ئه‌ڤرۆ نیۆز، سالار دۆسكى:
ئه‌ڤرۆ رۆژا ئه‌ینى ل باژێرێ مه‌ككه‌ها پیرۆز سێیه‌م حه‌جیێ كوردستانێ وه‌غه‌ركر و هه‌ر ل هه‌مان جهـ هاته ڤه‌شارتن.
مالك ره‌مه‌زان رێڤه‌به‌رێ په‌یوه‌ندى و رگه‌هاندنێ ل رێڤه‌به‌ریا گشتى یا ئه‌وقاف و كارۆبارێن ئاینى ل دهۆكێ دپه‌یجێ خوه‌یێ تایبه‌تێ فه‌یسبووكى دا ئاشكراكریه كو ئه‌ڤرۆ رۆژا ئه‌ینى 18/9/2015 سێیه‌م حه‌جیێ كوردستانێ ب ناڤێ ( محه‌مه‌د عه‌لى جبرائیل) وه‌غه‌ركریه و خه‌لكێ باژێرێ هه‌ولێرى یه و ل هه‌مان جهـ هاته ڤه‌شارتن.
ئه‌ڤرۆ نیوز: ڤه‌ده‌ر ره‌شاڤایی:
فرۆكه‌یێن شه‌ركه‌ر یێن توركیا ل ده‌مژمێر شه‌شێ ئیڤاریا ئه‌ڤرۆ 18 ئیلۆنێ ده‌ست ب هێرشان كر بۆ سه‌ر بنگه‌هێن په‌كه‌كێ ل هه‌ر ئێك ژ گوندێ پیربلێ و ئه‌وله ل ناوچێن سندییا ل ده‌ڤه‌را زاخۆ.
گوندێ پیربلئ و ئه‌وله پتری 50 كیلۆمه‌تران ژ باژێرێ دهۆكێ دوورن و ل حه‌فتیا بۆری ژی توركیا هێرش بۆ سه‌ر هه‌ردو گوندان كر بوون.
ئه‌ڤرۆ نیوز: ڤه‌ده‌ر ره‌شاڤایی:
وه‌لاتێ ئه‌لمانیا مه‌ودایێ مه‌شقدانێن خوه بۆ هێزێن پێشمه‌رگه‌ی زێده‌كر ب ره‌نگه‌كی كو نها پێشمه‌رگه دهێته مه‌شقدان لسه‌ر به‌ره‌ڤانیكرن ژ خوه ل دژی چه‌كێ كۆمكوژ و كیمیاوی، پشتی حكومه‌تا هه‌رێمێدیاركری كو تیرۆرستێن داعش هێرشێن كیمیاوی كرینه سه‌ر پێشمه‌رگه‌ی.
له‌شكه‌رێ ئه‌لمانی (Bundeswehr) د به‌یاننامه‌كێ دا ئه‌ڤ یه‌ك پشتراستكریه و خویا كریه نیشاپێشمه‌رگه‌ی دهێته دان كا دێ چاوا ب ماسك ڤه و ل بن گه‌فێن چه‌كێ كۆم كوژی شه‌ری كه‌ن.
ئه‌ڤرۆ نیوز:
وه‌زاره‌تا خاندنا بلند و ڤه‌كۆلینێن زانستی یا حكومه‌تا هه‌رێما كوردستانێ بریار دا قۆتابیێن كورد ل كوركووكێ ل زانكۆیێن هه‌رێما كوردستانێ وه‌ربگریت.
د.یوسف گۆران وه‌زیرێ خاندنا بلند و ڤه‌كۆلینێن زانستی یا حكومه‌تا هه‌رێما كوردستانێ ئه‌ڤ یه‌ك ل كه‌ركووكێ راگه‌هاند، هند ئالی ژی ب پێنگاڤه‌كا باش دبینن بۆ خزمه‌تكرنا ده‌ڤه‌رێن كوردستانی یێن ده‌رڤه‌ی هه‌رێما كوردستانێ.
تێ زانین پتری سه‌دهزار قوتابی ل قوتابخانێن به‌شێ كوردی ل كه‌ركووكێ دخوینن، به‌رییا نها نه‌دشیان ل زانكۆیێن هه‌رێمێ بخوینن.
