ بەر ھندێ ژی پشتی ھندەک گوھۆرینان روو دان جارەکا دی ھەر دو ئالیان دەست ب شەری کرن و شەرێ نھا زیانەکا مەزن گەھاندیە کوردێن باکور.
بایرام بۆزیەل سەرۆکێ بەرێ یێ پارتیا ماف و ئازادیان ل باکورێ کوردستانێ د دیدارەکێ دا ل گەل رۆژناما ئەڤرۆ سەبارەت ب شەرێ نھا ل تورکیا و چارەکرنا پرسا کوردی ئاخڤی و دیار کر کو دەمێ قۆناغا ئاشتیێ دەستپێکری و شەر ھاتیە راگەھاندن وی دەمی مە وەک پارتیا ماف و ئازادیان پشتەڤانیا خوە بۆ پرۆسا ئاشتیێ دیار کربوو و مە گۆتبوو کو دڤێت ئەو پرۆسە تنێ د ناڤبەرا ئیمرالیێ و ئەردۆگانی دا نەبیت و دڤێت ھەموو ئالیێن کوردی و دەولەتێ ب گشتی تێدا جە بگرن و بۆ رایا گشتی یا تورکیا ژی بھێتە ئاشکرا کرن کا ھەر دو ئالی داخوازن چاوا پرسا کوردی چارە بکەن، لێ مخابن ھەموو تشت ب رەنگەکێ نھینی برێڤە چوون و بەری ھەلبژارتنێن حەفتێ خزیرانێ ژی ھەم PKK و ھەم ژی حوکمەتێ و سەرۆک کۆمارێ تورکیا ب داخۆیانیێن خوە زەمینە بۆ دەستپێکرنا شەری ئامادە دکرن و گۆت: (بەری کو ھەلبژارتن دەستپێ بکەن بەرێز ئەردۆگانی دیار کر کو ئێدی ل تورکیا پرسا کوردی نینە و ئەو دانوستاندنێن ھەتا نھا برێڤە چووینە ژی نەگەھشتنە چو ئەنجامەکێ و ئێدی پێدڤی ناکەت برێڤە بچن و گەف ژی کرن کو نابیت ل تورکیا کەس بەحسێ پرسا کوردی بکەت، ل ھەمبەر وێ یەکێ ژی بەرپرسێن PKK ل قەندیلێ ل جھێ کو ل سەر چارەکرنا پرسا کوردی رژد بن زمانێ گەفێ بکار ئینان و گەفا شەری کرن و ھێزێن خوە زێدەتر رەوانەی ناڤ ئاخا تورکیا کرن و ژ بەر ڤان خالان ژی ئێدی قۆناغا ئاشتیێ ھاتە راگرتن و شەری جارەکا دی دەستپێکر).
ناڤھاتی د بەردەوامیا ئاخڤتنا خوە دا ئەو یەک ژی دیار کر کو د دەمێ ھەلبژارتنان دا ھەڤسەرۆکێ پارتیا دیموکراتی یا گەلان و بەرپرسێن ئاکپارتیێ ب زمانەکێ گەلەک توند ھێرشی ھەڤدو کرن، ژ بەر وێ یەکێ ژی پارچەبوونەک د دەنگێ خەلکێ دا پەیدا بوو، مرۆڤ دشێت بێژیت کو ل دەڤەرێن باکورێ کوردستانێ ب گشتی پرانیا کوردان دەنگێ خوە دا نوونەرێن خوە و یێن بەرێ دەنگ ددانە ئەردۆگانی ڤێجارێ دەنگێ خوە دا HDP و ئەو یەک ژی بۆ ئەگەر کو ئاکپارتی یا کو وێ دخواست ب رێیا ھەلبژارتنان بدەستڤە نەئینا، چونکو بەرنامێ وان ئەو بوو جارەکا دی ئەو وەک ئاکپارتی ببنە دەستھەلات و دستوورەکێ نوو بۆ تورکیا دروست بکەن و ل گۆر خوە پرسا کوردی چارە بکەن و سیستەمێ سەرۆکاتیێ ل تورکیا دروست بکەن، لێ ژ بەر دەنگێ کوردان ئەو یەک تێک چوو و پشتی وێ ژی مە دیت کو چاوا ئەردۆگانی ب رەنگەکێ ئاشکرا گەفا شەری کر و بەرپرسێن PKK ل قەندیلی ژی ھەمان دژواریا ئەردۆگانی نیشا دان و گۆت: (یا راست مرۆڤ دشێت بێژیت کو ھەر دو ئالی ژی ژ بەھانەکێ دگەرن دا کو جارەکا دی دەست ب شەری بکەن و د ئەنجاما وێ یەکێ دا پەقینا ل قەزا پرسووسێ روو دا و پاشی ژی PKK چەند پۆلیسێن تورکیا کوشتن و ئاگرێ شەری بەرفرەھتر لێ ھات و تورکیا ژی ژ بەھانەکێ دگەریا دا کو ھێرشی PKK بکەت و ئەو یەک ژی بۆ ئەگەر جارەکا دی شەر دەستپێ بکەت و نھا چو تشتەک ب ناڤێ قۆناغا ئاشتیێ و چارەسەریێ ل تورکیا نەمایە و ھەر کەس بەحسێ شەری دکەت و رۆژانە ژی شەر ھەنە و جەنازە دھێنە تورکیا و رەوشەکا گەلەک ئالۆز دروست بوویە و ئەز دبینم کو ھەم PKK و ھەم ژی دەولەتا تورکیا ھەر دو بەرپرسیارن ژ کوشتنا خەلکێ مەدەنی ل تورکیا و باکورێ کوردستانێ).
سەرۆکێ بەرێ یێ پارتیا ماف و ئازادیان د بەردەوامیا ئاخڤتنا خوە دا ئەو یەک ژی دیار کر کو نھا شەر کەڤتیە ناڤ باژار و گۆندێن کوردان، گەلەک کەس ژ بەر شەری نەچار ماینە کو برەڤن و بەرێ خوە بدەنە باژارێن تورکیا، مال و مولکێ خەلکی جارەکا دی وێران بوویە، ل جزیرێ، شەمزینان و فارقینێ گەلەک تاخ وێران بووینە ب دەھان خەلکێ مەدەنی ھاتینە کوشتن و PKK ژی نھا ب رەنگەکێ بەر بەلاڤ ھێرشی پۆلیس و ھێزێن ئێمناھیێ یێن تورکیا دکەت، شەرێ نھا دبینم کو د چارچۆڤێ شەری دا ژی نینە و گەلەک سنۆر دەرباز بووینە، چونکو گەلەک کەس دھێنە کوشتن وان کەسان چ پەیوەندی ب شەری ڤە نینە و خەلکێ بێ گونەھن و گۆت: (شەرێ نھا بریڤە دچیت بەری ھەر تشتەکێ زیان گەھاندە پرسا کوردی و چارەکرنا وێ، چونکو سەرەرای کێماسیان ژی بەری چەند سالان قۆناغا ئاشتیێ دەستپێ کربوو و گەلەک ئاستەنگیێن ل ھەمبەر چارەکرنا پرسا کوردی ھاتبوونە راکرن و دەولەتێ دخواست ھێدی ھێدی ھندەک تشتان بکەت، لێ شەرێ ڤێ دووماھیێ دەستپێ کری زیانەک مەزن گەھاندە قۆناغا ئاشتیێ و بابەتێ چارەکرنا پرسا کوردی بۆ چەندین سالێن دی پاشڤە چوو و ژ بەر ھندێ ئەز دبێژم پێدڤی بوو کو بەرپرسێن PKK ل قەندیلی چو بەھانە بۆ دەستپێکرنا شەری نەدابانە دەستێ تورکیا و پێدڤی بوو وان کار بۆ چارەکرنا پرسا کوردی و نەھێلانا شەری کربا، لێ مخابن ئەو یەک نەھاتە کرن).
