ئه‌ڤرۆ نيوز:

كه‌ساتيێ ديارێ يه‌كگرتوو ل ده‌ڤه‌را بادينان و ئه‌ندامێ به‌رێ يێ جڤاتا نوونه‌رێن عيراقێ راگه‌هاند كو ب چو ره‌نگه‌كى ئه‌و نابنه‌ به‌ركه‌كێ شه‌ترنجێ دا وه‌لاتێن هه‌ڤسۆ و هنده‌ك لايه‌ن د گه‌ل دا وان ب كار بينن و كاودانێن كوردستانێ تێك بده‌ن و جاره‌كا دى براكوژيێ بكه‌نه‌ بارا ملله‌تێ كوردستانێ.

سامى ئه‌ترووشى، كه‌ساتيێ ديارێ يه‌كگرتوو ل ده‌ڤه‌را بادينان و ئه‌ندامێ به‌رێ يێ جڤاتا نوونه‌رێن عيراقێ، ل ديوارێ خوه‌ يێ تۆڕا جڤاكيا فه‌يسبۆكێ نڤيسينه‌ك به‌لاڤكريه‌ و تێدا ئاماژێ ب وێ چه‌ندێ دكه‌ت كو ئه‌وێن موزاهيدا ب ناڤێ شه‌هيدێن وان دكه‌ن ل مال د روونشتى نه‌ و ب تنێ ناڤێن وان د پۆست و كۆمێنتان دا دهێته‌ ديتن.

سامى ئه‌ترووشى دبێژيت: “ده‌ما سينگێ مه‌ يێ ڤه‌كرى بۆ دوژمنا و چه‌ندين جاران ژ مرنا پشت راست قورتال بووين و رۆژانه‌ ئه‌م د ناڤ ئاگرى دا، هه‌موو به‌رێزێن سه‌ركرداتيێ هوون يێن به‌رێز ل كووڤه‌ بوون”.

ئه‌ترووشى يێ د هه‌مان ده‌م دا ئه‌ندامێ سه‌ركرداتيا يه‌كگرتوو ئيسلامى كوردستان ل ده‌ڤه‌را بادينان ئاماژه‌ ب وێ چه‌ندێ ژى كريه‌ كو چو ئه‌وان به‌ره‌ڤانى ژ چو لايه‌نان نه‌كريه‌ و دبێژيت: “ئه‌وان ژى منه‌ت ب به‌ره‌ڤانيا مه‌ ننيه‌”.

ئه‌ندامێ به‌رێ يێ جڤاتا نوونه‌رێن عيراقێ دبێژيت: “مه‌ هنده‌ك بنه‌ما يێن هه‌ين و ل سه‌ر وان بنه‌مايان وه‌كو يه‌كگرتوو ئه‌م كۆمبووينه‌، خزمه‌تا گه‌ل و ئاين و وه‌لاتێ خوه‌ بكه‌ن”.

زێده‌تر دبێژيت: “به‌لێ ب راستى ئه‌م نه‌دبه‌رهه‌ڤين ببينه‌ به‌ركه‌كێ شه‌ترنجێ، ده‌وله‌تێن هه‌ڤسۆ و هنده‌ك لايه‌ن د گه‌ل دا مه‌ ب كار بينن دا كاودانێ، مه‌ تێك بده‌ن و جاره‌كا دى براكوژيێ بكه‌نه‌ بارا ملله‌تێ مه‌ يێ كوردستانێ”.

ئه‌ندامێ جڤاتا سه‌ركرداتيا يه‌كگرتوو ئيسلامى كوردستان ل ده‌ڤه‌ران بادينان ئاماژێ ب وێ چه‌ندێ دكه‌ت كو ئه‌ڤه‌ نه‌ جارا ئێكێ يه‌ بزاڤا خاپاندنا وان دهێته‌ كرن و دبێژيت: “چه‌ندين جاران مه‌ كه‌سانێن ئاست بلند ل به‌غدا ديتينه‌ يێن كار بۆ هندێ دكر جوداهيێ بێخنه‌ د ناڤ مالا كوردى دا و هه‌موو ب كار ئيناينه‌ چو ب رێيا هنده‌ك قانوونان ل په‌رله‌مانى يان هنده‌ك پۆستان يان مووچێن فه‌رمانبه‌ران يان بودجه‌ يان هه‌لبژارتن يان بابه‌تێن مووسل و كه‌ركووك يان ژى حه‌شدا شه‌عبى ل شنگا و … هتد”.

