ئه‌ڤرۆ نيوز:
رێڤه‌به‌رێ رێڤه‌به‌ريا پاسپۆرتان پارێزگه‌ها دهۆكێ بۆ راديۆيا دهۆك راگه‌هاند كو پشتى بوويه جۆرێ A زێده‌ترى مليۆن و نيڤ پاسپۆرتان ده‌ركرينه هه‌ر ژ 2010ێ و هه‌تا نوكه و ده‌رياره‌يى ئاواران ژى دا زانين كو نێزيكى 11 هزار پاسپۆرتان بۆ هاتينه چێكرن.
نه‌وزاد مه‌جيد زێده‌تر گۆت: “دێ باره‌گايێ ژماره دو ل ناڤ دهۆكێ ڤه‌كه‌ين، ل ده‌سپێكێ ب تنێ دێ بۆ ئاواران بيت دا كو قه‌ره‌بالغ ل سه‌ر رێڤه‌به‌ريێ رابيت و وه‌لاتيان ژى رازى بكه‌ين”.
دا زانين ژى كو ب تنێ كێشا وان هه‌يى، گرێدايى تۆڕێ يه و ئه‌و ژى تشته‌كێ ته‌كنيكى يه و گرێدايى به‌غدايه په‌يوه‌ندى ب وان ڤه نينه.
ئه‌ڤرۆ نيوز:
ره‌وانگه‌ها سورى بۆ مافێن مرۆڤى به‌لاڤ كر كو رۆژا شه‌مبى تيرۆرستێن داعش پشتى 10 رۆژان ژ ده‌ست ب سه‌ر داگرتنا باژێرێ ته‌دمور يێ مێژوويى، ل ناڤه‌راستا سوريا، زيندارنا مه‌زن يا وى باژێر په‌قاند و وێنێن وێ به‌لاڤكرن.
زيندانا ته‌دمۆر ب ئێك ژ وان زيندانان ل سه‌ر ئاستێ ده‌ڤه‌رێ و جيهانێ دهێته هژمارتن يێن ناڤوده‌نگيا خوه هه‌يى ب ره‌نگه‌كى ل سه‌ر پشكه‌كا زۆر يا ئه‌ردى هاتيه دروستكرن و ژ لايێ چالاكڤان و وه‌لاتيێن سۆريا ڤه ب هێمايێ سه‌رداكه‌فتنا رژێما به‌شار ئه‌سه‌د دژى وه‌لاتيێن وى وه‌لاتى دهێته دانان.
ئەڤرۆ نيوز:
رێکخراوا یونیسف یا جیھانی راگەھاند، ژ ئەگەرێ ئەو شەرێ ئەڤ سالە ل وەلاتێ عیراقێ دھێتە کرن، ٢٠% ژ زارۆیێن وەلاتێ ناڤبری ژ خواندنێ ھاتینە بێ بەھرکرن کو رێژا وان دگەھیتە ملیۆنەک و ١٨٥ ھزار زارۆیان و ئەڤە ژی رێژەکا مەترسیدارە ل سەر عیراقێ.
رێکخراوا جیھانی یونیسف یا تایبەت ب مافێن زارۆیان ڤە راگەھاند کو ئەڤ شەرێ نھا ل عیراقێ دھێتە کرن بوویە ئەگەر کو ب ھزاران خێزان ژ باژێرێ خوە ئاوارە ببن و بوویە ئەگەر کو ملیۆنەک و ١٨٥ ھزار زارۆ ژ خواندنێ بێ بەھر ببن کو دگەھیتە رێژا ٢٠% ژ زارۆیێن ل عیراقێ دژین.
