ئەڤرۆ نیۆز، سالار دۆسکی:
پشتی کونترۆلکرنا باژێرێ رومادی ژ لایێ تیرۆرستێن داعش ڤە و ئاوارەبوونا خەلکێ وی بۆ باژێری بۆ بەغدا و چوون ب زحمەت کەفتی کو بەرامبەر کەفیلەکی یە چوونا ناڤ بەغدا و ھەرێما کوردستانێ دەرگەهـ ل ئاوارێن وی باژێری بێ مەرج ڤه‌کر، ھاریکارێ پارێزگارێ دھۆکێ ل دور بابەتی بۆ ئەڤرۆ نیۆز دئاخڤیت.
ئيسماعیل محەمەد ھاریکارێ پارێزگارێ دھۆکێ بۆ کارۆبارێن ئاواران بۆ مالپەرێ ئەڤرۆ نیۆز ئاشکرا کر کو ھەرێما کوردستانێ دەرگەهـ بۆ ھاتنا ئاوارێن باژێرێ رومادی ڤەکرینە و گۆت: “وەک پارێزگەھا دھۆکێ مە حوکمەتا ھەرێما کوردستانێ ھایدارکریە کو پارێزگەھا دھۆکێ شیانێن ڤەحەواندنێ نین و نوکە پارێزگەھا دھۆکێ پلا چارێ دھێت ل سەر ئاستێ عیراقێ ب ھەبوونا مرۆڤێن ناڤ دا دژین”.
ئەڤرۆ:
جێگرا سەرۆکێ جڤاتا پارێزگەھا دھۆکێ دیار کر کو ب ئاوایەکێ گشتی رەوشا ئاواران وەکو پێدڤی یا باش نینە، چونکی پێدڤیە پتر ھاریکاریا وان بھێتەکرن، نەمازە ژ ئالیێ دەروونی ڤە و گۆت “بێگومان د رەوشەکا ھوسا دا کو مرۆڤ مال و حالێن خوە بھێلیت و ترس ب سەر دا بھێتە خوارێ، دەروونێ مرۆڤی تێک دچیت و ئەو تێکچوون دبیتە سەدەم کو ئاریشێن خێزانی روو بدەن”.
بێریڤان شەمو کو ل ھەمان دەمی ئەنداما لیژنا ئافرەتانە ل جڤاتا پارێزگەھا دھۆکێ دیار کر وەکو ھەموو دزانن پشتی چەکدارێن داعش ب سەر چەندین باژار و دەڤەرێن کوردان دا گرتی و خەلکێ وان دەڤەران رەڤین و دەربەدەر بووین و ب ھزاران کچ و ژن و گەنج و پیر و زارۆ کەفتینە د دەستێن داعش دا، ب ھزاران کەس ژ ھەردو رەگەزان راستی ئاریشێن دەروونی بووینە و گۆت “حالەتێن خوەکوشتنێ د ناڤ کەمپان دا روو داینە و ھەتا ئافرەت ھەبوویە بزاڤ کریە کو دەستان ژ خێزانا خوە بەردەت و گەلەک ئاریشێن دن یێن جڤاکی”.
بێریڤان خانێ خویا ژی کر کو د رەوشێن نۆرمال دا رۆژانە ئاریشێن جڤاکی روو ددەن، ڤێجا نھا ژمارەکا زۆرا ئاوارە و دەربەدەران ھاتینە پارێزگەھا دھۆکێ، بێگومان ئاریشێن جڤاکێ دێ زێدەتر بن، د ناڤ ئاواران دا ب گشتی و د ناڤ ئافرەتان دا ب تایبەتی، چونکی داعش گەلەک زۆری ل ڤی خەلکی کریە، بۆ نموونە ھندەک ئەندامێن خێزانێ ھەمبەری چاڤێن وان کوشتینە و دەست درێژی ل سەر کچ و ژنان کریە و گۆت “ئەم وەکو جڤات ھەر ل دەستپێکێ مە راپۆرت ل سەر رەوشا وان خێزانێن ئاوارە و ئاریشێن وان یێن جڤاکی بەرھەڤ کرن و رادەستی رێکخراوان کرینە، داکو ئەو رێکخراو ل گەل مە خوە ل ئاریشێن وان بکەنە خودان”.
