ئه‌ڤرۆ نيوز، نيوار محه‌مه‌د سه‌ليم:

فه‌رماندێ ليوا 12 يا پێشمه‌رگێ كوردستانێ د داخۆيانيه‌كێ دا راگه‌هاند كو دوهى ب شه‌ڤ پێشمه‌رگێ كوردستانێ هێرشه‌كا چه‌كدارێن داعش ل تاخێ به‌رۆژ يێ قه‌زا شنگال هێرشه‌كا داعش تێكشاند و دا زانين كو په‌قاندنا ئاڤاهيان ژى ژ لايێ چه‌كدارێن داعش ڤه‌ يا به‌رده‌وامه‌.

ليواز عزه‌دين سه‌عدو، فه‌رماندێ ليوا 12 يا پێشمه‌رگێ كوردستانێ د داخۆيانيه‌كێ دا بۆ ئه‌ڤرۆ نيوز گۆت: “شڤێدى ده‌مژمێر 9:40 چه‌كدارێن داعش ل تاخێ به‌رۆژ يێ قه‌زا شنگال هێرش كره‌ سه‌ر هێزێن پێشمه‌رگه‌يى و هه‌ر زوو و ب پشته‌ڤانيا فرۆكێن شه‌ركه‌رێن هه‌ڤپه‌يمانان هێرشا وان هاته‌ تێكشكاندن”.

زێده‌تر گۆت: “هێزێن پێشمه‌رگێ كوردستانێ چو زيانێن گيانى نه‌بوون و ب تنێ پێشمه‌رگه‌ك ب سڤكى بريندار بوويه‌ و ب ده‌هان كه‌ش ژى ژ چه‌كدارێن داعش هاتينه‌ كوشتن و بريندار كرن”.

ده‌باره‌يى ره‌وشا شنگال ژى ئاشكه‌را كر كو نوكه‌ ره‌وشا شنگال يا ئارام و ب تنێ هنده‌ك جاران چه‌كدارێن داعش ب ره‌نگه‌كێ گه‌له‌ك لاواز هێرشان دكه‌ن سه‌ر هێزێن پێشمه‌رگه‌يى.

دا زانين ژى كو ب ره‌نگه‌كێ رۆژانه‌ چه‌كدارێن داعش مالێن وان كه‌سێن د زانن ل گه‌ل حوكمه‌تێ نه‌ يا ژى كاره‌كێ دژى وان دكه‌ن و ئه‌و ب دوژمنێن خوه‌ دزانن ژ ناڤ دبه‌ن.