رێکخراوا ناڤبری د مالپەرێ خوە دا ئاشکرا کریە کو ئەڤ رێژە دێ مەترسیەکا مەزن ل سەر عیراقێ پەیدا کەت و ئایندێ وان قوتابیان یێ زانستی ھاتیە تێکدان و ئەڤە رەنگە ببیتە ئەگەر کو زارۆیێن عیراقێ ھەتا پێنچ سالێن دی ژی زیانا خوە ژ ڤی شەری ببینن و تێدا ھاتیە ژی: پێدڤیە وەزارەتا پەروەردێ ل عیراقێ پێنگاڤێن جدی ب ھاڤێژیت بۆ ھندێ ئەڤ قوتابیە ھەموو ئەڤ سالا چوویی ژ خواندنێ بێ بەھرنەبن و بۆ وان بھێتە قەرەبووکرن ب ھەر رێیەکا ھەبیت، چونکو زێدەباری ھندێ کو سالەکا خواندنێ ژ وان چوو، ئەو ئێدی ژ ئالیێ دەروونی ڤە دێ تێکچن.
د ڤێ راپۆرتێ دا کو رێکخراوا یونیسف ب ھەڤکاری ل گەل حوکمەتا عیراقێ و ھەرێما کوردستانێ ئەنجام دایە ئاشکرا بوویە کو ژ سەرجەمێ ملیۆنەک و ١٨٥ ھزار قوتابیێن بێ بەھربووین ژ خواندنێ، ٧١٢ ھزار ل پارێزگەھێن عیراقێ دژین و ٦٦ ھزار ژی ل پارێزگەھێن ھەرێما کوردستانێ. ھەر ژ ڤی سەرجەمی ٤٨٥ ھزار زارۆ د ناڤبەرا شەش ھەتا ١١ سالیێ دانە و ٦٥٠ ھزار دناڤبەرا ١١ – ١٤ سالیێ دانە.
ل دووماھیا راپۆرتێ رێکخراوا یونیسف ئاشکرا دکەت کو رێژا قوتابیێن کچ ئەوێن ھاتینە بێ بەھرکرن ژ خواندنێ دو جاران تەمەت قوتابیێن کۆرە.
عەبد یوسف، رێڤەبەرێ گشتیێ پەروەردا پارێزگەھا دھۆکێ بۆ ئەڤرۆ دیار کر، بۆ وەرزێ خواندنا ئەڤ سالە مە ل پارێزگەھا دھۆکێ ٣٠ قوتابخانە تایبەت بۆ ئاوارێن ل دھۆکێ دژین ڤەکربوون کو ١٨ ژ وان قوتابخانان یێن ١٢ رێزی بوون و یێن دی یێن شەش رێزی بوون ل ناڤ کەمپان دا ھاتبوونە ڤەکرن و گۆت: ژ بەر زێدەبوونا رێژا ئاواران و نە جھگیربوونا وان، ئەم نەشیاینە رێژا وان یا دروست بزانین.
رێڤەبەرێ گشتیێ پەروەردا پارێزگەھا دھۆکێ ئاماژە دا وێ چەندێ، دەمێ مە قوتابخانە داناین مە رێ بۆ ھەموو قوتابیێن ئاوارە خۆشکر کو بخوونن، بەلێ گەلەک قوتابی ھەبوون ژ بەر تێکچوونا رەوشا وان یا ئابووری یان ژی یا دەروونی نەشیان بەردەوامیێ ب خواندنا خوە بدەن و گۆت ژی: مە دو قوتابخانە ب درەنگی ڤە ل ناڤ کەمپان ڤەکرن ب تنێ بۆ ب ھێزبوونێ، وەکو دی خواندنا ئەڤ سالە بۆ وان ناھێتە ھژمارتن.
ئەڤرۆ نیوز:
ل گۆرەی وان ئامارێن ئەڤرۆ ب دەستخۆڤەخستین، د ماوێ دو ھەیڤێن بۆری دا نێزیکی 150 ترۆمبێلان ل ھەرێما کوردستانێ سۆتینە و ژ ڤی سەرجەمی 74 ترۆمبێل ژ ئەگەرێ سۆتنا فیولپەمپی سۆتینە و پتریا وان ترۆمبێلان ژ کارکەڤتینە. فیتەرەکی دیار کر کو پانزینا نھا کەرەستەکێ وەکو رساسی تێدایە و فیولپەمپی گەرم دکەت و دسۆژیت.
