ئه‌ڤرۆ نیۆز، قائید میرۆ
فه‌رمانده‌كێ هێزێن پێشمه‌رگه‌ی دیاركر، تیرۆرستێن داعش شه‌ش بۆتلێن ئاڤایێ كانزایی تژی ماددێ ته‌قه‌مه‌نی كربوون و ژلایێ هێزێن پێشمه‌رگه‌ی ڤه هاتنه ژناڤبرن.
عه‌مید عزه‌دین سه‌عدوو، فه‌رماندێ پێشمه‌رگه‌ی ب ئه‌ڤرۆ نیۆز راگه‌هاند” كو تیرۆرستێن داعش پیلانێن خوه یێن هێرشكرنێ بۆسه‌ر هێزێن پێشمه‌رگه‌ی گۆهۆڕینه و نوكه نه‌شێن هێرشا بكه‌ن تنێ ب رێیا بۆمبێن ڤه‌نایی دخوازن هێزێن پێشمه‌رگه‌ی بكه‌نه ئارمانج و تۆپبارانا سه‌نگه‌رێن پێشمه‌رگه‌ی دكه‌ن.
عه‌مید عزه‌دینی گۆتژی” چه‌كدارێن داعش د نووترین پیلاندا دوهی شه‌ش بۆتلێن ئاڤا كانزایی تژی ماددێ ته‌قه‌مه‌نی كربوون لسه‌ر رێیا سه‌ره‌كیا دۆریانا حه‌ردان و ناحیا سنونێ دانابوون، كو هه‌ر بۆتله‌كی 30 كیلۆیێن ته‌قه‌مه‌نیێ تێدابوون، به‌لێ ژلایێ تیمێن ئه‌ندازیاریێن هێزیا پێشمه‌رگه‌ی پیلان هاته ژناڤبرن و چو زیان نه‌گه‌هشتن هێزێن پێشمه‌رگه‌ی.
نووترين نووچه
- دڤێت بەغدا سیاسەتا نەهنارتنا مووچەیێ خەلكێ كوردستانێ ب دووماهی بینیت
- هەتا دووماهی خولەك مە باوەری هەیە کو بشێین بگەهینە رێككەفتنێ ل گەل بەغدایێ
- بۆ چارەسەركرنا كێشەیێن هەولێرێ و بەغدایێ دڤێت قانوونا پەترۆل و غازێ بهێتە دەركرن
- ئایدن مەعرووف: حوكمەتا ئیراقێ د چارەسەركرنا كێشەیاندا یا رژد نینە
- بابەكر زێباری: ل دووماهییا ئەڤسالە هەرێما كوردستانێ دێ ئێك هێزا پێشمەرگەی هەبیت
- دڤێت كێشەیێن هەولێرێ و بەغدا ل سەر بنەمایێ دستووری بهێنە چارەسەركرن
- خەلكێ ژێهاتی و بسپۆر د ناڤ لیستا بەربژارێن پارتی دا هەنە
- هندەك ئالیێن ئێراقێ كێشەیان بۆ رێككەفتنێ ل گەل كوردستانێ دروست دكەن
- مەسرور بارزانی پشكداری د بەهییا عەبدوللا عەزیز مەلا هەمزە مێرگەسۆری دا كر
- سەرۆك بارزانی و بالیۆزێ فرەنسا كێشەیێن د ناڤبەرا هەولێرێ و بەغدایێ دا گەنگەشەكرن
سه‌ره‌كى نووترين نووچه
ڤیدیۆ: كچه‌كا كوردا ئێزدی رزگاربووییا ده‌ستێ سه‌ركردێ داعش ئه‌لبه‌غدادی به‌حسێ ره‌فتارا وی دكه‌ت
ئه‌ڤرۆ نیوز: ڤه‌ده‌ر ره‌شاڤایی:
كچه‌كا كوردا ئێزدی یا 16 سالی كو به‌نده‌یا ئه‌بۆبه‌كر بئه‌له‌غدادی سه‌ركردێ تیرۆرستێن داعش بوو و پاشی شیایه بره‌ڤیت، ژ بۆ كه‌نالێ CNN یێ ئه‌مریكی به‌حسێ ره‌فتارێن ئه‌لبه‌غدادی دكه‌ت و دیاردكه‌ت كو ئه‌و گه‌له‌ك دقوتا،
خویاكر ژی كو بارمتا ئه‌مریكی كایلا موله‌ر یا دده‌ستێن داعش و پاشی هاتیه كوشتن، ببوو هه‌ڤال لگه‌ل وێ وه‌كی خۆشكه‌كێ بۆ لێهات بوو و دیار دكه‌ت كو وێ بارمتا ئه‌مریكی بۆ وێ گۆتییه كو ئه‌لبه‌غدادی 4 جاران ده‌ستدرێییا سێكسی كرییه سه‌ر و دڤیا ب نه‌چاری ئه‌و بارمتا ئه‌مریكی شوو پێ بكه‌ت. ده‌قێ هه‌ڤپه‌یڤینا وێ ب كوردی:
نێچیرڤان بارزانی پشته‌ڤانییا خوه بۆ هۆنه‌رێ سینه‌مایێ دیاركر
ئه‌ڤرۆ نیوز: ڤه‌ده‌ر ره‌شاڤایی:
ئێڤارا ئه‌ڤرۆ چارشه‌مبی 9/9/2015 ب ئاماده‌بوونا نێرڤان بارزانی سه‌رۆك وه‌زیرێ هه‌رێما كوردستانێ و چه‌ند وه‌زیر و په‌رله‌مانتار و به‌رپرسێن حكۆمی ل هه‌رێما كوردستانێ و هۆنه‌رمه‌ندێن بیاڤێ سینه‌مایێ ل ناڤخۆیا كوردستانێ و ده‌رڤه ل هولا كۆنگران ل زانكۆیا دهۆكێ ڕێوڕەسمێن سێیەم ڤێستیڤاڵا نێڤدەوڵەتییا فلمان یا دهۆكێ ده‌ستپێكر.