جێگرا سەرۆکێ جڤاتا پارێزگەھا دھۆکێ خویا ژی کر کو نەە ئەندامێن ئافرەت ل جڤاتا پارێزگەھێ ھەنە و ل ڤێ دووماھیێ لیژنەکا ئافرەتان پێک ئینایە و گۆت “لیژنا مە ژ ھەر نەە ئەندامان پێک ھاتیە و ئێک ژ پرۆگرامێن لیژنا مە دووڤچوون و چارەکرنا ئاریشێن خێزانی یە یێن ئاواران و ب تایبەتی ئافرەتێن شنگالێ و ب ژڤانین لیژنا مە ھەماھەنگیێ ل گەل رێکخراوێن حکوومی و نەحکوومی و ساخلەمیێ بکەت ژ بۆ دابینکرنا ڤەکۆلەرێن جڤاکی داکو ب ئاوایەکێ بەردەوام سەرەدانا کەمپان بکەن و ئەو ئافرەتێن دەروونێ وان تێکچووی چارە بکەن، ئانکو ئەم دخوازین لیژنا مە ببیتە شەنگستەک و فاکتەرەک بۆ کێشانا ڤان ئالیان بۆ ناڤ ئاواران”.
ئەنداما لیژنا ئافرەتان گۆت ژی “ل دەستپێکێ گەلەک رێکخراو ھاتنە د ناڤ کەمپان دا و ژ ھەمی ئالیان ڤە ھاریکاری پێشکێش کرن، لێ بلا ئەم دکەتواری بین کو ئەو رێکخراو و کار و ھاریکاریێن وان دەمکینە و ل سەر ھاریکاریێن خوە بەردەوام نابن، چونکی وان پرۆژە ھەنە و ھەردەمێ پرۆژێ خوە بجە ئینا ئەو رێکخراو نامینیت”.
ل دووماھیێ بێریڤان شەمو دیار کر کو دێ ل گەل ئالیێن پەیوەندیدار بزاڤێ کەن کو ھندەک نوشدارێن ئافرەت و ڤەکۆلەرێن جڤاکی بھێنە دەستنیشانکرن بۆ کەمپێن ئاواران، چونکی ب دەھان حالەت ھەبووینە کو ئافرەتا دوگیان د حالەتێ زارۆبوونێ دا پێدڤی نوشدارا ئافرەت بوویە و نوشدارا ئافرەت نەبوویە، ئەڤجا ھەتا گەھاندیە نەخۆشخانێ راستی بەربوونا خوینێ و چەند ئاریشێن دن بوویە و گۆت “ھەروەسا ئافرەت ھەبوویە کو ئاریشەکا دەروونی ھەبوویە و ڤەکۆلەر یان شارەزایێن جڤاکی د کەمپێ دا نەبووینە کو چاڤدێریا رەوشا دەروونی یا وان بکەت”.
ئەڤرۆنیۆز، سالار دۆسکی:
ل ژێر چاڤدێریا پارێزگارێ دھۆکێ فەرھاد ئەمین ئەترووشی رێڤەبەریا گشتی یا ئەوقاف و کارۆبارێن ئاینی و ئێکەتیا زانایێن ئاینێ ئیسلامێ لقێ دھۆک، ب ھەڤکاری ل گەل گوڤارا (حەرا ) کونفرانسێ (توندرەوی و سەرداچوون بناڤێ ئاینی و نیشانێن وێ یێن خراب ل سەر پێگڤەژیانێ) ب بەرھەبوونا ژمارەکا زور ژ مامۆستایێن ئاینێن موسلمان و مەسیحی و ئێزدی ل سەرانسەری پارێزگەھێ و چەندین مێھڤانبَن دەرڤە ل سپێدەھی یا ئەڤرۆ ٢٨-٥ ل ھولا کونفرانسان دەست ب کارێن خوە کر.