بایرام بۆزیەل د پشکەکا دی یا ئاخڤتنا خوە دا ئەو یەک ژی راگەھاند کو سەرکەڤتنا HDP د ھەلبژارتنێن حەفتێ خزیرانێ دا بۆ کوردێن باکورێ کوردستانێ دەستپێکرنا قۆناغەکا مەزن و دیرۆکی بوو، چونکو بۆ کوردان خوەش ببوو کو بچنە پەرلەمانی و ٨٠ پەرلەمانتار ب دەنگێ کوردان چوونە پەرلەمانێ تورکیا و ئەڤە ب خوە تشتەکێ گەلەک مەزن و دیرۆکی بوو، ژ PKK دھاتە خواستن کو ب ھەموو رەنگەکێ زەمینە بۆ HDP خوەش بکەت دا ئەو ل پەرلەمانی کار بۆ چارەکرنا پرسا کوردی بکەن، چونکو کورد و تورک ب گشتی ل تورکیا شەری ناخوازن، نھا دەمێ جەنازێ سەرباز یان ژی گەریلان دھێن، مالباتێن وان داخوازێ ژ ئەردۆگانی و PKK دکەن کو شەری رابگرن و دەست ب قۆناغا ئاشتیێ بکەن و گۆت: (د ناڤ تورکان دا ژی پشتەڤانیەکا باش بۆ چارەکرنا پرسا کوردی دروست ببوو، لێ شاشیێن کو PKK کری و شەرێ کو جارەکا دی ھاتیە دەستپێکرن کاریگەریا خوە ل ھەستێ گەلەک تورکان کریە و ئەردۆگانی ژی ئەو یەک باش دزانی و ژ بەر ھندێ ژی ل بەھانەکێ دگەری دا کو جارەکا دی دەست ب شەری بکەت).
سەرۆکێ بەرێ یێ پارتیا ماف و ئازادیان د دووماھیا ئاخڤتنا خوە دا ئەو یەک ژی نەڤەشارت کو شەرێ نھا و ئالۆزیێن کو روو داینە نیشا ددەت کو پاشەرۆژەکا تاری ل پێشیا کوردان و تورکیا ب گشتی ھەیە، ئەز گەشبین نینم کو ڤێجارێ زوو شەر بھێتە راگرتن دێ بەردەوام بیت و ھەکە بھێتە راگرتن ژی دێ چەندین سالێن دی پێ بچن ھەتا کو جارەکا دی قۆناغەکا نوو بۆ چارەکرنا پرسا کوردی دەستپێ بکەت و گۆت: (ب مخابنی ڤە بێژم کو دەلیڤەکا دیرۆکی بۆ کوردان ھاتبوو پێش و وان دشیا ب رێیا پەرلەمانی و ب رێیا دەنگێ کو خەلکی دابوو HDP گەلەک تشتێن باش بۆ چارەکرنا پرسا کوردی ل تورکیا بکەن، لێ سیاسەتا شاش یا PKK و ئەردۆگانی وەسا کر کو جارەکا دی ئەم چەند سالان بۆ پاشڤە ڤەگەرین و ئەو یەک بۆ مە کوردان باش نینە، شەر بوویە ئەگەر گوند و مال و ئەردێ مە وێران بیت و خەلکێ مە بھێتە کوشتن و ھەلبژارتنێن پێشوەخت یێن پەرلەمانی ژی چو گوھۆرینەکێ د رەوشا نھا یا تورکیا دا دروست ناکەت).
ئەڤرۆ نيوز:
مەزنە فەرماندێن لەشکرێ ئەمریکی پێشبینیا وێ چەندێ دکەن کو شەڕێ دژی رێکخستیا داعش یا تیرۆرستی دێ ١٠ سالان ڤەکێشیت و نە کۆچکا سپی و نەژی کۆنگریسی نەڤێن گوە ل ڤێ نامێ ببن.
