ئه‌ڤرۆ نيوز:

رۆژناما “الشرق الاوسط” د ديداره‌كێ دا به‌حس ل رۆلێ سكرتێرێ گشتيێ حزبا سيوشالست ديموكراتا كوردستانێ دكه‌ت د به‌ره‌يێن شه‌رى دا و ئه‌و سه‌ركه‌فتنێ ب ده‌ست خوه‌ ڤه‌ ئيناين پشتى سه‌رۆكێ هه‌رێما كوردستانێ وه‌كو فه‌رماندێ هێزێن چه‌كدار ل كه‌ركووكێ دانايى و كارێن حزبا خوه‌ ژى ب رێڤه‌ دبه‌ت.

هه‌ر د ڤێ ديدارێ دا محه‌مه‌د حاجى مه‌حمود به‌حس ل كاودانێن سياسى و دستوورێ هه‌رێما كوردستانێ و چه‌ند پرسێن گرنگ يێن هه‌رێمێ دكه‌ت كو پێدڤيه‌ ڤه‌گه‌رن بۆ بۆچوونا گه‌لێ كوردستانێ و نابيا حزبێن سياسى خوه‌ ب نوونه‌رێن هه‌موو چين و ته‌خێن ملله‌تى بزانن، دده‌ته‌ زانين ژى كو دبيت گه‌له‌ك ژ وه‌لاتيان سه‌ر ب چو حزبان نه‌بن و پێدڤيه‌ د پرسێن چاره‌نڤيسساز دا بۆ بڕيارا خه‌لكى ڤه‌گه‌رن.

ده‌رباره‌ى جودا بوونا هه‌رێمێ ژى ژ عيراقێ ته‌كست ل سه‌ر وێ چه‌ندێ كر كو پێدڤيه‌ ئه‌و كار ل دووڤ راپرسيێ بهێته‌ كرن و ل وێرێ ژى بوچوونا خه‌لكى بهێته‌ وه‌رگرتن و ئه‌و چو بڕيار بده‌ن پارتێن سياسى ل گه‌ل وێ چه‌ندێ بن.

ل دۆر پرسا سه‌رۆكاتيا هه‌رێمێ ژى ئاماژه‌ ب وێ چه‌ندێ كر كو پێدڤيه‌ لايه‌نێن سياسى ل سه‌ر وێ پرسێ بگه‌هنه‌ هه‌ڤهاتنه‌كا سياسى و هه‌كه‌ به‌رى 19ى ته‌باخێ نه‌گه‌هنه‌ چاره‌سه‌ريه‌كێ، ل وى ده‌مى دڤێت حوكمه‌ت نه‌مينيت و حوكمێ ئنتيقالى بهێته‌ گێران و هه‌لبژارتنێن به‌روه‌خت بهێنه‌ كرن، به‌لێ هه‌كه‌ گه‌هشتنه‌ چاره‌سه‌ريه‌كێ پێدڤيه‌ ب قانوون بهێته‌ كرن و ويلايه‌تا سه‌رۆكێ هه‌رێما كوردستانێ هه‌تا سالا 2017ێ ب دووماهى بهێت.

ته‌كست ژى ل سه‌ر وێ چه‌ندێ كر كو ئه‌و ل گه‌ل كێمكرنا ده‌سته‌لاتێن سه‌رۆكێ هه‌رێمێ نينن و ئه‌وان نه‌ڤێت سه‌رۆكه‌ك هه‌بيت ب تنێ يێ پرۆتۆكولى بيت، دا زانين كو دڤێت سه‌رۆكى ده‌سته‌لات هه‌بيت بۆ بجهئينانا داخوازيێن گه‌لێ كوردستانێ و گۆت: “ل گه‌ل مانه‌ڤا بارزانى مه‌”.

محه‌مه‌د حاجى مه‌حمود وه‌سان دبينيت كو نه‌ ده‌مێ ئازراندنا پرسا سه‌رۆكاتيا هه‌رێمێ بوو و پێدڤى بوو په‌رله‌مانى بزاڤ كربايه‌ كار ل سه‌ر كێشێن سه‌ره‌كى يێن وه‌كو چه‌ك بۆ پێشمه‌رگه‌ و خۆشكرنا ژيارا خه‌لكى و پێشكێشكرنا خزمه‌تگۆزاران بۆ وه‌لاتيان كربايه‌، رۆژانه‌ خێزانێن كوردستانيان يێن ل دژى شه‌رێ داعش قوربانيان دده‌ن، دڤێت لايه‌نێن سياسى ژى روو بكه‌نه‌ به‌ره‌يێن شه‌رى دا كو بزانن هێزێن پێشمه‌رگه‌يى چاوان قوربانيێ ده‌ن بێ ى و داعش جوداهيێ د ناڤبه‌را لايه‌نێن سياسى دا ناكه‌ت.

