ئەڤرۆ نیۆز، قائید میرۆ:
شەڤا بۆری ھەڤپەیمانان سێ ھێرشێن ئەسمانی کرنە سەر گوندەکێ میحوەرێ رۆژئاڤایێ دیجلە و ھژمارەک چەکدارێن داعش کوشتن.
عەقید دلشاد مەولوود، بەرپرسێ ھۆبا راگەھاندنا فەرماندا زێرەڤانی بۆ ئەڤرۆ نیۆز راگەھاند” دەمژمێر ٨ی شەڤا بۆری، فڕۆکەیێن ھەڤپەیمانان سێ ھێرشێن ئەسمانی کرینە سەر بنکە و بارەگایێن تیرۆرستێن داعش ل گوندێ تەشتێ گرێدایی میحوەرێ رۆژئاڤایێ دیجلە.
عەقید دلشادی گۆتژی” ب ئەگەرێ بۆردومانا ھەڤپەمانان چەندین بارەگایێن داعش ھاتینە وێرانکرن و ھژمارەکا زۆرا چەکدارێن وانژی ھاتینە کوشتن، بەلێ ھژمارا کوشتیان دیارنینە.

ئه‌ڤرۆ نيوز:

ئەندامەکێ بەرێ یێ پەرلەمانێ کوردستانێ ل سەر لیستا پارتی دیموکراتی کوردستان د داخۆیانیەکێ دا بۆ رۆژناما ئەڤرۆ دیارکر، نە پەکەکە ب توپبارانکرنا باشوورێ کوردستانێ تێکدچیت، نە مافێ کوردێن باکۆر ب کۆشتنا دو پولیسێن تورک دھێتە دابینکرن. ئاماژێ ددەتە وێ چەندێ ژی کو سەرۆکێ ھەرێمێ و حوکمەتا ھەرێمێ رۆلەکێ بەرچاڤ ھەبوو د پرۆسا ئاشتیێ دا ل تورکیا.