نوژدار حسێن شۆفێرەکێ پارێزگەھا دھۆکێ یەو خودانێ ترۆمبێلەکا ئەلنترایە بۆ ئەڤرۆ دیار کر، پشتی وی پانزینا پیس کریە ترۆمبێلا خوە، فیولپەمپێ ترۆمبێلا وی سۆت و بۆ ماوێ سێ جاران د ئێک ھەیڤ دا وی فیولپەمپێ ترۆمبێلا خوە گوھۆری و گۆت: ل جارا چارێ د گەرما نیڤرۆ دا فیولپەمپێ ترۆمبێلا من سۆت و ئێکسەر ئاگر بەربوو ترۆمبێلێ، بەلێ خۆشبەختانە مە زوو کۆنترۆل ل سەر ئاگری کر.
ناڤبری دیار کر کو مخابنە حوکمەت ھوسا سەرەدەریێ ل گەل وەلاتیان بکەت و ئەڤ پانزینا ھوسا یا پیس بەلاڤ دکر ھەتا بوویە ئەگەرێ سۆتنا فیولپەمپێن سەدان ترۆمبێلێن وەلاتیان و گۆت: مادەم حوکمەتێ دزانی یا پیسە بلا نەھاتە بەلاڤکرن و ببایە قەیران، باشتر بوو ترۆمبێلێن وەلاتیان بسۆژینیت.
ل گۆرەی وان ئامارێن ئەڤرۆ ب دەستخۆڤەخستین، د ماوێ دو ھەیڤێن بۆری دا نێزیکی 150 ترۆمبێلان ل ھەرێما کوردستانێ سۆتینە و ژ ڤی سەرجەمی 74 ترۆمبێل ژ ئەگەرێ سۆتنا فیولپەمپی سۆتینە و پتریا وان ترۆمبێلان ژ کارکەڤتینە.
ھوستایێ چێکرنا فیولپەمپێن ترۆمبێلان محەمەد جەمیل ژ پیشەسازیا دھۆکێ بۆ ئەڤرۆ دیار کر، ئەڤ پانزینا د ماوێ دو ھەیڤێن بۆری دا ل ھەرێما کوردستانێ ھاتیە بەلاڤکرن کەرەستەکێ وەکو رساسی تێدابوو و د بۆ ئەگەر کو فیولپەمپ زوو گەرم ببیت و پاشی ب سۆژیت و گۆت: دڤێت شۆفێر باش ئاگەھداری دەنگێ پانزینێ بن، چونکو ھەر دەمێ دەنگێ گڤە گڤێ ژ فیولپەمپی و پانزینێ ھات، وی دەمی مەترسیا سۆتنا فیولپەمپی و ترۆمبێلێ د ئارادایە.
خویاژی کر، ئەڤ ئاریشا نھا یا پیسیا پانزینێ بوویە ئەگەر کو چێکەرێن فیولپەمپ ل پیشەسازیێ گەلەک مشە بووینە و ئەو کەسێ وی کاری ژی نەکەت دەست ھاڤێتیێ و ڤێ ژی مەترسی زێدەتر لێ کریە، چونکو ھندەک نزانن ب دروستی فیولپەمپى گرێدەن و ھندەک ژی ھەنە یێن نە ئۆرجینال و بێ سەروبەر دئێخنێ، ئەڤە ژی دبیتە ئەگەر کو ترۆمبێل ب سۆژن.