ئەڤرۆ نیوز:
جێگرا سەرۆکا لیژنا ساخلەمیێ ل پەرلەمانێ کوردستانێ ئاشکرا کر کو چەندین یاداشت ژ وەلاتیان و رێکخراوێن جڤاکێ سڤیل گەھشتینە لیژنا ساخلەمیێ ل سەر سەنتەرێن مەساجی و وەزیرێ ساخلەمیێ ل سەر بابەتی ئاگەھدار کریە.
مریەم سەبری جێگرا سەرۆکا لیژنا ساخلەمیێ ل پەرلەمانێ کوردستانێ بۆ رۆژناما ئەڤرۆ دیار کر کو پرسا سەنتەرێن مەساجی ئێک ژ خالێن کۆمبوونا وان بوو ل گەل وەزیرێ ساخلەمیێ و گۆت “مە بۆ تەئکید کر کو ھندەک سەنتەرێن مەساجی بۆ ھندەک مەبەستێن دی دھێنە بکارئینان و پاداشت گەھشتینە مە و ل دووڤ رێنمایێن وەزارەتا ساخلەمیێ و رێنمایێن وان ئەڤ سەنتەرە ھاتینە ڤەکرن”.
مریەم سەبری خویا ژی کر کو ھندەک سەنتەر ب بریارەکێ ھاتینە داخستن و ب تنێ ئەو ماینە یێن ئوتێلێن چار ستێر، دڤێت وەزارەتا ناڤخوە پێداچوونێ بکەت و ھەموو بھێنە داخستن و گۆت “نێزیکی ٢٢ سەنتەران سلێمانیێ و ھەولێرێ ھەنە و نزانین ل دھۆکێ چەندن”.

ئه‌ڤرۆ نيوز:

رێڤەبەریا ساخلەمیێ و پۆلیسان و ھاتنوچووونێ ل پارێزگەھا دھۆکێ پلانێن خوە بۆ رۆژانێن جەژنا رەمەزانا پیرۆز راگەھاندن، ١٥ تێمێن ھەوارھاتنا ب لەز ١٢٢ ب شەڤ و رۆژ دێ د کاری دابن و ھەر ترۆمبیلەکا د جەژنێ دا بھێتە دەستەسەرکرن ناھێتە بەردان ھەتا پشتی جەژنێ و ھەموو پۆلیسێن پارێزگەھا دھۆکێ دێ د ئامادەباشیێ دابن بۆ پاراستنا گیان و سامانێ وەلاتیان.
د. نزار عسمەت تەیب، رێڤەبەرێ گشتیێ ساخلەمیا پارێزگەھا دھۆکێ دیارکر، وان ل سەر سێ تەوەران پلانا خوە بۆ رۆژانێن جەژنێ دانایە، ئەوژی پلانا بنگەھێن نوبەردار و نەخۆشخانە و پشکێن تەنگاڤیانە، تەوەرێ دویێ خزمەتێن ھەوارھاتنا ب لەز ١٢٢، زێدەباری تیمێن بەردەوام د بەرۆکێن شەری دا و تەوەرێ سێیێ یێ گرێدایە ب خوە پاراستنا ساخلەمیێ ڤە و گۆت: “مە ١٥ تیم ل سەرانسەری پارێزگەھا دھۆکێ ھەنە و ٢٤ دەمژمێران دێ د ئەرکێ خوە دا بن و خزمەتا وەلاتیان کەن د ناڤ دھۆکێ دا و ژ دەرڤەی دھۆکێ ب تایبەتی ژی ل جادا سەرەکییا د ناڤبەرا ھەولێر و دھۆکێ دا، دیسا تیمێن خوە پاراستنا ساخلەمیێ دێ د ئەرکێ خوە دابن و بەوردەوام دێ دووڤچوونا ھەموو جھان ھێتە کرن ب تایبەتی خارنگەە و کەمپێن ئاواران”.
د. عسمەت ئاشکرا کر، بنگەھێن ساخلەمیێ یێن نوبەردار دێ د ڤەکری بن و نەخۆشخانێن تەنگاڤیان و ئازادی و ھیڤی یا زارۆیان و چاڤ و سۆتنێ تایبەتی ژی پشکێن تەنگاڤیان دێ د ئامادەباشیێ دا بن.
رائیدێ مافپەروەر ئازاد تەھا، بەرپرسێ راگەھاندنێ ل رێڤەبەریا ھاتنوچوونا پارێزگەھا دھۆکێ دیار کر، رێڤەبەریا ھاتنوچوونێ پلانەکا باش دانایە بۆ جەژنا رەمەزانێ و ل ئێڤاریا جەژنێ و رۆژا ئێکێ یا جەژنێ پۆلیسێن ھاتنوچوونێ دێ ل گۆڕستانان ئامادە بن و ھەموو کارمەندێن رێڤەبەریا ھاتنوچوونێ ل ھەر سێ رۆژێن جەژنێ دێ د ئامادەباشیێ دا بن و گۆت: “ل ھەر سێ رۆژێن جەژنێ و ل ھەموو ترافیک لایتا پۆلیسێن ھاتنوچوونێ دێ د بەرھەڤ بن و تیمێن گەرۆک ل ھەموو تاخ و گەرەکێن پارێزگەھا دھۆکێ گەرن و تیمێن رادارێن زێرەڤانیێ و کامیرێن چاڤدێرێ ل ھەموو جھان دێ ھێنە دانان، ھەڤکاری د گەل ھەموو دەزگەھێن ئێمناھیێ یا ھاتیە کرن و وەلاتی دشێن بۆ ھەر ئاستەنگەکێ پەیوەندیێ ب ھژمار ١٨٨ بکەن”.
رائیدێ مافپەروەر ئازاد ئاشکرا ژی کر، ھەر ترۆمبێلاکا بھێتە دەستەسەرکرن ناھێتە بەردان ھەتا پشتی جەژنا رەمەزانێ، رادیۆیا ترافیک/دھۆک دێ بەردەوام دخزمەتێ دابیت و ئەو جھێن رادار لێ دھێنە دانان دێ دیارکەت و ھەر شوفێرەکێ سەرپێچیێ بکەت دێ دەملدەست ب ریکا ئامیرێ ھانڤیلێ ئەمریکێ یان ب رێکا مسجەکێ ھێتە سزادان و گۆت:” جھێن قەرەبالغ و یاریێن زارۆیان دێ پۆلیس ئامادەبن و داخوازێ ژ شوفێران دکەین لەزاتیا ھاژوتنا ترۆمبیلێن خوە کێم بکەن”.
ھەروەسا رائید ھێمن سلێمان ئەترووشی، بەرپرسێ پەیوەندی و راگەھاندنێ ل رێڤەبەریا پۆلیسێن پارێزگەھا دھۆکێ دیار کر، بەری ھەیڤا رەمەزانێ پۆلیسێن پارێزگەھا دھۆکێ پلانەک دانابوو، ئەڤ پلانە ھەتا رۆژانێن پشتی جەژنێ ژی دێ یا بەردەوام بیت و گۆت:”د ڤێ پلانێ دا پشکێن ھەوارھاتنێ و نەھێلانا گۆنەھباریان و پۆلیسێن چالاکیێن مەدەنی پشکداربوون و بۆ رۆژانێن جەژنێ ژی ھەموو پشکێن پۆلیسان دێ د ئامادەباشیێ دا بن و پۆلیس دێ ل ھەموو جھین گرنگ و د ناڤ تاخ و جھێن ئاکنجیبوونێ دا ھێنە دانان، سەرەرای ڤێ چەندێ ٢٧ خالێن جێگر یێن ھەوارھاتنێ دێ ھەبن و د ئەرکی دابن، دیسا چەند ترۆمبیلێن گەرۆک و پۆلیسێن چالاکیێن مەدەنی دێ ھیزەکا ئامادە ھەبیت بۆ ھەر روودانەکا نەچاڤەرێکری و دێ بنگەھێن پۆلیسان و نڤێسینگەھێن نەھێلانا گۆنەھباریان ئەفسەر و پۆلیسێن نوبەدار ھەبن بۆ وێ چەندێ ھەر وەلاتیەکێ سکالایەکێ تۆماربکەت”.
رێڤەبەرێ راگەھاندنا پۆلیسێن پاریزگەھا دھۆکێ گۆتژی ھەر دو ھێلێن گەرم ١٠٤ و ١٤٠ دێ د کاری دا بن بۆ پەیوەندیکرنێ و گەھاندنا پێزانینان ل سەر روودان و ھەر تشتەکێ گومانلێکری بھێتە دیتن، ئەڤ پلانا پۆلیسان دێ ل ھەموو قەزا و ناحیان ژی ھێتە پەیرەوکرن و گۆت: “ئارمانج ژ ڤێ پلانێ پاراستنا گیان و سامانێ وەلاتیانە”.