پشتی خواندنا چەند ئایەتێن قورئانا پیرۆز، مەلا عەبدوللاسەرۆکێ ئێکەتیا زانایێن ئاینێ ئیسلامێ ل کوردستانێ پەیڤەک پێشکێشکر و تێدا ھەبوونا ئەڤان جورە کونفرانسان بگرنگی ل قەلەم دا و خوەیارکر کو ئەڤ کونفرانسە ھاتە پێش پشتی ل ھەر دو پارێزگەھێن سلێمانی و ھەولێرێ ھاتینە ئەنجامدان، خواست مامۆستایێن ئاینی رۆلێ خوە یگَرن دناڤا جڤاکی دا و ببنە رێگر ل ھزرێن بەرتەنگ و دوور ژ ئاینێ ئیسلامێ یێ پیرۆز، دووڤ دا، فەرھاد ئەترووشی پارێزگارێ دھۆکێ پەیڤەک پێشکێشکر و تێدا بخێرھاتنا ھەموو ئامادەبوویان کر و گۆت: بەرسنگرتنا داعش ب چەکی ب تنێ بەز نینە و تنێ دێ کاریگەری ھەبیت ژ روویێ ھزری ڤە، قورئانا پیرۆز گەلەک گرنگی دایە مێشکی و چەکێ ھەر مەترسی دا چەکێ ھزری یە، دڤێت مامۆستایێن ئاینی ڤێ چەندێ چارەسەر بکەن و ئاگەھداربکەن و دەلیڤێ نەدەنە کەسێن ھزرێن بەرتەنگ ھەین جھێن ئاینی ب دەلیڤە وەربگرن بۆ ھزرێن خراب و توند و تیژیی تێدا دوور ژ ئاینێ پیرۆزێ ئیسلامێ.
دووڤ دا، نەوازد سەواش، رێڤەبەرێ گشتیێ گوڤارا خەرا پەیڤەک پێشکێشکر و خوشحالیا خوە دەربری ب دیتنا ھەموو مامۆستایێن ئاینی ل ھەموو پێکھاتێن پارێزگەھا دھۆکێ ژ موسلمان و ئێزدی و مەسیحی و گۆت: پێکڤە ژیان ب ھەبوونا ھەوە پێکڤە جوانیا ڤی باژێری و وەلاتێ ھەوە نیشا جیھانێ د دەت و دیسان ھاتنا ھەو بۆ جڤاتێن بڤی رەنگی برایەتی و مرۆڤایەتیێ پتر خورت دکەت.
ھەڤدەم د. سەمیان عەبدولخالق سەعدی، رێڤەبەرێ گشتیێ ئەوقاف و کارۆبارێن ئاینی ل پارێزگەھا دھۆکێ بۆ مالپەرێ ئەڤرۆ نیۆز دیارکر کو پەیاما رێڤەبەریا گشتی یا ئەوقاف و کارۆبارێن ئاینێ ئیسلامی ل پارێزگەھا دھۆکێ، ئێکەتیا زانایێن ئاینێ ئیسلامێ، ئەوە کار بکەین بۆ ھندێ ئەڤ ھزرێن توند رەو و کارتێکرنا خراب یا ل سەر راوستین و کا چ کارتێکرن کریە ڤە، دیسان مە ب دەلیڤە بزانین ئەڤی کونفرانسی بگێرین و ھەموو ماموستایێن ئولی ژ ھەموو ئاینین پێکڤە کوم بکەین و دیسان مێھڤان ل دەرڤە بھێنە گازیگرن دا بزانن کو مللەتێ کورد حەزژ پێکڤەژیانێ و برایەتیێ دکەت و چ جاران زولم و تەعدا ل کەسێ نەکریە.
