ئه‌ڤرۆ نيوز:

رەوانگەھا سوورى یا مافێن مرۆڤان د داخویانیەکێ دا ئه‌ڤرۆ، 24ێ گولانێ، راگه‌ھاند کو ژ دوھى وه‌ره‌ شەر و ب هه‌ڤچوون د ناڤبەرا شەرڤانێن یەکینەیێن پاراستنا گەل (یه‌په‌گه‌) و چەکدارێن داش دا ل سەرێ کانیا رۆژاڤایێ کوردستانێ د بەردەوامن.

شەر و ب هه‌ڤچوون ل ناڤچەیا ئەبۆ شخات ل باشوورێ-رۆژاڤایێ باژارۆکێ سەرێ کانیێ رووداينه‌، چەکدارێن داعشێ ژی ئۆتۆمبیلەکا بۆمبەکری ل وێ ناڤچەیێن تەقاندن.

ل گۆر ژێده‌ران، ھەر دو لايان پێگەھێن ھەڤدو تۆپباران دکه‌ن، لێ ھەتا نھا ئامارا قوربانیێن تۆپباران و تەقینێ نە دیارن.

ئه‌ڤرۆ نيوز، نيوار محه‌مه‌د سه‌ليم:

ئاخفتنكه‌رێ ب ناڤێ فراكسيۆنا زه‌ر ل په‌رله‌مانێ كوردستانێ راگه‌هاند كو ئه‌وان ئاگه‌هـ ژ چو شاندێن ئێكه‌تيا په‌رله‌مانتاران نينه‌ به‌ر ب چيايێ قه‌نديل چوو بن و داخواز ژى ژ په‌رله‌مانى كريه‌ هه‌لويست هه‌بيت.

محه‌مه‌د عه‌لى ياسين، ئاخفتنكه‌رێ ب ناڤێ فراكسيۆنا زه‌ر ل په‌رله‌مانێ كوردستانێ، بۆ ئه‌ڤرۆ نيوز گۆت: “ئاگه‌هـ ژ چو شاندێن ئێكه‌تيا په‌رله‌مانتاران نينه‌ به‌ر ب چيايێ قه‌نديل چوو بن و هه‌كه‌ چووبن ژى ئه‌م نه‌هاتينه‌ ئاگه‌هدار كرن”.

محه‌مه‌د عه‌لى ياسين زێده‌تر گۆت: “ژ به‌ر كو ئه‌ڤه پرسه‌كا چاره‌نڤيس سازه‌ و گرێدايى نه‌ته‌وا كورده‌، ئه‌وان وه‌كو فراكسيۆنا پارتى ديموكراتى كوردستان ل په‌رله‌مانێ كوردستانێ ياداشته‌ك دايه‌ په‌رله‌مانێ كوردستانێ و داخواز ژێ كريه‌ كو هه‌لويسته‌ك هه‌بيت”.

ئاخفتنكه‌رێ ب ناڤێ فراكسيۆنا زه‌ر ل په‌رله‌مانێ كوردستانێ دا زانين ژى كو ب گۆره‌يى قانوونا ژماره‌ ئێك يا په‌رله‌مانێ كوردستانێ ل سالا 1992ێ دڤێت ل سه‌ر هه‌ر پرسه‌كا چاره‌نڤيس ساز په‌رله‌مانێ كوردستانێ هه‌لويست هه‌بيت.

رۆژا پێنجشه‌مبى هێزێن په‌كه‌كێ ژماره‌كا پێشمه‌رگێن پارتيا ديموكراتا كوردستانا ئيرانێ ئابلۆقه‌ دابوون و هه‌ردو لايه‌نان روونشتن ئه‌نجام ددان دا كو ڤێ كێشێ چاره‌ كه‌ن كو پارتيا ديموكراتا كوردستانا ئيرانێ دڤيا بچيته‌ ده‌ڤه‌ره‌كا نێزێك شنۆ يا سه‌ر ب پارێزگه‌ها ورمێ ڤه‌، په‌كه‌كه‌ ژى دبێژيت كو ئه‌وان ڤيايه‌ گۆمركه‌كێ ل وێرێ بدانن و ئه‌و ده‌ڤه‌ر يا وانه‌ و رێ ب پێشمه‌رگه‌يى ناده‌ن ل وێرێ بيت.

دارا ناتق، ئه‌ندامێ ده‌فته‌را سياسى يا پارتيا ديموكراتا كوردستانێ ئيرانێ د داخۆيانيه‌كا تايبه‌ت دا، بۆ ئه‌ڤرۆ نيوز گۆت: “ئه‌ڤرۆ سپێده‌هيا رۆژا ئێكشه‌مبى رێكه‌فتى 24ى گۆلانا 2015ێ چه‌كدارێن په‌كه‌كێ هێرش كريه‌ سه‌ر هێزێن پێشمه‌رگێ كوردستانێ ل ده‌ڤه‌را خنێره‌”.

ئه‌ندامێ ده‌فته‌را سياسى يا پارتيا ديموكراتا كوردستانێ ئيرانێ گۆتژى: “چه‌كدارێن په‌كه‌كێ ژ دو لايان ڤه‌ هێرش كريه‌ سه‌ر پێشمه‌رگێ پارتى ل رۆژهه‌لات و ئه‌ڤه‌ د ده‌مه‌كى دابوويه‌ كو پێشمه‌رگه‌يى ئه‌و هزر نه‌دكر كو دێ هێرشێ كه‌نه‌ سه‌ر وان”.

دارا ناتق دا زانين ژى كو د ئه‌نجامێ ڤێ هێرشێ دا پێشمه‌رگه‌يێ رۆژهه‌لات ژماره‌كا شه‌هيد و برينداران هه‌يه‌، به‌لێ ژ به‌ر به‌رده‌واميا شه‌رى هێشتا ژمارا دروست يا شه‌هيد و برينداران نه‌هاتيه‌ زانين.