پشتی ڤه‌كرنا پێشانگه‌هه‌كا فۆتۆگرافی ژ ئالێ سه‌رۆك وه‌زیرێ هه‌رێمێ ڤه، رێوره‌سمێن فێستڤالێ ده‌ستپێكر نێچیرڤان بارزانی گۆتاره‌ك پێشكێشكر كو ئه‌ڤه ده‌قێ وێ یه:
گه‌لى خانم و جوامێرێن ڕێزدار،
مێهڤانێن هێژا..
ئێڤارا وە باش، هوون هه‌مى لایەك بخێر بێن..
بخێرهاتنهكا تایبه‌ت ل وان مێهڤانێن هێژا دكه‌م یێن كو ژ گه‌له‌ك وهلاتێن جیهانێ هاتى و به‌شدارى ڤێ ڤیستیڤالێ بووى. به‌شداریا وان دڤێ ڕووداوا هونه‌رى و ڕه‌وشه‌نبیریدا، ئه‌ڤرۆ بۆ مه ل هه‌رێما كوردستانێ گەلەك مه‌عنا هەیە!.
به‌شداریا وان، به‌رى كو به‌شدارییه‌كا هونه‌رى بیت، پشته‌ڤانییه‌كا مه‌عنه‌ویا مه‌زنه بۆ خه‌لكێ كوردستانێ، كو ئه‌ڤرۆ د مه‌زنترین به‌رۆكا شه‌ڕێ دژى تیرۆرێدا ل هه‌مبه‌رى هێزێن تاریێ ڕاوه‌ستایه و، به‌ڕه‌ڤانیێ ل باوه‌ڕى و پره‌نسیپێن مرۆڤانه و جیهانا شارستانى دكه‌ت.
هاتنا وان بتایبهتى بۆ باژێڕێ دهۆكێ و ده‌ڤه‌را به‌هدینا، دیسا پشتگیرییه‌كا مه‌زنه بۆ خه‌لكێ ده‌ڤه‌رێ، خه‌لكێ دهۆكێ، زاخۆ، ئاكرێ، ئامێدیێ و هه‌مى جهێن دى یێن پارێزگه‌ها دهۆكێ، كو پترى ساڵه‌كێیه گه‌له‌ك ب دلگه‌رمى، مرۆڤدۆستانه و ب مێهڤاپه‌روه‌رى، پێشوازیا نێزیكى ملیۆنه‌ك و حەفسەد هەتا هەشتسەد هزار ئاواره و په‌نابه‌را كریه ل دهۆكێ. بێ جوداهى پێشوازى ل ئاواره‌و په‌نابه‌رێن ژ هه‌مى دین و مه‌زهه‌ب و نه‌ته‌وه‌یێن جدا كریه.
جوامێرانه ده‌رگه‌هێن ده‌ڤه‌ر و گوند و باژێڕێن خۆ، بۆ خوشك و برایێن خۆ یێن مه‌سیحى، ئێزدى و موسلمان، سوننه و شیعى، كاكه‌یى و سابیئه، بۆ عه‌ره‌ب، توركمان، كلد و ئاشوورى و سریان و بۆ كوردا ل هه‌رێما كوردستانێ، ل عیراقێ و سووریا ڤه‌كرینه.
پشتگیرى و پێزانینه‌كا مه‌زنه بۆ خه‌لكێ ڤێ ده‌ڤه‌رێ كو به‌رى ساله‌كێ ده‌رگه‌هێن قوتابخانه و فێرگه‌هێن خۆ بۆ ئاواره و په‌نابه‌را ڤه‌كرن و زارۆكێن وان بۆ ده‌مه‌كێ نه‌یێ كێم ژ خویندنێ بێبه‌ش بوون، داكو هاریكاریا ڤى خه‌لكێ به‌له‌نگاز بكه‌ن. ئه‌ڤه‌ژى نیشانه‌كێ دیار و به‌رچاڤێ ژیاندۆستى و مرۆڤدۆستیا خه‌لكێ مه‌یه ل كوردستانێ و ل دەڤەرا بەهدینان.
هه‌ر ب ڤێ هه‌لكه‌فتنێ، جارهكا دى سپاسیا خه‌لكێ پارێزگه‌ها دهۆكێ بتایبهتى و خه‌لكێ كوردستانێ بگشتى دكه‌م، بۆ ڤێ جوامێرى و مرۆڤپه‌روه‌ریا وان. هاتنا مێهڤانێن مه‌یێن بیانى، بۆ باژێڕێ دهۆكا خۆشتڤى، بۆ خه‌لكێ كوردستانێ بگشتى، هه‌م پشتگیرییه، هه‌م ژى گه‌له‌ك جهێ خۆشحالى و شانازییێ یه. هون جارهكا دى بخێر هاتن، هیڤیدارم ده‌مه‌كێ خۆش و پر مفا ل كوردستانێ ده‌رباز بكه‌ن، هه‌روهسا ده‌ما كو ڤه‌دگه‌رنه‌ڤه وهلاتێن خۆ، ببنه ده‌نگ و بالیۆزێن هەرێما كوردستانێ. هەمی بخێربێن، سەرچاڤا بێن.
