ئه‌ڤرۆ نيوز، ئومێد وه‌لاتی:

د گۆتاره‌كێ دا ل 16-7-2015 زیره‌ك كه‌مال (ئه‌ندامێ مه‌كته‌با سیاسیا حزبا شیوعیا كوردستانێ ) كو ل مالپه‌رێ خه‌ندان به‌لافبوویه‌ چیرۆكا به‌ری دوو هه‌فتیان  یا خو و ئێك ژ كار ب ده‌ستێن به‌شێ هه‌والگریا كوچكا كوماریا ئێرانێ به‌لاف دكه‌ت.

ل دیف ئاخفتنێن ڤی ئه‌ندامێ حزبا شیوعی كو ژ كاربه‌ده‌سته‌كێ به‌شێ هه‌والگریا كوچكا كوماریا  ئێرانێ بیستیه‌‌ ل داهاتی دا هه‌ر ئێك ژ توركیا و كومارا ئیسلامیا ئیرانێ دێ شه‌ری ئێخنه‌ د ناف مالا بارزان دا ل هه‌ولێر و سه‌رێ ره‌ش و جهێن دیتر.

د ئاخفتنا وی كه‌سێ سه‌ر ب هه‌والگریا كوچكا كوماریا ئیسلامیا ئیرانێ دا ده‌ر دكه‌ڤیت كو دۆژمن چه‌ند پیلانان دگێریت دا كو ل هه‌رێما كوردستانێ  شه‌رێ براكوژیێ دروست ببیت و د پێخه‌مه‌ت سه‌رخستن و بنه‌جهكرنا ڤان پیلانان دێ هه‌می پێكولان كه‌ت.

ئه‌ڤا ل خوارێ ده‌قێ گۆتارێ يه‌:

زه‌لامێ ئیرانی هوسا گوته ‌من

21-6-2015 نزیكی دوو هه‌فتیان به‌ری نها زه‌نگا موبایلا من لێدا و كه‌سه‌كێ بناڤێ سه‌ردار ره‌سول خو ب من دانیاسین گوت: رۆژنامه‌ڤانه‌كێ ئێرانی ل هه‌ولێرێ یه‌ و دڤێت ته‌ ببینیت، رۆژا ب دووڤ دا ئه‌و هه‌ردو ل باره‌گایێ راگه‌هاندنا حزبێ هاتنه‌ ده‌ف من، ل ده‌مێ من سه‌حدكره‌ سیما و شێواز و روونشتنا وی كه‌سێ ئێرانی من زانی كو نه‌ رۆژنامه‌ڤانه‌‌ و بگره‌ زه‌لامێ ده‌زگه‌هه‌كێ نهێنی و هه‌والگری یه‌‌، بێی ده‌ستپێك ژ من را گوت ژ لایێ من ڤه‌ یا سه‌یره‌ نها ئه‌ز ل جهه‌كێ دانیشتیمه‌ كو ئالایێ چه‌كوچ و داسكێ ب سه‌ری ڤه‌یه‌، ل ده‌مه‌كێ دا كو فكرا كومونیست ل چ جهه‌كێ دونیایێ دا نه‌مایه‌.

هه‌روه‌سا گوت: من ئه‌و چه‌ند ژی بهیستیه‌ كو تو كه‌سه‌كێ چالاك و دیاری د ناف كوردستانێ دا، ئه‌و به‌رده‌وام بوو ل سه‌ر ئاخفتنێن خو ئه‌ژی هه‌روه‌ك پاپه‌ندبوون ب عورفێ جڤاكیێ كورده‌واری ب هویری گوهلێ دگرت، پشتی هنگی گوت: ئاخفتن و هه‌لویست و كردارێن (ئاغایێ مه‌سعود بارزانی) ب مه‌ترسی بۆ سه‌ر هه‌رێما كوردستانێ نزانی؟ من ژی گوت وه‌كو چ؟ گۆت: (پشتی ئه‌و فێلبازی و چاڤ گرێدان و هه‌لخه‌له‌تاندنا رایا گشتی یا دنیایێ شیا چه‌كدارێن خو د ناڤ توركیا دا فرێ بكه‌ته‌ كوبانێ و ل هه‌وارا كوردێن ل وێرێ بچیت)، نها مژوولی وێ چه‌ندێ یه ده‌سته‌ ده‌سته‌ دوژمنێن كومارا ئیسلامیا ئێرانێ چه‌كدار دكه‌ت ب‌ مه‌به‌ستا دروستكرنا ئاژاوێ فرێ دكه‌ته‌ سه‌ر سنوری و ناف ئاخا ئیرانێ دا، وه‌سا دزانیت كو ئه‌ڤه‌ژی فرێكرنا چه‌كانه‌ ژ بوو كوبانێ؟ ئاغای بارزانی د سه‌رێ دا خو ب دوستێ توركیا نیشا دده‌ت و ل ژێریش دا په‌یوه‌ندی هه‌نه‌  د گه‌ل په‌كه‌كێ و نه‌یارێن توركیا دا،  ل ده‌مێ خوش دا ل ناڤه‌راستا هه‌شتێ یان دا ئاغایێ جلال تاله‌بانی خۆ وه‌كی دوسته‌كێ كۆمارا ئیسلامیا ئیرانێ نیشا ددا و دژێریش دا پشته‌ڤانیا یاخی بوویان دكر”. من ژی گوتێ: ژ ئه‌ده‌بێ مێهڤانداریێ و ئاخفتنێ بزانه‌ و فندوفێلا نه‌ده‌ پشت كه‌سێ، كاك مسعود بارزانی و مام جلال تاله‌بانی دو زه‌لامێن مه‌زنێن مێژوویا مه‌نه‌، ئه‌وێن تو ژی ب دۆژمنێن كومارا ئیسلامیا ئیرانێ ناڤێن وان دبه‌ی خه‌باتگێر و نوێنه‌رێ ئامانج و خواسته‌كێن گه‌لێ كوردن ل رۆژهه‌لات دا.

