ئه‌ڤرۆ نيوز:
ئه‌ڤرۆ ژى كۆمبوونا پێنج لايه‌نێن سياسى ل هه‌رێما كوردستانێ ب دووماهى هات بێى كو ب گه‌هنه چو ئه‌نجامان و ژ به‌ر ڤێ چه‌ندێ ژى بڕياره سوبه‌هى رۆژا ئه‌ينى 21ى ته‌باخا 2015ێ به‌رده‌واميێ بده‌نه كۆمبوونا پێنج قۆلى.
ب گۆره‌يى ئه‌وان پێزانينێن ده‌زگه‌هێن راگه‌هاندنێ به‌لاڤ كرين، سوبه‌هى رۆژا ئه‌ينى رێكه‌فتى 21ى ته‌باخێ دێ هه‌ر پێنج لايه‌نين سياسى به‌رده‌واميێ ده‌نه كۆمبوونا خوه يا پێنج قولى هه‌تا بگه‌هنه رێكه‌فتنه‌كێ ل سه‌ر پرسا سه‌رۆكاتيا هه‌رێما كوردستانێ.
ئه‌ڤرۆ نيوز:
عسمه‌ت ره‌جه‌ب، به‌رپرسێ لقا 14 يا پارتى ديموكراتى كوردستان ل مووسل بۆ ئه‌ڤرۆ نيوز ئاشكه‌را كر كو ئه‌ڤرۆ سپێدێ 20ى ته‌باخا 2015ێ چه‌كدارێن تيرۆرستێن داعش ل پێش چاڤێن فه‌رمانبه‌ران، دو فه‌رمانبه‌رێن زانكۆيا مووسل سێداره دان و پاشان ژى سڤكاتى ب ته‌رمێن وان كرن.
دا زانين ژى كو ل شه‌ڤا بۆرى چه‌كدارێن نه‌نياس هێرش ب رۆمانا كريه سه‌ر زانگه‌هه‌كا چه‌كدارێن تيرۆرستێن داعش، ل تاخێ ميساق ل ناڤ بارێژێ مووسل ل دووڤ دا ترۆمبێله‌كا جۆرێ BMW ب چه‌كدار ڤه هێرش كريه سه‌ر زالگه‌هه‌كێ و سێ چه‌كدارێن داعش يێن پله بلند هاتينه كوشتن.
به‌رپرسێ لقێ پارتى ب گۆره‌يى ئه‌و پێزانينێن ل به‌ر ده‌ستێ وان ئاماژه ب وێ چه‌ندێ ژى كر كو نوكه ناڤا سه‌نته‌رێ مووسل وه‌كو سه‌نگه‌ره‌كێ شه‌رى د ناڤبه‌را چه‌كدارێن داعش و چه‌كدارێن نه‌نياس ڤه لێ هاتيه “ژ به‌ر كو رۆژانه هێرشا دكه‌نه سه‌ر باره‌گا و زالگه‌هێن وان”.
ئه‌ڤرۆ نيوز:
پشتى دوهى شه‌ڤا چارشه‌مبى رێكه‌فتى 19ى ته‌باخا 2015ێ هێرش كريه سه‌ر مه‌لبه‌ندێ پێنج يێ ئێكگرتوويا ئيسلامى كوردستان ل هه‌له‌بچا شه‌هيد، بڕياره ئه‌ڤرۆ مه‌لبه‌ندێ دهۆكێ يێ ئێكگرتوو د خرڤه‌بوونه‌كێ دا، نه‌رازيبوونا خوه ل هه‌مبه‌ر وى كاره ده‌رببڕيت.
ئارام حسێن په‌يامنێرێ كه‌نالێ سپێده ل دهۆكێ كو سه‌ر ب ئێكگرتوويا ئيسلامى كوردستانێ يه، بۆ ئه‌ڤرۆ نيوز گۆت: “بڕياره ئه‌ڤرۆ ل دانێ ئێڤارى ل به‌ر ده‌رگه‌هێ باره‌گايێ مه‌لبه‌ندێ سێ يێ ئێكگرتوويا ئيسلامى كوردستان خرڤه‌بوونه‌ك بهێته ئه‌نجام دان و تێدا نه‌رازيبوونا خوه به‌رامبه‌ر ته‌قه‌كرنا ل باره‌گايێ ئێكگرتوو هاتيه كرن ده‌رببڕن”.