د. سەمیان عەبدولخاق گۆت ژی: سەربلندین کو نوکە ھەستا نەتەوەیی ل دەڤ گەنجێ مە گەشھیتە ئاستێن بلند و دیسان مامۆستایێن ئاینی مل ب ملێ ھەموو تەخێ، جزاکی رولێن ھەرە کاریگەر ھەیە بۆ بلندکرنا ڤێ ھەستێ بەرز و بھیڤی نە دێ پتر خزمەتێ کەین.
رێڤەبەرێ گشتی ئاشکراکر ژی کو کونفرانس دێ بتنێ بۆ ماوێ ئێک رۆژ بیت و دو پەنەلە و چەند مێھڤان و شارەزا دبیاڤێن ئاینی دا ل وەلاتێن مەغرب و تورکیا تێدا دبەرھەڤن.
ئه‌ڤرۆ نيوز:
ژێده‌ره‌كێ ئابوورى يێ ئه‌مريكى ئاشكه‌را كر كو عيراقێ ل به‌ر د هه‌يڤا داهاتى دا ئاستێ به‌رهه‌مئينانا رۆژانه يێ په‌ترۆلێ بۆ سه‌ر سێ مليۆن به‌رميلان زێده بكه‌ت.
سايتێ بلۆمبێگ به‌لاڤ كر كو عيراقێ ل به‌ره د هه‌يڤا داهاتى دا، ئاستێ به‌رهه‌م ئينانا په‌ترۆلێ بۆ سێ مليۆن و 75 هزار به‌رميلان د رۆژه‌كێ دا بلند بكه‌ت و ئه‌وێ ستراتيژيه‌تێ ب ده‌رفه‌ت ببينيت ئه‌وا رێكخراوا ئۆپێل به‌ر دچيت كو زێده‌فرۆتنا په‌ترۆلێ يه ب بهايه‌كێ كێمتر ژ په‌ترۆلا خاڤ يا ئه‌مريكى.
ب گۆره‌يى هه‌مان ژێده‌ر ئه‌و په‌ترۆلا زێده يا رۆژانه عيراق به‌رهه‌م دئينيت دگه‌هيته نێزيكى 800 هزار به‌رميلان.
د هه‌يڤا كانينا دويێ يا ئه‌ڤ ساله دا، وه‌زاره‌تا په‌ترۆلا عيراقێ راگه‌هاند كو ئه‌وان رۆژانه شيانێن به‌رهه‌مئينانا نێزيكى سێ مليۆن به‌رميلێن په‌ترۆلێ هه‌نه و بهايێ وێ په‌ترۆلا هاتيه فرۆتن ژى گه‌هشتيه زێده‌ترى پێنج مليار دۆلاران.
ئەڤرو نیوز، بارزان مزووری:
موقه‌دم داود خالد بانی، يێ سەر ب بەتەلیوونا سێ يا پێشمەرگەیێن میحوەرێ ناوەران بۆ ئه‌ڤرۆ نيوز ئاشکرا کر کو ل شەڤا بوری دەمژمێر 10:40 ده‌قيقه فروکەیێن ھەڤپەیمانان ب ھەڤکاری د گەل ھێزێن پێشمەرگەی ب چەکێ گران کوگەھێن دووریانا خورسەبات ل میحوەرێ ناوەران ب توندی بوردومان کرن د ئەنجام دا کاروانەکێ چەکدارێن تیرورستێن داعش ب ترومبێل و چەکێ گران تێک شکاندن.
زێده‌تر گۆت: “ل دووڤ زانیاریێن دەسپێکێ وان ب خوه ب ھەواری ئێکدو دکر د گۆت گەلەک تەرمێن کەفتینە د ناڤ کوگەھان دا ھەوار دکر کو ھێزەکا مەزن ل مووسل بگەھیتە وان ژ بوو قورتالکرنا وان و ل گه‌ل خوه برنا تەرمان”.
ناڤبری دیار کر کو ل دوڤ پێزانینان وان پلانەکا درێژ بو شڤێدى ل دژی پێشمەرگەی دارێت بوو، به‌لێ پێشمه‌رگه‌يى زوو پلانا وان تێكدا.