ل گۆر وان ئامارێن رۆژنامێ ب دەستخۆڤە ئیناین پتر ژ ملیۆن ترۆمبێلان ل ھەرێما کوردستانێ ھەنە و ڤێ پانزینێ بکاردئینن و حوکمەتێ ژی بریار دابوو ھەر ترۆمبێلەکا ب ئاگری ب سۆژیت، ب رێژا 30% وان ترۆمبێلا قەرەبوو بکەت، بەلێ ھەتا نوکە ئەڤ بریارە نەھاتیە بجھئینان و ئەگەر ژی بۆ پەیدابوونا قەیرانا دارایی ڤەدگەرن.
رائیدێ مافپەروەر ئازاد تاھا، بەرپرسێ راگەھاندنا ھاتن و چوونا دھۆکێ بۆ ئەڤرۆ دیار کر کو سۆتنا فیولپەمپ و ترۆمبێلان ئەگەرەکێ تەکنیکیە و گرێدای رێڤەبەریا وان نینە و گۆت: دەمێ مرۆڤ ل رێیێن دەرڤە ھاتن و چوونێ دکەت، دێ بینیت ھەر د ناڤبەرا چەند کیلۆمەتەرەکا چەند ترۆمبێلەک ژ بەر خراببوونا فیولپەمپى ژ کارکەفتینە.
ئه‌ڤرۆ نيوز:
سه‌رۆكێ جڤاتا وه‌زيرێن حوكمه‌تا عيراقێ حه‌يده‌ر عه‌بادى ل نڤيسينگه‌ها خوه پێشوازى ل سه‌رۆكێ جڤاتا نوونه‌رێن عيراقێ، سه‌ليم جبۆرى، كر.
ب گۆره‌يى به‌ياننامه‌كا سه‌رۆكاتيا جڤاتا وه‌زيران كو ئه‌ڤرۆ نيوز دانه‌ك ل ده‌ست خوه خستيه، د ڤێ پێشوازێكرنێ دا، به‌حس ل پێشهاتێن ئه‌منى و سياسى كرن و ته‌كست ل سه‌ر هه‌ڤپشكيا د ناڤبه‌را ده‌سته‌لاتا دانانا قانوونان و بجهئينانێ دا كر و به‌رنامێ حوكمه‌تێ بۆ ئاواران ژى ته‌وه‌ره‌كێ دى يێ كۆمبوونێ بوو.
ئاماژه ب وێ چه‌ندێ ژى كريه كو هه‌ر د ڤێ روونشتنێ دا سه‌ركه‌فتنێن هێزێن ئه‌منى يێن عيراقى و پۆليس و له‌شكرى و حه‌شه‌د شه‌عبى بلند هاتنه نرخاندن و ته‌كست ل سه‌ر هه‌ڤپشكيا نشتيمانى كر و ئێكرێزيا گۆتار و لايه‌نان دا كو ل هه‌ڤدژى هه‌ر هه‌ڤركيه‌كا ل وه‌لاتى هه‌يى ببن.
هه‌ر د ڤێ به‌ياننامێ دا هاتيه كو حه‌يده‌ر عه‌بادى يێ سه‌رۆك وه‌زير و سه‌ليم جبۆرى يێ سه‌رۆكێ جڤاتا نوونه‌ران به‌حس ل گرنگيا پشته‌ڤانيا نێڤده‌وله‌تى كريه ل دژاتيكرنا چه‌كدارێن تيرۆرستێن داعش دا.
ئەڤرۆ نیوز:
سەرۆکایەتیا جڤاتا وەزیرێن ھەرێما کوردستانێ پڕۆژەیەک بەرھەڤکریە و ھنارتیە پەرلەمانێ کوردستانێ، ھەتا رێکێ بدەت حوکمەت بۆ دەربازکرنا ڤێ قەیرانا دارایی بشێت قەڕی ل وەلاتێن بیانی وەربگریت، ئەندامەکێ لیژنا ئەوقاف و کاروبارێن ئاینی ژی دبێژیت، ئەم دژی وەرگرتنا قەڕینە ئەگەر زێدەھی بچیتە سەر و دبیتە ریبا، د ھەمبەرا لیژنا دارایی و ئابووری رادگەھینیت، ئەف قەڕێ دھێتەکرن ٥٠٠ ملیۆن دۆلارە و بۆ گەشەپێدانا ژێرخانا ئابووریا ھەرێمێ یە، ئەگەر دەنگ ئینا دێ پڕۆژە ھێتە پەسەندکرن.