گۆڤارا (فۆرین بولیسی) یا ئەمریکی د راپۆرتەکا خوەدا ئاماژێ ب دانوستاندنەکا جەنەرال مارتن دیمبسی ل گەل ٢٠٠ سەربازێن ئەمریکی ل ھۆلەکێ ل بەغدا ل مەھا تەمووزا ٢٠١٥ ێ دکەت، دەمێ پرسیار ژ وان کری کو بەری نوکە ھاتینە ھنارتن بۆ عیراقێ و سێ چارێکێن وان دەستێن خوە بلندکرین و دەما پرسیارەکا دی ژێ کری ئایا چەند ژ ھەوە د وێ باوەریێ دایە دێ جارەکا دی ھێتە عیراقێ ، ھەموویان دەستێن خوە بلندکرن و جەنەرال دیمبسی گوتە وان ” ھوون راست دبێژن، دبیت ئەم بۆ دەمەکی دی ژی د بەردەوام بین د ڤی شەڕی دا”.
گوڤارا ئەمریکی د راپۆرتا خوە دا ئاماژێ ب وێ چەندێ ددەت ” سەرەرای ھەبوونا ھەلسەنگاندنێن گەشبین ل دەڤ کۆچکا سپی، لێ جەنەرالێن ئەمریکی پێشبینیێ دکەن کو شەڕێ دژی داعشێ درێژ ببیت و ھەتاکو پشتی دەمەکێ درێژ ژ ب دووماھی ھاتنا ویلایەتا سەرۆکێ ئەمریکی باراک ئۆبامای ڤەکێشیت”.
د دیدارەکێ دا ل گەل گۆڤارا ناڤبری ل مەھا تەمووزا بۆری، جێگرێ سەرۆک ئەرکانێن لەشکرێ ئەمریکی ئەدمیرال (ساندی وینفیلد) شەڕێ دژی داعشێ وەکو شەڕێ سار ھژمارت و گوت” ب دیتنا من دێ شەڕەک بیت د ناڤبەرا نەڤیان” .. دیسا سەرۆکێ ئەرکانێن لەشکرێ ئەمریکی یێ بەرێ (رای ئودێرنۆ) بۆ رۆژنامەڤانان دیارکربوو ” رێکخستیا داعشێ نە کێشەکە کو تنێ دو سالان دێ بەردەوام ببیت، بەلکو دێ بیتە کێشە ل ١٠، یان ٢٠ سالێن داھاتی دا”.
ل دووڤ وێ گۆڤارێ” بەرپرسێن کۆچکا سپی و پتریا ئەندامێن کۆنگریسی د دو دلن کو ب شێوەکێ ئاشکرا بێژن کا ھەتا کەنگی دێ شەڕێ دژی داعشێ یێ بەردەوام بیت، لێ ئەندامێن ھەردو حزبێن سیاسی یێن ئەمریکی دانپێدانێ ب وێ چەندێ دکەن کو ئەو شەڕ دێ بۆ دەمێ ١٠ ھەتا ٢٠ سالێن بھێت ڤەکێشیت و ئەڤ چەندە ژی دەرکرنا بریارێن ب زەحمەت دخوازیت ل دۆر ھنارتنا ھێزێن لەشکری و دابینکرنا بۆدجان و ستراتیژیێن تایبەت”.
گۆڤارا ئەمریکی دبێژیت” بەرپرسێن ئەمریکی دانپێدانێ ب وێ چەندێ دکەن کو شەڕێ داعشێ دێ ھەتاکو پشتی ب دووماھی ھاتنا ویلایەتا ئۆبامای ل ٢٠١٧ ێ یێ بەردەوام بیت و دێ بژاردەیێن ب زەحمەت بۆ سەرۆکێ داھاتی یێ ئەمریکا ھێلیت ل دۆرچاوان دێ ئەو شەڕێ لاوازێ نوکە یێ دژی داعشێ بەرفرەھتر ببیت.