بخێرهاتنەكا گەرم یا قونسڵێت بیانی ئەڤێت ل كوردستانێ و ل هەڤلێرێ نە و ئەڤرۆ بەشدارن دگەل مە د ڤێ مەراسیمێدا، بخێرهاتنەكا تایبەتیا وان ژی دكەم، بخێربێن.
هێژایان..
گه‌لێ كوردستانێ، گه‌له‌كێ ژیاندۆست و مرۆڤدۆسته، ب درێژیا دیرۆكا خۆ، دگه‌ل وێ هه‌مى سته‌م و زۆرداریا لێ هاتیه‌كرن، د ڕۆژێن هه‌رى ته‌نگدا ژى، چه‌ندى كو ده‌لیڤه هه‌بووبیت، ئه‌ڤ سیمایێ خۆ یێ ژیاندۆستى و مرۆڤدۆستیێ یێ پاراستى. دگه‌ل هه‌مى نه‌خۆشى و ده‌رده‌سه‌ریا، حه‌ز و عشقا خۆ بۆ ژیانێ و بۆ بنه‌ما و بنگهه‌ێن ژیانا مۆدێرن و پێشكه‌فتى، وندا نه‌كرینه.
ئه‌گه‌ر نه‌چار مابیت ب دهسته‌كى چه‌كى هه‌لگریت داكو خۆ بپارێزێت، به‌رده‌وام ژى ب ده‌ستێ دى، داهێنان و ئافراندنا كرى و هه‌ولێن به‌رده‌وام داینه كو ژ جیهانا پێشكه‌فتى، ژ جیهانا ئه‌ده‌بیاتا، ژ جیهانا هونه‌رێ و وهرزشێ و هه‌مى وارێن دى یێن ژیانا شارستانى پاش نه‌كه‌ڤیت. سالێن دویر و درێژێن تێكۆشینا گه‌لێ مه، ل هه‌مى پارچه‌یێن كوردستانێ، گه‌له‌ك ناڤێن دیار و به‌رچاڤ دڤان وارێن هونه‌رى و ڕه‌وشه‌نبیریدا، ده‌رخستینە كو جهێ شانازیا گەلێ مە نە ل هەر جهەكێ بن.
ل هه‌رێما كوردستانێ كو گه‌لێ مه د هه‌مى وارادا شانسه‌كێ مه‌زنتر ژ به‌شێن دى یێن كوردستانێ بدهستڤه‌هات، ب پشتگیریا حكوومهتا هه‌رێما كوردستانێ د گه‌له‌ك وارێن هونه‌رى، ڕه‌وشه‌نبیرى، وه‌رزشى، ئه‌ده‌بى و چه‌ندین وارێن دیدا، هه‌ول دان و به‌رده‌وام ژى هه‌ول دده‌ت كو پێشڤه‌بچیت و ببیته‌خودانێ به‌رهه‌مێن د ئاستا به‌رهه‌مێن جیهانێدا.
سینه‌ما كو یه‌ك ژ هونه‌رێن هه‌رى بلند و گرنگه و كاریگه‌ریا وێ گه‌له‌كا مه‌زنه، یه‌ك ژ وان هونه‌رێن جیهانا پێشكه‌فتییه كو مخابن ژ دیرۆكا ده‌ركه‌فتنا وێ و هه‌تا نها، ژبه‌ر ڕه‌وشا كوردستانێ و دیرۆكا كو ملله‌ت و وه‌لاتێ مه تێڕا ده‌رباز بووى، شانسه‌كێ زێده بۆ ڤێ هونه‌رێ ل كوردستانێ چێ نه‌بوویه.
دگه‌ل ڤێ چه‌ندێ ژى، هه‌ر ژ ده‌ستپێكا ئاڤابوونا حكوومهتا هه‌رێما كوردستانێ و ل دویڤ شیانێن كو هه‌بووینه، حكوومه‌تێ هه‌ول دایه گرنگیێ بده‌ته ڤێ هونه‌را مه‌زن و پشتگیریا كارێن سینه‌مایى بكه‌ت، چ وه‌كى چێكرنا فیلمێن سینه‌مایى، یان ژى سازكرنا چالاكى یێن سینه‌مایى یێن وه‌كى ڤێ ڤیستیڤالێ.
ئه‌م دزانین د ڤى واریدا ل هەمی كوردستانێ هه‌ولێن پێشخستنا سینه‌مایێ هه‌بووینه و به‌رده‌وام ژى هه‌نه، ڤێجا چ ژ لایێ ده‌زگه‌هێن حكوومه‌تێڤه بیت، یان ژى ژ لایێ هونه‌رمه‌ند و سینه‌ماكارێن كوردستانێڤه بیت، لێ به‌لێ ئه‌م دزانین ژى كو ئه‌ڤ هه‌وله وه‌كى پێویستن نینه، نه ژبه‌ر كو ئه‌م وه‌كى ملله‌ت و وه‌كى حكوومه‌ت ژى، بها و گرنگییا ڤێ هونه‌رێ نزانین، نه‌خێر، لێ ژبه‌ر گه‌له‌ك ئه‌گه‌رێن دى كو مخابن نه د ده‌ستێ مه‌دا بوونە.
ئاشكرایه ب درێژیا ته‌مه‌نێ حكوومهتا هەرێمێ، به‌رده‌وام ڕه‌وشێن وسا هه‌بووینه كو چاڤێ مه‌یێ ل ئه‌وله‌ویاتێن دى بووى. مخابن ب درێژیا ڤان سالا، به‌رده‌وام ڕه‌وش و كاودانێن نه‌هاریكار و ل ده‌رڤه‌ى ئیرادا مه هاتینه ڕێكا مه‌و، مەجالێ پشتگیریا سینەمایێ ل كوردستانێ وەكی پێویست نەبوویە.