راگه‌هاندنا فه‌رماندا زێره‌ڤانى ژى د به‌ياننامه‌كێ دا كو دانه‌ك بۆ ئه‌ڤرۆ نيوز ره‌وانه كريه راگه‌هانديه كو ژماره‌كا فرۆكێن شه‌ركه‌رێن هه‌ڤپه‌يمانان چه‌ند باره‌گا و حه‌شارگه‌هێن چه‌كدارێن داعش ل گۆندێن خورسه‌بات سنورێ ميحوه‌رێ ناوه‌ران و گۆندێ محه‌له‌بيه كو دكه‌ڤيته به‌رامبه‌ر بلنداهيێن بادوش ل ميحوره‌ێ رۆژئاڤايێ ديجله تۆپبارانكرن.
ئەڤرۆ:
وەزیرێ وزێ یێ تورکیا د داخۆیانیەکی رۆژنامەڤانی دا ل باژێرێ ئەنقەرە یێ تورکیا راگەھاند کو تورکیا دخوازیت ئەو پەترۆلا کو ژ ھەرێما کوردستانا عیراقێ بۆ تورکیا دھێتە ھەناردە کرن بھێتە زێدەکرن و گۆت: (ئەم ژ پەیمانا پەترۆلێ یا کو ل گەل ھەرێما کوردستانا عیراقێ ھاتیە ئیمزا کرن رازینە و ھەموو پەیمانێن مە د چارچۆڤێ قانوونێن نێڤدەولەتی دانە و نە ل دژی حوکمەتا عیراقێ و چو ئالیەکی دی داینە).
تانەر یلدز وەزیرێ وزێ یێ تورکیا د پرێس کۆنفرانسەکی دا بەرسڤا پرسیارێن رۆژناماڤان دا و د بەرسڤا پرسەکی یا د دەربارێ پەیمانێن پەترۆلێ و ناکۆکیێن د ناڤبەرا حوکمەتا عیراقێ و حوکمەتا ھەرێما کوردستانێ دا راگەھاند کو ئەو ژ ئالیێ خوە ڤە ژ وان پەیمانێن کو ل گەل کوردستانێ بۆ وەرگرتن و ڤەگوھەستنا پەترۆلێ ئیمزا کرینە، د رازینە گۆت: (ئەم وەک حوکمەتا تورکیا دخوازین حوکمەتا ھەرێما کوردستانێ و حوکمەتا ناڤەندی یا عیراقێ ناکۆکیێن د ناڤبەرا خوە دا چارە بکەن لێ د ھەر رەوشەکی دا ئەم بەرھەڤین پەترۆلا کوردان وەربگرین و ھەر دەمێ پێدڤی بوو رێژا ڤەگوھەستنا پەترۆل کوردستانا عیراقێ زێدە بکەین).
ھەروەسا تانەر یلدز ئەو یەک ژی راگەھاند کو حوکمەتا وان دخوازیت د زووترین دەم دا ئارامی بھێتە عیراقێ و ھەموو رۆژھەلاتا ناڤین و گۆت: (ھەر ئالۆزیەکا ل ھەرێما رۆژھەلاتا ناڤین دروست دبیت کاریگەریا خوە ل ھەموو وەلاتێن ڤێ ھەرێمێ دکەت و کاریگەریا ئالۆزیان ھەر چەندە کێم ژی بیت ل وەلاتێ مە ژی دھێتە دیتن و بۆ ڤێ چەندێ دڤێت د ھەر واری دا ھەماھەنگیەکا مەزن د ناڤبەرا حوکمەتێن رۆژھەلاتا ناڤین دا ھەبیت بۆ ڤەگەراندنا ئارامی و ژ ناڤبرنا تەڤگەرێن تیرۆرستی و ھەر دەمێ ئۆپەراسیۆنا ئازادکرنا دەڤەرێن ل ژێر کۆنترۆلا داعشێ ھاتنە دەستپێکرن ئەم دێ ژی د گەلەک واران دا ھەڤکاریا حوکمەتا عیراقێ و یا کوردان بکەین).
