ئەڤرۆ نيوز:
وەزارەتا ئەوقاف و کاروبارێن ئایینی یا حوکمەتا ھەرێما کوردستانێ راگەھاند، ئەڤرۆ سێشەمبێ ١٦-٦-٢٠١٥ لژنا دیتنا ھەیڤێ ل وەزارەتێ دێ کۆم بیت و بەرێخوەدانا ھەیڤێ ھێتە کرن، دا کو رۆژا ئێکێ یا ھەیڤا پیرۆزا رەمەزانا ئەڤ سالە بھێتە دیارکرن.
ل دووڤ راگەھاندنەکا وەزارەتا ئەوقاف و کاروبارێن ئایینی یا حوکمەتا ھەرێما کوردستانێ کو ئاماژە ب وێ چەندێ کریە، ھەکەر ئێڤاریا ئەڤرۆ سێشەمبێ ھەیڤ ھاتە دیتن رۆژا چارشەمبی ١٧-٦ دێ رۆژا ئێکێ یا ھەیڤا رەمەزانا پرۆزا ئەڤ سالە بیت و ھەکەر نەھاتە دیتن پێنجشەمبێ دێ بیتە رەمەزان.
وەزارەتا ئەوقافێ داخواز ژ ھەموو وەلاتیان ژی کریە کو چاڤدێریا دیتنا ھەڤێ بکەن و ل ھەر جھەکێ ھەیڤ ھاتە دیتن ب زووترین دەم لژنا بینینا ھەیڤێ ئاگەھدار بکەن.

ئەڤرۆ:
ل دووڤ نڤیسارەکا جڤاتا دادوەری ل ھەرێما کوردستانێ ئەوا ل ١٤-٦-٢٠١٥ بێنڤەدانێ ل دادگەھێن ھەرێما کوردستانێ دیار دکەت کو ئێک ھەیڤە.
نڤیسارا جڤاتا دادوەری کو باسنیوز بەلاڤ کری دیارکریە کو ھەر ژ ١-٧-٢٠١٥ و بۆ ماوێ ٣٠ رۆژان ئەڤ بێنڤەدانە ل دادگەھێن ھەرێما کوردستانێ دێ ڤەکێشیت.
د نڤیسارێ دا بەحسێ وێ چەندێ ھاتیە کرن کو د وان ٣٠ رۆژان دا ب تنێ دادگەهـ دێ سەحکەنە ھندەک بادەکان، ئەو ژی ل چەند خالان دا ھاتینە دیارکرن، وەکو وان کێشێن کو پەیوەندی ب کاروبارێن شارستانێ و بازرگانی و بارێ کەسی ڤە ھەی، ھەروەسا ھندەک داواکاریێن دیتر کو ھەر د نڤیسارێ دا ئاماژە پێ ھاتیە کرن.
ژ بلی دادگەھان چو دەزگەھێن حوکمەتێ ھەیڤەکێ بێنڤەدانێ وەرناگرن.

ئەڤرۆ:

وەزیرا باژێرڤانی و گەشتوگوزار ل حوکمەتا ھەرێما کوردستانێ نەورۆز مەولود دیارکر کو ل ئایندەکێ نێزیک ھەموو پارچە ئەردێن بێ تاپۆ دێ ھێنە تاپۆ کرن.
نەورۆز مەولود د کۆنگرەکێ رۆژنامەڤانی دا ھەروەسا گۆت ئەم پێشبینی دکەین ئەڤ کارە کێمتر ژ سالەکێ ڤەکێشیت کو ھەموو ئەو پارچێن ئەردی یێن نە تاپۆ کری ل کوردستانێ بھێنە تاپۆ کرن.
وەزیرا باژێرڤانی و گەشتوگوزار ئەو ژی ئاشکرا کر کو ل ھەولێرێ ١٠٠ ھزار پارچێن ئەردی، ل دھۆکێ ٢٢ ھزار و ٨٠٠ پارچێن ئەردی، ل سلێمانیێ ژی ١٥ ھزار و ٣٠٠ پارچە ھەتا نوکە نەھاتینە تاپۆ کرن کو ھەموو دبنە ١٣٨ ھزار و ١٠٠ پارچە ل کوردستانێ د نە تاپۆ کری.

ئەڤرۆ نیوز:

ئێکەتیا زانایێن ئاینێ ئیسلامی لقێ دھۆک، لژنا فەتوایێ ل پارێزگەھا دھۆکێ کۆمبوونەک ل دۆر ھاتنا ھەیڤا رەمەزانا پیرۆز و رەوشا پێشمەرگێ کوردستانێ ل سەر گرتنا رۆژیان ل چەپەرێن بەرگێریێ دا گرێدا.
ئەحمەد شێخ حەسەن ژ راگەھاندنا ئێکەتیا زانایێن ئاینی ل پارێزگەھا دھۆکێ بۆ رۆژناما ئەڤرۆ دیارکر کو لژنا فەتوایێ ل ئێکەتیا زانایێن ئاینێ ئیسلامێ دوھی ١٥/٦/٢٠١٥ فەتوایێن گرنگ دەرکرن، فەتوا ھاتە دان کو پێشمەرگە پێدڤی ھێزێ یە، ژ بەر خۆراگرتنێ بەرامبەر دوژمنی و ژبەر کاودانێن نوکەیێن نەخوەش، فەتوا ھاتە دان کو پێشمەرگە دشێن د چەپەرێن شەری دا دبێ رۆژی بن، ل دووڤ دا رۆژیێن خوە بگرنە ڤە .