لێ به‌لێ دگه‌ل ڤێ چه‌ندێ ژى، كێم ـ زێده و، ل دویڤ شیانێن كو هه‌بووینه، حكوومه‌تێ پشتگیریا سینه‌مایێ و به‌رهه‌مێن سینه‌مایى یێن كوردستانێ كریه و هه‌ول دایه كو د ڤى واریدا خزمه‌ته‌كێ بكه‌ت. بۆ ڤێ یه‌كێ ژى گه‌له‌ك هونه‌رمه‌ند و سینه‌ماكارێن كوردستانێ شاهدن.
هه‌روسا فیلم و به‌رهه‌مێن سینه‌مایى یێن هژماره‌كا وان سینه‌ماكاران ژى، كو به‌شداریا چه‌ندین ڤیستیڤالێن جیهانى كرینه و چه‌ندین خه‌لاتێن به‌رچاڤ ژى بده‌ستڤه ئیناینه، شاهد و به‌لگه‌یێن ڤێ پشتگیریا حكوومهتا هه‌رێما كوردستانێنه. هه‌لبه‌ت، پشتگیریا كو هاتیه‌كرن و به‌رهه‌مێن كو هاتینه چێكرن ژى، نه‌ل دویڤ تمووحا مه‌نه و ئه‌م دزانین بۆ كارێن باشتر و سه‌ركه‌فتیتر، هاریكارى و پشتگیرى یێن مه‌زنتر پێویستن ژبۆ بوارێ سینەمایێ ل هەرێما كوردستانێ.
زێده‌ڕۆیى نیه ئه‌گه‌ر بێژین سینه‌ما هونه‌را هه‌رى كاریگه‌را جیهانێ یه. كاریگه‌ریا كو سینه‌مایێ كریه و دكه‌ت، ژ كاریگه‌ریا هه‌موو هونه‌رێن دى زێده‌تره. ڕۆلا كو سینه‌ما دبینیت، ژ ڕۆلا هه‌مى هونه‌رێن دى مه‌زنتره. ب درێژیا دیرۆكا خۆ، هیچ هونهره‌ك هندى سینه‌مایێ، نه‌بوویه ده‌ربڕا ڕاسته‌قینه‌یا ژیانێ. ده‌ربڕا ڕاسته‌قینه‌یا خه‌م و ده‌رد و ژانێن مرۆڤاتیێ. ده‌ربڕا خه‌ون و خۆزى و، هیڤى و ئومێدێن مرۆڤان.. په‌ردێ سینه‌مایێ ڕۆنترین ئاوێنه‌یا ژیانا مللەتەكێ یە.
سینه‌مایێ گه‌له‌ك ڕووداو و سه‌رپێه‌اتى یێن جیهانێ و جڤاكا مرۆڤاتیێ، ده‌ق و ده‌ق وه‌كى خۆ ڤه‌گوهاستینه و دوكیوومێنت كرینه. زولم و زۆر و ده‌رده‌سهرى یێن گه‌له‌ك ملله‌تان تۆمار كرینه و ده‌نگێ گه‌له‌ك بێده‌نگكرییان، گه‌هاندیه جیهانێ. دیرۆك و سه‌رهاتى یێن گه‌ل و وه‌لاتێ مه، مادده‌یێن هه‌رى باش و بهاگرانن بۆ هونەرا سینەمایی. ئه‌گه‌ر وه‌كى گه‌له‌ك ملله‌تێن جیهانێ، شانسێ گه‌لێ كوردستانێ ژى هه‌با و ڕه‌وشا وى هاریكار با، نهۆ ب سه‌دان و ب هزاران سه‌رهاتى و چیرۆكێن مه، دا بنه بابه‌تێن سه‌دان شاكارێن سینه‌مایى ل سەرتاسەرێ جیهانێ.
هه‌ر ژ سه‌رهلدان و شۆڕهشێن كه‌ڤنێن كوردستانێ بگره، هه‌تا دگه‌هیته ئۆپه‌راسیۆنێن ڕه‌شێن ئه‌نفالا، داستان و قه‌هره‌مانى یێن پێشمه‌رگا، كۆچبه‌رى و ئاواره‌بوونێ، چیرۆكێن ئه‌ڤین و حه‌زكرنێ، هه‌تا دگه‌هیته ئه‌ڤرۆ و فه‌رمانا كو هاتیه سه‌رێ كه‌سوكارێن مه‌یێن ئێزدى. چیرۆكا ب ئێش و ژانا هه‌ر خوشكه‌كا مه‌یا ئێزدى كو هاتیه ڕه‌ڤاندن، سه‌رپێهاتیا ئالانێ جوانه‌مه‌رگ، ئه‌ڤانه و ب هزارا چیرۆكێن دى ژى، بابه‌تێن گه‌له‌ك شاكارێن سینه‌مایى یێن مه‌زنن.
چیرۆكا ئالانێ سێ سالى، كو وه‌كى فریشته‌كێ نڤستى ل سه‌ر لێڤا ده‌ریایه‌كا بێ ڕه‌حم ڕازا بوو. دیمه‌نه‌ك بوو كو چ جارا ژبیرا مه ناچیت. دیمه‌نه‌ك بوو كو د له‌حزه‌یهكێدا هه‌مى ئه‌و زولم و سته‌م و كاره‌ساتێن هاتینه سه‌رێ گه‌لێ كوردستانێ و مرۆڤاتیێ، ئینانه بیرا مه. دیمه‌نه‌ك بوو كو دبێژته مه، شه‌ڕ تشته‌كێ چه‌ندێ نەخۆشە و، جیهانێ و مرۆڤاه‌یێ، چه‌ند پێویستیا ب ئاشتیێ هه‌ى؟!. بێگومان بتنێ كامێرا و چاڤێ سینه‌مایێ دێ شێت ڤان هه‌مى ده‌ربڕینا، د دیمه‌نه‌كێ وه‌ك یێ ئالانێ جوانه‌مه‌رگدا نیشا جیهانێ بده‌ت.