ئه‌ڤرو نیوز، بارزان مزوورى
ژێده‌ره‌ك ژ چه‌كدارێن رێكخراوا ئازاد ل ناڤ باژێرێ مووسل بو مالپه‌رێ ئه‌ڤرو نیوز ئاشكرا كر كو ئه‌ڤرو نیڤرو 1/9/2015 چه‌كدارێن تیرورستێن داعش دناڤ باژێرێ مووسل ل دادگه‌ها داعش 192 رێكخستیێن خو گوله‌باران كرن و لدوڤ دا ته‌رمێن وان بو جهه‌كێ نه‌دیار ڤه‌گوهاستن.
وى ژێده‌رى دیار كر : ئه‌و كه‌سێن هاتینه گوله‌باران كرن پتریا وان خه‌لكێ مووسل بون یێن ب موچه چوینه دناڤ رێزێن وان و نه‌رازیبونا خو هه‌میا ب هه‌ڤرا دیار كربوو كو موچه‌یێن وان 30% برینه ژبه‌ر لاوازیا ره‌وشا وان و ئه‌و رێژه ژێ بریه و وان ژى قه‌بیل نه‌كریه و داعش ژى بریارا گوله‌بارانا وان ده‌ركر و هه‌مى ب هه‌ڤرا گوله‌باران كرن .
وى ژێده‌رى زێده‌تر گوت : ئه‌و رێكخستیێن داعش یێن خه‌لكێ مووسل ته‌رمێن وان راده‌ستێ مالباتێن وان نه‌كرن و بو جهه‌كێ نه‌دیار ڤه‌گوهاستن.
ئه‌ڤرۆ نیوز: ڤه‌ده‌ر ره‌شاڤایی:
ژن و زه‌لامه‌كێن بریتانییێن موسلمان وه‌سا خویا دكه‌ن كو خودێ موعجیزه‌كا بۆ هنارتی پشتی ناڤێ خودێ په‌یڤا (الله) دیتی یا نه‌خشاندی لسه‌ر هێكه‌كێ كو ژ به‌رهه‌مێ مریشكێن ئایسله‌ندا یه ل وه‌لاتێ بریتانییا یه.
ئه‌نیسا جوساب ره‌فه‌كا هێكان ل باژێرێ لێسێسته‌ر ل برتانیا كرین ب بهاێ ئێك جونه‌یهـ ، لده‌مێ لبه‌ر بوو بشكێنیت بۆ خارنێ دبینیت كو بئاشكرایی لسه‌ر هێكه‌كێ بشێوه‌كێ سرۆشتی هاتیه نڤیسین ( الله) پشتی هێك زڤراندی و هه‌می ره‌خێن وێ دیتی.
لدووڤ گۆتنا ئه‌نیسایێ و هه‌ڤژینێ وێ بۆ میدیا بریتانی ئه‌ڤه دلۆڤانییه و نامه‌كه بۆ ئاشتییا جیهانی.
ل سالا 2011 ێ ژی ل وه‌لاتێ كازاخستانێ هێكه‌كا بڤی ره‌نگی كو ناڤێ خودی ب زمانێ عه‌ره‌بی لسه‌ر هاتبوو نڤیسین هاتبوو دیتن .
ئه‌ڤرۆ نيوز:
سه‌ڵاحه‌دین دێمیرتاش هه‌ڤسه‌رۆكێ هه‌ده‌پێ راگه‌هاند: پێدڤيه ب زووترين ده‌م پروسا ئاشتيێ ده‌ستپێ بكه‌ت و بۆ سه‌رخستنا پروسێ ژى ئاگربه‌ستا دو لايه‌نى بهێته راگه‌هاندن.
ده‌ميرتاش دياركر ژى: ئێكه‌نيا ئوروپا ب هويرى چاڤدێريا هه‌ولێن مه دكه‌ت بۆ چه‌سپاندنا ئاشتيێ و ب گرنگى دزانين به‌رى هه‌لبژارتنێن پێشوه‌خت ييێن توركيا، ئاگربه‌ستا دو لايه‌نانه بهێته راگه‌هاندن و ده‌ست ب دانوستاندنان بهێته كرن و بۆ سه‌رخستنا پروسا ئاشتيێ ژى پێدڤيه لايه‌نى سيێى چاڤدێريا پروسێ بكه‌ت.