سامى ئه‌ترووشى پێڤه‌ دچيت و دبێژيت: “به‌لێ يا ئه‌ڤرۆ ل په‌رله‌مانى روودايى ب مرجى و ماهۆلكى خه‌لكى ڤيان ديوارێن ئێكرێزيا ناڤ مالا كوردى ب هه‌رفينن”.

دده‌ته‌ زانين ژى كو هه‌لويستى وان ل بادينان هه‌لويستێ راسته‌قينه‌ يێ سه‌ركرداتيا يه‌كگرتوو بوو و يا خويايه‌ د ده‌قێ رووهنكرنێ دا، لێ بزڤرن دێ ديار بيت  چ هه‌ڤدژى ل گه‌ل بريارا سه‌ركرداتيێ نينه‌.

دوهى رۆژا سێشه‌مبى رێكه‌فتى 23ى خزيرانا 2015ێ پشتى كو چار فراكسيۆنێن گۆڕان و ئێكه‌تى و كۆمه‌ل و يه‌كگرتوو ل په‌رله‌مانێ كوردستانێ ب ئاماده‌بوونا قونسلێ ئيرانێ خواندنا ئێكێ بۆ پرۆژێ قانوونا راستڤه‌كرنا قانوونا سه‌رۆكاتيا هه‌رێمێ كرى هنده‌ك ژ په‌رله‌مانتارێن بادينان ژى يێن يه‌كگرتوو د ئاماده‌ بوون.

ژ به‌ر ڤێ چه‌ندێ ژى جڤاتا سه‌ركرداتيا يه‌كگرتوو ئيسلامى كوردستان ل ده‌ڤه‌را بادينان ب ئيمزا 33 په‌رله‌مانتاران نه‌رازيبوونا خوه‌ به‌رامبه‌ر ڤى كارێ ده‌ربڕى و هنده‌ك سه‌ركردێن يه‌كگرتوو ل سلێمانيێ نه‌رازيبوونا خوه‌ دياركر.

ئه‌ڤرۆ نيوز:
پەیڤدارێ دەستەیا پاراستن و چاککرنا ژینگەھێ ل ھەرێمێ بۆ ئەڤرۆ دیار کر کو پێشبینی دھێتە کرن ھەتا دەە سالێن دی قەیرانا ئاڤێ ل ھەرێما کوردستانێ دروست ببیت و ئەڤ چەندە ژی ھاتیە ئاشکراکرن پشتی دەستەیا ژینگەھێ لیژنەک بۆ دوڤچوونا ژێدەرێن ئاڤێ پێک ئینای و د ئەنجام دا دیار بووی کو رێژا ٥٠% ژێدەرێن ئاڤێ کێم بوویە و ب تایبەتی ژی بیرین ئیرتوازی.
لوقمان شێروانی پەیڤدارێ دەستەیا پاراستن و چاککرنا ژینگەھێ ل ھەرێمێ دیار کر پشتی لیژنە ھاتیە راسپاردن بۆ دوڤچوون و دیارکرنا ئەگەرێن نزمبوونا ئاڤێ ل ھەرێمێ راپۆرتا خوە پێشکێشی دەستەیا پاراستن و چاککرنا ژینگەھێ کر و چەندین راسپاردە ھاتنە نڤیسین و بلندکرن بۆ ھەموو لایەنێن پەیوەندیدار بۆ ھندێ ریێن چارەسەری بھێنە دیتن بەری ھەرێما کوردستانێ تووشی قەیرانا ئاڤی ببیت و ل دووڤ راپۆرتا ھاتیە دروستکرن ژێدەرێن ئاڤێ ب رێژا ٥٠% کێم بووینە ب تایبەتی ژی بیرێن ئیرتوازی یێن ئاڤێ گەلەک کێم بووینە ئەڤە جھێ مەترسیێ یە.
لوقمان شێروانی زێدەتر گۆت “ل دووڤ ئەنجامێن راپۆرتا ھاتیە دروستکرن ل سەر کێمبوونا ئاڤێ لیژنێ پیشنیاز کر ھەتا دەە سالێن بھێت دێ ھەرێما کوردستانێ تووشی قەیرانا ئاڤێ بیت و ئاڤ دێ گەلەک کێم بیت و پێدڤیە حوکمەت سکرێن ئاڤێ دروست بکەت و وەلاتی ژی ئاڤێ کێم ب مەزێخن و داخوازی ھاتیە کرن ئێدی ئاڤ ب ھەروە نەچیت و بھێتە عومبارکرن د سکران دا”.
پەیڤدارێ دەستەیا پاراستن و چاککرنا ژینگەھێ گۆت ژی “حوکمەتا ئیرانی و تورکیا نوکە یێ سکرێن ئاڤێ دروست دکەن و ھەکە دووماھی بھێن مەترسیەکا مەزنە بۆ سەر ژێدەرێن ئاڤێ ل ھەرێمێ، چونکو ئیران و تورکیا یا سکران ل سەر وان ژێدەرێن ئاڤێ دروست دکەن یێن دھێنە ناڤ ھەرێما کوردستانێ”.