ئه‌ڤرۆ نیوز: كاروان باعه‌درى:
نڤیسینگه‌ها په‌له‌مانتار ڤیان ده‌خیل ئه‌نداما په‌رله‌مانێ عیراقێ ل سه‌ر لیستا پارتى دیموكراتی كوردستان راگه‌هاند: پشتى ڤیان ده‌خیلێ و شانده‌كى په‌رله‌مانتارێن عیراقێ دیداره‌ك دگه‌ل وه‌زیرا ده‌رڤه‌یا سویدێ ئه‌نجام داى، چه‌ندین بابه‌تێت گرنگ ل سه‌ر گۆره‌پانا سیاسى هاتنه گه‌نگه‌شه‌كرن , هه‌روه‌سان ده‌خیلێ بابه‌تێ كچ و ژن و زارۆكێن ره‌ڤاندیێن ئێزدى و چاوانیا هاریكاریكرنا وان ژبال جڤاكێ نیڤده‌وله‌تى و وه‌لاتێ سوید پیشنیازكر.
ده‌خیلێ راگه‌هاند ژى كۆ وه‌زیرا ده‌رڤه یا سویدێ دبه‌یننامه‌كا فه‌رمى دا راگه‌هاندیه ئه‌و دێ مه‌سه‌لا ره‌ڤاندیێن كوردێن ئێزدى بۆ جڤاكا نێڤده‌وله‌تى بلند كه‌ت و دێ پشته‌ڤانیه‌كا مه‌زن لێ كه‌ت.
ئه‌ڤرۆ نیوز: ڤه‌ده‌ر ره‌شاڤایی:
78 كۆچبه‌رێن ئیراقی بریار دا لدووڤ حه‌زا خوه د چه‌ند رۆژێن داهاتی دا ڤه‌گه‌رنه ئیراقێ ڤه .
میدیا ئه‌ورۆپی ئاشكرا كر كو ئه‌ڤ كه‌سه ژ ره‌گه‌ز ئیراقی نه ل وه‌لاتێ به‌لجیكا و پێرابوونێن داخازا وان یا په‌نابه‌ریێ ژ ئالیێ وی وه‌لاتی ڤه هاتینه راگرتن و تا راده‌كێ هاتیه بێهیڤی كرن و ژیانا وان وه‌كی پێدڤی برێڤه نه‌چوو ل وی وه‌لاتی.
ل ده‌ستپێكا هه‌شت مه‌هێن ئه‌ڤ ساله هزار و 160 ئیراقیان داخازا په‌نابه‌ریێ ل به‌لجیكا كرییه و ل مه‌ها داویێ ئه‌ڤ داخازه زێده‌بوویه ب ره‌نگه‌كی كو نیڤا كۆچبه‌رێن دگه‌هنه به‌لجیكا ئیراقی نه.
سازیا به‌لجیكا كو بریارێ لسه‌ر مافێ دان یان نه‌دانا په‌نابه‌ریێ بۆ په‌نابه‌ران دكه‌ت دیاردكه‌ت كو چ كۆچبه‌ران به‌لگه‌یێن مه‌ترسیا راسته‌وخۆ لسه‌ر ژیانا خوه نه‌داینه وان ، له‌ورا بریار راگرتن و قه‌رساندنا پێرابوونان دایه.
ل سالا بۆری به‌لجیكا داخازا په‌نابه‌ریێ یا پتری 58 كۆچبه‌ران ره‌ت كریه.
ئه‌ڤرۆ نیوز: ڤه‌ده‌ر ره‌شاڤایی:
پێلا ملیۆنییا كۆچبه‌ران بۆ وه‌لاتێن ئه‌ورۆپی وه‌ك سۆپرایزه‌كێ بوو بۆ سیاسه‌تمه‌دارێن رۆژئاڤا، لێ هه‌كه‌ر گوهداریا گۆتاره‌كا قه‌زافی كو مه‌هه‌كێ به‌ری بهێته كوشتن كربوو هاتباكرن چێدبیت ره‌وشا وه‌لاتێن ئه‌ورۆپی یا جیاواز با لدووڤ گۆتنا شرۆڤه‌كارێن سیاسی.