مەدینە ئەیوب، ئەنداما لیژنا دارایی و ئابووریا پەرلەمانێ کوردستانێ بۆ رۆژناما ئەڤرۆ دیارکر، بڕیارە حوکمەتا ھەرێما کوردستانێ بۆ پتر گەشەکرنا ژێرخانا ئابووریا ھەرێمێ قەڕی بکەت و گۆتژی” ئەف قەڕە پێنج ملیۆن دۆلارن و ل دو بانکا دێ ھێتە وەرگرتن، کو ئێک ژوانا بانکەکا ئورۆپی و یا بانکەکا ئەمریکیە، خواندنا ئێکێ بۆ پڕۆژەی ھاتیە کرن ل حەفتیا بۆری و بڕیارە ڤێ حەفتیێ خواندنا دویێ بۆ بھێتەکرن وبھێتە پەسەندکرن، راستە لیژنا ئەوقافێ تێبینی ل سەر وەرگرتنا قەڕی ھەبوو، بەلێ دێ رەتکرنا قەڕی مینیت سەر ئەندامێن پەرلەمانی، ئەگەر د کۆمبوونا داھاتی دەنگێ قانوونی بدەستڤە ئینانا، ئەڤە دێ پڕۆژە ھێتە دەربازکرن و بەرۆڤاژی ئەگەر دەنگ نە ئینا ئەڤە دێ ھێتە رەتکرن، پتریا وەلاتێن جیھانێ قەڕی دکەن و تشتەکێ ئاسایە، ژبەرکو ئەمریکا بخوە یا قەڕدارە و نێزیکی ٢٠٠ وەلاتێن جیھانێ قەڕکرینە، ھەتا عێراقێ بخوە چەندین قەڕکرینە ل بانکێن جیھانی و ئیسلامی، بابەتێ قەڕی بابەتەکێ جیھانیە، مەرج نینە زێدەھیا راستەوخۆ بچیتە سەر وەلات ھەیە بۆ ٤٠ سالا قەڕکریە، دبیت حوکمەتا ھەرێمێ بێژیت ڤان بانکا دێ وی دەمی زێدەھیێ بدەین، دەمێ قەیرانا دارایی دوماھی دھێت، ڤێ رەوشێ دا نەچارین قەڕی بکەین، چونکو بودجە نینە، ئەڤەژی بۆ موچەی نینە، ئەگەر بۆ موچەی قەڕی بکەین، چو مفا نابیت ژبۆ ھەرێما کوردستانێ”.