ئه‌ڤرۆ نیوز:
د.جمال كوچه‌ر ئه‌ندامێ په‌رله‌مانێ عیراقێ ل سه‌ر فراكسیونا یه‌كگرتوو ، شه‌ش پرسیاران ئاراسته‌ى لایه‌نێن سیاسى یێن سه‌ره‌كى ل هه‌رێما كوردستانێ ده‌رباره‌ى پرسا سه‌روكایه‌تیا هه‌رێما كوردستانێ دكه‌ت .
د.جمال كوچه‌ر دیاركریه‌: نێزیك بونا ب دوماهى هاتنا ویلایه‌تا سه‌روكێ هه‌رێما كوردستانێ و نه‌بونا چ یاسایێن دیار و رون و په‌یوه‌ندى دار ب بابه‌تى ڤه‌ ، و نه‌بونا ئێك رێزى و ئێك هه‌لویستیا ناڤ مالا كوردى ل سه‌ر ڤێ كێشێ ، و حه‌ز و به‌رژه‌وه‌ندى و پروژه‌یێن جیاواز یێن وه‌لاتێن ده‌وروبه‌ر ، و ئالوزیا ره‌وشا عیراقێ و ده‌ڤه‌رێ … شه‌ش پرسیار دگرنگ بهێنه‌ كرن.
1- ئه‌رێ گه‌له‌ك یا گرنگه‌ له‌زه‌كا زێده‌ لڤى بابه‌تى بهێته‌ كرن، به‌رى كوده‌نگیه‌كا نشتیمانى ل سه‌ر دروست ببیت ؟؟
2- ئه‌رێ ئه‌م نه‌شێین ڤى بابه‌تى بو دوو سالێن دیژى پاشبێخین و دناڤا ڤان دوو سالان دا راستڤه‌كرنا ده‌ستورى و یاسایا سه‌روكاتیا هه‌رێمێ بریارێ ل سه‌ر بده‌ت ؟؟
3- ئه‌گه‌ر نه‌ ، پا كینه‌ به‌ربژێر بو ڤى پوستى ؟ ئه‌رێ دێ ل ئاستێ بارگرانیا وان كێشه‌یان بن یێن نها به‌روكێن ملله‌تێ مه‌گرتین ؟؟
4- كى هه‌یه‌ ئه‌ڤرو زوربه‌یا ملله‌تى ل سه‌ر كوده‌نگ بیت و شیانێن رێڤه‌برنا پێشمه‌رگه‌ى د شه‌رێ دژى داعش دا و به‌رسینگگرتنا پروژه‌یێن نه‌خوازیار هه‌بن ، و به‌رژه‌وه‌ندیا ملله‌تێ كورد ب سه‌ر هه‌مى به‌رژه‌وه‌ندیێن دى بێخیت ، و د گه‌مه‌یا سیاسى یا نیڤ ده‌وله‌تى دا رول هه‌بیت و تێبگه‌هیت ؟؟
5- ئه‌رێ ئه‌و چاكسازى و گهورینێن پێتڤى كو بهێنه‌كرن هه‌مى ب ڤى پوستى ڤه‌ دگرێداینه‌ ؟ و ئه‌گه‌ر وه‌سابیت بوچى هه‌تا نوكه‌ نه‌هاتیه‌ داخواز كرن ؟؟
6- ئه‌رێ كیشكێ گورى كیشكێ بكه‌ین ؟ .. ئێك رێزى و ئێك هه‌لویستیا ناڤ مالا كوردى دڤى كاودانێ نازك دا گورى پوسته‌كى و هنده‌ك به‌رژه‌وه‌ندیێن حزبى یێن به‌رته‌نگ بكه‌ین .. یان هه‌مى تشتا گورى ئێك رێزى و ئێك هه‌لویستیا ناڤ مالا كوردى بكه‌ین ؟؟
د.جمال كوچه‌ر ل دووماهیێ هیڤى خواستیه‌ هه‌ر پێنچ لایه‌نێن سیاسى یێن سه‌ره‌كى ل هه‌رێما كوردستانێ به‌رسڤه‌كا نه‌ته‌وه‌یانه‌ بوڤان پرسان دروست بكه‌ن و پاشى بریارا پێنگاڤ هاڤێتنێن خوه‌ بده‌ن.