ئه‌ڤرۆ نیوز: ڤه‌ده‌ر ره‌شاڤایی:
پارێزه‌رێ دو رۆژنامه‌ڤانێن بریتانی یێن كه‌نالێ VICE News بریارا دادگه‌ها توركی لسه‌ر ده‌سته‌سه‌ركرنا هه‌ردو رۆژنامه‌ڤان بتۆمه‌تا تیرۆرێ ره‌تكر و خویاكر كو ده‌سته‌سه‌ركرنا وان بتنێ بمه‌ره‌ما رێگرتنێ یه ژ رۆمالا وان لسه‌ر كوردان و خه‌باتا وان.
په‌یامنێر جه‌یك هانراهان و كامیره‌ڤان فیلیپ پێندله‌بێری ل باژێری ئامه‌دێ ل باكورێ كوردستانێ ل ده‌مێ رۆماكرنا پێكدادانێن كوردان و هێزێنئێمناهییا توركیا هاتینه ده‌سته‌سه‌ركرن و ڤێ یه‌كێ ژی رخنه‌یێن توند بۆ حكومه‌تا توركیا ئینانه ژ رێكخراوێن مافێن مرۆڤان و مافێن رۆژنامه‌ڤانان یێن ناڤخۆ و نێڤده‌وله‌تی.
تێ زانین كه‌نالێ VICE News كو نڤیسینگه‌ها وێ یا سه‌ره‌كی ل نیویۆرك، ئه‌مریكا یه گرنگیه‌كا تایبه‌ت دده‌ته پرسا كوردی ل هه‌ر چوار پارچێن كوردستانێ، دده‌مێ پتری ساله‌كێ یه گه‌له‌ك راپۆرت و دوكیۆمێنت لسه‌ر خه‌باتا پێشمه‌رگێ كوردستانێ ل دژی داعش ئاماده‌كرینه و به‌لاڤكرینه زێده‌باری خه‌باتا هێزێن كوردی ل رۆژئاڤا كوردستانێ.
ئەڤرۆ نیوز،زنار تۆڤی:
پشتی کۆمبوونا شه‌شێ يا لایەنێن سیاسی ل ھۆلا سەعەد عەبدولا ل ھەولێرا پایتەخت دناڤبەرا ھەر پێنج لایەنێن سیاسی دا ھاتیە ئەنجامدان و د وێ کۆمبوونێدا لایەنێن سیاسی نەگەھشتینە چ ئەنجامان،ھندەک لایەن د وێ کۆمبوونێ دا بەشدار نەبووین،بریارە ئەڤرۆ رۆژا سێشەمبی ١-٩-٢٠١٥ مەسعود بارزانی سەرۆکێ ھەرێما کوردستانێ دگەل وان لایەنان کۆمبیت کو بەشداری د دوماھیک کۆمبوونا لایەنێن سیاسی دا ل کوردستانێ دا نەکری.
ئه‌ڤرۆ نيوز:
رێڤەبەرێ کاروبارێن زیندانیێن سیاسی ل وەزارەتا کاروبارێن شەھید و ئەنفالکریان راگەھاند، د ماوەیێ سێ سالێن بۆری دا وان نێزیکی ١٠ ھزار مامەلێن زیندایێن سیاسی بۆ ئەنجوومەنێ وەزیران و وەزارەتا دارایی یا حوکمەتا ھەرێما کوردستانێ ھنارتینە بۆ ھندێ مۆچەیەک بۆ وان بھێتە تەرخانکرن، بەلێ ژ بەر قەیرانا دارایی ھەتا نوکە ئەو مامەلە نەھاتینە وەرگرتن و د راگرتینە.