عەبدولسەلام بەرواری بۆ ئەڤرۆ گوت” چەندین سالە پەکەکە ب چەند گرۆپێن بچووک یێن چەکداری ل شاخ و دولێن چەند قەزا و ناحیێن سنۆری ل ھەرێما کوردستانێ جھگیر بووینە، ھەر جارەکا پەکەکە دو تەقەیان ل دەڤەرا شەمزدینا یان ل جۆلەمێرگێ دکەت، لەشکرێ تورکی دێ دەست ب توپبارانکرنا دەڤەرێن سنۆری کەت و خەلکێ سڤیل دەربەدەر بن و زیاندار بن، بێی کو ھەردو کریاران کاریگەریا خوە ھەبیت ل سەر کێشەیا سەرەکی”.
گوت ژی “ئەڤە ٣٠ سالە پەکەکە شەرێ چەکداری دکەت بێی کو دەڤەرەکا ئاخا باکوورێ کوردستانێ ئازاد کربیت، لێ کێشەیەکا رەوا یا کوردان ل تورکیا ھەیە،بەری پەیدابوونا پەکەکێ ھەبوو،پشتی نەمانا پەکەکێ ژی ھەر دێ مینیت ھەکە نەھێتە چارەکرن، لێ شاشیا مەزن یا تورکیا دوێرێ دایە کو ڤێ کێشێ د تێروانینا پەکەکێ دا دبینیت،کریارێن پەکەکێ دکەتە بەھانە بۆ کریارێن خوە یێن لەشکری، ،ھەروەسا شاشیا مەزن یا پەکەکێ تنێ خوە ب خوە دڤێت،یا ئامادە نینە وێ راستیێ ببینیت،کو ئێدی مەحالە ب ڤی رەنگی ھیچ پێشکەفتنەکێ بدەست خوەڤە بینیت”.
عەبدولسەلامی زێدەتر گۆت”ل تورکیا دەرفەتەک پەیدابوویە بۆ خەباتا مەدەنی و ئاشتیێ و چەندین باژێرڤانی ب دەستێ پارتێن کوردینە و نوکە ٨٠ پەرلەمانتار ژی ل پەرلەمانێ تورکیا یێن ھەین،ھەر چەندە ھژمارەکا وان پەلەمانتاران نە کوردن، بەلێ ل سەر لیستا پارتەکێ نە کو خوە ب پاشگۆیێ پەکەکێ ددانن،ھەروەسا دبوارێ کۆلتوری و رەوشەنبیری و رێکخراوێن جڤاکا سڤیل دا دەرفەتا پێشکەفتنەکا بەرچاڤ ھەیە، لەورا ھەرێما کوردستانێ و بتایبەتی سەرۆکێ ھەرێمێ و حووکمەتا ھەرێمێ و پارتێن سەرەکی یێن کوردی رۆلەکێ کارا گێرایە بۆ دابینکرنا بارودۆخەکێ گۆنجای بۆ دەستپێکرنا پرۆسا ئاشتیێ ل تورکیا و چەند پێنگاڤان چووینە پێش”.
زێدەتر گوت”رێکا ئێکانە بۆ راگرتنا ھێرشێن تورکیا ل سەر دەڤەرێن سنۆری ل ھەرێما کوردستانێ، دەستبەردانا پەکەکێ یە ژ ڤێ سیاسەتا شاش، چونکی چو مفا تێدا نینە و پێدڤیە ھەموو لایەن، ب تورکیا و پارتێن کوردستانا باشۆر ڤە ،دوور ژ سۆزێ جۆداھیێ بکەن د ناڤبەرا پەکەکێ وەک پارت و ھێزەکا چەکدار،ھەروەسا مافێن رەوا یێن کوردان ل باکۆرێ کوردستانێ ،ھەروەسا ھەموو ئەڤ موزایەداتێن دھێنەکرن ژلایێ چەند ناڤەندێن سیاسی و میدیایی،کو دبەرژەوەندا ئیرانێ دا دزڤرن،چ واتەیا خوە نینە و دوورن ژ ھەستکرنێ ب بەرپرسیارەتیا نەتەوی”.

ئه‌ڤرۆ نیوز: ڤه‌ده‌ر ره‌شاڤایی:
سۆپایێ توركی د به‌یاننامه‌كێ دا ئه‌و یه‌ك ره‌ت كر كو وان كه‌سێن سڤیل ل هه‌رێما كوردستانێ كربنه‌ ئارمانج یان چ كه‌سه‌كێ سڤیل كوشت بیت.
هه‌روه‌سا دده‌ته‌ خویاكرن كو ئارمانجكرنا جهێن مه‌به‌ست ژ ئالیێ تیمێن پرۆفێشنال ڤه‌ دهێته‌ دیاركرن، ئه‌و جهێ وان كرییه‌ ئارمانج بنگه‌هێ چه‌كدارێن په‌كه‌كێ بوو،
ئاشكرا كریه‌ ژی كو لدووڤ لێكولینان وان لسه‌ر گوندێ زه‌رگه‌له‌  كرین دیاربوویه‌ چ جهێن ئاكنجیێن سڤیل لێ بژین ژ ئاليێ فرۆكه‌یێن توركیا ڤه‌ نه‌هاتینه‌ بۆمبه‌ باران كرن.
تێ زانین ژ ئه‌گه‌رێ بۆمبه‌ بارن كرنا فرۆكه‌یێن توركیا بۆ سه‌ر گوندێ زه‌رگه‌له‌ ل بنارا چیاێ قه‌ندیلێ 10 كه‌سێن سڤیل ژ ژن و زارۆیان هاتبوونه‌ كوشتن و 15 كه‌س ژی بریندار ببوون و ئه‌ڤ هێرشه‌ ژی ژ ئالیێ گه‌له‌ك ئالییان ڤه‌ هاته‌ ئیدانه‌كرن .