ئاماده‌بوویێن بەڕێز..
به‌رده‌وامیا ڤێ ڤیستیڤالێ ل دهۆكێ د ڕه‌وشا ئه‌ڤرۆیا كوردستانێدا كو گه‌له‌ك كێشه و قه‌یرانێن سیاسى، ئابوورى و دارایى هه‌نه و، شه‌ڕه‌كێ گران ب سه‌ر گه‌ل و وه‌لاتێ مه‌دا هاتیه سه‌پاندن، جهێ خۆشحالییه‌كا مه‌زنه. هه‌روسا نیشان و به‌لگه‌یه‌كا دیاره كو گه‌لێ كوردستانێ، گه‌له‌كێ زندییه و دگه‌ل هه‌مى زه‌حمه‌تیا ژى، ده‌ستێ وى ژ پێشكه‌فتنێ و، ژ عه‌شقا وى یا بۆ ژیانێ به‌رنابن و دێ هەر بەردەوام بیت.
هیڤیا سه‌ركه‌فتنێ بۆ سێیه‌مین ڤیستیڤالا ناڤنه‌ته‌وه‌یى یا فیلمان ل دهۆكێ دخوازم، ده‌ستخۆشیێ ل هه‌وهدكه‌م، هیڤیدارم كو ڕه‌وش و كاودانێن باشتر بێنه پێش و ئه‌م ژى چ وه‌ك حكوومهتا هه‌رێما كوردستانێ، چ ژى كه‌رتێ تایبه‌ت بشێین باشتر گرنگییەكا زێدەتر ب بوارێ سینەمایێ ل هەرێما كوردستانێ بدەین.
دیسا جهێ خۆیە ئەز دەستخۆشییەكا تایبەت ل ڕێڤەبەریا ڕەوشەنبیری یا دهۆكێ كاك ئەیوب و هەڤالێت وی بكەم بۆ ڤێ ڕێوڕەسمێ و هەروەها سوپاسیا پشتگیری یا پارێزگارێ دهۆكێ بكەین بۆ ڤێ ڤیستیڤالێ و سوپاسیا جەنابێ وەزیرێ ڕەوشەنبیری بكەین كو پشتیڤان و هاریكار بوویە.
دیسا ئەز جارەكا دی بخێرهاتنا وە هەمیا دكەم و هیڤیا سەركەفتنێ بۆ ڤیستیڤالا وە دخوازم.
بخێربێن سەرچاڤا و سەر سەرا، زۆر سوپاس.
به‌رپرسه‌كێ دهۆكێ ل هه‌ولێرێ خوه كوشت
ئه‌ڤرۆ نیۆز، قائید میرۆ
رێڤه‌به‌رێ دادگه‌ها سه‌ربازیا هه‌رێما كوردستانێ ل باره‌گایێ فه‌رمانده‌یا له‌شكرێ كوردستانێ ب چه‌كێ ده‌مانچێ دوماهی ب ژیانا خوه ئینان و خوه كوشت.
ژێده‌ره‌كێ به‌رپرس ل وه‌زاره‌تا پێشمه‌رگه‌ی ب ئه‌ڤرۆ نیۆز راگه‌هاند” دوهی ل باره‌گایێ فه‌رمانده‌یا له‌شكرێ كوردستان حاكم غازی ئه‌تروشی رێڤه‌به‌رێ به‌رێ یێ دادگه‌ها سه‌ربازیا هه‌رێمێ ب ئه‌گه‌رێ نه‌دیار خوه كوشتیه و گیانێ خوه ژده‌ستدایه.
ژێده‌ری كو نه‌ڤیا ناڤێ وی بهێته ئاشكراكرن گۆتژی” غازی ئه‌تروشی بۆ ده‌مێ چه‌ندین سالا رێڤه‌به‌رێ گشتیێ دادگه‌ها سه‌ربازیا هه‌رێمێ بوویه و به‌ری دو سالان ب پله‌یا فه‌ریق هاتیه خانه‌نشینكرن، به‌لێ ژۆره‌ك ل فه‌رمانده‌یا له‌شكرێ كوردستان هه‌بوو جار جار سه‌ره‌دانا ئه‌ڤی جهێ خوه دكر، مخابن دوهی دده‌مێ ده‌وامێ ب چه‌كێ ده‌مانجێ خوه كوشتیه.
لدۆر ئه‌گه‌رێن خوه كوشتنێ ژی دیاركر، چو زانیاریێن دروست لدۆر خوه كوشتنا غازی ئه‌تروشی نینه، به‌لێ نه‌ساخیا شه‌كرێ هه‌بوو نه‌خۆشیا ناڤهاتی ژی زۆرا دژواربوو له‌وڕا مه گومان هه‌یه ب ئه‌گه‌رێ دژواریا نه‌خۆشیێ خوه كوشتبیت.
عەبادی هندەک بریارێن گرنگ دەرکرن
ئەڤرۆ نیوز،زنار تۆڤی:
ئەڤرۆ رۆژا سێشەمبی سەرۆک وەزیرێن عێراقێ حەیدەر عەبادی چەند بریارەکێن گرنگ دەرکرن و ژوان 123 بریکار و رێڤەبەرێن گشتی ژ کار لادان و دیارکر: جێگرێن رێڤەبەرێن گشتی یان رێڤەبەرێن پێشکەفتی یێن بەشان دێ کاروبارێن فەرمانگەها برێڤەبەن هەتاکو رێڤەبەرێن گشتی دهێنە دانان.