ل ده‌مێ خودا ل سه‌رده‌مێ رژێما به‌عس دا كوردستان لاندكا هزاران كه‌سێن ئوپوزوسیونا عێراقێ بوو كو نها جله‌وا حوكمرانیا عێراقێ د ده‌ستان دایه‌ و ب هه‌مان وێنێ صه‌دام ره‌فتارێ د گه‌ل هه‌رێما كوردستانێ دكه‌ن، دوماهی جار گوت: (دڤێت هوین ب تایبه‌تی سه‌رۆكێ هه‌وه‌ ئاغایێ بارزانی وێ راستیێ بزانن كوبانێ كوبانێ یه‌ و مهاباد مهاباد و هه‌ولێریش هه‌ولێره‌، ئه‌گه‌ر ده‌ست ژ وان په‌یوه‌ندیێن ژێر ب ژێر به‌رنه‌ده‌ن، توركیا و كومارا ئیسلامیا ئێرانێ دێ شه‌ری ئێخنه‌ د ناف مالا بارزانی دا ل هه‌ولێر و سه‌رێ ره‌ش و جهێن دیتر)، ئه‌ژی دوستێ هه‌‌وه ‌مه‌ ژ بوو خودێ بۆته‌ دبێژم، پشتی چه‌نده‌كێ من زانی ئه‌و زه‌لامێ ئیرانی ناڤێ وی (سالح سلحشور)ه‌ و ئێكه‌ ژ كاربده‌ستێن پشكا هه‌والگریا كوچكا كوماریا ئیرانێ، من ژی ئه‌و تشتێن ناڤبری ب جدی وه‌رگرتینه‌ و هیڤیدارم سه‌ركردایه‌تیا سیاسیش وه‌كی من وه‌ربگریت.