ئارام زێده‌تر گۆت: “هێشتا چو لايه‌نان به‌رپرساتيا خوه ژ وێ بوويه‌رێ نه‌دايه زانين”، ئاماژه ب وێ چه‌ندێ ژى كر كو ئه‌و بۆ ته‌مام نه‌بوونا رێژا قانوونى يا په‌رله‌مانێ كوردستانێ بۆ ب رێڤه‌چوونا روونشتنا په‌رله‌مانى ل دۆر گه‌نگه‌شێ ل سه‌ر قانوونا راستڤه‌كرنا قانوونا سه‌رۆكاتيا هه‌رێمێ ڤه‌دگه‌رينن كو “هنده‌ك لايه‌نان يه‌كگرتوو تۆمه‌تبار دكر ب ڤێ چه‌ندێ”.
پشتى ئه‌و هێرشا كريه سه‌ر باره‌گايێ مه‌لبه‌ندێ ئێكگرتوو كه‌سه‌كى د گرته‌يه‌كا ڤيديۆى دا به‌رپرساتيا خوه ژ وێ بوويه‌رێ دياركر، به‌لێ ئاماژه ب وێ چه‌ندێ نه‌كر كا سه‌ر ب چو لايه‌نێ سياسى يه ب تنێ دا زانين كو ژ به‌ر ئاماده‌نه‌بوونا په‌رله‌مانتارێن وان بوويه ل روونشتنا په‌رله‌مانى و ب خيانه‌ت ل قه‌له‌م دايه.
ئەڤرۆ نیوز، سالار دۆسکی:
مامۆستایەکێ زانستێن سیاسی ل زانکۆیا ێەلاحەدین ئاشکراکر کو ٢٣حزەیرانێ و ١٩ تەباخێ دو روژێن گرنگێن تاقیکرنێ بوون دسیاسەتا کوردستانێ دا.
د.سالح مەلا عومەر پرۆفیسورێ ھاریکار ل زانستێن سیاسی زانکۆیا سەلاحدین دپەیجێ خوە یێ تایبەتێ فێسبووکی دا دیارکریە کو پشتی ھەلبژاتنان تەڤەگەرا گوران دیارکر کو دڤێت بھێتە ناڤ حوکمەتێ وچار سالێن ئارامیێ پەیدا ببن، بەلێ ٢٣ حوزیرانێ خوە دیارکر کو گەلەک یا کاریگەرە ل سەر ئێکەتیێ و کومەل و ئێکگرتوو و فشار ل سەر پارتی دروست کر و سەرکەفت و چەند رۆژان یا بەردەوام بوو.
مامۆستایێ زانکۆیێ ھێشتا گۆت: دیسان ئێکگرتوو بۆ ھێزێن کوردستانێ دیارکر کو وەک لایەنێ سیێ کاریگەر ل سەر ھێزێن کوردستانی ھەیە و دووماھی گۆتن بوو وێ یە و نە بوو گورانە وێ چەندێ کاریگەری ل سەر ھێزبوونا ئێکگرتوو ل نافخوە و دەرڤە کر، پشتی ١٩ تەباخێ دڤێت ھەموو حزب حسابەکێ بۆ ئێکگرتوو بکەن، چونکە ھێزا پارتی بەرامبەر ئێکەتی و گوران و کومەلە و حزبا دشێت گوھۆرینێ دھێزدا بکەت ئێکگرتوویە و دھێتە ھەژمارتن ھێزا سیێ.
ناڤبری ھێشتا گۆت: ب ڤێ چەندێ ئێکگرتوو جھێ گوران گرت وەک ھێزا دوویێ و کاریگەریا خوە ھەیە ل کوردستانێ و دبیت ھەلبژارتنێن داھاتی دا ئێکگرتوو پتر سەنگا خوە قورس بکەت و پتر دەنگان بینت.
ئه‌ڤرۆ نيوز:
ئەڤرۆ رۆژا پێنجشەمبی رێکەفتی 20ى ته‌باخا 2015ێ و ل دەم ژمێر 8:30 سپێدێ ل سەرانسەری ھەرێما کوردستانێ ئەزموونێن گشتی و نیشتیمانی يێن خولا دويێ بۆ سالا خواندنێ 2014-2015 قوناغا 12 ئامادەیی ب ھەمی پشکێن خوه ڤە و پۆلا 9ێ بنەرەتی دەست پێکرن.
