ھەولێر، قائید میرۆ:
بھێنڤەدانا پەرلەمانێ کوردستانێ ئەڤرۆ ١-٩-٢٠١٥ دێ ب دووماھی ھێت و ئەندامەکا لیژنا دارایی و ئابووری ژی دبێژیت “دگەل دەستپێکرنا روونشتنێن پەرلەمانی دێ وەزیرێ دارایی و ئابووری ل دۆر گیرۆبوونا مووچەی بۆ پەرلەمانی ھێتە گازیکرن”.
د. شیرین حسنی، ئەنداما فڕاکسیۆنا پارتی دیمۆکراتی کوردستان ل پەرلەمانێ کوردستانێ بۆ رۆژناما ئەڤرۆ گۆت “ئەڤرۆ دێ بھێنڤەدانا پەرلەمانی یا وەرزێ ھاڤینێ ب دووماھی ھێت و پەرلەمان دێ دەست ب روونشتنێن خوە یێن ئاسایی کەت، بەلێ ھەتا نوکە بەرنامێ کاری نەھاتیە دارێشتن و پێدڤیە بەری ٤٨ دەمژمێرێن ھەر کۆمبوونەکێ بەرنامێ کاری بھێتە دیارکرن و پەرلەمانتار بھێنە گازیکرن بۆ کۆمبوونێ”.
ئەنداما فڕاکسیۆنا پارتی دیمۆکراتی کوردستان ئاشکرا ژی کر کو دو پڕۆژە قانوونێن زۆر گرنگ چاڤەڕێی دەستپێکرنا کۆمبوونا پەرلەمانی دکەن، ئێک ژ وان پڕۆژە قانوونا پەیڕەوێ ناڤخۆیێ پەرلەمانێ کوردستانێ یە و یێ دی ژی خواندنا دویێ یە بۆ پڕۆژە قانوونا بازرگانیکرن ب ئەندامێن لەشێ مرۆڤی و گۆت “پێشبینی دکەم د ئێکەم کۆمبوون دا بکەڤنە بەرنامێ کاری یێ کۆمبوونا ئێکێ”.
شیرینێ گۆت ژی “ئەڤە ھەیڤا ئیلۆنێ ژی ھات و فەرمانبەرێن حوکمەتێ مووچێ ھەیڤا حەفت وەرنەگرتیە، وەکی دھێتە زانین ژی فرۆتنا پترۆلێ یا بەردەوامە ژلایێ حوکمەتا ھەرێما کوردستانێ ڤە، لەوڕا دگەل دەستپێکرنا کۆمبوونێن پەرلەمانی دێ ب رژدی ل سەر گیرۆبوونا مووچێ فەرمانبەران کار کەین و مە ل بەرە وەکی لیژنا دارایی ل دۆر گیرۆبوونا مووچەی وەزیرێ دارایی و ئابووری گازی بکەینە پەرلەمانی و دوڤچوون بۆ گیرۆبوونا مووچەی بھێتەکرن، بەلێ ھێشتا دیار نینە دێ ھێتە لیژنێ بۆ ڤەکۆلینێ یان روونشتنا پەرلەمانی”.

ئەڤرۆ نیوز:
ژ ئەگەرێ پێنەدانا مافێن وان و زیندانکرنا د ناڤ خانیەکی دا دو کرێکارێن ژن خوە د ئاڤاھیەکێ بلند دا ھاڤێتە خوار و د ئەنجامدا برینداربوون، سەرۆکێ لژنا مافێن مرۆڤی ژی ئاشکرا کر، ھژمارەکا کرێکارێن دی ژ لایێ کۆمپانیا نافھاتی ڤە ھاتینە زیندانیکرن و وەزارەتا ناڤخوە ھاتیە ئاگەھدارکرن.
سۆران عومەر، سەرۆکێ لژنا مافێن مرۆڤی ل پەرلەمانێ کوردستانێ بۆ رۆژناما ئەڤرۆ گۆت:” بەری چەند رۆژان ل تاخێ بەختیاری یێ باژێڕێ ھەولێرێ دو کرێکارێن ژن یێن بیانی ژبەر تەپەسەرکرنا وان ژلایێ خۆدانێ کۆمپانیەکا ئینانا کرێکارێن نافمالیێ خوە ژ ئاڤاھیەکێ بلند دا ھاڤێتیە خوارێٍ و نوکە رەوشا ساخلەمیا وان تێکچوویە و برینداربووینە”.
ناڤھاتی دیار کر، ل دووڤ وێ دووڤچوونا وان کری دیاربوویە کو ھژمارەکا ژنێن دی د ناڤ ئەڤی ئاڤاھیێ بلند ھەنە و ب مەرەما کارکرنێ ژ لایێ کۆمپانیەکا کەرتێ تایبەت ھاتینە ھەرێما کوردستانێ، بەلێ خۆدانێ وێ کۆمپانیێَ مافێ وان کرێکاران نەدایێ و وەکو زیندانی د ناڤ خانیەکی دا ھاتینە دەستەسەرکرن و چو رێ پێنەھاتینە دان بۆ کارکرنێ ژبەر ڤێ چەندێ نەچاربووینە بۆ خوە رزگارکرنێ خوە ل سەر بانێ خانیەکێ بلند ب ھاڤێژنە خوارێ.
ل دووماھیێ سۆرانی دیار کر، کو پشتی پێزانین گەھشتینە وان لژنا مافێن مرۆڤی دووڤچوون بۆ ڤێ روودانێ کر و دیاربوو ئەڤان دو کرێکارێن بیانی خوە ھاڤێتیە خوار و د ئەنجامدا برینداربووینە و نوکە ژ بۆ چارەسەریێ ھاتینە ڤەگۆھاستن بۆ نەخۆشخانێ و گۆت: “ئەڤان کرێکاران ئاشکرا کریە کو زۆری ل چەندین کرێکارێن دی یێن بیانی دھێتە کرن و مافێن وان ناھێنەدان، ژبەر ڤێ چەندێ مە ژی وەزارەتا ناڤخوە ئاگەھدارکریە ب زووترین دەم دووڤچوونێ بۆ ڤی بابەتی بکەت و خۆدانێ کۆمپانیێ بھێتە سزادان و کرێکار بھێنە رزگارکرن”.