عەبادی خویاکر ژی: نوکە لیژنێن تایبەتمەند دێ بەردەوام پێداجوونا پەیکەرێن وەزارەتان و ئاستێ کارێ وان کەن.
باژێرڤانێ باژێرێ نه‌شڤیل یێ ئه‌مریكی: كوردان جڤاكێ مه پێشئێخستییه
ئه‌ڤرۆ نیوز: ڤه‌ده‌ر ره‌شاڤایی:
كارل دین باژێرڤانێ باژێرێ نه‌شڤیل ل ویلایه‌تا تێنسی یا ئه‌مریكی دبێژیت “د ده‌هان سالێن بۆری دا پتری 13 هزار په‌نابه‌رێن كورد ل باژێرێ نه‌شڤی ئاكنجی بووینه، ئه‌ڤ یه‌كه ژی بۆ باژێرێ مه یا باش بوویه و جڤاكا مه زه‌نگین كرییه. ”
ناڤهاتی دیاركر كو گه‌له‌ك ژ كوردان ل باژێرێن دی یێن ئه‌مریكا دژیان لێ پشتی ژ ئالیێ كوردێن نه‌شڤیل ڤه تشتێن باش بهیسیتی به‌ره‌ڤ ناشڤیل ڤه هاتن و ل وی باژێری ئاكنجی بووینه، كورد خه‌لكه‌كێ رێنجبه‌ره و خه‌ونێن خوه لگه‌ل خوه دئینن و ل ئه‌مریكا بجهـ دئینن.
دین ئه‌ڤ داخویانییه د كونفرانسه‌كی دا ل دۆر كۆچبه‌ران ل پارێزگه‌ها نیو برونسویك ل كه‌نه‌دا گۆتن كو نها پێشبینییا پێله‌كا نوو یا په‌نابه‌ران دكه‌ت، شیره‌ت ل كه‌نه‌دا كرن كو كار ل گه‌ل رێكخراوێن نه‌حكومی بكه‌ت بۆ سه‌ره‌ده‌ریكرن ل گه‌ل كۆچبه‌رێن نوو، و چاوانییا رێڤه‌چوونا ژیانێ ل وی باژێری فێری كۆچبه‌رێن نووهاتی بكه‌ن.
تێ زانین د چه‌ندین قوناغان دا ل سالێن داویێ یێن هه‌شتێیان و ل سالێن نوتا دا بهزاران كورد كۆچبه‌ری ئه‌مریكا ببوون و پرانيا وان ل باژێرێ نه‌شڤیل ئاكنجی بووینه و بووینه وه‌لاتیێن ئه‌مریكی.
ل زانکۆیا دھۆک ڕاگرێن يازده کۆلیژان ب وەکالەت ھاتنە دانان
ئەڤرۆ، رەمەزان رێکانی:
پشتی ل حەفتیا بۆری فەرمانا لێبۆرینا چەند راگران ل زانکۆیا دھۆک ھاتیە دان، ھەروەسا پشتی سیستەمێ فاکۆلتیان ژی بوویە کۆلیژ و چەندین کۆلیژێن نوو ھاتینە دانان، پۆستێن ١١ راگرێن کۆلیژان ڤالا مان، سەرۆکاتیا زانکۆیێ ژی ئەو پۆست ب وەکالەت پڕکرن ھەتا یێن بەردەوام دەست ب کار بن.
زانکۆیا دھۆک پشت بەستن ب فەرمانا وەزاری یا وەزارەتا خواندنا بلند و ڤەکۆلینێن زانستی یا ھژمار ١١٥٣ ل رۆژا ٢-٩-٣٠١٥ و ل دووڤ دەستھەلاتداریێن سەرۆکاتیا زانکۆیا دھۆک بڕیار ھاتە دان ل سەر پێرابوونا ڤان کەسێن ناڤونیشانێن وان رێز کری ب کارێ دیارکری بەرامبەر ناڤێن وان ب (وەکالەت) ھەر ژ رۆژا ٣-٩-٢٠١٥ ژ بۆ ب رێڤەبرنا کاری ل زانکۆیێ ھەتا دەستنیشانکرنا بەرپرسێن بەردەوام بۆ پۆستێن دیارکری.
١ـ د. محەمەد ئەمین یاسین، راگرێ کۆلیژا چاندنێ.
٢ـ د. سوزان حسێن عیسا، راگرا کۆلیژا پزیشکی.
٣ـ د. ھشیار محەمەد سالح حسێن، راگرێ کۆلیژا دەرمانسازی.
٤ـ د. ئیسماعیل محەمەد عەبدولقھار، راگرێ کۆلیژا زانستێن تەندروستی.
٥ـ د. موئەیەد ئەغالی میرزا، راگرێ کۆلیژا پەرستاری.
٦ـ د. ئالان جەمیل ئیبراھیم، راگرێ کۆلیژا پەروەردا بنیات.
٧ـ پ. د. مسلح محەم د سەعید دھۆکی (سەرۆکێ زانکۆیێ)، راگرێ کۆلیژا پەروەردا وەرزشی.
٨ـ د. مزگین محەمەد حەسەن، راگرێ کۆلیژا زانستێن مرۆڤایەتی.
٩ـ د. سدقی عومەر یوسف، راگرێ کۆلیژا زانست.
١٠ـ د. عەلی میکائیل عەلی، راگرێ کۆلیژا ڤێتێرنەری.
١١ـ د. بھار جەعفەر حاجی، راگرێ کۆلیژا پزیشکی ددان.