ئه‌حمه‌د عه‌بدولا زۆبێر به‌رپرسێ راگه‌هاندنێ ل رێڤه‌به‌ريا گشتيا په‌روه‌ردا پارێزگه‌ها دهۆكێ بۆ ئه‌ڤرۆ نيوز گۆت: “ژ بۆ ژ نێزیک ئاگەھدار بوون ب رەوشا رێڤەچوونا ئەزموونان به‌ھزاد عه‌لی ئادەم جێگرێ پارێزگەرێ دھۆکێ و عه‌بد یوسف ئه‌حمه‌د رێڤەبەرێ گشتی یێ پەروەردا پارێزگەھا دھۆکێ و د گەل دا فه‌خری که‌لش رێڤەبەرێ رێڤەبەریا سەرپەرشتیا پەروەردەیی و دلنیا جوری سەرا چەندێن بنگەھێن ئەزموونان ل سنورێ پەروەردا قەزا دھۆک روژئاڤا دا”.
زێده‌تر گۆت: “دڤان سەرەدانا دا ژ نێزیک ئاگەھداری رەوشا ئەزمووونان ل بنگەھێن ناڤبری بون و داخازا سەرکەفتنێ بو سەرجەم قوتابیان خواست، بنگەھێن سەرەدانا وان ھاتینە کرن ( ئامادەیا سادق بھائه‌دین و لاڤان و ته‌ئاخی) .
44 هزار و 651 قوتابیێن پولا 12 ئامادەی و 9 بنەرەت دێ پشکداریێ ئەزموونێن گشتی و نیشتیمانی خولا دووێ سالا خواندنێ 2014.2015 دا کەن و ل سەر 755 بنگەھان ل سەرانسەری پارێزگەھا دھۆکێ ھاتینە دابەشکرن.
ئەڤرۆ نیۆز: یوسف موسـا:
ل دوو روودانێن جۆدا دا ل زاخۆ دۆ کەسان خوە کۆشت، ئێک ژوان ژنەکا ٢٥ سالی خوە خەندقاند، ھەروە برایێ ھۆنەرمەند عەمار کۆفی یە شڤێدی ب گۆلەیان دۆماھی ب ژیانا خوە ئینا.
رائێدێ مافپەروەر ھێمن سلێمان بەرپرسێ راگەھاندن و پەیوەندیان ل پارێزگەھا دھۆکێ دیارکر روودانا ئێکێ دا ل دۆھی ئێڤاری ژنەک بناڤێ (ح، م، س) دژیێ ٢٥ سالیێ دا ل زاخۆ خوە خەندقاند د ئەنجام دا گیانێ خوە ژ دەست دا.
ھەروەسا رائێدێ مافپەروەر ئاشکرا کر د روودانا دووێ دا عەبدۆللا محەمەد سالح سنێلەیێ دژیێ ١٥ سالان دا ب گۆلەیا دەبانجەیێ ب درەنگی شەڤ شڤێدن دناڤ ترۆمبێلێ دا گۆلە بەردانە لەشێ خوە د ئەنجام دا وی ژی گیانێ خوە ژ دەست دا لدووماھیێ گۆت: دۆسە لدۆر ھەردوو روودانا ھاتینە ڤەکرن بو ئەگەرێن ڤەکۆلین و زانینا ئەگەرێن ھەردوویان.
ئه‌ڤرۆ نيوز:
وه‌زاره‌تا سامانێن سرۆشتى ل حوكمه‌تا هه‌رێما كوردستانێ به‌رسڤا په‌رله‌مانتار عه‌لى حه‌مه سالح دده‌ت و ب كه‌سه‌كێ بێ ئه‌زموون د پێشه‌سازيا په‌ترۆل و غازێ دا ب ناڤ دبه‌ت و دبێژيت: “پۆستێ خوه خربا ب كار دئينيت دا كو ب ده‌نگه‌كێ بلند ره‌خنێ ل سياسه‌تا په‌ترۆل و غازا حوكمه‌تا هه‌رێمێ بگريت”.
د روونكرنه‌كێ دا وه‌زاره‌تا سامانێن سرۆشتى ل حوكمه‌تا هه‌رێما كوردستانێ كو وێنه‌ك ب ده‌ست ئه‌ڤرۆ نيوز كه‌فتيه، تێدا ره‌خنێن دژوار ل عه‌لى حه‌مه سالح په‌رله‌مانتارێ فراكسيۆنا گۆران دگريت ل دۆر فرۆتنا په‌ترۆل و غازێ ب پێشه‌كيا 10 مليار دۆلار و ب گرۆپه‌كێ خودانكار.