ئەڤرۆ نیوز:
ھاریکارێ ئەمیندارێ گشتیێ ئێکگرتوویا ئیسلامی کوردستان مەحەمەد ئەحمەد راگەھاند، ھێشتا چو رۆناھی ناھێتە دیتن لایەنێن سیاسی ل سەر خالەکێ ل دۆر پرسا سەرۆکایەتیا ھەرێما کوردستانێ بگەھنە رێککەفتنێ، ژ بەر کو ھەر چار لایەن درژدن ل سەر ھەلبژارتنا سەرۆکێ ھەرێما کوردستانێ ل پەرلەمانێ و پارتی ژی یا رژدە ریفڕاندۆم بھێتەکرن، ھەکە لایەنێن سیاسی نەگەھشتن چو رێککەفتنان، ئێکگرتوو دێ خوە ژ کۆمبوونێن پێنج قۆلی ڤەکێشیت.
تەیب زرار، کادرێ پێشکەفتیێ پارتی دیموکراتی کوردستان بۆ رۆژناما ئەڤرۆ گۆت” بەردەوامیا ئێکگرتووی ئیسلامی د کۆمبوونێن دا پێنج قۆلی دا ب پێدڤی دزانین، پرسا سەرۆکایەتیا ھەرێمێ رەھەندەکا نیشتیمانی یا ھەی و وەک پارتی دخوازین نەک ئێکگرتوو ، بەلکو ھەموو پارت و لایەن تێدا پشکدارببن، مە پێنەخوەشە ئێکگرتوو خوە ڤەکێشیت ژ دانوستاندنان، چونکی پارتی نەرمی یا دیارکری و بۆ ھەر کۆمبوونەکێ مە پێشنیار و کارتێن نوو ھەبووینە بۆ ھەلبژارتنا سەرۆکێ ھەرێمێ، چ ژلایێ خەلکی ڤە، یان بکەڤیتە ریفڕاندۆمێ، مخابن ھەتا نوکە گۆڕان ل سەر پێشنیارێن خوە یا رژدە وچو نەرمی نەبوویە، ھەکە بھێت و لایەنێن دی نەرمیێ نیشابدەن، دێ گەھینە رێککەفتنێ، ھەکە نەرمی نەھێتەکرن، پێشبینیێ دکەین دانوستانێن بۆ چەند حەفتیێن دی درێژیێ ڤەکێشن، پارتی دلگرانیا خەلکێ کوردستانێ بۆ ڤێ رەوشێ ل بەرچاڤ وەرگرتیە، بەلێ نابیت ئەم ھێزا ئێکێ بین و ھەر تەنازۆلێ بکەین و لایەنێن دی ژی نیڤا مە کۆرسی ھەبن و د بەرھەڤ نەبن تەنازۆلێ بکەن.

بھار مەحموود، جێگرا سەرۆکا لیژنا قانوونی ل پەرلەمانێ کوردستانێ و ئەنداما لیژنا دانوستاندکارا بزاڤا گۆڕان بۆ رۆژناما ئەڤرۆ گۆت” مە باوەری ب دانوستاندنان یا ھەی و دخوازین ھەموو ئاریشە ب ئاشتیانە بھێنە چارەکرن، لەوما ئەم دخوازین دانوستان بەردەوام بن بۆ چارەکرنا ئاریشان، ب دیتنا من ھێشتا دێ دانوستاندنێن لایەنێن سیاسی درێژیێ ڤەکێشن و ھەتا نوکە نەگەھشتینە چو ئەنجامان، ل دوماھی کۆمبوون ل سەر ١٣ خالێن دەستھەلاتێن سەرۆکێ ھەرێما کوردستانێ رێککەفتینە و بۆ چاوانیا ھەلبژارتنا سەرۆکێ ھەرێمێ ژی ھەر چار لایەن درژدن ل سەر پڕۆژەیین خوە کو سەرۆکێ ھەرێمێ دناڤ پەرلەمانی دا بھێتە ھەلبژارتن، د ھەمبەردا پارتی ژی یا رژدە سەرۆک ژلایێ خەلکی ڤە بھێتە ھەلبژارتن، ھیڤیدارم کۆمبوونێن مە دبێ ئەنجام نەبن و بگەھینە سازانێ.