ل ئادارا سالا 2011 موعه‌مه‌ر قه‌زافی سه‌رۆكێ وی ده‌میێ لیبیا گۆتبوو كو بێی لیبیایه‌كا ئێكگرتی و ئارام كه‌س نه‌شێت رێ ل بملیۆنا ئه‌فریقیان بگریت كو برێیا لیبیا را ده‌ریا ناڤه‌راست ده‌رباز كه‌ن و بگه‌هنه ئه‌ورۆپا و پێله‌كا مه‌زن یا كوچبه‌ران دێ به‌ره‌ڤ ئه‌ورۆپا چیت.
هه‌روه‌سا كوری وی سه‌یفولئیسلام قه‌زافی د هه‌ڤه‌یڤینه‌كێ دا ل گه‌ل كه‌نالێ (فرانس 24) گۆتبوو : ئێمناهیا لیبیا رۆله‌كێ گرنگ د پاراستنا ده‌ریا ناڤه‌راست دا هه‌یه، بێ ئێمناهیا وی وه‌لاتی دێ ئه‌و ده‌ریا ئالۆز بیت و كه‌ڤیته گێله‌شۆكان دا، قاچاخچی وچه‌تێن ده‌ریایێ دێ مفای ژ ره‌وشا خرابا لیبیا كه‌ن.”
وه‌لاتێن رۆژئاڤا و ئه‌مریكا پشته‌ڤانیا چه‌ند هێزێن ئیسلامی ل لیبیا كربوو و شیان حوكمێ درێژێ قه‌زافی سه‌رۆكێ به‌رێ یێ لیبیا ژناڤ ببه‌ن. لێ نها دو حكومه‌ت ل وی وه‌لاتی هه‌نه و یا نه‌ئارامه.
تێ زانین پتری 200 هزار كه‌سان ژ وه‌لاتێن ئه‌فریقی برێیا لیبیا را رییا ده‌ریا ناڤه‌راست بۆ ئیتالیا و یونان و فره‌نسا ده‌رباز كریه و ب هزاران كه‌س د رێ دا خه‌ندقینه.
ئه‌ڤرو نیوز ،بارزان مزوورى:
عصمت ره‌جه‌ب، به‌رپرسێ لقا 14 مووسل بو مالپه‌رێ ئه‌ڤرو نیوز دیار كر كو ل شه‌ڤا بورى 18 ئه‌یلولێ 2015 دناڤ باژێرێ مووسل 82 چه‌كدارێن تیرورستێن داعش به‌ره‌ڤ سوریا دره‌ڤن دناڤ وانا سێ ژن دگه‌ل دانه.
ناڤهاتی لدور ره‌ڤینا وان دیار كر كوپشتى ده‌نگویێ رزگار كرنا مووسل گه‌هشتیه وان ترس كه‌فتیه دناڤ رێكخستیێن وان گروپ گروپ دگه‌هنه ئێك بو سوریا یان بو وه‌لاتێن خو دره‌ڤن ئه‌و جهێن لێ هاتین ،
ناڤبرى گوت ژى ژبلى ره‌ڤینا وان دناڤ ئێك دا لێك دكه‌ڤن كوشتن دناڤ وان دروست بیت ل روژا پێنج شه‌مبى د شه‌ره‌كی دا دناڤبه‌را چه‌كدارێن بیانى و عه‌شیره‌تا جبور دا 14 داعشێن بیانى هاتبوونه كوشتن .
ئه‌ڤرۆ نیوز، زنار تۆڤى:
جه‌عفه‌ر ئیبراهیم په‌یڤدارێ مه‌كته‌با سیاسى یا پارتى دیمۆكراتى كوردستان راگه‌هاند: پێشنیازا لایه‌نێن دى هه‌میگاڤا جۆره‌كێ سه‌پاندنێ پێڤه دیاربوویه، چونكى وان دڤێت یاسایه‌كێ بگۆهورن ب سه‌پاندنا رایا خوه، لێ پیشنیازێن مه هه‌می گاڤا دڤه‌كرى بوون نه‌كو گرتى، چونكى هه‌میگاڤا مه گۆتیه ئه‌ڤه بوچۆنا مه‌یه،ئه‌گه‌ر ل سه‌ر پێكنه‌هاتین بلا گه‌ل بریارێ ل سه‌ر رایا مه هه‌ردو لایه‌نا بده‌ت.