ئەڤرۆ:
پشتی چار فرۆکێن ئەمریکێ یێن پێشکەفتی ژ جۆرێ F16 و ھندەک کەلوپەلێن دی یێن لەشکری یێن پێشکەفتی ل رۆژا ١٣ ڤێ مەھێ ھاتینە ھنارتن بۆ لەشکرێ عیراقێ، ئەمریکا ب شێوەکێ فەرمی دلتەنگیا خوە دیارکر ژ وێ چەندێ کو ئەو فرۆکە بکەڤنە دەستێ رێکخستیا داعش یا تیرۆرستی دا.
پەیڤدارێ وەزارەتا دەرڤە یا ئەمریکی جون کێربی، ل دووڤ راپۆرتەکا رۆژناما (الشرق الاوسط) دبێژیت” ئەم د دلتەنگین ژ بەر بارودۆخێ ئەمنی ل سەر ئەردی ل عیراقێ، نە تنێ ژبەر فرۆکان، بەلکو ژبەر ھەر کەلوپەلێن دی یێن لەشکری کو دەستێ خوە دانیتە سەر، لێ دبیت فرۆکێن F16 جۆداھیەک ھەبیت، ژ بەر کو داعشێ ھێزا ئەسمانی نینە و نەشێت فرۆکێن پێشکەفتی بکاربینیت، لێ بارێ ئەمنی دمینیت جھێ دلتەنگیێ ل ھەموو عیراقێ”.
ژلایێ خوەڤە ھیشام ھاشمی شارەزا د وارێ ئەمنی دا و شیرەتکار ل بنگەھێ نەھرێن یێ ڤەکۆلینێن ستراتیژی کو بەردەوام ڤەکۆلین و شیرەتان پێشکێشی حوکمەتا عیراقێ دکەت دبێژیت” ئیدارا ئەمریکی دترسیت ئیران، یان رووسیا تکنولۆژیا پێشکەفتی یا وان فرۆکان بدەستڤەبینیت، ب ڕێیا وێ چەندێ کو ئەو ھەردو وەلاتە وێ تەکنولۆژیایێ ژ وان فرۆکان ڤەکەن بەری بھێنە رادەستکرن بۆ عیراقێ و ب وێ چەندێ دێ ٤٠% ژ بەرھەڤیا خوە ژدەست دەت ژ ئەگەرێ نەبوونا باوەریێ ژ نە گەھشتنا وێ تەکنەلۆژیێ بۆ ھەڤڕکێن ئەمریکا”.
ل دۆر بنگەھێ بەلەد یێ ئەسمانی (70 کلم باکوورێ بەغدا) کو فرۆکێن F16 ل وێرێ ھاتینە دانان، ھیشام ھاشمی دبێژیت” ھەرچەندە ئەو بنگەھە یێ پاراستیە و مۆشەکێن کاتیوشا و ھاون ناگەھنێ، لێ پێدڤیە دەروبەرێن وی بنگەھی زێدەتر بھێنە پاراستن و ئێمناھی لێ بھێتە دابینکرن، ژ بەر کو ئەو بنگەھە یێ ل دەڤەرەکێ کو ژلایێ ئەمنی ڤە ئەو دەڤەرە دھێتە ھژمارتن دژی حوکمەتا بەغدایە ژبەر چەندین ئەگەران و ئەڤ چەندە ژی پێدڤی ب ئەنجامدانا چەندین رێککەفتنایە ل گەل وێ وان دەڤەران، ب تایبەتی ژی دەڤەرێن (یەسرب، ئەلبوحشمە و عەزیز بەلەد).
عیراقێ ل سالا 2011ێ رێککەفتنەک ل گەل ئەمریکا ئیمزاکربوو ل دۆر کڕینا 36 فرۆکێن پێشکەفتی ژ جۆرێ F16 کو ل سالا 2014 بھێنە ھنارتن بۆ عیراقێ، لێ پشتی داعشێ کونترۆل ل سەر رووبەرەکێ مەزن ژ ئاخا عیراقێ کری ل خزیرانا 2014ێ و لەشکرێ عیراقێ تووشی شکەستنەکا مەزن بووی و چەکدارێن داعشێ نێزیکی بنگەھێ بەلەد یێ ئەسمانی بووین و د ئەنجامدا ئەمریکا ئەو شارەزایێن خوە یێن ھنارتین بۆ شیاندن و بەرھەڤکرنا وی بنگەھی بۆ وان فرۆکان ڤەکێشان و ل شوینا وێ ئەو فرۆکە ھنارتنە بنگەھەکێ ئەسمانی ل ویلایەتا ئەریزونا و فرۆکەڤانێن عیراقێ ل وێرێ ل سەر ھاتنە مەشقدان، رادەستکرنا وان فرۆکان بۆ عیراقێ ھاتە پاشخستن ژلایێ ئیدارا ئەمریکی ڤە و ب گەھشتنا وان چار فرۆکان بۆ عیراقێ ل 13 ڤێ مەھێ دبیتە گەرا ئێکێ ژ رادەستکرنا وان 36 فرۆکان بۆ عیراقێ، ل دۆر ژڤانێ وەرگرتنا عیراقێ بۆ ھەر 34 فرۆکێن دی، ھیشام ھاشمی دبێژیت” چ دەمێ عیراقێ بڤێت، ئەمریکا یا بەرھەڤە وان فرۆکان رادەستی عیراقێ بکەت، لێ عیراق یا بەرھەڤ نینە وەرگریت د ڤی دەمی دا، ژ بەر نەبوونا فرۆکەڤانێن مەشقدای ل سەر وان فرۆکان و ھەتا نوکە تنێ مەشق یا ب ھەشت فرۆکەڤانان ھاتیە کرن، ھەر چەندە ھەر فرۆکەیەک ژ وان پێدڤی ب ھەبوونا دو فرۆکەڤانان یا ھەی”.