وه‌زاره‌تا سامانێن سرۆشتى دبێژيت: “عه‌لى حه‌مه سالح چو ئه‌زموون ل سه‌ر پێشه‌سازيا په‌ترۆل و غازێ نينه، به‌لێ پۆستێ خوه خراب بكار دئينيت و ب ده‌نگه‌كێ بلند ره‌خنێ ل سياسه‌تا په‌ترۆل و غازا هه‌رێما كوردستانێ دگريت”.
دبێژيتژى: “هه‌ر چه‌نده ئه‌و ب (حاسبه) هاتيه ب ناڤكرن، به‌لێ به‌حس ل كۆمه‌كا پێزانينێن نه‌دروست دكه‌ت كو چو ده‌رئه‌نجام لێ ناكه‌ڤن و ئه‌ڤه ژى بزاڤه‌كه بۆ دروستكرنا تێكدانێ ل ده‌ف رايا گشتى د پێناڤى مه‌ره‌مێن سياسى يێن خوه دا”.
ئەڤرۆ نيوز:
ل دووڤ نڤیسارەکا وەزارەتا باژێرڤانی و گەشت و گوزارێ، رێڤەبەرێن ھەردو باژێرڤانیێن دھۆکێ رۆژھەلات و رۆژئاڤا دێ ھێنە گوھۆڕین.
ل دووڤ نڤیسارا ژمارە 10991 یا کو ل 16\8 دەرکەفتی، بەھجەت حسێن عەبدوللا ل شوونا مللەت سالم محەمەد دێ بیتە رێڤەبەرێ باژێرڤانیا رۆژھەلات و مللەت سالم محەمەد ل شوونا جەلال رەشید سولتان دێ بیتە رێڤەبەرێ باژێرڤانیا رۆژئاڤا.
ھەر ل دووڤ ھەمان نڤیسار، جەلال رەشید سولتان ژی دێ بۆ دیوانا سەرۆکاتیا باژێرڤانیا دھۆک ھێتە ڤەگوھاستن و ئەڤ فەرمانە ھەر ژ رۆژا دەرکەفتنێ دێ ھێنە بجە ئینان.
ئەڤرۆ نيوز:
ب سەدەما ھێرشێن سوپایێ تورکیا بۆ سەر باژارێن باکورێ کوردستانێ و بەردەوامیا شەڕێ ناڤبەرا چەکدارێن پەکەکێ و سوپایێ تورکی، ژمارەکا خێزانێن ئاکنجیێن باژارێ شەمزینان ئاوارەی ھەرێما کوردستانێ بوون.
غەفوور ئەحمەد، قائیمقامێ قەزا مێرگەسۆر راگەھاند چونکی ژیانا خەلکێ باژارێ شەمزینان ژ بەر ھێرشێن سوپایێ تورکیا و شەرێ سوپای ل گەل چەکدارێن پەکەکێ کەفتیە د مەترسیێ دا، ب دەھان وەلاتی ل سنوورێ شەمزینان ئاوارە بوون و گەھشتینە باژارکێ مێرگەسۆر و گۆت “ل گۆر ئامارا ھەتا نھا ٣٨ خێزان کو ژمارا وان دبیتە ٢٤١ کەس ھاتینە مێرگەسۆرێ”.
قائیمقامێ قەزا مێرگەسۆر خویا ژی کر ئەو تشتێ ژ وان بھێت دێ بۆ ڤان ئاوارا کەن، لێ چونکی چ کەمپ ل مێرگەسۆرێ نینن، ڕەنگە ل دەستپێکێ ھندەک گرفت دروست ببن و گۆت “لێ زێدەباری وێ ئێکێ ژی مە ئالیێن پەیوەندیدار ھایدار کرینە کو ھەکە ئەڤ ئاوارەبوونە یا بەردەوام بیت پێدڤیە ئەم خوە بەرھەڤ بکەین و جھەکی بۆ ئاواران ڤەکەین، و ھەر ئاوارەکێ بێت ژی دەرگەھێن مە بۆ دڤەکرینە”.
ئەڤرۆ نیوز،زنار تۆڤی:
دەزگەهێن راگەهاندنێ ل وەلاتێ تورکیا دانە دیارکرن کو کۆمسیونا بلند یا هەلبژارتێن تورکیا دادیارکرن کوو ل ئێکی چریا دویێ یا ئەڤ سالە هەلبژارتنێن پێشوەخت ل تورکیا دێ هێنە ئەنجامدان،ئەڤ چەندە هات پشی کو پارتێن سیاسی ل وی وەلاتی نەگەهشتینە رێکەفتنێ ل سەر پێکئیننا حوکمەتا نوو یا وی وەلاتی.
نيشاندان