ئەحمەد مامە رەسول، رێڤەبەرێ کاروبارێن زیندانیێن سیاسی ل وەزارەتا کاروبارێن شەھید و ئەنفالکریان بۆ ئەڤرۆ دیار کر، د ھەیاما بۆری دا وان سێ لیستێن ناڤێن زیندانیێن سیاسی بۆ ئەنجوومەنێ وەزیران و وەزارەتا دارایی ھنارتینە بۆ ھندێ مۆچەیەکێ ھەیڤانە بۆ وان بھێتە تەرخانکرن و د وان لیستان دا ناڤێ نەە ھزار و ٩٨٧ زیندانیێن سیاسی تێدا بوون و گۆت ژی: ھەتا نوکە بەرسڤا ڤان مامەلان نەھاتیە دان و ھەر ل ئەنجوومەنێ وەزیران ماینە و ھاتینە پشتگوە ھاڤێتن.
مامە رەسول ئاماژە دا وێ چەندێ، ل وەزارەتا کاروبارێن شەھید و ئەنفالکریان ھەموو رێکارێن قانوونی بۆ مامەلێن وان ھاتینە کرن و چو ئاریشە تێدا نەماینە ژ نوو بۆ ئەنجوومەنێ وەزیران ھاتینە ھنارتن، بەلێ ژ ئەگەرێ قەیرانا دارایی یا کو ئەڤە دو سالە ب سەر ھەرێما کوردستانێ دا ھاتی، ئەڤ مامەلە ھاتینە راگرتن و گۆت ژی: ھەکە ئەڤ مامەلە ھەموو ب رێڤەبچن و مۆچە بۆ وان بھێتە تەرخانکرن، دێ ھەیڤانە ب ٢٠٠ ملیار دیناران ل سەر حوکمەتا ھەرێما کوردستانێ تەکلیف بن، لەو حوکمەتێ ئەڤ مامەلە راگرتینە ھەتا کو قەیرانا دارایی ب دووماھی دھێت.
ناڤبری خویاژی کر، پشتی راگرتنا مامەلێن وان زیندانیێن سیاسی، مە پێشنیازەک پێشکێشی ئەنجوومەنێ وەزیران کریە و ژێ خواستیە ل شوونا مۆچەی ھەموویێ، ب تنێ مۆچێ بنەرەت بۆ وان بھێتە تەرخانکرن، بەلێ ھوسا دیاربوو کو حوکمەت خوە نەشێت وی پارەی ژی بدەت و گۆت ژی: ھەتا قەیرانا دارایی ب دووماھی نەھێت، باوەرناکەم ئەڤ مۆچە بھێنە خەرجکرن.
ئەحمەد مامە رەسول ئاشکرا کر، نھا ل ھەرێما کوردستانێ نێزیکی پێنچ ھزار ١٥٦ زیندانیێن سیاسی ھەنە کو ھەیڤانە مۆچێ خوە ژ حوکمەتێ وەردگرن و د تۆمارکرینە و ھندەک ژ وان ھەیڤانە ٥٠٠ ھزار دیناران وەکو مۆچە وەردگرن و ھەنە ژی ھەتا ٢٠٠ ھزار دیناران وەردگرن و گۆت ژی: ئەڤ زیندانیێن سیاسی ھەیڤانە نێزیکی دو ملیار و ٢٠٠ ھزار دیناران ژ حوکمەتا ھەرێمێ وەردگرن.
ل دور دانا پارچە ئەردان بۆ زیندانیێن سیاسی رێڤەبەرێ کاروبارێن زیندانیێن سیاسی ل وەزارەتا کاروبارێن شەھید و ئەنفالکریان خویا کر، ھەتا نوکە نێزیکی دو ھزار و ٥٤٥ زیندانیێن سیاسی ل ھەرێما کوردستانێ پارچە ئەرد ژ حوکمەتێ وەرگرتینە و نھا بۆ ٨٨٨ زیندانیێن دی ژی فەرمانا دانا پارچە ئەردی دەرچوویە و ل نێزیک دێ ئەو ژی پارچە ئەردان وەرگرن.
نيشاندان