تانەر یلدز د داویا ئاخڤتنا خوە دا ژی راگەھاند کو ئارمانجا سەرەکی یا حوکمەتا وان دروستکرنا پەیوەندیێن دۆستانە یە ل رۆژھەلاتا ناڤین و ل گەل وەلاتێن ھەڤسنۆر و گۆت: (مخابن ھەتا نھا ل سووریێ رژێما ئەسەد و داعش بەردەوامن د کوشتنا خەلکێن سڤیل دا و ل عیراقێ ژی چەکدارێن داعشێ نیڤا ئاخا وی وەلاتی کۆنترۆل کریە و بۆ ڤێ یەکێ ژی پێدڤی ب ھەماھەنگیەکا بەرچاڤ ھەیە و بۆ ژناڤبرنا مەترسیا تیرۆرستان ل دەڤەرێ دڤێت ئەم ھاریکاریا ھەڤدو بکەین).
ئەڤرۆ:
پشتی ئالۆزیا د ناڤبەرا ھەردو پارتێن کوردی دا ھێزێن پاسدارێن ئیرانێ ل دەڤەرا خنێرە و کەلەشینێ خوە بجە دکەن و ل دووڤ زانیاریان بەرھەڤیێ بۆ ئۆپەراسیۆنەکا بەرفرەە دکەن و ل ھەمبەر دا پارتا کارکەرێن کوردستانێ ژی ھێزێن خوە خستیە د ئامادە باشیێ دا.
د دەمەکی دا کو حوکمەتا ھەرێما کوردستانێ و ھندەک ئالیێن سیاسی ھەول ددەن ناکۆکیێن د ناڤبەرا PKK و پارتی دیموکراتی کوردستان- ئیران دا ب دیالۆگێ چارە بکەن، ھێزێن سەربازی یێن ئیرانێ ژی ب رەنگەکی ئاشکرا بەرھەڤیێ بۆ ئۆپەراسیۆنەکا بەرفرەە دکەن و ھژمارەکا زێدە ھێزێن خوە ل دەڤەرێن سەر سنۆرێن ھەرێما کوردستانێ یێن ل گەل باژێرێن ئورمیێ و شنۆ کۆم کرینە و ل دووڤ ئاخڤتنێن شارەزایێن رۆژھەلاتێ کوردستانێ ھەکە ئیران ئۆپەراسیۆنەکا سەربازی ئەنجام بدەت دێ شەرەکی دەمدرێژ و دژوار ل رۆژھەلاتێ کوردستانێ دەستپێ بکەت.
ھەر د ڤێ دەربارێ دا ھەڤال باھۆز ئەندامێ کۆمیتەیا راگەھاندنا پارتا ژیانا ئازاد یێ کوردستانێ راگەھاند کو دەولەتا ئیرانێ دخوازیت ژ ناکۆکیێن د ناڤبەرا پارتا وان و پارتا دیمۆکراتا کوردستانا ئیرانێ دا مفایێ وەربگریت و ڤێ دەلیڤێ بۆ لاواز کرنا ھێزێن کوردی ب کار بھینیت و گۆت: (ھێزێن مە ب تەمامی بۆ بەرخوەدانەکا دژوار و بۆ پاراستنا ھەرێمێن ل ژێر دەستێ مە دا د ئامادە باشیێ دانە و ھەکە ئیران شاشیەکا وەسا بکەت دێ تووشی زیانەکا مەزن بھێت و شەر ب تەمامی بۆ رۆژھەلاتێ کوردستانێ بھێتە ڤەگوھاستن).