زێدەباری پۆستێن ١١ راگران ھەروەسا د. جەمال عەلی حسێن، رێڤەبەرێ کارگێری و خۆیەتی دێ ب وەکالەت پۆستێ ھاریکارێ سەرۆکێ زانکۆیێ بۆ کاروبارێن کارگێری و دارایی وەرگریت، ھەتا ھاریکارێ بەردەوام دەست ب کار دبیت.
ئەڤ پۆستێن ڤالا ماین مامۆستایێن زانکۆیێ ل دووڤ سیستەمێ وەزارەتا خواندنا بلند ل ھەرێمێ و ل دووڤ ھندەک مەرج و رێنمایان ب رێیا (CV) پێشکێش کرینە و ناڤ ژ وەزارەتا خواندنا بلند چووینە جڤاتا وەزیران، بەلێ ھەتا نوکە نەھاتینە راگەھاندن، ھەتا ئەو ناڤ دھێنە راگەھاندن یێن ب وەکالەت دێ د وان پۆستان دا بن.
ژوورا ئوپەراسیونا رزگارکرنا مووسل ھاتە پێکئینان
ئه‌ڤرۆ نيوز:
سەرۆکێ کوتلا برایەتی و پێکڤە ژیانێ ل جڤاتا پارێزگەھا نەینەوا بۆ ئەڤرۆ دیار کر کو ژوورا ئوپەراسیونا رزگارکرنا پارێزگەھا نەینەوا ژ دەستێن رێکخراوا تیرۆرستیا داعش د ناڤبەرا حوکمەتا ھەرێما کوردستانی و عیراقێ و ھەڤپەیمانان دا ھاتە پێکئینان و دەمژمێر سفر بۆ رزگارکرنا مووسل ھاتە دانان.
سەیدو چەتو، سەرۆکێ کوتلا برایەتی و پێکڤە ژیانێ ل جڤاتا پارێزگەھا نەینەوا ئاشکرا کر، ل دووڤ وێ ژوورا ھاتیە دروستکرن ھێزێن پێشمەرگێ کوردستانێ دێ پێشکداریێ د ئازادکرنا پارێزگەھا نەینەوا دا کەن و گۆت: “ھەر دەمێ مووسل ھاتە رزگارکرنا ریکخراوا تیرۆرستی یا داعش دێ ل عیراقێ ھێتە ژناڤبرن و دەمژمێر سفر ژی یا ھاتیە دانان، بەلێ ھەتا نوکە چو دەمێن دروست دیارنینن ژ بەر ڤێ چەندێ ئەم دخوازین لەز د رزگارکرنا پارێزگەھا نەینەوا دا بھێتە کرن، چونکی رۆژانە خەلکێ مووسل ژ لایێ تیرۆرستێن داعش ڤە تووشی ئەشکەنجەدان و کوشتنێ دبن”.
ناڤھاتی خویا ژی کر، ھیشتا پۆستێ پارێزگەرێ نەینەوا ئێکلا نەبوویە، چونکی ھەتا دادگەھا ئیداری بڕیارا خوە نەدەت ئەو نەشێن دەرگەھێ خوە بەربژێرکرنێ ڤەکەن، بەلێ پشتی دادگەە مان و نەمانا پارێزگەرێ نەینەوا ئێکلا دکەت دێ بۆ د دەمێ ١٥ رۆژان دا دەرگەھێ خوە بەربژێرکرنێ ھێتە ڤەکرن و گۆت: “ئەم حەز دکەین ب زووترین دەم مان و نەمانا پاریزگەرێ نەینەوا بھێتە ئێکلاکرن بەری پارێزگەھا نەینەوا بھێتە رزگارکرنا، چونکی ل دەمێ پارێزگەھا ناڤبری رزگار دبیت دا خەلک ڤەگەرنە سەر مال و مولکێن خوە و دا بشێن خزمەتا خەلکێ خوە بکەین و پرۆژێن خزمەتگوزاری بۆ ھەموو قەزا و ناحیا دابین بکەین”.
پەرلەمانتارک: مالکی و نجێفی و عەلاوی د پۆستێن خوەدا یێن ماین
ئەڤرۆ نيوز:
ئەندامەکێ پەرلەمانێ عیراقێ راگەھاند، ژ مەھا تەباخا بۆری بریارا جڤاتا وەزیرێن عیراقێ یا تایبەت ب کێمکرنا مووچێن ھەرسێ سەرۆکاتیان ب رێژا ٥٠% و وەزیر و پەرلەمانتاران ب رێژا ٤٥% یا ھاتیە بجھئینان، ئاشکراکر ژی کو ھەتا نوکە سەرۆک کۆماری فەرمانا لادانا ھەرسێ جێگرێن خوە ئیمزا نەکریە.
مەسعود حەیدەر ئەندامێ پەرلەمانێ عیراقێ ژ لیستا گۆڕان دیارکر” فەرمانا ھەلوەشاندنا پۆستێن جێگرێن سەرۆک کۆماری چەندین بۆچوونێن دستووری ب خوەڤە دگریت و ل دووڤ دستوورێ پێدڤیە جێگرێن سەرۆک کۆماری دەست ژ کارکێشانا خوە پێشکێشێ سەرۆک کۆماری بکەن ھەتاکو دەنگدان ل سەر بھێتە کرن ل پەرلەمانێ عیراقێ” دیار کر ژی ” ژ دەستھەلاتێن سەرۆک وەزیران نینە سەرپێچیا دستووری بکەت”.
مەسعودی گوت ژی” ھەتا نوکە جێگرێن سەرۆک کۆماری د پۆستێن خوەدا یێن ماین و سەرۆک کۆماری ژی چو داخوازیێن دەست ژ کارکێشانا وان پێشکێشی پەرلەمانێ عیراقێ نەکریە”.
