ئەڤرۆ نیوز:
ھژمارەک کەسایەتیێن ناڤدار یێن رۆژھەلاتێ کوردستانێ ل ئەمریکا و ئوروپا و گەلەک وەلاتێن دی یێن جیھانێ راگەھاندن کو ئیران پشتی رێککەڤتنا ل گەل ئەمریکا دخوازیت، دەنگێ بەرھنگاریێ ژناڤ ببەت و ژ بەر وێ یەکێ ژی چەندین پیلانگێری ل دژی پارتێن کوردی یێن رۆژھەلاتێ کوردستانێ گێران و ئەو یەک ژی نیشا ددەت کو دڤێت پارتێن رۆژھەلات بەرەیەکێ نەتەوی دروست بکەن و پێکڤە کار بکەن.
د. رویا تلوعی مامۆستا یا زانکۆیێ ل ئەمریکا بۆ رۆژناما ئەڤرۆ دیار کر کو پشتی بزاڤا تیرۆرکرنا سەرکردەکێ کۆمەلێ و ھەروەسا پۆچەل کرنا چەندین تەقەمەنیان ل بارەگایێ وێ پارتیێ و بزاڤێن ئیرانێ بۆ دەستێوەردان د کاروبارێن گەلەک وەلاتێن رۆژھەلاتا دا ناڤین بۆ مە دیار دبیت کو ئەو یەک دێ کاریگەریەکا خراب ل سەر پرسا کوردی ل رۆژھەلاتێ کوردستانێ کەت، ژ بەر وێ یەکێ ژی بەری ھەر تشتەکێ دھێتە خواستن کو پارتێن رۆژھەلاتێ کوردستانێ ھەموو پێکڤە بەرەیەکێ نەتەوی دروست بکەن و پێکڤە دەست ب خەباتێ بکەن، چونکو رەوشا رۆژھەلاتا ناڤین و ئیرانێ وەک سالێن بۆری نینە و دڤێت ل رۆژھەلات ژی دەنگێ خەلکێ و داخوازیێن نەتەوی ئێدی بلند ببن و ئەو بێدەنگیا کو ب سالانە ل رۆژھەلاتێ کوردستانێ ھەیە دڤێت ئێدی ب دووماھی بھێت.
محەمەد خالدی چاڤدێرێ سیاسی و پێشمەرگێ بەرێ یێ پارتیا دیموکرات یا کوردستان- ئیران ژی بۆ رۆژناما ئەڤرۆ دیار کر کو پشتی ئەمریکا ھێرشی عیراقێ کری و رژێما سەدامی ھاتیە رووخاندن، مخابن گەلەک پارتێن رۆژھەلاتێ کوردستانێ ژی چاڤەرێ ھندێ بوون کو ئەمریکا ھەمان سیناریویێ ل ئیرانێ ژی دوبارە بکەت و ھێرشی ئیرانێ بکەت و دێ دەلیڤەکا زێرین بۆ وان ھێتە پێش، ب سالان پارتێن رۆژھەلات چاڤەرێ دەلیڤەکا وەسا مان، لێ پشتی رێککەڤتنا د ناڤبەرا ئیرانێ و ئەمریکا دا ل گۆر من ئێدی ئەو ھیڤی ھەموو ژناڤ چوون و نھا د راستی دا مرۆڤ دشێت بێژیت کو قۆناغەکا نوو دەستپێ کریە و گۆت: (ھەکە ھەموو پارتێن رۆژھەلاتێ کوردستانێ ناکۆکیێن خوە بدەنە رەخەکێ و پێکڤە بەرەیەکێ ب ھێز بۆ خەباتێ دروست بکەن، ئەو یەک دێ کاریگەریا خوە ل خەلکێ مە ل رۆژھەلاتێ کوردستانێ ژی کەت و دێ ھێزەکا مەزن بیت بۆ مە ھەموو کوردان و ژ بەر ھندێ ژی نھا ھەر پارتەکا کوردی ل رۆژھەلاتێ کوردستانێ ھەکە بەحسێ خەباتێ بکەت دڤێت بەری ھەر تشتەکێ بێژیت کو ئەم بەرھەڤین بەرەیەکێ کوردی ل رۆژھەلاتێ کوردستانێ دروست بکەین، چونکو ل گۆر نێرینا من ھەتا ھەموو پارتێن رۆژھەلاتێ کوردستانێ ل سەر ستراتیژیەکا نەتەوی پێکڤە کار نەکەن نەشێن ل دژی دەستھەلاتا نھا ل ئیرانێ چ کارەکێ وەسا مەزن بکەن).
ل ئالیێ دی کۆمەکا مامۆستا و کەسایەتێن سیاسی و رەوشەنبیر یێن رۆژھەلاتێ کوردستانێ ل وەلاتێن جودا جودا یێن جیھانێ دا راگەھاندن کو ل ھەر سێ پارچێن دی یێن کوردستانێ کورد بەر ب ئازادیێ ڤە دچن و مخابن ل رۆژھەلات بێدەنگی ھەیە، ئەگەرێ سەرەکی یێ وێ بێدەنگیێ ژی نەبوونا ستراتیژیەکا نەتەوی یا پارتێن رۆژھەلاتێ کوردستانێ یە و دڤێت ئێدی پارتێن رۆژھەلات چاڤەرێ چو گوھۆرینێن دەرڤە نەبن، و ب خوە کار بۆ پێشڤەبرنا خەباتا نەتەوی ل رۆژھەلاتێ کوردستانێ بکەن و ژ بۆ وێ یەکێ ژی دڤێت بەرەیەکێ نەتەوی دروست ببیت و ئەزموونا ھەرێما کوردستانێ ژی باشتر نیشا ددەت کو وی دەمی پارتێن باشور بەرەیەک وەسا دروست کرن وی بەرەیی کاریگەریا خوە ل سەر بزاڤا ئازادیخواز یا گەلێ مە کر و ئەڤرۆکە ژی دڤێت ل رۆژھەلات ھەمان تشت بھێتە کرن و گیروبوون ژی تنێ دێ خزمەتا کۆمارا ئیسلامی بکەت دا کو بشێت پتر جھێ لنگێ خوە د ناڤ جڤاکێ مە دا دروست بکەت.