ئەڤرۆ:
رێکخەرێ ئەمریکا ل ناڤ ھەڤپەیمانیا شەرێ داعشێ د پرێس کۆنفرانسەنێ ل ئەمریکا راگەھاند کو ئەو دژی ئاڤاکرنا دەولەتەکا کوردی نە ل سووریێ و د رەوشا نھا دا یا گرنگ ئەوە کو ھەموو ئالیێن ل سووریێ کار بۆ ژناڤچوونا داعشێ و گرۆپێن دی یێن تیرۆرستی بکەن و پاچەبوونا سووریێ نھا د بەرژەوەندیا چ کەسەکێ دا نینە و گۆت: (کوردێن سووریێ ژی نھا داخوازەکا وەان یا وەسا نینە، بەلکو ئەو پتر دخوازن ل سووریایەک دیموکراتی دا بژین، ئەو ژی ل دژی پارچەبوونا سووریێ نە و ژ بەر ھندێ ژی نھا جارێ نابیت بەحسێ بابەتێن وەسا بھێتە کرن، چونکو سووریە د بن مەترسیێ تیرۆرێ دایە و نھا کورد ل سووریێ ھێزەکا کاریگەرن ل شەرێ دژی تیرۆرێ و د وی چارچۆڤەکی دا ئەم ھاریکاریا وان دکەین و بۆ مە ژناڤچوونا داعشێ و رژێما بەشاری گەلەک گرنگە و ھەتا ئەو ھەر دو ھێزە ھەبن ل سووریێ ئەم نەشێین بەحسێ ئاڤابوونا سیستەمەکێ دیموکراتی دا بکەین).
جەنەرال جۆن ئالن د پشکەکا دی یا ئاخڤتنا خوە دا دیار دکەت کو ئاڤاکرنا ھەرێمەکا ئارام ل سووریێ و ھەروەسا دەستێوەردانا تورکیا دێ رەوشا سووریێ خرابتر لێ کەت و ئەم دژی پێنگاڤێن ب وی رەنگی نە و ژ بۆ مە یا گرنگ ئەوە کو ھەموو ھێز و ئالیێن سیاسی ل سووریێ کو داخوازا وەلاتەک دیموکراتی دکەن پێکڤە ل دژی داعشێ شەری بکەن و ئەم ژی دێ ھاریکاریا وان بکەین و گۆت: (کورد دشێن پشتی ژناڤچوونا داعشێ و رژێما ئەسەدی ل سووریا نوو دا رۆلەک گرنگ بگێرن، ژ بۆ مە گرنگە ئەو ل گەل سووریێ بمینن و ئەو وەلاتە پارچە نەبیت و کوردان بخوە ژی چو داخوازیێن وەسا نینن).
ئەو داخۆیانیێن بەرپرسێ ئەمریکی د دەمەکێ دایە کو بەری نھا چەندین جاران سالح موسلم ھەڤسەرۆکێ PYD دیار کریە کو وان نەڤێت ل رۆژئاڤایێ کوردستانێ دەولەتا کوردی راگەھینن و ئەو دخوازن د چارچۆڤێ کانتۆنان ل گەل سووریێ بمینن و بەرەڤانیێ ژ مافێ کوردان و خەلکێن دی ل سووریێ و رۆژئاڤایێ کوردستانێ بکەن.
ھەروەسا گەلەک پارت و ئالیێن سیاسی یێن رۆژئاڤایێ کوردستانێ ژی ھەردەم رەخنە ژ وێ سیاسەتا PYD گرتینە و دیار کرینە کو مافێ گەلێ کوردە ل سووریێ د چارچۆڤێ سیستەمێ فیدرالی یان ژی ئاڤاکرنا ھەرێمەکا کوردی خوە برێڤە ببەن و ھەردەم ژی دژبەریا خوە ل ھەمبەر ھەلویستێ PYD و ئاڤاکرنا کانتۆنان راگەھاندینە و چاڤدێرێن سیاسی ژی دبێژن کو ئەو دو ھەلویستیا کو د ناڤبەرا ھێزێن کوردی ل سووریێ ھەیە کاریگەریا خوە ل ھەلویستێ ھێزێن نێڤدەولەتی ژی کریە و فەرە بەر ھەر تشتەکێ کورد ل سووریێ ئێک ھەلویست بن و داخوازیێن وان ژی زەلال بن.
ل ئالیێ دی بەرپرسەکێ پایەبلند یێ فرەنسا ژی بۆ ئاژانسا فرانس پرێس دیار کریە کو کورد ل سووریێ بووینە قوربانیا تیرۆرێ و رژێما بەشاری ژی ھەتا نھا زۆرداریەکا مەزن ل وان کریە و نھا دەم ھاتیە کو کورد دەڤەرێن کو ژ داعشێ پاقژ دکەن بخوە برێڤە ببەن و ھزرێ بۆ سیستەمەکێ نوو بکەن و بەرەڤانیێ ژ مافێ خوە بکەن و فرەنسا ژی پشتەڤانیا ل مافێ کوردان ل سووریێ دکەت.