ئەڤرۆ نیوز:

ئەندامەکێ پەرلەمانێ کوردستانێ راگەھاند، ژ بەر کێمیا کارگەھێن بەلاڤکرنا غازێ، ھەتا نوکە بھایێ بۆتلێ غازێ ل ئێک بھا رانەوەستیایە و جار جار گران و ئەرزان دبن و جار ژی غاز کێم دبیت و قەیران پەیدا دبن و گۆت: زێدەبوونا کارگەھێن غازێ ل گۆرەی قانوونێ دێ ڤان ھەموو ئاریشان چارەسەرکەت، ب تایبەت بێسەروبەریا بۆتلێن غازێ. گۆت ژی: دو کارگەھێن غازێ ل ھەولێرێ نە، دو ل سلێمانیێ و ئێک ل دھۆکێ، لێ دڤێت چاڤخشاندنەک بۆ بھێتە کرن کا ئەڤ ھەر پێنچ کارگەھە دشێن پێدڤیێن خەلکێ ھەرێمێ دابین بکەن یان نە
دلشاد شەعبان غەفار، ئەندامێ لیژنا سامانێن سرۆشتی ل پەرلەمانێ کوردستانێ بۆ ئەڤرۆ دیار کر، کارگەە و کۆمپانیێن بەلاڤکرنا غازێ ب دروستی کارێ خوە ناکەت و دڤێت وەزارەتا پیشەسازی و بازرگانی ژی ب ئەرکێ خوە رابیت، دا کو چو قەیرانێن غازێ و گرانبوونا بھای پەیدا نەبیت و بۆ ڤێ یەکێ چە چو ھەماھەنگی دناڤبەرا وەزارەتا سامانێن سرۆشتی و وەزارەتا بازرگانی دا نینە، د سەر ھندێ را ئەڤە کارێ وەزارەتا بازرگانیە و نابیت ب تنێ دو یان سێ کارگەە د ڤی بیاڤی دا کاربکەن و گۆت: ئەڤە ٥ سالە عیراق بوویە نەشێت بۆتلەکێ غازێ دروست بکەت کو ل دووڤ ستانداردێن جیھانی بیت.
ناڤبری دیار کر کو دڤێت کارگەێن غازێ ل ھەرێما کوردستانێ زێدەببن، ب مەرجەکی ل گۆر سیستەمەکێ دروست کاربکەن و زێدەبوونا وان ببیتە ئەگەرێ پەیدابوونا ھەڤرکیێ ل سەر بۆتل و بھایێ غازێ و گۆت ژی: ھەتا نوکە سەقایێ ھەڤرکیێ د ناڤ کارگەھان دا دروست نەبوویە.
ئەندامێ پەرلەمانێ کوردستانێ دیار کر کو وان ل بەرە وەزارەتا پەیوەندیدار گازی بکەنە لیژنا دارایی ل پەرلەمانی و گفتۆگۆیێ ل سەر ڤان پرسان بکەن، دا بزانین کا پلانێن وان چنە و دێ چاوا شێین ل گۆر قانوونێ ھاریکاریا وان کەین و گۆت:
ل گۆرەی وێ پرسیارێ کا بۆچی بەری چەند رۆژان ل ھندەک کارگەھێن ھەرێمێ بۆتلێن غازێ گرانبووینە و ل ھندەک جھان ھەھا ٢٠ ھزار دیناران چوویە؟ بەختیار بشدەری، رێڤەبەرێ کارگەھا غازا ھەولێرێ دیار کر کو ئەگەرێ نە جھگیریا بھایێ غازێ بۆ وێ یەکێ ڤەدگەریت کو ئێک ژ پارزینگەھێن بەرھەمئینانا غازێ ل ھەرێما کوردستانێ نھا ل بەر نووژەنکرنێ یە و ئەڤە بۆ ئەگەر کێشا غازێ پەیداببیت و گۆت ژی: نھا نووژەنکرن ب دووماھی ھاتیە و ل ڤان چەند رۆژان دێ ھژمارەکا زۆر یا بۆتلێن غازێ کەڤنە بازاری و ئاریشە نامینیت.
بەری نھا غازا ھەرێما کوردستانێ ژ کۆمپانیەکا کەرکوکێ دھاتە دابینکرن، بەلێ نھا ژ کۆمپانیا غازا باکوورێ عیراقێ دھێتە دابینکرن و د ڤێ دەربارێ دا دلشاد شەعبان غەفار دبێژیت: ھژمارەکا کۆمپانیێن ناڤخۆ و دەرڤە د بیاڤێ غازێ دا کاردکەن، بەلێ کۆمپانیێن ناڤخۆ شیانێن دەرخستن و دابینکرنا غازێ نینن و ب تنێ کۆمپانیێن بیانی ئەڤ شیانە ھەنە و گۆت: دو کارگەھێن غازێ ل ھەولێرێ نە، دو ل سلێمانیێ و ئێک ل دھۆکێ، لێ دڤێت چاڤخشاندنەک بۆ بھێتە کرن کا ئەڤ ھەر پێنچ کارگەھە دشێن پێدڤیێن خەلکێ ھەرێمێ دابین بکەن یان نە ئەرێ بەرھەمێ وان ل دووڤ پیڤەرانە یان نە، یان ژی غازا وان ل گۆەری کوالێتیێ یێ ساخلەمە یان نە و ھەکە ئەڤ پێنچ کارگەھە زێدەتر لێ بھێن دێ خەلک یێ مفادار بیت یان نە.