ئه‌ڤرۆ نيوز:

ئاخفتنكه‌رێ فه‌رمى يێ بناڤێ پارتيا ديموكراتا گه‌لان “هه‌ده‌په‌” راگه‌هاند: ژمارا ئه‌و كه‌سێن مه‌ده‌نى يێن ژ لايێ په‌لامارێن توركيا دا گيان ژ ده‌ست دايى، ژ ژمارا وان كه‌سێن د روو ب رووبوونا بووينه‌ قوربانى زێده‌تره‌.

ئايهان بيلكه‌ن ئاخفتنكه‌رێ فه‌رمى يێ هه‌ده‌پێ د كۆنگره‌كێ رۆژنامه‌ڤانى ل باره‌گايێ سه‌ره‌كى يێ پارتيا وى ل باژێرێ سته‌مبۆل به‌حس ل په‌لامارێن توركيا بۆ سه‌ر خه‌لكێ مه‌ده‌نى كر و راگه‌هاند كو توركيا ب ته‌مامى په‌ياما شه‌رى راگه‌هانديه‌.

ئاخفتنكه‌رێ هه‌ده‌پێ ئه‌و ژى رووهنكر كو ئه‌و ب چو ره‌نگه‌كى ژ تاوانێن كۆمه‌لكوژيا زارگه‌لى ل باشوورێ كوردستانێ و پرسۆزێ و رۆبۆسكى و ئامه‌د ل باكوورێ كوردستانێ خوش نابن و گۆت: “توركيا هه‌موو سنور يێن به‌زاندين”.

ئاشكه‌را ژى كر كو ل قه‌زا سلۆپى جه‌ندرمێن توركيا ته‌قه‌ ل وان وه‌لاتيان كريه‌ يێن كو بۆ مه‌ره‌ما چاره‌سه‌ريێ روو ل نه‌خۆشخانان كرى.

ئه‌ڤرۆ نیوز، بارزان مزوورى

وه‌كیلێ مێرێ ئێزدیان حازم میر ته‌حسین به‌گ ئه‌ڤرۆ ل په‌رستگه‌ها لالش سه‌باره‌ت پرسا سه‌رۆكایه‌تیا هه‌رێمێ به‌یاننامه‌ك به‌لاڤكر و گوتى” د ڤێ قوناغا نازك دا ، داخوازا مانا سه‌رۆك بارزانى دكه‌ین د پۆستى سه‌رۆكایه‌تیا هه‌رێما كوردستانێ دا و بلا گه‌نگه‌شه‌ و دانوستاندن ل دۆر ڤێ پرسێ بهێنه‌ پاشخستن و بلا ل شوونا وێ كار بۆ رزگاركرنا شنگا و ده‌ڤه‌رێن دى یێن بن ده‌ستێ داعش بهێته‌ كرن و كچ و ژنێن ئێزدیان بهێنه‌ رزگاركرن”.