ئه‌ڤرۆ نيوز، نيوار محه‌مه‌د سه‌ليم:

ژ ئەگەرێ بلندبوونا پلەیێن گەرمێ ل باژێرێن باشوورێ عيراقێ، حوکمەتا عێراقێ بڕیار دا سۆبەهی رۆژا پێنجشەمبی 16ى تيرمه‌ها 2015ێ بکەتە بهێنڤەدانا فەرمی بۆ فەرمانبەرێن عيراقێ ل هه‌موو دامودەزگەهێن حکومی.

نڤيسينگه‌ها ئاخفتنكه‌رێ ب ناڤێ حوكمه‌تا هه‌رێما كوردستانێ، سه‌فين دزه‌يى، ل دۆر ڤێ چه‌ندێ راگه‌هاند كو هه‌رێما كوردستانێ يا گرێدايى نابيت ب وێ بڕيارا حوكمه‌تا عيراقێ ده‌ركرى و ل هه‌رێما كوردستانێ دێ ده‌وام يا ئاسايى بيت.

ب گۆره‌يى ژێده‌رێن ده‌نگوباسان سوبه‌هى رۆژا پێجشه‌مبى و رۆژا ئه‌ينى دێ بلندترين پلێن گه‌رمێ هێنه‌ تۆماركرن و كه‌شناسيا هه‌رێمێ ژى راگه‌هاند كو ل رۆژا شه‌مبى ئه‌و پله‌ دێ هێنه‌ خوار و ئه‌گه‌رێ باران بارينێ ژى دێ ل ده‌ڤه‌رێن چيايى هه‌بيت.