مەلا ئەنەس دۆسکی، ئەندامێ لیژنا ئەوقاف و کاروبارێن ئاینی ل پەرلەمانێ کوردستانێ بۆ رۆژناما ئەڤرۆ گۆت” پشتی ھاتنا قەیرانا دارایی بۆ ھەرێما کوردستانێ و عێراقێ، حوکمەتێ پێشنیاز کریە پڕۆژە قانوونەک ژلایێ پەرلەمانی بھێتە پەسەندکرن، ئەوژی بۆ وەرگرتنا قەڕی ل وەلاتێن دەرڤە، بەلێ مە وەکی لیژنا ئەوقاف و کاروبارێن ئاینی تێبینی ل سەر ئەڤی قەڕی ھەنە، چونکو راستە بەغدا بودجە و مووچێ ھەرێما کوردستانێ بڕیە و نەچارین چارەسەریەکێ ڤەبینین، بەلێ ھەر وەلاتەکێ قەڕی بدەتە ھەرێما کوردستانێ کەس یێ بەرھەڤ نینە بێ زێدەھی ئەڤی قەڕی بدەت، ئەڤەژی دێ بیتە ئەگەرێ حەرامبوونا قەڕی و دچیتە چوارچوڤێ ریبایێ د ئیسلامێ دا، لەوڕا ئەم ب ھەموو شێوەیەکی دژی وەرگرتنا قەڕینە ژلایێ حوکمەتا ھەرێما کوردستانێ ڤە، ئەگەر زێدەھی ل سەربیت و ببیتە ریبا، دگەل ڤێ چەندێ مە چەند رێیەک پێشنیارکرینە، ژوانا فرۆتنا پتڕۆلێ ب قەر ژلایێ ھەرێمێ ڤە، دشێت پتڕۆلا خوە بقەر بفرۆشیت و چو ئاریشە تێدا نینە، ھەروەسا نەھێلانا موچێن فەرمانبەرێن بندیوار و کەسێ، پتری ئێک موچەی ھەی، زۆر رێکێن دی ھەنە و حوکمەت دشێن بەدیلێ قەڕی مەزاختیێن خوە کێم بکەت”.
ئەڤرۆ نیۆز، قائید میرۆ:
ل میحوەرێ باشیک تیرۆرستێن داعش ھێزەکا مەزن ل دەڤەرێ کۆمکریە و فەرماندەکێ پێشمەرگەی ژی رادگەھینيت، پێشبینیا ھێرشا ژ لایێ داعش دھێتەکرن و پێشمەرگە یێ بەرھەڤە بۆ بەرسیڤدانێ.
بەھره‌م عریف یاسین، فەرماندێ ھێزێن پێشمەرگەی ل میحوەرێ باشیک بۆ ئەڤرۆ نیۆز گۆت: “ئەڤە بۆ دەمێ چەند رۆژانە چەکدارێن تیرۆرستێن داعش ل میحوەرێ باشیک دەست ب لڤینان کریە و ھاتنوچوونا داعش ل دەڤەرا یا ئاسایی نینە وەک بەرێ و ھێزەکا مەزن ژی ئینایە دەڤەرا باشیک”.
بەھره‌م گۆتژی: “مە گومان ل ئینانا ئەڤێ ھێزا تیرۆرستێن داعش بۆ دەڤەرا باشیک ھەیە و پێشبینی دکەین، د دەمێ رۆژێن داھاتی دا، داعش دەست ب ھێرشێن خوە بکەتەڤە بۆ سەر ھێزێن پێشمەرگەی و بۆ ڤێ مەرەمێ ھێزێن پێشمەرگە کەفتینە د حالەتێ ئامادە باشیێ دا و د بەرھەڤن بۆ بەرسیڤدانا ھەر ھێرشەکا داعش”.
ئەڤرۆ نيوز:
ئەمریکا و روسیا ل سەر دروستکرنا ھەرێمەکا پاراستی ل سووریێ ل ھەڤکرن و د ڤێ چارچۆێ دا ھێزێن ھەڤپەیمانان داخواز ژ YPG و بورکان فراتێ کرینە کو لەزێ بکەن د ئازادکرنا گرێسپی و جەربالوسێ دا و ئۆپەراسیۆنا ئازادکرنا ھەردو باژێرکان ب پشتەڤانیا فرۆکێن ھەڤپەیمانیا نێڤدەولەتی دەستپێکریە.
