ئەڤرۆ نیۆز، قائید میرۆ:
سەرۆکێ پەرلەمانێ کوردستانێ ئاشکرا کر كو بەرھەڤبوونا سەرکۆنسولێ ئیرانێ د کۆمبوونا پەرلەمانی دا ل سەر داخوازا ئێکەتی نیشتیمانی کوردستان بوویە.
دکتۆر یوسف مەحەمەد، سەرۆکێ پەرلەمانێ کوردستانێ د لاپەڕێ خوە یێ فەیسبووکی دا نڤیسینەک بەلافکریە و تێدا نڤیسیە: “پشکداریا سەرکۆنسولێ کۆمارا ئیسلامیا ئیرانێ د کۆمبوونا پەرلەمانی دا ئەز ژى دلگران کربووم، بەلێ ئەڤە ل سەر داخوازا ئێکەتیێ بوویە و ل سەر بزاڤا گۆڕان نەھژمێرێن.
سەعید مەسیفی، ئەندامێ فڕاکسیۆنا ئێکەتیێ ل پەرلەمانێ کوردستانێ بۆ ئەڤرۆ نیۆز گۆت: “ئەز ئاگەھدار نه‌بوويمه‌ فڕاکسیۆنا مە داخوازا پشکداریا ئیرانێ کربیت، بەلێ مە پێخۆشە نوونەرێن ھەموو وەلاتان پشکداریا کۆمبوونێن پەرلەمانی بکەن”.
ئەڤرۆ نیۆز، چەندین جارا پەیوەندی ب بێگەرد تالەبانی سەرۆکا فڕاکسیۆنا ئێکەتی و دلێر ماوەتی جێگرێ وێ کر، به‌رسڤا په‌يوه‌نديێن مه‌ نه‌هاته‌ دان.

ئه‌ڤرۆ نيوز:

پشتى هنده‌ك ده‌زگه‌هێن راگه‌هاندنێ به‌لاڤكرى كو پارتى ديموكراتى كوردستان وه‌كو نه‌رازيبوون ل به‌رامبه‌ر ئه‌و پرۆژێن ل په‌له‌مانى بێى ئاماده‌بوونا وێ خواندنا ئێكێ بۆ هاتينه‌ كرن، دێ خوه‌ ژ لژنا ئاماده‌كرنا دستوورى ڤه‌كێشيت، پارتى ئه‌و داخۆيانى ره‌تكرن.

مالپه‌رێ خه‌ندان يێ سه‌ر ب ئێكه‌تى نشتيمانى كوردستان ڤه‌، بابه‌ته‌ك به‌لاڤكريه‌ و تێدا ب پشت به‌ستن ل سه‌ر ژێده‌ره‌كى ژ ناڤا پارتى ديموكراتى كوردستان ئاماژه‌ ب وێ چه‌ندێ كريه‌ كو ل به‌رامبه‌ر ئه‌و بزاڤێن لايه‌نان گرتينه‌ به‌ر ل په‌رله‌مانێ كوردستانێ و خواندن بۆ پرۆژێ قانوونا راستڤه‌كرنا قانوونا سه‌رۆكاتيا هه‌رێما كوردستانێ كرين، ئێك ژ هه‌لبژارتيا ئه‌وه‌ كو خوه‌ ژ لژنا ئاماده‌كرنا دستوورى ڤه‌كێشن.

دايه‌ زانين ژى كو ئه‌و لايه‌نێن ل په‌رله‌مانێ كوردستانێ ئاماده‌ نه‌بوويى، سازانێ ل سه‌ر بكه‌ن، د وێ باوه‌رێ دانه‌ ل سه‌ر پرۆژه‌كێ گرنگێ وه‌كو دستوورى ژى ئاماده‌ نابن سازانێ ل سه‌ر بكه‌ن و ب تنێ دڤێت ياريان ب ده‌مى بكه‌ن، ژ به‌ر هندێ ژى ڤه‌كێشانا وان ژ لژنێ دێ لژنه‌ ژناڤ چيت چونكو ب گۆره‌يى قانوونێ دڤێت ماده‌ و بڕگێن وێ ته‌وافقێ بن.

خه‌ندان د ڤى بابه‌تى دا هێشتا دبێژيت: “پشتى لژنه‌ ژ ناڤ دچيت، دێ ڤه‌گه‌ريته‌ ڤه‌ بۆ قانوونا كه‌ڤن يا دستوورى و دێ ئێخنه‌ به‌ر راپرسيێ، چونكو ئه‌وێ به‌رێ هه‌موو رێيێن خوه‌ يێن قانوونى يێن ده‌رباز كرين”.

فه‌رسته‌ سۆفى، ئه‌ندامێ په‌رله‌مانێ كوردستانێ و لژنا 21 كه‌سى يا نڤيسينا دستوورى ل سه‌ر فراكسيۆنا پارتى ديموكراتى كوردستان  د داخۆيانيه‌كێ دا بۆ ئه‌ڤرۆ نيوز ئه‌ڤ گۆتنه‌ ره‌تكرن و گۆت: “پارتى چو كارێن ژ وى ره‌نگى ناكه‌ت و چو راستى بۆ نينه‌”.