ئەڤرۆ نيوز:

رۆژناما واشنتۆن پۆست د راپۆرتەکێ دا دیار کریە کو پشتی ئاشکرابوونا ھندەک خالێن کو ئیران و وەلاتێن زلھێز ل سەر وان رێککەڤتینە و نھا ژی بەر ب رێککەڤتنا دووماھیێ ڤە دچن، روسیا گەلەک دلگران بوویە و ژ شێوەیێ دانوستاندنان و رێککەڤتنێ د رازی نینە، چونکو روسیا ھەردەم ئێک ژ پشتەڤانێن ئیرانێ ل دژی رۆژئاڤا بوویە و مفایەکا گەلەک باش ژی ژ پێگەھێ ئابووری و سیاسی یێ ئیرانێ وەرگرتیە و ھەکە نھا ئیران و رۆژئاڤا رێککەڤتنەکێ بکەن و سزایێن ئابووری ل سەر ئیرانێ رابیت دێ پێگەھێ روسیا ل ئیرانێ گەلەک لاواز بیت و پرانیا خەلکێ ئیرانێ ژی دخوازن کو کۆمپانیێن رۆژئاڤا بچنە ئیرانێ و ئێدی چ ئاستەنگی د پەیوەندیێن ئیرانێ ل گەل ھێزێن جیھانی دا نەمینیت.
د بەردەوامیا راپۆرتێ دا ھاتیە دیار کرن کو شیرەتکارێن پۆتینی بۆ وی دیار کرینە کو رژدبوونا ئەمریکا ل سەر باشکرنا پەیوەندیان ل گەل ئیرانێ بۆ لاوازکرنا پێگەھێ روسیایە ل دەڤەرێ و ژ دەستدانا ئیرانێ دێ زیانەکا خوە یا مەزن بۆ روسیا ھەبیت، ژ بەر ھندێ ژی روسیا داخواز ژ ئیرانێ کریە کو دڤێت دەمێ رێککەڤتن ھاتە کرن ئورانیوما ل کوگەھێن ئیرانێ بۆ روسیا بھێتە ڤەگۆھاستن و دڤێت رۆلێ روسیا نەھێتە ژبیر کرن و ئەو یەک ژی دلگرانیا روسیا ل ھەمبەر رێککەڤتنا د ناڤبەرا ئیران و وەلاتێن رۆژئاڤا ب ئاشکرایی نیشا ددەت.
ل ئالیێ دی وەزارەتا دەرڤە یا ئەمریکا دوھی د داخۆیانیەکا فەرمی دا راگەھاند کو دانوستاندنێن ل گەل ئیرانێ نھا د ئاستەکا گەلەک باش داینە و چ نەمایە کو رێککەڤتنا دووماھیێ بھێتە کرن، تنێ ئالۆزی ل سەر چەند خالان ماینە کو بزاڤ دھێتە کرن ھەتا دو رۆژێن دی ئەو ئاریشە ژی چارە ببن.
چاڤدێرێن سیاسی ژی دیار دکەن کو د رەوشا نھا یا ئالۆز ل رۆژھەلاتا ناڤین دا روسیا جارێ ناخوازیت بلەز ئاریشێن ئیرانێ ل گەل رۆژئاڤا چارە ببن، چونکو ئیران نھا کارتەکا ب ھێزە بۆ روسیا دا بشێت بابەتێ ئوکرانیا و سووریێ ل گۆر بەرژەوەندیێن خوە چارە بکەت.
ل ئالیێ دی دەزگەھێن راگەھاندنا ئیرانێ ژی ب گرنگی بەحسێ بابەتێ رێککەڤتنا ل گەل وەلاتێن رۆژئاڤا دکەن و دیار دکەن ئێدی نابیت وەک سالێن بۆری سەرەدەری ل گەل ئەمریکا و وەلاتێن رۆژئاڤا بھێتە کرن و دڤێت ئیران د بیاڤێ ئابووری و سیاسی دا پەیوەندیێن خوە ل گەل رۆژئاڤا باش بکەت و ب تایبەتی ژی نھا رەوشا ئابووری یا ئیرانێ گەلەک خرابە و دڤێت پشتی رێککەڤتنێ بزاڤ بھێنە کرن کو کۆمپانیێن ئەمریکا و ئوروپی د بیاڤێ نەفت و گازێ دا ل ئیرانێ کار بکەن و ئەو یەک دێ وەسا کەت کو رەوشا ئابووری یا وەلاتی باش بیت.
ھشکباوەرێن ئیسلامی ل ئیرانێ ژی دژبەریا رێککەڤتنا ئیرانێ ل گەل وەلاتێن رۆژئاڤا دکەن و دبێژن ئەو یەک ل دژی بنەمایێن کۆمارا ئیسلامی یە و حەسەن رۆحانی سەرۆک کۆمارێ نھا ژی وەک مرۆڤەک خایین ل قەلەم ددەن و داخواز ژ سەرۆکێ ئایینی یێ ئیرانێ ژی دکەن کو سەرۆک کۆماری ژ کاری دوور بکەت.

ئەڤرۆ نیوز،زنار تۆڤی:
ئێدی برێیا عێراقێ چەک ناگەھیتە پێشمەرگەی و ئەڤە پێنگاڤەکا زۆرا سەرکەفتیە بۆ پێشمەرگێ کوردستانێ کو ئەمریکا بریاردایە ئێدی چەک راستەوخۆ دێ گەھیتە پێشمەرگەی،لەورا وەزیرێ بەرگریا ئەمریکا ئاشتۆن کارتەر د پرێس کۆنفرانسەکی دا ل رۆژا سێشەمبی ٧/٧/٢٠١٥ راگەھاند کو ژ ئەڤرۆ پێڤە ئەو دێ راستەوخۆ چەکی دەنە ھێزێن پێشمەرگەی ژ پێخەمەت ھندێ کو ئێدی چەک زوو بگەھیتە پێشمەرگەی و نەھێتە گیرۆکرن،ژبەرکو ھێزێن پێشمەرگە شیاینە پێشکەفتنێن مەزن ل سەر داعشێ تۆمار بکەن و دربێن کۆژەک داناینە وێ رێکخراوا تیرورستی،ھەروەسا گوت ژی:بۆ ھنارتنا چەکی بۆ پێشمەرگەی ئەو دێ حوکمەتا عێراقێ ئاگەھدارکەن.