ئاماژە دا وێ چەندێ ژی کو ” ئەوا ل سەر پەرلەمانی و وەزیران دھێتە بجھئینان ل سەر سەرۆکاتیا کۆماری ژی دھێتە بجھئینان”.
قادر سەعید ئەندامێ کورد د پەرلەمانێ عیراقێ دا راگەھاند” پێدڤیە ھەموو بەرپرسێن عیراقێ بریارێن چاکسازیێ بجھبینن و ل پەرلەمانێ عیراقێ و ل جڤاتا وەزیران ژی راستڤەکرن ل سەر مووچێن وان ھاتنە کرن، لێ ئەم د مەندەھوشین ژ نەبجھئینانا بریارێن چاکسازیێ ژ لایێ سەرۆکێ کۆماری و جێگرێن وی ڤە”.
ل دەستپێکا مەھا تەباخا ٢٠١٥ ێ، حەیدەر عەبادی سەرۆک وەزیرێن عیراقێ د چارچۆڤێ زنجیرە چاکسازیێن حوکمەتا عیراقێ راگەھاندین ژ ئەگەرێ خوەنیشادانێن جەماوەری ل بەغدا و چەندین پارێزگەھێن دی دژی گەندەلیێ، پۆستێن جێگرێن سەرۆک کۆماری و جێگرێن سەرۆک وەزیران ھەلوەشاندبوون.
دلشاد شەعبان: بۆ من نەخوەشە ل گەل تیرۆرستەکی ل پەرلەمانی روونم
ئەڤرۆ نیوز:
ئەندامەکێ پەرلەمانێ کوردستانێ ژ فراکسیۆنا پارتی دیموکراتی کوردستان راگەھاند، سۆران عومەر تیرۆرستە و من بەلگە ژی یێن ھەین و دێ ڤێ چەندێ ل دادگەھێ سەلمینم و دبێژیت، بۆ من وەکو کورێ شەھیدی نەخوەشە ل گەل کەسەکێ تیرۆرست ب روونم.
پشتی نڤیسەر و رۆژنامەنڤیس (سەرۆ قادر) د بەرنامەکێ تەلەڤزیونی دا بەحس کری کو گەنج ژبەر وێ چەندێ مشەختێ دەرڤە دبیت چونکی مە فەرھەنگەکا ھەی کو قەبوول دکەت سەربڕ و قاتل سەرۆکێ مافێ مروڤی بیت، ل دووڤ چەندین پێزانینێن رۆژنامەڤانی ژی (سۆران عومەر) پەرلەمانتارێ کۆمەلا ئیسلامی ل پەرلەمانێ کوردستانێ و سەرۆکێ لژنا مافێن مروڤی یا پەرلەمانی، بریار دایە سکالایێ دژی سەرۆ قادری تۆمار بکەت، ل دۆر ڤێ چەندێ ژی دلشاد شەعبان پەرلەمانتارێ پارتی دبێژیت” من بەلگەیێن ھەین کو سۆران عومەر تیرۆرستە و ل دادگەھێ ژی دێ ڤێ چەندێ سەلمینم، چونکی بۆ من وەکو کورێ شەھیدەکی یا نەخوەشە د ئێک ھۆل دا ل گەل تیرۆرستەکێ روونم”.
دلشاد شەعبانی زێدەتر بۆ مالپەرێ فەرمیێ پارتی دیموکراتی کوردستان گوت” ئەز مژوولی بلندکرنا سکالایەکا قانوونی بووم ل سەر (سۆران عومەر) ژ بەر کو بادەکا تیرۆرێ یا ل سەر ھەی و من بەلگە و دێکیومێنت یێن ل سەر وی ھەین و بۆ من وەکو کورە شەھیدەکی گەلەک یا نەخوەشە د ئێک ھۆل ڤە ل گەل تیرۆرستەکێ روونم، بەلێ ژ بەر کو سەرۆ قادر ئەو بابەتە ل گەنالەکێ راگەھاندنێ دا بەحسکر کو مە فەرھەنگەک یا ھەی قەبوول دکەت سەربڕ و قاتل سەرۆکێ متفێ مرۆڤی بن، وی ژی سکالایا قانوونی یا ل سەر تۆمار کری، لەوما ئەز ب وان بەلگێن ل بەر دەستێ من و ب ھەموو ھێزا خوە پشتەڤانیا سەرۆ قادری دکەم کو ب سەلمینین ئەو کەسە تیرۆرستە”.
دلشادی خویاکر ژی” نابیت ئەو کەسە سەرۆکێ لیژنا مافێن مرۆڤی بیت ل پەرلەمانێ کوردستانێ و ل دادگەھێ ھند بەلگە یێن ل بەر دەستێ مە کو ب سەلمینن (سۆران عومەر) تیرۆرستە”.
یوسف محەمەد سەرۆکێ پەرلەمانێ کوردستانێ ل دۆر ڤێ چەندێ رۆھنکرنەک د پەیچێ خوە ل فیسبووکی بەلاڤکر و تێدا دبێژیت” ب پێدڤی دزانم داواکاری گشتی ب فەرمی ل دووڤ ڤێ پرسێ بچیت و ھەکە بەلگە ھەبیت کو (سۆران عومەر) تیرۆرستە ئەم ژی ل سەرۆکاتیا پەرلەمانی ب چو شێوەکی ڤێ قەبوول ناکەین و ھەکە تیرۆرست نەبیت، بلا ئەو پرسا ب دووماھی بھێت.
نيشاندان
WP Facebook Auto Publish Powered By : XYZScripts.com