ھەروەسا ئاشکرا ژی کر کو ل دەڤەرا خنێرە شەرەکی دژوار د ناڤبەرا ھێزێن وان و سەربازێن ئیرانێ دا دروست بوویە و د ئەنجاما شەری دا دو گەریلایێن وان ژیانا خوە ژ دەست داینە و دو گەریلا ژی بەرزە بووینە و گۆت: (د ئەنجاما شەرێ دژوار یێ یەک رۆژی دا چار پاسدارێن ئیرانێ ھاتینە کوشتن و شەش ژی بریندار بووینە و دو ھەڤالێن مە ژی شەھید کەڤتنە و دو گەریلا یێن مە ژی ھەتا نھا نە گەھشتنە ناڤەندێن خوە).
ل ئالیێ دی سدیق دەرویشی ئەندامێ کۆمیتەیا ناڤەندی یا پارتی دیموکراتی کوردستان- ئیران د داخۆیانیەکی رۆژنامەڤانی دا راگەھاند کو ئالۆزیێن وان یێن ل گەل PKK ب داوی نەھاتینە و گۆت: (ھێزێن گەریلا جارەکا دی رێ ل ھێزێن مە گرتن و نەھێلان پێشمەرگەیێن مە دەربازێ رۆژھەلاتێ کوردستانێ ببن و ئەو کریارا گەریلایان نە د خزمەتا دۆزا کورد و کوردستانێ دایە و داخواز ژ برادەرێن PKK دکەم دەست ژ ڤان کریارێن خوە یێن نە رەوا بەردەن و نەبنە سەدەمێ شەرەکی براکوژیێ).
ل ئالیێ دی ب ھزاران وەلاتیێن کورد یێن ھەر چار پارچێن کوردستانێ ب رەنگێن جودا جودا نەرازیبوونا خوە ل ھەمبەر ئالۆزیا د ناڤبەر ھەر دو پارتێن کوردستانی دا دیار کرن و داخواز ژ سەرۆکێ ھەرێما کوردستانێ و ھەموو پارتێن سیاسی یێن ھەرێما کوردستانێ ژی کرن کو ب رێیا دانوستاندنان بزاڤێ بکەن کو ئالۆزیا ھەرێما کەلەشینێ چارە ببیت و نابیت ئێدی کورد شەرێ کوردی بکەت. چونکو ناکۆکیێن ڤێ دوماھیێ تنێ د خزمەتا دۆژمنێ کوردستانێ دانە و نھا دەلیڤەکا مەزن بۆ کوردان ھاتیە پێش دا چارەنڤیسێ خوە دیار بکەن و د دەمەکی وەسا دا شەرێ د ناڤبەرا دو پارتێن کوردی خزمەتا دۆزا نەتەوی یا گەلێ کوردستانێ ناکەت و دڤێت ھەر دو ئالی ژی دوور ژ شەری و ب رێیا دانوستاندنان پرسێن خوە چارە بکەن.
ئه‌ڤرۆ:
ئاژانسا ئەلمانیا د راپۆرتەکێ دا دیار دکەت کو پشتی مەسعود بارزانی سەرۆکێ ھەرێما کوردستانێ سەرەدانا ئەمریکا و ھندەک وەلاتێن ئوروپی کری، پشتەڤانیەکا باش بۆ راگەھاندنا دەولەتا کوردی بدەستڤە ئینایە و بارزانی دێ دەولەتا کوردی راگەھینیت و وەلاتێن زلھێز ژی دژبەریا راگەھاندنا دەولەتا کوردی ناکەن.
ئاژانسا دویتشە فیلە یا ئەلمانیا د راپۆرتەکێ دا بەحسێ رەوشا دووماھیێ یا رۆژھەلاتا ناڤین، عیراق و کوردستانێ دکەت و د راپۆرتێ دا ھاتیە دیار کرن کو ئەڤرۆکە ل رۆژھەلاتا ناڤین دو دەولەت پارچە بووینە و ئەو ژی عیراق و سووریانە، داعشێ پشکەک گەلەک مەزن ژ ئاخا ھەر دو وەلاتان داگیر کریە و نھا بەرێ خوە ددەتە بەغدا و دیمەشقێ و ل عیراق و سووریا ئێدی دەولەتەکا ئێکگرتی نەمایە و رەوشا وەلاتان ژی گەلەک خرابە و حوکمەتێن ناڤەندی یێن ھەر دو وەلاتان ژی نەشێن ئێمناھیێ بۆ خەلکێ خوە دابین بکەن و رۆژانە رێکخستنا تیرۆرستی یا داعشێ ب دەھان وەلاتیێن بێ تاوان دکوژیت و لەشکرێ وان وەلاتان ژی نەشیایە سنۆرەکێ بۆ زێدەگاڤیێن داعشێ دانێت.