ئاڤرەش ئێزیدی رۆژنامەڤان و چالاکڤانێ سیاسی ل روسیا د داخۆیانیەکی دا بۆ رۆژناما ئەڤرۆ راگەھاند کو د کۆمبوونا ل مۆسکۆ دا شاندێ ئەمریکا ب سەرۆکاتیا جۆن کێری وەزیرێ دەرڤە و شاندێ روسیا ب سەرۆکاتیا سیرگێی لاڤرۆڤ وەزیرێ دەرڤە یێ روسیا ل سەر رەوشا سووریێ و بەلاڤبوونا داعشێ ل رۆژھەلاتا ناڤین گەنگەشە کرن و د کۆمبوونێ دا باشورێ کوردستانێ وەک ناڤەندەکا ئارام ھاتە بناڤ کرن و پشتەڤانی بۆ ئاڤاکرنا ھەرێمەکا خوەسەر ل رۆژئاڤایێ کوردستانێ ھاتە کرن.
ئاڤرەش دیار ژی کر کو د کۆمبوونێ دا ھەردو شاندێن ئەمریکا و روسیا ل سەر راگەھاندنا رۆژئاڤایێ کوردستانێ وەک ھەرێمەکا دژە فرینێ ل ھەڤکرن و بۆ ڤێ چەندێ ژی بریار دان پشتەڤانیا کوردان د شەرێ ل دژی داعشێ دا بکەن و ھەڤکاریا ھێزێن کوردان د ئازادکرنا گرێسپی (تل ئەبیەد) و جەرابلوسێ دا بھێتە کرن و گۆت: (پشتی کۆمبوونا شاندێن ئەمریکا و روسیا ھەڤدیتنەک ل گەل شاندێ کانتۆنا جزیرێ یا رۆژئاڤا ھاتە کرن و ژ وان ھاتە خواستن کو د ئازادکرنا گرێسپی و جەرابلوسێ دا لەزێ بکەن و د ڤێ چارچۆڤێ دا کانتۆنا جزیرێ فەرمان دایە YPG و بورکان فرات کو دەسا ب ئازادکرنا ڤان ھەردو باژێرکان بکەن و ئۆپەراسیۆنەکا گەلەک دژوار ژ ئالیێ سەرێکانیێ و کۆبانێ ڤە بۆ ئازادکرنا گرێ سپی و جەرابلوسێ ھاتە دەستپێکرن).
ل ئالیێ دی فەرماندارێ YPG مەحمود بەرخوەدان ژی راگەھاند کو ئۆپەراسیۆنا وان بۆ ئازادکرنا ھەموو دەڤەرێن ل ژێر کۆنترۆلا داعشێ دەستپێکرینە و گۆت: (ئۆپەراسیۆن ب پشتەڤانیا فرۆکێن ھەڤپەیمانان دەستپێکریە و دیسان ل رەخێ کۆبانێ ھەڤالێن بورکان فرات و ل جزیرێ ژی ھێزێن مە ئەڤ دو رۆژن دەست ب ئازادکرنا گرێسپی و جەرابلوسێ کرینە و ھەکە پێدڤی بھێتە دیتن دێ ھێزێن کانتۆنا عەفرینێ ژی د ئازادکرنا جەرابلوسێ دا جھێ خوە بگرن و ئەم دخوازین د دەمەکی کورت دا ھەم رۆژئاڤا بکەینە ژێر کۆنترۆلا خوە و ھەرسێ کانتۆنێن خوە ب ھەڤدو را گرێ بدەین).
ل سەر بریارا راگەھاندنا رۆژئاڤایێ کوردستانێ وەک ھەرێما دژە فرینێ ژی فەرماندارێ YPG راگەھاند کو ئاگاھیێن وی یێن تەمام د ڤی واری دا نینن و گۆت: (ئەم ھێزا پاراستنا رۆژئاڤایێ کوردستانێ نە و ئەرکێ مە پاراستنا دەستکەڤت و ئازادکرنا دەڤەرێ داگرکری یێن رۆژئاڤا کوردستانێیە).