ئەڤرۆ نیوز:
رێکخراوا تیرۆرستی یا داعشێ ھێرشی گەلەک قەزا و گوندێن حەلەبێ کرینە و پرانیا وان دەڤەران داگیر کرینە و ژ بەر وێ یەکێ ژی ب ھزاران تورکمان بەرێ خوە داینە تورکیا و دھێتە گۆتن کو داعشێ دڤێت پشتی حەلەبێ بەرێ خوە بدەتە عەزاز و عەفرینێ و ھێزێن کوردی ژی نھا د ئامادەباشیێ دانە.
حسێن ئەکرەم چاڤدێرێ سیاسی یێ رۆژئاڤایێ کوردستانێ بۆ رۆژناما ئەڤرۆ دیار کر کو داعشێ د ماوەیێ چەند رۆژێن بۆری رێکخراوا تیرۆرستی یا داعشێ ھێرشی چەندین قەزایێن حەلەبێ کریە و قەزایا ستراتیژی یا سەڤران ژ ئالیێ داعشێ ڤە ھاتیە داگیر کرن و گەلەک گۆندێن تورکمانان ژی کەڤتنە دەستێ چەکدارێن داعشێ و ژ بەر وێ یەکێ ژی نھا ب ھزاران تورکمان بەرێ خوە داینە تورکیا و دخوازن خوە بگەھیننە وی وەلاتی و گۆت: (داعشێ دڤێت پشتی حەلەبێ داگیر بکەت و پشتی حەلەبێ ژی بەرێ خوە بدەتە عەزاز و عەفرینێ و ئەوە ژی بێگومان دێ مەترسیەکا گەلەک مەزن بۆ رۆژئاڤایێ کوردستانێ دروست کەت و نھا ھێزێن کوردی د ئامادەباشیێ دانە دا کو نەھێلن ب چو رەنگەکی داعش خوە نێزیکی عەفرینێ بکەت و گەلەک دەڤەرێن دی شەرڤانێن کورد شیاینە دربێن کوژەک ل داعشێ بدەن و د ماوەیێ چەند رۆژێن بۆری ب دەھان چەکدارێن داعش ل دەڤەرێن جودا جودا یێن رۆژئاڤایێ کوردستانێ ھاتینە کوشتن).
ناڤھاتی ئەو یەک ژی دیار کر کو لەشکرێ سووریێ و گرۆپێن دی یێن بەرھنگاریا سووریێ نەشیاینە کو رێگریێ ل پێشڤەچوونێن داعشێ بکەن و ژ بەر ھندێ ژی بارگرانی کەفتیە سەر ملێ شەرڤانێن کورد و یێن نھا ل سووریێ شیاینە براستی ژی سنۆرەکێ بۆ داعشێ دانێن و ئاستەنگیان ل ھەمبەر پێشڤەچوونێن وان دروست بکەن شەرڤانێن کورد بووینە و ل گۆر من دڤێت ھەر ژ نھا کورد بەرھەڤیێن تەمام بکەن دا کو نەھێلن چارەنڤیسێ عەفرینێ ژی وەک یێ کۆبانێ لێ بھێت و گۆت: (ھەکە براستی مە بڤێت کو رۆژئاڤایێ کوردستانێ پاراستی بیت و چو مەترسی ل سەر پاشەرۆژا وی پارچەیێ کوردستانێ دروست نەبیت، دڤێت ھەموو ھێزێن کوردی پێکڤە بەرنامەکێ بۆ پاراستنا عەفرینێ و حەسەکێ و باژاران دی دانێن و پێکڤە پاراستنا وان باژاران بکەن، ژ بەر ھندێ ژی دڤێت یەکینەیێن پاراستنا گەل رێ بدەن کو پێشمەرگێن رۆژئاڤایێ کوردستانێ ژی دەربازی رۆژئاڤا ببن و ل گەل برایێ خوە شەرێ تیررۆستان بکەن و ئاخا خوە ب پارێزن).
ل ئالیێ دی ھاتە زانین کو داعش ب ھەموو ھێزا خوە بزاڤێ دکەت کو ھێرشی حەسەکێ بکەت، لێ ھەتا نھا نەشیایە کو پێشڤەچوونێن بەرچاڤ دروست بکەت، چونکو ھەم فرۆکێن ھەڤپەیمان ب رەنگەکێ باش ل بنگەھێن داعشێ ددەن و ھێزێن کوردی ژی ل گەل بورکان فرات شیاینە ھەماھەنگیەکا باش دروست بکەن و نەھێلن داعش پێشڤە بچیت و ژ ئەنجاما شەرێ ھەفتیا بۆری ب دەھان چەکدارێن داعشێ ل حەسەکێ و دەڤەرێن دی ھاتینە کوشتن و نەچار ماینە کو پاشڤە ڤەکێشن.
ل ئالیێ دی وەزارەتا دەرڤە یا تورکیا ژی دیار کر کو ژ بەر ھێرشا داعشێ ل حەلەبێ گەلەک تورکمان جە و مالێن خوە ھێلاینە و بزاڤێ دکەن کو خوە بگەھیننە تورکیا و ئەم بەرھەڤین ب ھەموو رەنگەکێ ھاریکاریا وان بکەین و دێ وان ب پارێزین و دەرگەھێ مە بۆ برایێ مە ڤەکرینە.

ئه‌ڤرو نیوز ،بارزان مزوورى
ئه‌ڤرو سپێدێ د. فارس بریفكانى ئه‌ندامێ په‌رله‌مانێ عێراقێ سه‌ره‌دانا لقا 20 ل شێخان كر و ژ لایێ به‌رپرسێ لقا 20 ل شێخان عه‌لى عه‌ونى پێشوازى لێ هاته‌كرن، د سه‌ره‌دانا خودا سه‌ره‌دانا چه‌ندین مالێن نه‌خوشان كرن و ناڤێن وان توماركرن ئه‌وێن چاره‌سه‌ریا وان ژ ده‌رڤه‌ى وه‌لاتى.
د. فارس بریفكانى ، ئه‌ندامێ په‌رله‌مانێ عێراقێ و سه‌روكێ لژنا ته‌ندروستیا په‌رله‌مانێ عێراقێ بو مالپه‌رێ ئه‌ڤرو نیوز دیار كر كو مه‌ره‌م ژ سه‌ره‌دانا مه‌ بو قه‌زا شێخان ئه‌و بو كو سه‌ره‌دانا مالێن نه‌خوشێن دوم درێژ بكه‌ین و ناڤێن وان توماربكه‌ین و فائیله‌كێ بو دروست كه‌ین كو ئه‌م بشێین كاروبارێن وان بگه‌هینه‌ به‌غدا و ئه‌و ب رێكا وه‌زاره‌تا ته‌ندروستیا عێراقێ ره‌وانه‌ى ده‌رڤه‌ى وه‌لاتى بكه‌ن ژبو چاره‌سه‌ركرنێ و ئه‌و نه‌خوشێن نه‌خوشیا دلى و یێن مێشك و ده‌مارا و په‌نجه‌شێر هه‌ین و ئه‌وێن پێتڤى ب گورینا مێلاكێ ئه‌و نه‌خوشیێن چاره‌سه‌ریا وان ل عێراقێ نه‌هێنه‌ كرن بو ده‌رڤه‌ى وه‌لاتى ره‌وانه‌ بكه‌ین ل سه‌ر میزانیا حكومه‌تا به‌غدا و به‌رى نها ئه‌ڤه‌ چه‌ند ساله‌ چ پشك بو نه‌خوشیێن هه‌رێمێ نه‌بون، به‌س عه‌ره‌ب بون بو ده‌رڤه‌ى وه‌لاتى ره‌وانه‌ دكرن.