د بەردەوامیا راپۆرتێ دا ھاتیە دیار کرن کو ھەرێما کوردستانێ ب سیاسەتا سەرۆکێ وێ ھەرێمێ مەسعود بارزانی شیایە ئاخا خوە ژ تیرۆرستێن داعشێ پاقژ بکەت و نھا کورد ئیدارا کەرکووکێ دکەن و دخوازن ب ریفراندومەکێ وی باژارێ مەزن و گرنگ ڤەگەریننە سەر ھەرێما کوردستانێ و نھا کار بۆ وێ یەکێ دھێتە کرن و ب ڤەگەراندنا کەرکووکێ دێ بارزانی دەولەتا کوردی راگەھینیت.
ئاژانسا ئەلمانی ئاماژە ب ڤێ یەکێ کریە کو د سەرەدانا خوە یا ڤێ دووماھیێ دا بۆ ئەمریکا سەرۆک و جێگرێ سەرۆکێ ئەمریکا پشتەڤانیا خوە بۆ بارزانی دیار کرینە و وان ژی ئێدی نەڤێت کو کورد ببنە پشکەک ژ ئالۆزیێن ناڤخوەیی ل عیراقێ، چونکو بۆ ئەمریکا و وەلاتێن رۆژئاڤا ھەبوونا ھەرێم یان ژی دەولەتەکا کوردی ل عیراقێ گەلەک گرنگە، کورد نھا باشتر ژ ھەر کەسەکێ بەرژەوەندیێن رۆژئاڤا دپارێزن و ب ھزاران نەتەوە و کێم نەتەوێن دی یێن کو ژ دەستێ داعشێ رەڤینە نھا ل ھەرێما کوردستانێ دانە و کورد وان دپارێزن و ئەوە ژی خالەکا گەلەک گرنگە کو دبیتە ئەگەر وەلاتێن رۆژئاڤا پشتەڤانیێ ل دەولەتا کوردی بکەن.
د دووماھیا راپۆرتا ئاژانسا دویتشە یا ئەلمانیا دا ئەو یەک ژی ھاتیە دیار کرن کو کورد ل ھەرێما کوردستانێ و پارچێن دی یێن کوردستانێ نھا پتر ژ ھەر دەمەکێ پشتەڤانیێ ل راگەھاندنا دەولەتا کوردی دکەن و گەلەک وەلاتێن کو بەری نھا دژبەریا کوردان دکرن ژی پشتی شەرێ داعشێ بۆ وان دیار بوو کو ھەبوونا دەولەتەکا کوردی چو زیانا خوە بۆ وان نینە، بەلکو بەرۆڤاژی وێ یەکێ کورد دشێن ببنە جیران و ھەڤپەیمانێن باش بۆ وان، ئێک ژ وان وەلاتێن کو نھا ل ھەمبەر دەولەتا کوردی وەک بەرێ توند نینە ژی تورکیایە و بێگومان تورکیا دەمێ دیت ئەمریکا و ئوروپا پشتەڤانیێ ل کوردان دکەن ئێدی ناخوازیت پەیوەندیێن خوە یێن ب ھێز کو ل گەل کوردان ھەنە تێک بدەت و ئەو ھەموو خالە ژی دبنە ئەگەر کو بارزانی رژد بیت د دەمەکێ نێزیک دا دەولەتا کوردی راگەھینیت.
نيشاندان