ئەڤرۆ نیوز:
ئەندامەکێ پەرلەمانێ کوردستانێ راگەھاند، مە ھەر چار فڕاکسیۆنێن پەرلەمانی بڕیاردایە، خالەکا پێکئینانا لژنا بەرھەڤکرنا دستوورێ ھەرێمێ بھێتە راستڤەکرن و تێدا ھژمارا ئەندامێن لژنێ بھێنە زێدەکرن، بەرۆڤاژی پشکداریێ ناکەین و دێ بیتە دستوورەکێ حزبی، خوەیاکر، ددەمێ سێ ھەیڤان دا چو دستوور ناھێنە بەرھەڤکرن و پەسەندکرن.
باپیر کاکەمەلا، سکرتێرێ پارتی کرێکاران و رەنجدەرانی کوردستان و ئەندامێ پەرلەمانێ کوردستانێ بۆ رۆژناما ئەڤرۆ گۆت” ئەم چار فڕاکسیۆنێن پەرلەمانی کۆمبووینە و دووماھی بڕیارا خوە ل دۆر پشکداریا مە د لیژنا بەرھەڤکرنا پڕۆژێ دستوورێ ھەرێمێ دا ھاتیەدان، کو بەری نوکە نوونەرەک بۆ چار فڕاکسیۆنان ھاتبوو دیارکرن و مەژی ئەڤ چەند رەتکریە و د بەرھەڤ نینین پشکداریێ د ڤێ لیژنێ دا بکەین، تنێ ب مەرجەکی ھەر فڕاکسیۆنەکێ نوونەرەک ھەبیت د لیژنێ دا، مە دخوازکریە ئەڤ بڕگە بھێتە راستڤەکرن یا بەحسێ ھژمارا ئەندامێن لیژنا بەرھەڤکرنا دستووری دکەت کو ژ ٢١ کەسان پێک دھێت، باشە بۆچی ٢١ کەس بن و پتر نەبن؟ ھەکە پێشنیارامە ھاتە قەبوولکرن، دێ پششکداربین، ھەکە نە پشکدارنابین و وی دەمی دێ دستوورێ ھەرێمێ بیتە دستوورەکێ حزبی”.
ڤی پەرلەمانتاری گۆت ژی” حزبێن سیاسی د ھەوێن ھەلبژارتنان دا گەلەک سۆز داینە جەماوەرێ خوە و نوکە دخوازن پڕۆژێ دستووری بەرھەڤ بکەن، بەلێ ب دیتنا من دستوورەک ل سالا ٢٠٠٨ێ ھاتبیتە بەرھەڤکرن و ھەتا نوکە نەشیابن چو بۆ بکەن، ددەمێ ڤان سێ ھەیڤێن بۆ دیاریکرین دا نەشێن چو پێنگاڤێن وەسا پاڤێژن کو ئەم ببینە خوەدی دستوو”.
کاکەمەلا دیارکر، نوکە بۆچوونەک ھەیە دبێژیت نابیت بازاڕێ ھەرێمێ بازاڕەکێ ئازادبیت و قورغکاری تێدا بھێتەکرن، ھەروەسا من داخۆیانیەکا ئەندامەکێ ئێکگرتوویا ئیسلامی دیت دبێژیت، خەیالە ھەکە کەسەک بێژیت ئایینێ ئیسلامێ ژێدەرێ دستووری نابیت، دبەرامبەر دا خەلکەکێ علمانی دبێژن پێدڤیە دین و سیاسەت بھێنە جوداکرن، یا ژ ھەموویێ گرنگتر ئەوە، دستوورەک ب سازدانبیت ناھێتە بەرھەم، چونکی ھەکە کەسەک ژ وێ لیژنێ یێ رازی نەبیت ئەڤە سەرناگریت، ب دیتنا من گەلەک ب زەحمەتە بگەھنە ئەنجامەکی، دبیت ل سەر تشتێن گشتی ئێک بن، بەلێ گەلەک ناکۆکی ل سەر ھووردەکاریان یێن ھەین”.
نيشاندان