گۆت ژى:پارتى هیچ پێشنیازه‌كێ قه‌بول ناكه‌ت كو ئه‌نجامێ وێ ئه‌و بیت هه‌رێما كوردستانێ سه‌رۆكه‌كێ بێ ده‌ستهه‌لات هه‌بیت، لێ پارتى دگه‌ل هندێ یه سه‌رۆكێ هه‌رێما كوردستانێ راسته‌وخۆ ژلایێ گه‌لێ كوردستانێ بهێته هه‌لبژارتن و خۆدان ده‌ستهه‌لات بیت.
ناڤهاتى دیاركر ژى:پارتى دگه‌ل هندێ دایه هنده‌ك به‌رپرسیاره‌تى پشتى گفتوگۆ و رێكنه‌كه‌فتنێ بۆ سه‌رۆكێ هه‌رێمێ به‌رامبه‌ر په‌رله‌مانى بهێنه دیاركرن د یاسایێ سه‌رۆكاتیا هه‌رێما كوردستانێ دا،بێى هندێ كو تێكه‌لى درۆست بیت دناڤبه‌را سه‌رۆكێ ئه‌نجۆمه‌نێ وه‌زیران وه‌ك سه‌رۆكێ ده‌ستهه‌لاتا جێبه‌جێكار و به‌رپرسیار به‌رامبه‌ر په‌رله‌مان و سه‌رۆكێ هه‌رێما كوردستانێ كو بلندترین ده‌ستهه‌لاتا سیاسیه ل هه‌رێما كوردستانێ،ئه‌م وه‌ك رێوشوێنه‌كا ئه‌خلاقى و رێزگرتن ل پێشنیازا هه‌ر چار لایه‌نا،دێ گفتوگۆیێ ل سه‌ر پێشنیازێن وان كه‌ین،تێروانیا پارتى ئاشكه‌رایه كو پێكهاتیه ژ پێدڤى بوونا سه‌رۆكه‌كێ بهێز و خۆدان ده‌ستهه‌لات ل كوردستانێ و هه‌لبژاردنا وى ژلایێ خه‌لكى ڤه.
ئه‌ڤرۆ نیۆز، ئه‌یاد به‌روارى:
پۆلیسێن ئه‌لمانی ئه‌ڤرۆ كه‌سه‌كێ عیراقی كوشت، پشتى هێرش كریه سه‌ر پۆلیسه‌كا ژن و ب كێره‌كێ بریندار كری.
سه‌رۆكێ پۆلیسێن برلین دیریك فویبیرغ، ل دووڤ هافینگتۆن پۆست، د كونگره‌كێ رۆژنامه‌ڤانی دا گوت، ئه‌و كه‌سێ عیراقی یێ هاتیه كوشتن توندره‌وه‌كێ به‌رنیاس بوو ل ده‌ڤ ده‌ستهه‌لاتدارێن ئه‌لمانیا و ل سالا 2008 ێ هاتبوو تومه‌تباركرن ب ئه‌ندامه‌تیا رێكخراوه‌كا تیرۆرستی، و هاتبوو حوكمكرن ب زیندانكرنێ بۆ ده‌مێ هه‌شت سالان.
ئه‌و كه‌سێ عیراقێ ناڤێ وی (ره‌فیق) ژیێ وی 40 سالن و ل سالا 2013 ژ زیندانێ هاتبوو ئازادكرن، لێ به‌رده‌وام كێشه په‌یدادكرن و گه‌ف ل دادوه‌ره‌كی و هژماره‌كا پۆلیسان ژی كربوون و ئه‌ڤرۆ شیا خوه ژ وی بازنكێ ئه‌لكترۆنی ئه‌وێ پۆلیسان ل دۆر پێ وی داناى، قورتال بكه‌ت به‌ری تاوانا خوه ئه‌نجام بده‌ت.
نيشاندان